Yihowa Baxannoheta Ammani

1. Heeshshokki Yihowara sayisse oottohu mayiraati? (Misileno lai.)

HEESHSHOKKI Yihowara sayisse ootto yanna qaagatto? Hatto assoottohu iso afoottonna baxootto daafiraati. Heeshshokki giddo isi fajjo balaxisiisatenna woꞌmanka woyite iso woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxate qaale eootto. (Maq. 12:30) Hatte yannanni kayise Yihowara noohe baxilli lexxanni haꞌrino. Ikkina mittu manchi, “‘Addinta Yihowa baxatto?’ yee xaꞌmihero mayite qolatto?” Mittoreno huluullamittokkinni “Iso aye manchinni woy aye coyinni roorse baxeemmo” yite qolatto!

2-3. Yihowa maa ammannammora hasiꞌranno? Konni birxichira maa ronseemmo? (Ermiyaasi 31:3)

² Ikkina mittu manchi “Yihowa baxannoheta ammanatto?” yee xaꞌmihero mayite qolatto? ‘Ani Yihowa baxannoe gedee mancho diꞌꞌikkoommo’ yite hedde dawaro qolate hobbi ruxxi yaatto? Danchu garinni lossinoonnisekkiti mitte rodoo togo yitino: “Yihowa baxeemmata afoomma. Tenne dihuluullameemma. Kayinni duucha woyite, Yihowa baxannoeta huluullameemma.” Ikkina Yihowara ate daafira mayi macciishshamannosi?

³ Yihowa, isi baxannoheta ammanattora hasiꞌranno. (Ermiyaasi 31:3 nabbawi.) Yihowa isiwa abbinohe. Heeshshokki Yihowara sayisse uyite cuuamitto woyite isi muxxe elto uyinohe; tini elto bagamannokki baxillesiiti. Isi ate lubbora baxannohe hattono horo diagurannohe. Kuni baxilli Yihowa ateno wole ammanantino soqqamaanosino ‘baxxino woxi’ woy jajji gede asse laꞌꞌanno gede kakkayisannosi. (Mil. 3:17) Yihowa atino soqqamaasinchu Phaawuloosi gede isi baxannoheta ammanattora hasiꞌranno. Phaawuloosi woꞌma giddonni togo yee borreessino: “Reyono ikkituro, heeshshono ikkituro, sokkaasineno ikkituro, gashshooteno ikkiro, xa noo coyibbano ikkituro, albillitte dagganno coyibbano ikkituro, aye wolqano ikkituro, alillitteno ikkituro, wororritteno ikkituro woy wole aye kalaqamano ikkiro, Mootichinke Kiristoosi Yesuusi widoonni leellinohu Maganu baxilliwiinni badankera dandaannokkita seekke afoommo.” (Rom. 8:38, 39) Konni birxichira, Yihowa baxannonketa albinni roore ammana hasiissannonkehu mayiraatironna tennera kaaꞌlannonkeri maatiro ronseemmo.

YIHOWA BAXANNONKETA AMMANA HASIISSANNONKEHU MAYIRAATI?

4. Sheexaanunnite xagarrote hayyo giddo mitte qeela dandiineemmohu hiittoonniiti?

⁴ Yihowa baxannonketa ammanne Sheexaanu “xagarro” qeela dandiineemmo. (Efe. 6:11) Sheexaanu Yihowara soqqama agurreemmo gede assate dandiire baalare assanno. Isi horoonsiꞌranno xagarro giddo mitte Yihowa dibaxannohe yaanno kapho halashshate. Sheexaanu afiꞌri faro baala horoonsiꞌrannoha ikkinota deꞌooti. Isi duucha woyite ninke siannohu wolqa baꞌnoommo yannaraati; lawishshaho alba iillinonkere, xa iillanni noonke qarra hendanni woy albillittete daafira yaandanni wolqa baꞌneemmoha ikkara dandaanno. (Law. 24:10) Sheexaanu gargadhe afannokki kalaqama sianno doobbiichi gedeeti. Hakko daafira isi wolqa baꞌneemmo woyite hexxo mudhineemmo gede assate woꞌnaalanno. Yihowa baxannonketa albinni roore ammanneemmoha ikkiro kayinni, Sheexaanenna xagarrote hayyosi gimbe ‘kaajjine uurrate’ roore wolqa afiꞌneemmo.—1 Ph. 5:8, 9; Yaq. 4:7.

