Nooherinni Kassi Yaate ‘Fojo Rosootto?’

1. Noonkerinni kassi yaate yaa mayyaate? Mayyaa diꞌꞌikkitino?

ATI nooherinni kassi yaatto? Noosirinni kassi yaanno manchi xa noosire illachishanno daafira hagiirrenna keere afiꞌranno. Noosikki coye hedanni dicaaccaawanno. Ikkirono noonkerinni kassi yaate yaa baalanka coye lashshi assineemmo yaa diꞌꞌikkitino. Lawishshaho, mittu Kiristaanchi soqqanshosi halashshiꞌranno faro hasiꞌrasi danchate. (Rom. 12:1; 1 Xi. 3:1) Ikkirono soqqanshote qoosso isi hedino yannara afiꞌra hoogiro hagiirrisi dibaꞌꞌanno.

2. Kassi yaa hooga lowo geeshsha gawajjitanno yineemmohu mayiraati?

² Kassi yaa hooga buutote qarra abbitara dandiitanno. Noonsa coyinni horo kassi yaannokki manni hakkeeshsha hasiisannonsakkiha maalaamittete coye afiꞌrate lowo saate loosanno. Mitu Kiristaani halchino daafira woxe woy wole coye nafa moorino; tini dadillissannote. Insa togo yite heddara dandiitanno: ‘Kuni coyi hasiisannoeho; konne coye afiꞌrate agadhe keeshshoommo; woy konne woxe gedensoonni qoleemmo.’ Ikkollana aye coyeno moora Yihowa dadillissanno hattono suꞌmisi mishamanno gede assitanno. (Law. 30:9) Wolootu hasidhino qoosso afidhinokki daafira hexxo mudhite Yihowara soqqama agurtino. (Gal. 6:9) Heeshshosi Yihowara sayise uyino Kiristaanchi tenne heda nafa hiitto hedanno? Togoo qarri kalaqaminohu mittu manchi noosirinni kassi yaa hoogino daafira ikkara dandaanno.

3. Filiphisiyusi 4:11, 12 hiikkonne jawaachishanno roso ronseemmo?

³ Ninke baalunku noonkerinni kassi yaa rosa dandiineemmo. Soqqamaasinchu Phaawuloosi ‘noo gari ikkihano ikkiro noosirinni kassi yee heeꞌra rosinota’ borreessino. (Filiphisiyusi 4:11, 12 nabbawi.) Isi tenne hedo borreessinohu usuru mine heeꞌreeti. Ikkirono hagiirrisi dibaino. Isi noosirinni kassi yee heeꞌrate ‘fojo rosino.’ Noonkerinni kassi yine heeꞌra qarra ikkitinonkeha ikkiro Phaawuloosi coyiꞌrinorinna woꞌnaalshisi noonkerinni kassi yaa rosa dandiineemmota buuxisanno. Noonkerinni kassi yine heeꞌra kalaqamunni afiꞌnannire diꞌꞌikkitino. Hatteentenni tenne rosa hasiissannonke. Hiittoonni? Hanni noonkerinni kassi yaate fojo ronseemmo gede kaaꞌlitannonke akatta laꞌno.

GALATTINANNIRE IKKE

4. Galanteemmore ikka noonkerinni kassi yineemmo gede kaaꞌlitannonkehu hiittoonniiti? (1 Teselonqe 5:18)

⁴ Galanteemmore ikka noonkerinni kassi yaate kaaꞌlitannonke. (1 Teselonqe 5:18 nabbawi.) Lawishshaho, heeshshote hasiisannonkehu afiꞌnoommo coyira galanteemmore ikkinummoro, afiꞌra hasiꞌneemmohu noonkekki coyira quwa saꞌne diyaandeemmo. Xa noonketa soqqanshote qoosso naandeemmoha ikkiro, wole qoosso lende afiꞌrate wojji yaantenni xa uyinoonninke looso loosate dandiinummore baala assineemmo. Qullaawa Borro huuccatto assiꞌneemmo woyite assinonke coyira Yihowa galata hasiissannonketa kultannohu iseraati! Galanteemmore ikkinummoro ‘wodancha baala roorannoha Maganu keere’ afiꞌneemmo.—Fil. 4:6, 7.

