‘Maganunniwa Gamba Yaa Woyyitannonke’!

1-2. (a) Mittu manchi ledo muli jaalooma kalaqiꞌrate maa assa hasiissannonke? (b) Konni birxichira maa ronseemmo?

MULI jaali noohe? Isi ledo jaalooma kalaqiꞌrate maa maa assootto? Isi ledo yanna sayisoottoha, iillannosi qarra hattono isi baxannorinna giwannori maatiro afoottoha ikkara dandaanno. Isira ati baxattoti kaajja akatta noosita huwatootto. Hakkiinni jaalakki baxitto.

² Mittu manchi ledo muli jaalooma kalaqiꞌrate yannanna sharro hasiissanno. Maganu Yihowa ledono muli jaalooma kalaqiꞌrate yannanna sharro hasiissanno. Konni birxichira Maganinkewa albinni roore gamba yaa dandiineemmo garanna hatto assinummoro afiꞌneemmo atooti maatiro ronseemmo. Hanni balanxe, baalanka rooranno Jaalinkewa Yihowawa gamba yaa woyyitannonke yineemmohu mayiraatiro laꞌno.

3. Yihowawa gamba yinummoro afiꞌneemmo atoote hiinca hasiissannonkehu mayiraati? Lawishsha kuli.

³ Yihowawa gamba yaa woyyitanno yiniro sumuu yaattoti dihuluullissannote. Kayinni Yihowawa gamba yaa mageeshshi geeshsha kaaꞌlitannoro hiincanke, woꞌmanka woyite isiwa gamba yineemmo gede kakkayissannonke. (Far. 63:6-8) Lawishshaho, fayyimmate kaaꞌlitanno sagale ita, ispoorte loosa, dancha gede fooliishshiꞌranna lowo waa aga kaaꞌlitannonketa anfoommo. Ikkirono batinyu manni kuri coyibba hasiissanno yee hedannokki daafira fayyimmansa ditowaaxxanno. Kayinni kuri coyibba mageeshshi geeshsha kaaꞌlitannoro albinni roore hendummoro, kuri coyibba assa diagurreemmo. Hatteente gede Yihowawa gamba yaa woyyitannonketa anfoommo; kayinni hatto assinummoro afiꞌneemmo horo hiincanke Jaalinkewa YIhowawa albinni roore shinqeemmo gede kakkayissannonke.—Far. 119:27-30.

4. Faarso 73:28 borreessaanchi mayino?

⁴ Faarso 73:28 nabbawi. Faarso 73 borreessaanchi Yihowahu qullaawu mini giddo muuziiqa ganara shoommoonni Leewaawichaati. Isi boode yanna geeshsha Yihowara ammaname soqqaminoha ikkara dandaanno. Ikkirono “Maganunniwa gamba yaa” woyyitannosita afino; wolootuno, tini woyyitannonsata qaaggara hasiꞌrino. Yihowawa gamba yiniro afiꞌnanniti mite horo maati?

“MAGANUNNIWA GAMBA YAA” HAGIIDHINANNI GEDE ASSITANNO

5. (a) Yihowawa roore gamba yaa hagiidhineemmo gede assitannonkehu mayiraati? (b) Lawishsha 2:6-16 kultanno garinni, Yihowa hayyo kaaꞌlitannonkehunna agartannonkehu hiittoonniitiro leellishanno lawishsha kuli.

⁵ Yihowawa gamba yinummo kiiro roore hagiirraamma ikkineemmo. (Far. 65:4) Hatto yineemmo gede assannonkehu batinyu korkaati no. Lawishshaho, Qaalisi Qullaawu Maxaafi giddo noota kaaꞌlitanno amaale loosu aana hosiinsummoro horo afiꞌneemmo. Maganu Qaali giddo noo hayyo gawajjannonke coyinni agartannonke; hattono jawa soꞌro loonseemmokki gede kaaꞌlitannonke. (Lawishsha 2:6-16 nabbawi.) Qullaawu Maxaafi, “Egenno afiꞌrannohunna buuxa lexxannohu baꞌraaꞌrinoho” yaannohu iseraati.—Law. 3:13.