5. Yihowa baxannonketanna lowo geya naadannonketa ammana hasiissannonkehu mayiraati?

⁵ Yihowa baxannonketa ammanne isiwa shiqa dandiineemmo. Hanni hatto yineemmohu mayiraatiro laꞌno. Yihowa woloota banxeemmo gedenna wolootuno baxxankera hasiꞌneemmo gede asse kalaqinonke. Wolootu baxille leellishshannonke woyite ninkeno insa baxate kaꞌneemmo. Yihowa baxannonketanna lowo geya naadannonketa ammannummoro, ninkeno iso baxate kaꞌneemmo. (1 Yo. 4:19) Iso albinni roore banxummoro isino ninke albinni roore baxannonke. Qullaawu Maxaafi xawise togo yaanno: “Maganunniwa shiqqi yiiyye; isino kiꞌnewa shiqqi yaanno.” (Yaq. 4:8) Ikkina Yihowa baxannonketa albinni roore addaxxa dandiineemmohu hiittoonniiti?

YIHOWA BAXANNONKETA AMMANNEEMMO GEDE KAAꞌLANNONKERI MAATI?

6. Yihowa baxannonketa ammanate maa assa dandiineemmo?

⁶ Yihowa baxannohehu mayiraatiro huwatatto gede kaaꞌlahera iso ganyite huucciꞌri. (Luq. 18:1; Rom. 12:12) Hasiisannoha ikkiro barru baala duucha higge ateneeto isi laꞌꞌannohe garinni laꞌꞌatto gede kaaꞌlahera huucciꞌri. Hige tiiꞌꞌikki busha assannoheha ikkiro, Yihowa baxannoheta ammana qarra ikkitahera dandiitanno. Kayinni Yihowa wodanikkira aliidiha ikkinota qaagi. (1 Yo. 3:19, 20) Isi ati umikki daafira afoottohunni roorse afinohe; qoleno giddokki nooha ati laꞌꞌa dandaattokki coye laꞌꞌanno. (1 Sa. 16:7; 2 Du. 6:30) Hakko daafira ‘qarrakki baala isira hasaaphate’ hobbi ruxxi yitooti; qoleno baxannoheta ammanatto gede kaaꞌlahera huucciꞌri. (Fa. 62:8) Hakkiinni, aante noo hedo loosu aana hosiisse huuccattokki ledo sumuu yaannore assi.

7-8. Faarsote maxaafi Yihowa baxannonketa buuxisannohu hiittoonniiti?

⁷ Yihowa coyiꞌrannore ammani. Yihowa Qullaawa Maxaafa borreessi manni isita addu ayimmasi borreessanno gede qullaawu ayyaaninni massaginonsa. Faarsaanchu Daawiti Yihowa dhagge ikkanno garinni xawisino gara wodanchi. Isi Yihowa “dadillunni hiiqqantinorira mule noonsa; hexxo hoogginore gatisannonsa” yiino. (Fa. 34:18) Hexxo mudhatto woyite callatoottohu gede assite hedattora dandaatto. Kayinni Yihowa togoo yannara isi kaaꞌlo roore hasiissannoheta afino daafira ledokki heeꞌrannota kule qaale eino. Daawiti wole faarsora, “Mageeshshi hindiiddo duꞌnoommoro egennootto” yee borreessino. (Fa. 56:8) Dadillattonna xissiisiꞌratto woyite Yihowa laꞌꞌanno. Isi ate daafira lowo geya hedanno hattono qarrikki leellannosi. Faarso 139:3 “Loosoꞌya baala egennootto” yitanno. Yihowa loosokki baala laꞌꞌannoha ikkirono assattoha dancha coye illachishanno. (Ibi. 6:10) Mayira? Korkaatuno iso hagiirsiisate assattore baala naadanno.a

⁸ Yihowa qullaawu ayyaaninni borreessinoonnihu Qaalisi giddo noote sheshifachishshanno qummeeshshuwa widoonni togo yaanni noohehu gedeeti: “Mageeshshi geya baxeemmoheronna ate daafira mageeshshi geya hedeemmoro afattora hasiꞌreemmo.” Kayinni, aleenni ronsummonte gede Sheexaanu Yihowa dibaxannohe yaanno kapho tareessanno. Hakko daafira mito woyite Yihowa baxannoheta huluullamattoha ikkiro, taxxi yite ateneeto togo yite xaꞌmi: ‘Aye ammana hasiissannoe? Kaphu annanso halaalu Magano?’—Yoh. 8:44; Fa. 31:5.

9. Yihowa iso baxxannorira maa buuxisinonsa? (Fulo 20:5, 6)

⁹ Yihowa baxxannosire ma assannoro hiinci. Yihowa Museranna Israeelete mannira mayinoro hedi. (Fulo 20:5, 6 nabbawi.) Yihowa baxxannosirira woꞌmanka woyite bagamannokki baxille leellishannota kule qaale eino. Tini hedo ammanamino Maganinke baxxannosire baxannota buuxissanno. (Neh. 1:5) Hakko daafira mito woyite Yihowa baxannoheta ammana qarra ikkituhero taxxi yite ateneeto ‘Yihowa baxeemmo?’ yite xaꞌmi. Hakkiinni tenne hedi: Ati Yihowa baxattohanna iso hagiirsiisate dandiittore baala assitanni noottoha ikkiro, isino lowo geya baxannoheta huluullantooti. (Dan. 9:4; 1 Qo. 8:3) Ati Yihowa baxattota huluullamattokkiha ikkiro isi baxannoheta mayira huluullamatto? Isi woꞌmanka woyite baxannohetanna agurannohekkita woꞌmunni woꞌma addaxxa dandaatto.