5. Israeele Yihowa galattanno gede assannonsa coyi maati? (Misileno lai.)

⁵ Hanni Israeelete xagge laꞌno. Insa alba Gibitsete noo waro ittanno sagale halallaho afidhinokki daafira, Yihowara duucha higge gunguntino. (Kir. 11:4-6) Hige halallaho heeshsho shota ikkitinonsakkiti egennantinote. Insa noonsarinni kassi yitanno gede kaaꞌlannonsari maati? Yihowa hakkuyira albaanni assinonsare hiincanna galata hasiissannonsa. Insa Gibitsete borojjimmate heedheenna beebba assiꞌrannonsa mannira Yihowa tonne qoomama dirrisino. Insa borojjimmatenni fultuhu gedensaanni ‘Gibitsootuwiinni birra, culkanna imaana gudhite hadhino.’ (Ful. 12:35, 36) Gibitsootu Israeele shorritanni duumu baariwa iillituta Yihowa maalaletenni baara lamewa badino. Insa halallaho hadhu yannara Yihowa ittanno menna barru baala uyinonsa. Ikkina Israeelete qarri maatiyya? Israeele noonsa coyinni kassi yitinokkihu ittanno sagale hooggino daafira ikkikkinni noonsa coyira galattinokki daafiraati.

6. Galanteemmore ikkineemmo gede kaaꞌlitannonketi mite doogga hiittenneeti?

⁶ Galanteemmore ikka dandiineemmohu hiittoonniitiyya? Umihunni, afiꞌroottoha dancha coye hedate barru baala yanna gaaꞌmi. Galatatto gede assannoheha lame woy sase coye borreessiꞌra nafa dandaatto. (Erq. 3:22, 23) Layinkihunni, galatu nooheta leellishi. Umikkinni kaꞌe assitinoherira woloota galati. Baalunkunni roore woꞌmanka woyite Yihowa galati. (Fa. 75:1) Sayikkihunni, galattanno jaalla doodhi. Galatanno mancho jaala assiꞌneemmoha ikkiro galanteemmore ikkineemmo; galatannokkiha jaala assiꞌneemmoha ikkiro kayinni galanteemmokkire ikkineemmo. (Mar. 1:26-28; 2 Xi. 3:1, 2, 5) Woꞌmanka woyite galanteemmore ikkinummoro noonkekki coye hendanni dicaaccaambeemmo.

7. Achi galattannota ikkitinohu hiittoonniiti? Tini mayi guma abbituyya?

⁷ Hanni Indooneezhiyaho heedhannote Achi yinanni rodoora mayi tuncu yiinosero laꞌno. Ise togo yitino: “Koroonu fayya ubbu yannara aneneeto wolootu ammanate roduuwiꞌya ledo heewisiisa hanafoomma. Hakko daafira nooerinni kassi yeemmakkita ikkoomma.” (Gal. 6:4) Achi hedose biddi assidhanno gede kaaꞌlinoseri maati? Ise ledde togo yitino: “Barru baala afiꞌreemma atoote hedanna Yihowa dirijjite wido ikkaꞌyanni afiꞌroommaha batinye dancha coye hiinca hanafumma. Hakkiinni Yihowa galaxxumma. Tini nooe coyinni addinta kassi yeemma gede assitinoe.” Gara ikkinokkire heddanni yaaddanni noottoha ikkiro, galagalte galatattoha ikkate tini rodoo assitinore assa dandaatto?

