Yesuusi Lawishsha Haꞌrunsitine Diinaggaabbine Sabbakke

1. Yihowa manni alamete manninni baxxanno gede assannonsahu mittu akati hiikkonneeti?

YIHOWA soqqamaano suꞌmu Kiristaaninni baxxitanno gede assannonsahu mittu coyi diinaggaabbea sabbakkannore ikkansaati. (Tit. 2:14) Mito woyite kayinni, diinaggaambe sabbaka qarra ikkitankera dandiitanno. Atino diinaggaawe soqqamannohu mittu cimeessi coyiꞌrino hedora sumuu yaattoha ikkara dandaanno; isi, “Mito woyite sabbakate hasattoꞌya baꞌanno” yiino.

2. Mito woyite diinaggaawe soqqama qarra ikkitannonke gede assannori maa ikkara dandaanno?

² Sabbakate looso loosantenni wolu garita qullaawa soqqansho soqqama roore banxeemmoha ikkara dandaanno. Mayira? Magano magansiꞌnanni mine minneemmo woyitenna gatamarreemmo woyite, dano gawajjitinonsare kaaꞌlineemmo woyite woy ammanate roduuwanke jawaachinsheemmo woyite bayichonkonni dancha guma afiꞌneemmo daafira lowo geya hagiidhineemmo. Ammanate roduuwinke ledo keerunninna baxillunni loonseemmo woyite lowo geeshsha hagiidhineemmo; qoleno insa assinoommonsare naaddannota anfoommo. Kayinni mittu qoqqowira lowo diro sabbankoommoha ikkirono dancha guma afiꞌra hoongammora dandiineemmo. Woy xaandeemmo manni sabbankeemmo sokka macciishsha giwara dandaanno. Qoleno goofimarchu gambise dayi kiiro, mannu kulleemmo sokka roore giwannota anfoommo. (Mat. 10:22) Ikkina sabbaka agurreemmokki gede woy albinni roore diinaggaambe sabbankeemmo gede kaaꞌlannonkeri maati?

3. Luqaasi 13:6-9 kulloonni lawishshi Yesuusi diinaggaawe sabbakinota leellishannohu hiittoonniiti?

³ Yesuusi lawishsha xiinxalline diinaggaambe sabbankeemmo gara rosa dandiineemmo. Isi uullate aana soqqami yannara, woꞌmanka woyite diinaggaawe sabbakino. Yanna saꞌu kiiro isinni albinni roore diinaggaawe sabbakino. (Luqaasi 13:6-9 nabbawi.) Woyinete irshira loosanno manchi mitto guma nafa laaltinokkita balasete haqqicho sase diro woꞌma towaatinonte gede, Yesuusino Ayihudete mannira sasu diri geeshsha sabbakanni keeshshinoha ikkirono, insa giddo rooru manni sabbakino sokka macciishshe diadhino. Ikkirono, woyinete irshira loosanno manchi hexxo mudhe balasete haqqicho towaata agurinokkinte gede, Yesuusino hexxo mudhe mannaho sabbaka diagurino. Hatteentenni isi, insa halaale macciishshite adhitanno gede kaaꞌlate albinni roore dinaggaawe sabbakino.

4. Yesuusi lawishshinni ronseemmohu shoolu coyi hiikkonneeti?

⁴ Konni birxichira, Yesuusi roorenkanni jeefote soqqaminohu lewu agani giddo diinaggaawe sabbakannota leellishinohu hiittoonniitiro laꞌneemmo. Isi rosiisinorenna assinore xiinxallanke, woꞌmanka woyite diinaggaambe soqqammeemmo gede kaaꞌlitannonke. Hanni Yesuusi lawishsha ikkinonketa shoole doogga laꞌno: (1) Isi Yihowa fajjo illachishino, (2) Qullaawu Maxaafi masaalo illachishino, (3) Yihowa kaaꞌlannosita addaxxino hattono (4) mitu manni sabbakanno sokka macciishshannota hexxino.

ISI YIHOWA FAJJO ILLACHISHINO

5. Yesuusi Maganu fajjo illachishinota leellishinohu hiittoonniiti?

⁵ Yesuusi, “Maganu Gashshootiha dancha duduwo” diinaggaawe sabbakino; korkaatuno isi Maganu konne looso loosara hasiꞌrannota afino. (Luq. 4:43) Yesuusi heeshshosi giddo sabbakate looso balaxisiisino. Wole agurina soqqanshosi jeefora, “katamunni katama, hattono qachunni qacha saꞌꞌanni [rosiisino].” (Luq. 13:22) Qoleno wole rosaano ledosi sabbakate looso loossanno gede qajeelsino.—Luq. 10:1.