10-11. Yihowa wodo ma garinni laꞌꞌattora hasiꞌranno? (Galaatiya 2:20)

¹⁰ Wodote daafira hiinci. Yesuusi Kiristoositi wodote kakkalo Yihowa mannu oosora uyinote baalanta roortanno eltooti. (Yoh. 3:16) Ikkina Yihowa tenne elto aterano uyinohe? Ee uyinohe! Hanni soqqamaasinchu Phaawuloosi woꞌnaalsha laꞌno. Phaawuloosi Kiristaancho ikkara albaanni mito jawa cubbo loosinota qaagi; Kiristaancho ikkihu gedensaannino laanfesi qeeꞌlate sharrama hasiissinosi. (Rom. 7:24, 25; 1 Xi. 1:12-14) Ikkirono, wodo Yihowa isira uyino elto gede asse laino. (Galaatiya 2:20 nabbawi.) Yihowa, Phaawuloosi tenne hedo qullaawu ayyaani massageennasi borreessanno gede assinota qaagi. Qullaawu Maxaafi giddo borreessinoonnire baala roso ikkankera borreessinoonni. (Rom. 15:4) Phaawuloosi borreessino hedo Yihowa wodo atera uyino elto gede assite laꞌꞌattora hasiꞌrannota leellishshanno. Wodo konni garinni laꞌꞌattoha ikkiro, Yihowa baxannoheta albinni roore addaxxatto.

¹¹ Yihowa, Yesuusi uullara daye ninkera reyanno gede assinohura galaxxineemmosi. Yesuusi uullara dayinohu wolu korkaati wolootaho Maganu daafira halaale kulateeti. (Yoh. 18:37) Yesuusi, Yihowa oososi mageeshshi geeshsha baxannorono rosiisino.

YESUUSI YIHOWA BAXANNONKETA AMMANNEEMMO GEDE KAAꞌLINONKE GARA

12. Yesuusi Yihowa daafira kulinore addaxxineemmohu mayiraati?

¹² Yesuusi uullate aana noo waro Yihowa hiittoohoro xawisino. (Luq. 10:22) Yesuusi Yihowa daafira kulinore addaxxineemmo gede assannonkehu ikkadu korkaati noonke. Yesuusi uullara daara albaanni iima Yihowa ledo kiirre tunqannikki diro heeꞌrino. (Qol. 1:15) Yesuusi, Yihowa isono ammanantino sokkaasineno mageeshshi geeshsha baxannoro heeshshosinni laino daafira, uullate aana noore ammanantino oososino mageeshshi geeshsha baxannoro afino. Yesuusi Maganu baxannonketa ammanneemmo gede kaaꞌlinonkehu hiittoonniiti?

13. Yesuusi Yihowa ma garinni laꞌnammora hasiꞌranno?

¹³ Yesuusi, Yihowa isi laꞌꞌanno garinni laꞌnammora hasiꞌranno. Isi Wongeelluwate giddo Yihowa 160 saꞌꞌanno bayicho “Anna” yee woshshino. Qoleno rosaanosi ledo hasaawi yannara, ‘Anniꞌne’ woy “iimi Anniꞌne” yitanno yaatto horoonsiꞌrino. (Mat. 5:16; 6:26) Yesuusi uullara daara albaanni Maganunniti ammanantino soqqamaano Yihowa ‘Woꞌmanka Dandaannoha,’ ‘Aliidi Mooticha,’ ‘Bayira Kalaqaancho’ yite hattono wole suusu suꞌmuwanni woshshitanno. Yesuusi kayinni Yihowa, ‘Anna’ yee duucha hige woshshino; tini yaatto Yihowa soqqamaanosi mittu qaaqqi baxillaanchu annisiwa shiqannohu gede ikkite isiwa shiqqara hasiꞌrannota leellishshanno. Addanko Yesuusi, Yihowa isi laꞌꞌanno garinni yaano oososi baxannohu baxillaanchu anni gede assine laꞌnammora hasiꞌranno. Hanni Yesuusi “Anna” yitanno yaatto horoonsiꞌrinota leellishannoha lame lawishsha laꞌno.

14. Yesuusi ninke mittu mittunkura iimi Anninke albaanni waagu noonketa leellishinohu hiittoonniiti? (Maatewoosi 10:29-31) (Misileno lai.)