YIHOWA FAJJO ILLACHISHI HATTONO UMOKKI HEESHSHI ASSATTOHA IKKI

8. Baarookira woshshaado ikkinosiri maati?

⁸ Masaalaanchu Ermiyaasi borreessaanchi Baarooki mite yanna geeshsha woshshaadote giddo uwino. Ermiyaasi galata afiꞌrinokkihu Israeelete mannira kaajjado sokka kuli yannara Baarookira iso kaaꞌlanno gede shota ikkinokki looso uyinoonnisi. Mitte yannara Baarooki illachisha hasiissannosire illachishikkinni gatino. Baarooki Yihowa hasiꞌrannore illachishantenni, quwa sae umisi assa hasiꞌranno coye illachishino. Yihowa isira Ermiyaasi widoonni togo yiinosi: “Woluwiinni bade atera addire assammohera hasiꞌrootto? Konne coye agadhitooti.” (Erm. 45:3-5) Wole yaattonni Yihowa “Xa noohe coyinni kassi yite heeꞌri” yaanni noosihu gedeeti. Baarooki uyinoonnisi seejjo adhino hattono Yihowa hagiirsiisannore assa diagurino.

9. Umi Qorontoosi 4:6, 7 umo heeshshi assate daafira maa qaangeemmo gede assitannonke? (Misillano lai.)

⁹ Mito woyite mittu Kiristaanchi mitte qoosso afiꞌra hasiissannosihu gede asse hedara dandaanno. Isira dandoo noosiha, diinaggaawe loosannohanna woꞌnaalshu noosiha woy kuri sasunku coyi noosiha ikkara dandaanno. Ikkirono, wolootu isi afiꞌra hasiꞌranno qoosso afidhinoha ikkara dandaanno. Isi togoo woyite maa hiinca dandaanno? Soqqamaasinchu Phaawuloosi 1 Qorontoosi 4:6, 7 borreessinore hiinca dandaanno. (Qummeeshsha nabbawi.) Afiꞌnoommo qoossonna noonke dandoo baala uyinonkehu Yihowaati. Ninke tini elto hasiissanno manna diꞌꞌikkinoommo. Kuni coyi baalu Yihowa eltonnilla afiꞌnoommoho.—Rom. 12:3, 6; Efe. 2:8, 9.

10. Umonke heeshshi assineemmore ikka dandiineemmohu hiittoonniiti?

¹⁰ Yesuusi lawishsha seekkine hiincine umonke heeshshi assineemmore ikka dandiineemmo. ‘Yesuusi, Annu baalanka coye angasira uyinosita, Maganuwiinni dayinotanna Maganunniwa haꞌrannota afinoha ikkirono rosaanosi lekka hayishshino.’ (Yoh. 13:3-5) Yesuusi, rosaanosi isi lekka hayishsha hasiissannonsahu gede asse hedara dandaanno. Kayinni isi uullate aana heeꞌrino yannara durooꞌmenna qawaaxxiꞌre heeꞌra hasiissannosihu gede asse horonta hede diegennino. (Luq. 9:58) Yesuusi umosi heeshshi assino hattono noosirinni kassi yiino. Isi ninkera guuta lawishsha ikkinonke.—Yoh. 13:15.

11. Umo heeshshi assa Deenisi noosi coyinni kassi yaanno gede kaaꞌlitinosihu hiittoonniiti?

¹¹ Neezerilaandete heeꞌrannohu Deenisi yinanni rodii Yesuusi lawishsha haꞌrunse umosi heeshshi assate woꞌnaalino; kayinni tini shota diꞌꞌikkitinosi. Isi togo yiino: “Wolootu soqqanshote qoosso afidhanno woyite mito woyite naaxxeemmotanna nooerinni kassi yeemmokkita wodanchoommo. Togoo coyi tuncu yaannoe woyite umo heeshshi assate daafira kulanno birxicho xiinxalleemmo. JW Layibirere aana taage kalaqiꞌre umo heeshshi assate daafira kultanno qummeeshshuwa wodheemmo; tini rahe faꞌne galagale nabbawa dandeemmo gede kaaꞌlitannoe. Qoleno silkeꞌyara umo heeshshi assate daafira kultannota mite lallawo dirrisiꞌre wodhoommo; hattono duucha woyite macciishsheemmo.a Baalankare loonseemmohu uminke ayirrinyira ikkikkinni Yihowa ayirrinyira ikkinota rosoommo. Yihowa hedinore wonshate mittu mittunku shiimare assine kaaꞌlineemmo gede fajjinonke.” Nooherinni kassi yaa qarra ikkitinoheha ikkiro umokki heeshshi assate kaaꞌlannohere assi. Tini, Yihowa ledo noohe jaaloomi kaajjanno gedenna nooherinni kassi yite heeꞌratto gede kaaꞌlitannohe.—Yaq. 4:6, 8.