6. Faarsaanchoho hagiirrisi bainohu mayiraati?

⁶ Hige Yihowa jaalla nafa dadillitino woyiti no. Faarso 73 borreessaanchi gara ikkinokkire heda hanafita hagiirrisi baino. Isi, Maganohonna biddishshisira hajajamannokkihu bushu manni dancha heeshsho heeꞌranni no yee hedino daafira, caaccaawino hattono hinaasino. Isi finqilunna booꞌnanno manni dureeyyete, didhiwamanno hattono qarru nafa diamadannonsa yee hedino. (Far. 73:3-7, 12) Faarsaanchu lowo geeshsha caaccaawino daafira, Yihowara soqqamate assannori waaga afiꞌrinokkihu gede asse hedino. Isi lowo geeshsha dadillino daafira, “Anino wodanaꞌya beebba qarrisoommo; beebballa cubbo qorophoommo” yiino.—Far. 73:13.

7. Dadillineemmo woyite maa assa dandiineemmo? (Misileno lai.)

⁷ Faarsaanchu dadillu hexxo mudhanno gede assasira diwodhino. Isi qaafo adhino. Isi ‘Qullaawu minira eino;’ hakkiicho Yihowa hedosi biddi assiꞌranno gede kaaꞌlinosi. (Far. 73:17-19) Dadillineemmo woyite Jaalinke Yihowa afanno. Isi biddishsha aannonke gede huucciꞌnummoro hattono Qaalisinna songote widoonni aannonke kaaꞌlo maahoyye yine adhinummoro, dadille qeelle saꞌneemmo gede kaaꞌlitannonke jawaante afiꞌneemmo. Yaaddo amaddannonke woyite nafa Yihowa jawaachishannonke hattono sheshifachishannonke.—Far. 94:19.a

“MAGANUNNIWA GAMBA YAA” HAGIIRRU NOO HEESHSHO HEEꞌNEEMMO GEDENNA HEXXO HEEDHANNONKE GEDE KAAꞌLITANNONKE

8. Maganunniwa gamba yinummoro afiꞌneemmoti wole horo hiitteeti?

⁸ Maganunniwa gamba yinummoro wole lame horo afiꞌneemmo. Umihunni, hagiirru noo heeshsho heeꞌneemmo. Layinkihunni, albillitte kaajjado hexxo heedhannonke. (Erm. 29:11) Hanni tenne lamenta horo seekkine xiinxallino.

9. Yihowawa gamba yaa hagiirraamma ikkineemmo gede assitannonkehu hiittoonniiti?

⁹ Yihowawa gamba yaa hagiirraamma ikkineemmo gede assitannonke. Xaa yannara Maganu noota ammanannokkihu batinyu manni heeshsho waaga afidhinokkihunna gedensoonni mannu sirchi baꞌꞌannohu gede asse hedanno. Ikkirono ninke Qullaawa Maxaafa xiinxalline “Maganu nootanna iso hasiꞌranno mannira baꞌraaꞌra aannota” anfoommo. (Ibi. 11:6) Xaa yannara nafa, Yihowa hede kalaqinonke garinni heeꞌnummoro yaano isira soqqammeemmoha ikkiro, hagiirraamma ikkineemmo.—Mar. 10:12, 13.

10. Faarso 37:29 kultanno garinni Yihowa hexxitannori albillitte maa afidhanno?

¹⁰ Batinyu mannira xaa heeshsho agurranna wole hexxo dinonsa; insa looso loosa, ooso ile lossiꞌra hattono geedhitanno woyitira woxe codha calla illachishshanno. Insa Maganu albillitte assara hedinore diaffino. Yihowa soqqamaano kayinni iso hexxitanno. (Far. 25:3-5; 1 Xim. 6:17) Ninke Maganonkenna Jaalanke hexxineemmo; qoleno isi albillitte assara hedinore anfoommo. Albillitte afiꞌneemmo coyi giddo mittu Gannate ikkitino uullara hegerera iso magansiꞌrate.—Faarso 37:29 nabbawi.