¹⁴ Hanni balanxe, Yesuusi Maatewoosi 10:29-31 mayinoro laꞌno. (Qummeeshsha nabbawi.) Gurrae Yihowa baxanna magansiꞌra dandiitannokkite shiimmaadda ceaati. Ikkirono, mitte gurraicho nafa iimi Anninke albaanni lowo waaga afidhino daafira, isi afikkinni uulla diubbanno. Baxillunni kaꞌe iso magansidhannosiri ammanantino soqqamaanosi isi albaanni hakkiinni roore lowo waaga afidhino! Qoleno Yesuusi iimi Anninke ‘dananchinke kiiro nafa’ afinota coyiꞌrino. Yihowa ninke daafira mitto mittonka coye nafa afinohura ninke daafira hedannota woꞌmunni woꞌma addaxxa dandiineemmo. Addanko, Yesuusi ninke mittu mittunku iimi Anninke albaanni waagu noonketa ammannammora hasiꞌranno.

15. Yesuusi Yohaannisi 6:44 coyiꞌrino hedo iimi Annikki daafira maa rosiissannohe?

¹⁵ Hanni Yesuusi “Anna” yaanno qaale horoonsiꞌrinoha layinki lawishsha laꞌno. (Yohaannisi 6:44 nabbawi.) Iimi Annikki shaqqillunni halaalunniwa abbinohe. Isi halaalunniwa abbinohehu mayiraati? Suwashshu wodani nooheta afino daafiraati. (Soq. 13:48) Yesuusi Yohaannisi 6:44 noo hedo coyiꞌrinohu Ermiyaasi 31:3 Yihowa coyiꞌrino hedo kulate ikkara dandaanno; hakko qummeeshshira Yihowa mannisira togo yiino: “Bagamannokki baxillinni . . . anewa gamba assoommoꞌne.” (Erm. 31:3; Hoosei 11:4 ledo heewisiisi.) Hatto yaa mayyaatero hanni hedi. Baxillaanchu iimi Anninke woꞌmanka woyite, ati laꞌꞌa dandaattokkiha giddokki nooha dancha coye laꞌꞌanno.

16. (a) Yesuusi mayyaanni noonkehu gedeeti? Isi coyiꞌrinore ammana hasiissannonkehu mayiraati? (b) Yihowa gedee Anni nookkita albinni roore ammanatto gede kaaꞌlannoheri maati? (“Baalunkura Hasiisannonke Anna” yitanno saaxineno lai.)

¹⁶ Yesuusi Yihowa Annanke yee woshshi woyite togo yaanni noohu gedeeti: “Yihowa ane Anna calla diꞌꞌikkino; aterano Annakkiiti. Qoleno isi baxannohetanna ate daafira lowo geya hedannota buuxiseemmohe.” Hakko daafira mito woyite Yihowa baxannoheta ammana qarra ikkituhero, taxxi yite ateneeto togo yite xaꞌmi: ‘Annanke seekke afinohunna woꞌmanka woyite halaale coyiꞌrannohu Maganu Beetti coyiꞌrinore ammana dihasiissannoe?’—1 Ph. 2:22.

WOꞌMANKA WOYITE YIHOWA BAXANNOHETA AMMANI

17. Yihowa baxannonketa albinni roore addaxxa hasiissannonkehu mayiraati?

¹⁷ Woꞌmanka woyite Yihowa baxannonketa albinni roore ammana hasiissannonke. Aleenni ronsummonte gede, diininke Sheexaanu Yihowara soqqama agurreemmo gede assate giidhe galanno. Hakko daafira Maganu baxannonketa huluullammeemmo gede assate woꞌmanka woyite sharramanno. Sheexaanu qeelankera wodha dihasiissannonke!—Iyo. 27:5.

18. Yihowa baxannoheta albinni roore addaxxa dandaattohu hiittoonniiti?

¹⁸ Yihowa baxannoheta albinni roore addaxxate ateneeto isi laꞌꞌanno garinni laꞌꞌatto gede kaaꞌlahera woꞌmanka woyite huucciꞌri. Qullaawa Maxaafa borreessituri qullaawu ayyaani massageennansa Yihowa baxille xawissino gara hiinci. Yihowa baxxannosire woꞌmanka woyite baxannota qaagi. Wodote kakkalo atera uyinoonni elto gede assite laꞌꞌa dandaattohu mayiraatiro hiinci. Yesuusi yiinonte gede Yihowa iimi Annakki ikkinota addaxxi. Hakkiinni mittu manchi, “Yihowa baxannoheta ammanatto?” yee xaꞌmihero woꞌma giddonni, “Ee ammaneemmo! Qoleno iso baxeemmota leellishate danduummore baala asseemmo!” yite qola dandaatto.