ALBILLITTETE HEXXOKKI HIINCI

12. Noonkerinni kassi yineemmo gede kaaꞌlitannonketi albillittete hexxo hiittenneeti? (Isayaasi 65:21-25)

¹² Dhagge ikkitannota albillittete hexxonke hiincineemmoha ikkiro albinni roore noonkerinni kassi yineemmo. Yihowa masaalaanchu Isayaasi widoonni borreessiisinori, xaa yannara heeꞌneemmo heeshsho caacceessitannota ikkitinota afinotanna isi albillitte togoo heeshshonni fooliishshiishannonketa buuxisanno. (Isayaasi 65:21-25 nabbawi.) Hatte yannara beꞌe yinummokkinni injaanno minira heeꞌneemmo. Harshammi assanno loosi heeꞌrannonke hattono fayyimmate kaaꞌlitannotanna coommitanno sagale inteemmo. Ninke woy oosonke gawajjannori iillanno yine horo diyaandeemmo. (Isa. 32:17, 18; Hiz. 34:25) Dhagge ikkitannoti tini baalanti hexxo woꞌmitannota horo dihuluullammeemmo.

13. Roorenkanni hexxonke illachisha hasiissannonkehu hiittoo woyite ikkara dandaanno?

¹³ Xaa yannara albinni roore hexxonke illachisha hasiissannonke. Mayira? Korkaatuno, heeꞌnoommohu ‘dandee heeꞌrate qarrissannote goofimarchu barruwaraati.’ (2 Xi. 3:1) Yihowa barru baala biddishshanna jawaante oye qarra dandiine saꞌneemmo gede kaaꞌlannonke. (Fa. 145:14) Qoleno hexxonke qarru yannara dandiine saꞌneemmo gede kaaꞌlitannonke. Maatekkira maalaamittete hasiisannonsare wonsha qarra ikkitinoheha ikkara dandaanno. Hatto yaa woꞌmanka woyite konni garinni qarrantanni heeꞌratto yaateni? Hatto yaa diꞌꞌikkino! Yihowa hasiisannohere aannoheta, Gannatete qole hakkiinni roorse aannoheta kule qaale eino. (Fa. 9:18; 72:12-14) Bayicho assiꞌrino dhibbi, quwa saꞌino yaaddo woy wolu buutote dhibbi amadinoheha ikkara dandaanno. Hegerera konni garinni qarrantanni heeꞌratto yaateni? Hatto yaa diꞌꞌikkino. Maganu abbannote haaro alamera dhibbunna reyo diheedhanno. (Aju. 21:3, 4) Tini hexxo xaa yannara nafa hanqanna caaccaawa agurre noonkerinni kassi yine heeꞌneemmo gede kaaꞌlitannonke. Miincinkero, shiiꞌnummoro, dhiwammummoro woy wolu qarri iillinkerono kassi yine heeꞌra dandiineemmo. Mayira? Xaa yannara iillannonke qarri ikkihano ikkiro, ‘keeshshannohu shiima yanna’ geeshsha calla ikkinotanna muli yannara haaro alamera geedote fooliishsho afiꞌneemmota anfoommo.—2 Qo. 4:17, 18.