11. Maganunniwa gamba yaa kaaꞌlitannonkehu hiittoonniiti? Tini Yihowara mayi macciishshamannosi gede assitanno?

¹¹ Maganunniwa gamba yaa duucha doogganni kaaꞌlitannonke. Lawishshaho, Yihowa cubbinsara maaro eꞌe isiwa gamba yitannorira cubbonsa gatona yaannota kule qaale eino. (Isa. 1:18) Hakko daafira alba loonsoommo soꞌrora ninkeneeto bushiisha dihasiissannonke. (Far. 32:1-5) Qoleno Yihowa hagiirsiinse hagiidha dandiineemmo. (Law. 23:15) Maganu jaalla ikkine afiꞌnanniha wole atooteno heda dandaatto. Ikkina woꞌmanka woyite Maganunniwa gamba yine heeꞌra dandiineemmohu hiittoonniiti?

WOꞌMANKA WOYITE “MAGANUNNIWA GAMBA” YINE HEEꞌRA DANDIINANNI GARA

12. Maganunniwa gamba yaate maa assootto?

¹² Cuuamootto Kiristaancho ikkittoro Yihowawa gamba yaate lowore assootto yaate. Maganu Yihowanna Kiristoosi Yesuusi daafira lowo halaale rosootto, alba loosootto cubbira maaro eootto, Maganoho kaajjado ammana nooheta leellishootto hattono isi fajjo ledo sumuu yaannore assate sharramootto. Ikkirono Maganunniwa roore gamba yaate kuri coyibba agurrummokkinni assa hasiissannonke.—Qol. 2:6.

13. Woꞌmanka woyite Yihowawa gamba yine heeꞌneemmo gede kaaꞌlannonkehu sasu coyi maati?

¹³ Yihowawa gamba yine heeꞌneemmo gede kaaꞌlannonkeri maati? (1) Qullaawa Maxaafa woꞌmanka woyite nabbawanna xiinxalla hasiissannonke. Togo assineemmo woyite Maganu daafira xinta ikkino roso rosatenni sainore assa hasiissannonke. Maganu ninkera hedinori maatiro wodanchatenna Qaalisi giddo kulinohu xintu seeri garinni heeꞌrate sharrama hasiissannonke. (Efe. 5:15-17) (2) Isi ninke baxannonketa leellishshannota batinye taje hiincine ammananke kaajjishiꞌra hasiissannonke. (3) Yihowa dadillisanno coye giwanna togoo coye assanno manniwiinni xeertiꞌra hasiissannonke.—Far. 1:1; 101:3.

14. Umi Qorontoosi 10:31 kultanno garinni Yihowa hagiirsiisate barru baala assa dandiineemmohu mitu coyi maati? (Misillano lai.)

¹⁴ Umi Qorontoosi 10:31 nabbawi. Woꞌmanka woyite Yihowa hagiirsiisannore assa lowo geeshsha hasiissannote. Tenne assate soqqansho fulanna songote gambooshshe haꞌra calla diguddanno. Barru baala assineemmori Yihowa hagiirsiisannore ikka hasiissannosi. Lawishshaho, baalunku coyinni ammanammoommore ikkinummoronna noonkere wolootaho beenkummoro Yihowa hagiirsiinseemmo. (2 Qor. 8:21; 9:7) Qoleno isi elto asse uyinonke heeshshora galatu noonketa leellinshammora hasiꞌranno. Quwa saꞌnummokkinni intenna ange hattono wole doogganni fayyimmanke towaaxxine heeshsho uyinonke Maganiwa gamba yaa dandiineemmo. Yihowa hagiirsiisate yine assineemmori baalu wole agurina shiima lawanno coyi nafa isi ninke lowo geeshsha baxannonke gede assanno.—Luq. 16:10.