6. Sabbakate loosi wolu loosinke ledo afiꞌrino xaadooshshi maati? (Misileno lai.)

⁶ Xaa yannarano Yihowanna Yesuusi loonsammora hasidhannohu qaru loosi dancha duduwo duduwate. (Mat. 24:14; 28:19, 20) Sabbakate loosinna wolu tiokiraasete loosi xaadooshshe afiꞌrino. Lawishshaho Magano magansiꞌnanni mine mina woy Beetelete soqqama sabbakate loosira kaaꞌlitanno. Dano kalaqanteenna ammanate roduuwanke kaaꞌlineemmonsa woyite, insa galagalte ayyaanaamittete coye assitanno gede, lawishshaho sabbakate looso loossanno gedeno kaaꞌlinanni heeꞌnoommonsa. Sabbakate loosi lowo geeshsha hasiisannoha ikkinota huwantummoronna Yihowa loonsammora hasiꞌrannoha qara looso ikkinota qaangummoro albinni roore ganyine sabbakate kakkaꞌneemmo. Hangaari gobbara heeꞌrannohu Yaanooshi yinannihu songote cimeessi togo yiino: “Sabbakate looso riqiwannohu mittuno tiokiraasete loosi nookkita qaagate woꞌnaaleemmo; loonseemmohu qaru loosi konneeti.”

7. Yihowa woꞌmanka woyite sabbakate looso loonsammora hasiꞌrannohu mayiraati? (1 Ximootewoosi 2:3, 4)

⁷ Manna Yihowa laꞌꞌanno garinni laꞌneemmoha ikkiro, albinni roore diinaggaambe soqqammeemmo. Yihowa dandaami deerrinni batinyu manni dancha duduwo macciishshe adhara hasiꞌranno. (1 Ximootewoosi 2:3, 4 nabbawi.) Hakko daafira tenne heeshsho gatissanno sokka sabbankeemmo gara woyyeessiꞌneemmo gede qajeelsannonke. Lawishshaho Manna Baxxe—Rosaano Asse yitanno birosherera manna rosaano assate hende hasaawa hanafa dandiineemmo gede kaaꞌlitannonketi kaajja hedo no. Mannu xaa yannara sabbankeemmo sokka macciishshe adha giwiro nafa, quuxxote qarri jeefora albaanni macciishshe adhara dandaanno. Xaa yannara kulleemmonsare qaagge insa albillitte Yihowara soqqantara dandiitanno. Kayinni insa qaagannohu agurrummokki sabbankeemmoha ikkiro callaati.

ISI QULLAAWU MAXAAFI MASAALO ILLACHISHINO

8. Yesuusi Qullaawu Maxaafi masaalo afasi yannasi hayyotenni horoonsiꞌranno gede kaaꞌlitinosihu hiittoonniiti?

⁸ Yesuusi Qullaawu Maxaafi masaalo ma garinni woꞌmitannoro huwatino. Isi soqqamanni sase dironna darate calla keeshshannota afino. (Dan. 9:26, 27) Qoleno masaalote kulloonni garinni mamootenna ma garinni reyannoro afino. (Luq. 18:31-34) Yesuusi Qullaawu Maxaafi masaalo afino daafira yannasi hayyoteni horoonsiꞌrino. Hakko daafira uyinoonnisi looso umo fushshate diinaggaawe sabbakino.

9. Qullaawu Maxaafi masaalo diinaggaambe sabbankeemmo gede kakkayisannonkehu mayiraati?

⁹ Qullaawu Maxaafi masaalo huwatanke diinaggaambe sabbankeemmo gede kakkayisannonke. Tini alame baꞌara shiima yanna calla gattinota anfoommo. Yannankera ikkanni noorinna mannu akati Qullaawu Maxaafi goofimarchu barri daafira masaalino masaalo woꞌmitanni noota leellishanno. Alamennihu Wolqaataamu Gashshooti Angilo Ameeriku hattono Ruusiyunna miillasi mereero noo heewo, aliyyenna wodiidi moote daafira masaalloonni masaalo ‘goofimarchu yannara’ woꞌmitanno gede assitinohu hiittoonniitiro anfoommo. (Dan. 11:40) Qoleno Alamennihu Wolqaataamu Gashshooti Angilo Ameeriku Daanieeli 2:43-45 kulloonnita misilete lekka riqiwannota huwantoommo. Masaalo kultanno garinni muli yannara Maganu Gashshooti mannu gashshoote hunannota anfoommo. Tini baalanti masaalo goofimarchu gambisino yannara heeꞌnoommota leellishshanno; hattono wiinamme sabbankeemmo gede kakkayissannonke.