14. Hexxonke kaajjishiꞌra dandiineemmohu hiittoonniiti?

¹⁴ Noonke coyinni kassi yine heeꞌrate hexxo lowo geeshsha hasiissannonke. Ikkina hexxonke kaajjishiꞌra dandiineemmohu hiittoonniiti? Mittu manchi xeertote noore buuxe laꞌꞌate maxanxare hasiissannosiha ikkara dandaanno; hatteente gede ninkeno albillitte dagganno Gannate xabbe leeltannonke gede, hexxonke kaajjishiꞌrate mitore assa hasiissannonkeha ikkara dandaanno. Angate anje amaddeennanke baasa yaandeemmo woyite, woxu, asalunna buxima heedhannokkite haaro alamera heeshsho hiittoota ikkitannoro hendo. Xaa yannara afiꞌnoommokkite soqqanshote qoossora yaandeemmoha ikkiro, guuta ikkinummohunna Yihowara lowo kume diro soqqammummohu gedensaanni togoo yaaddo lowo geeshsha shiima coye ikkitannota heda dandiineemmo. (1 Xi. 6:19) Umi qara xaa yanna daafira yaada agurre albillittete yanna daafira hiinca qarra ikkitankera dandiitanno. Ikkirono, galte hosse Yihowa albillittete yanna daafira uyinonke hexxo heda shota ikkitannonke.

15. Kirista coyidhinorinni maa rosootto?

¹⁵ Hanni aleenni kullihu Deenisi minaama Kirista hexxo kaaꞌlitinose gara laꞌno. Ise togo yitino: “Barru barrunku lexxanni haꞌrannohu hirrete dhibbi waadannoe daafira, bisu xeꞌne noonsari ofoltanno gaarera ofolleemma; hattono roore yanna daallasunni kaꞌꞌa didandeemma. Barru baala dhiwannoe. Muli yannara, akimichu dhibbiꞌyanni woyyimma afiꞌreemmakkita kulinoe. Ikkirono bayichonkonni, isi albillittete hexxoꞌya daafira afinori nookkita hedumma. Ani hexxoꞌya illachishoomma; tini giddoyidi keere afiꞌreemma gede assitinoe. Xaa yannara qarra dandee heeꞌra hasiissinoe; haaro alamera kayinni dhagge ikkitanno heeshsho heeꞌreemma!”

“WAAJJITANNOSIRI MITTORENO DIHOOGGANNO”

16. Moote Daawiti Yihowa waajjitannori “mittoreno dihoogganno” yee borreessinohu mayiraati?

¹⁶ Noosirinni kassi yee heeꞌrannohu Yihowa soqqamaanchira nafa qarru iillannosi. Moote Daawiti oososi giddonni ajayi ajeenna sase shiiꞌre xissiisiꞌrino. Iso beebbate kassansoonnisi, kaandoonnisi hattono shinasira shorrinanna lowo diro xooqanni keeshshino. Isira batinyu qarri iillisirono Yihowa daafira coyiꞌranni “Waajjitannosiri mittoreno dihoogganno” yiino. (Fa. 34:9, 10) Isi hatto yaa dandiinohu mayiraati? Ninke Yihowa manna ikkinoommo daafira qarru nookki heeshsho heeꞌneemmo yine dihendeemmo; ikkirono hasiisannonkere horo hoongeemmokkita addaxxa dandiineemmo. (Fa. 145:16) Yihowa iillannonke qarra baala dandiine saꞌneemmo gede kaaꞌlannonketa addaxxa dandiineemmo. Noonkerinni kassi yaa dandiineemmo.

17. Nooherinni kassi yite heeꞌrate fojo rosate murciꞌroottohu mayiraati?

¹⁷ Yihowa nooherinni kassi yite heeꞌrattora hasiꞌranno. (Fa. 131:1, 2) Hakko daafira nooherinni kassi yee heeꞌrate fojo rosate sharrami. Galatattoha, Yihowa fajjo illachishattohanna umokki heeshshi assattoha hattono hexxokki kaajjishiꞌrattoha ikkiro, atino “Nooerinni kassi yee heeꞌra rosoommo” yaa dandaatto.—Fil. 4:11.