15. Yihowa woloota ma garinni laꞌnammora hasiꞌranno?

¹⁵ Yihowa keeraanoteno keeraano ikkitinokkirirano shaqqadoho. (Mat. 5:45) Ninkeno wolootaho shaqqadda ikkinammora hasiꞌranno. Lawishshaho, isi ‘mittu manchi daafirano bushare coyiꞌneemmokki gede, giwammeemmokki gede, hattono manna baalaho woꞌmunni woꞌma jooguulle ikkinammora’ hasiꞌranno. (Tit. 3:2) Hakko daafira wolootu ammanatenni fiixxannonkekki daafira calla insa woffi diassineemmo. (2 Xim. 2:23-25) Woꞌmanka woyite shaqqadda ikkinenna wolootaho hendeemmota leellinshe albinni roore Yihowawa gamba yaa dandiineemmo.

GUFIꞌNEEMMO WOYITE NAFA “MAGANUNNIWA GAMBA YAA” DANDIINEEMMO

16. Faarso 73 borreessaanchi mite yanna gedensaanni mayyee heda hanafino?

¹⁶ Mite yanna gedensaanni, ‘Ani Yihowa baxannoe gedeeha diꞌꞌikkoommo’ yite hedalla hanafitto? Faarso 73 borreessaanchino hatto yee hedino. Isi, “Gufiꞌre hoogoommo; uwammora shiimurilla gatinoe” yiino. (Far. 73:2) Isi ‘aaraawino’ hattono Yihowa albaanni ‘afinori nookkiha saadate gedeeha’ ikkinota coyiꞌrino. (Far. 73:21, 22) Isi loosino soꞌronni kainohunni Yihowa gatona diyaannoe woy dibaxannoe yee hedinoni?

17. (a) Faarsaanchu hexxo mudhi woyite nafa maa assino? (b) Isi woꞌnaalshinni maa ronseemmo? (Misillano lai.)

¹⁷ Faarsaanchu Yihowa agurinosihu gede asse hedinoha ikkirono, togoori macciishshaminosihu shiima yanna geeshsha callaati. Isi hexxo mudhinoha ikkirono faarsote maxaafira borreessinonte gede, Maganunniwa gamba yaa woyyitannosita wodanchino. Isi togo yiino: “Ikkirono woꞌmanka woyite ani ate ledo noommo; atino qiniiticho angaꞌya amadoottoe. Amaalekkinni massagoottoe; gedensaannino ayirrinyunni atewa gamba assittoe.” (Far. 73:23, 24) Ninkeno daafurreemmo woy hexxo mudhineemmo woyite jawaante afiꞌrate alba Yihowawa higa hasiissannonke. (Far. 73:26; 94:18) Yannate geeshsha gufiꞌnummoro nafa, Yihowa ‘cubbo agurannoha’ ikkinota buuxisinonke daafira isiwa higa dandiineemmo. (Far. 86:5) Roorenkanni hexxo mudhineemmo woyite Maganinkewa gamba yaa hasiissannonke.—Far. 103:13, 14.

HEGERERA “MAGANUNNIWA GAMBA” YINE HEEꞌRA

18. Hegerera Yihowawa gamba yine heeꞌra dandiineemmo yineemmohu mayiraati?

¹⁸ Hegerera Yihowawa gamba yine heeꞌra dandiineemmo; hattono isi daafira horo rosa diagurreemmo. Qullaawu Maxaafi, Yihowa doogo, ‘hayyonna egennosi anfe gundannikkita’ ikkitinota kulanno.—Rom. 11:33.

19. Faarsote maxaafi maa buuxisannonke?

¹⁹ Faarso 79:13 togo yitanno: “Ninke mannikki, qanchikki geꞌreewi kayinni, hegere geeshsha galanteemmohe; galatakkino beettu beettira kulleemmo.” Atino woꞌmanka woyite Maganunniwa gamba yite heeꞌrattoha ikkiro, hegere atoote afiꞌrattota addaxxa dandaatto; hattono woꞌma giddonni, “Maganiꞌya . . . wodaniꞌyara jawaantete; hegere geeshsha kaayyoꞌyaati” yaa dandaatto.—Far. 73:26.