10. Qullaawu Maxaafi masaalo diinaggaambe sabbankeemmo gede kaaꞌlitannonketi wole doogga hiittenneeti?

¹⁰ Qullaawu Maxaafi masaalo Maganu Gashshooti sokka kulate quqquxammeemmo gedeno assitannonke. Doominiku Rippaabilikera soqqantannoti Keeri yinanni rodoo togo yitino: “Yihowa woyyitino yanna daggannota kule uyinonketi hagiirsiissanno hexxo halaale wolootaho kuleemma gede kakkayissinoe. Xaa yannara mannaho iillanni noore laeemma woyite, Yihowa tenne hexxo anera calla ikkikkinni insarano uyinota huwateemma.” Qullaawu Maxaafi masaalo sabbaka agurreemmokki gede kaaꞌlitannonke; korkaatuno konne looso massaganni noohu Yihowa ikkinota anfoommo. Hangaari gobbara heedhannoti Leela togo yitino: “Isayaasi 11:6-9 noo hedo macciishshe adhannoha lawannoki mannira nafa dancha duduwo kuleemma gede kakkayissinoe. Yihowa kaaꞌlisiro aye manchino soorramannota afoomma.” Zaambiyaho heeꞌrannohu Kiristooferi yinanni rodii togo yiino: “Maarqoosi 13:10 masaalloonni garinni danchu duduwi alame woꞌmate halaꞌlanni no; tini masaalo woꞌmitanno gede kaaꞌla anera lowo ayirrinyeeti.” Sabbaka agurattokki gede kakkayissinoheti Qullaawu Maxaafi masaalo hiitteeti?

ISI YIHOWA KAAꞌLANNOSITA ADDAXXINO

11. Yesuusi woꞌmanka woyite diinaggaawe sabbakanno gede Yihowa kaaꞌlannosita addaxxa hasiissinohu mayiraati? (Luqaasi 12:49, 53)

¹¹ Yesuusi woꞌmanka woyite diinaggaawe sabbakanno gede Yihowa kaaꞌlannosita addaxxitino. Yesuusi hayyicha ikkirono, danchu duduwi mitu manni lowo geya hanqannonna kullanni sokka tiyyiꞌre giwanno gede assannota afino. (Luqaasi 12:49, 53 nabbawi.) Ammaꞌnote massagaano Yesuusi sabbakannota gibbino daafira, duucha higge iso shaate woꞌnaaltino. (Yoh. 8:59; 10:31, 39) Yesuusi kayinni Yihowa ledosi noota afino daafira sabbaka diagurino. Isi togo yiino: “Anniꞌya ledoꞌya noo daafira ani callicho diꞌꞌikkoommo. Woꞌmanka woyite iso hagiirsiisannore asseemmo daafira callaꞌya diagurinoe.”—Yoh. 8:16, 29.

12. Yesuusi rosaanosi mannu giwinsarono sabbaka agurtannokki gede qajeelsinonsahu hiittoonniiti?

¹² Yesuusi rosaanosi Yihowa kaaꞌlannonsata addaxxitanno gede qaagiissinonsa. Isi mannu giwinsarono Yihowa kaaꞌlannonsata duucha hige kulinonsa. (Mat. 10:18-20; Luq. 12:11, 12) Ikkirono qorophitanno gede amaalinonsa. (Mat. 10:16; Luq. 10:3) Isi rosaanosi mannu sabbakkanno sokka macciishsha giwiro giddeessitannokki gedeno hajajinonsa. (Luq. 10:10, 11) Qoleno mannu waadinsaro xooqqanno gede kulinonsa. (Mat. 10:23) Yesuusi diinaggaawe sabbakinohanna Yihowa addaxxinoha ikkirono, hasiisikkinni heeshshosi qarru giddo tugannore diassino.—Yoh. 11:53, 54.

13. Yihowa kaaꞌlannoheta addaxxa dandaattohu mayiraati?

¹³ Xaa yannara mannu giwannonke woyite, woꞌmanka woyite diinaggaambe sabbakate Yihowa kaaꞌlo hasiissannonke. (Aju. 12:17) Yihowa kaaꞌlannoheta addaxxa dandaattohu mayiraati? Hanni Yohaannisi fooliishsho 17 noota Yesuusi huucciꞌrino huuccatto laꞌno. Yesuusi soqqamaasinesi agaranno gede Yihowa huucciꞌrino; Yihowano tenne huuccattora dawaro qolino. Soqqamaasinete maxaafi, mannu waadinsarono soqqamaasine diinaggaabbe sabbakkanno gede Yihowa kaaꞌlinonsa gara kulanno. Qoleno Yesuusi, soqqamaasine kultanno sokka ammane adhanno mannano Yihowa agarannonsa gede huuccino. Hakko manni giddo mittu ateeti. Yihowa xaano Yesuusi huuccattora dawaro qola diagurino; isi soqqamaasine kaaꞌlinte gede ateno kaaꞌlannohe.—Yoh. 17:11, 15, 20.

14. Woꞌmanka woyite diinaggaambe sabbaka dandiineemmota addaxxineemmohu mayiraati? (Misileno lai.)

¹⁴ Goofimarchu gambise dayi kiiro dancha duduwo diinaggaambe duduwa qarra ikkitannonkeha ikkiro nafa hasiissannonke kaaꞌlo afiꞌra dandiineemmo. (Luq. 21:12-15) Yesuusinna rosaanosi gede mannu sabbankeemmo sokka macciishshe adhanno gede digideessineemmo; hattono diheewisammeemmo. Loosonke hoolloonni gobbara heedhannori ammanate roduuwinke nafa uminsa wolqa ikkikkinni Yihowa addaxxitanno daafira dancha duduwo agurtukkinni duduwa dandiitino. Yihowa umi xibbi diro soqqamaanosira wolqa uyinte gede xaa yannarano isi hasiꞌranno garinni ‘sabbakate looso woꞌmunni woꞌma gumulleemmo gede’ wolqa aannonke. (2 Xim. 4:17) Yihowa addaxxittoro, woꞌmanka woyite diinaggaabbe sabbaka dandaattota huluullantooti.

ISI DANCHA DANCHARE HEDINO

15. Yesuusira soqqanshote dancha lao noosita leellishannori maati?

¹⁵ Yesuusira sabbakate loosi daafira dancha lao noosi. Tini isi diinaggaawe soqqamanno gede kaaꞌlitinosi. Lawishshaho 30 M.D. mereerimira Yesuusi batinyu manni dancha duduwo macciishshe adhate qixxaawinota huwatino; qoleno isi konne manna midote iillino gidi ledo heewisiisino. (Yoh. 4:35) Mittu diri gedensaanni isi rosaanosira, “Gidu lowoho” yiino. (Mat. 9:37, 38) Gedensoonni isi galagale tenne luphi asse kulanni, “Gidu lowoho; . . . Konnira loosu Anni middannore soyanno gede huuccidhe” yiino. (Luq. 10:2) Yesuusi mannu dancha duduwo macciishshe adhanno yee hexxa diagurino; qoleno insa macciishshite adhituta hagiidhino.—Luq. 10:21.

16. Yesuusi kulino lawishshi soqqanshote dancha lao heedhannonke gede kaaꞌlannonkehu hiittoonniiti? (Luqaasi 13:18-21) (Misileno lai.)

¹⁶ Yesuusi rosaanosira sabbakkanno sokkara woꞌmanka woyite dancha lao heedhannonsa gede rosiisinonsa; tini diinaggaabbe sabbaka agurtannokki gede kaaꞌlitannonsa. Hanni isi kulino lawishshi giddo lame laꞌno. (Luqaasi 13:18-21 nabbawi.) Yesuusi Maganu Gashshooti sokka dhagge ikkanno garinni halaꞌlitannotanna lopho uurritannokkita kulate lenteetu guma lawishsha asse horoonsiꞌrino. Qoleno Maganu Gashshooti sokka lowo geeshsha halaꞌlitannotanna tini sokka bayichonkonni leella hoogirono sunu sununni dancha guma abbitannota kulate irsho lawishsha asse horoonsiꞌrino. Konni garinni Yesuusi rosaanosi sabbakkanno sokka dancha guma abbitannota huwattanno gede kaaꞌlinonsa.

17. Soqqanshote dancha lao heedhanno gede assiꞌrate kakkayisannonkeri maati?

¹⁷ Xaa yannara alamete doyichora loonsanni heeꞌnoonni looso laꞌꞌanke woꞌmanka woyite diinaggaambe sabbankeemmo gede kakkayissannonke. Diru kiiro lowo miliyoone ikkannohu hasatto noonsa manni Qaagooshshu Ayyaana daanno; hattono ninke ledo Qullaawa Maxaafa xiinxallanno. Qoleno batinyu manni cuuame ninke ledo sabbakate looso loosanni no. Sabbankeemmo sokka mageeshshi manni macciishshe adhannoro dianfoommo; kayinni Yihowa quuxxote qarra gate saꞌꞌannoha lowo manna gamba assanni noota anfoommo. (Aju. 7:9, 14) Midote Anni Yihowa batinyu manni dancha duduwo macciishshe adhanno yee hexxa diaguranno; konnira sabbaka agurreemmokki gede assannonkehu ikkadu korkaati no.

18. Wolootu ninke laꞌe maa huwattara hasiꞌneemmo?

¹⁸ Yesuusi rosaano woꞌmanka woyite bande anfannihu diinaggaabbe sabbakanno daafiraati. Mannu soqqamaasine bashshi assitukkinni sabbakkanna laiti, insa ‘Yesuusi ledo keeshshitinota huwatino.’ (Soq. 4:13) Ninkeno mannu soqqamanna laꞌꞌanno woyite Yesuusi lawishsha haꞌrunsine diinaggaambe sabbankeemmota huwatara dandaanno.