Busha Yorto Qeeꞌla Dandiinanni Gara

1. Guuntete xeꞌne noonsa manni baalunkura mayi qarra ikkannonsa?

YIHOWA hagiirsiisannokki coye assate fonqolante egennootto? Hatto ikkiro, mannaho iillannokki fonqoli iillinoe yite heddooti. Qullaawu Maxaafi, “Manna baalaho iillanno fonqolo agurranna baxxino fonqoli diꞌꞌillinoꞌne” yaanno. (1 Qo. 10:13) Hatto yaa ate waaddanni nooti busha yorto wolootano waaddanni no yaate. Callichokki diꞌꞌikkootto; Yihowa kaaꞌlannohe daafira busha yorto qeeꞌla dandaatto.

2. Mito Kiristaananna Qullaawu Maxaafi rosaano hiittoo yorto waaddannonsaha ikkara dandaanno? (Misillano lai.)

² Qullaawu Maxaafi, “Mittu mittunku manchi umisi yortonni goshooshamanninna dogamanni jifamanno” yaanno. (Yaq. 1:14) Mitto mittonka mancho addi addi coyi dogara dandaanno. Lawishshaho mitu Kiristaani meyate ledo foorate fonqolamara dandaanno; wolootu kayi meyati meyate ledo woy labbaahu labbaahu ledo foorate fonqolantara dandiitanno. Teeda baꞌino misile laꞌꞌa agurtinori galagalte laꞌꞌate fonqolantannoha ikkara dandaanno. Jingilli assitanno xagga adha woy ago quwa sae aga agurinohu batinyu mannino galagale togoore assate fonqolamara dandaanno. Mito Kiristaananna Qullaawu Maxaafi rosaano waadannonsa coyi giddo kuni gamaholla. Mito woyite ninke baalunkura soqqamaasinchu Phaawuloosira macciishshamino gedeeri macciishshamankera dandaanno; isi, “Ani gara ikkinore assa hasiꞌreemmo woyite ledoꞌya noori kayinni bushareeti” yee borreessino.—Rom. 7:21.

3. Mittu manchi busha yorto seeda yanna waaddannosiha ikkiro mayyee hedara dandaanno?

³ Busha yorto waaddanni nooheha ikkiro, fonqolo qeelate wolqa noohekkihu gede assite hedattoha ikkara dandaanno. Qoleno busha yorto waaddannohe daafira calla Yihowa dibaxannoe yite hexxo noohekkihu gede assite hedattoha ikkara dandaanno. Tini lamenti hedo gara ikkitinokkita wodanchi! Hatto yineemmohu mayiraatiro xawisate konni birxichira lame xaꞌmora dawaro qollanni: (1) Wolqanna hexxo dinoe yite hedattora hasiꞌrannohu ayeti? (2) Busha yorto qeeꞌla dandaattohu hiittoonniiti?

‘BUSHU’ SHEEXAANU MAYINE HENDAMMORA HASIꞌRANNO?

4. (a) Sheexaanu wolqa dinonke yine hendammora hasiꞌrannohu mayiraati? (b) Busha yorto qeeꞌlate wolqa noonke yineemmohu mayiraati?

⁴ Sheexaanu fonqolu iillannonke woyite wolqa dinonke yine hendammora hasiꞌranno. Yesuusi tenne afino daafira haꞌrunsaanosi togo yite huuccidhara rosiisino: “Bushuwiinni gatisinke ikkinnina jifamate giddora eessitootinke.” (Mat. 6:13) Sheexaanu mittu manchira fonqolu iillisiro Yihowara hajajamannokkihu gede asse coyiꞌrino. (Iyo. 2:4, 5) Isi hatto yiinohu mayiraati? Sheexaanu umisi yortonni dogamino; Yihowarano ammaname diheeꞌrino. Sheexaanu busha yorto waaddannonke woyite, isi gede Yihowara badhe wodhineemmohu gede asse hedikki digatino. Sheexaanu guutu Maganu Beetti fonqoloho qeelamanno yee nafa hedino! (Mat. 4:8, 9) Kayi hanni tenne hedi: Busha yorto qeeꞌlate addinta wolqa dinonke? Noonke! Ninkeno soqqamaasinchu Phaawuloosi borreessino hedora sumuu yineemmo; isi, “Wolqa aannoehunni isinni baalunku coyira ikkitanno jawaante nooe” yee borreessino.—Fil. 4:13.

5. Yihowa busha yorto qeeꞌla dandiineemmota huluullamannokkita mayinni anfeemmo?

⁵ Sheexaanu gede ikkikkinni Yihowa busha yorto qeeꞌla dandiineemmota afino. Tenne mayinni anfeemmo? Korkaatuno Yihowa minshe nookkiha ikke heeꞌrinohu lowo manni quuxxote qarra gate saꞌꞌannota coyiꞌrino. Hanni hatto yaa mayyaatero hedi. Kaphara dandaannokkihu Yihowa ‘uddanonsa Geꞌrechu mundeenni hayishshiꞌre waajjo assiꞌrinohu’ minshe noonsakkihu lowo manni isi abbannota haaro alame eannota coyiꞌrino. (Aju. 7:9, 13, 14) Addanko, Yihowa busha yorto qeeꞌlate wolqa noonkekkihu gede asse dihedanno.

6-7. Sheexaanu busha yorto qeeꞌlate sharrammeemmo woyite hexxo dinonke yine hendammora hasiꞌrannohu mayiraati?

⁶ Sheexaanu wolqa dinonke yine calla ikkikkinni, busha yorto waaddannonke daafira calla Yihowa dibaxannonke yine hexxo noonkekkihu gede assine hendammorano hasiꞌranno. Isi hatto yine hendammora hasiꞌrannohu mayiraati? Yihowa hegere heeshsho afiꞌrate ikkado diꞌꞌikkino yee yoo yiinosi daafira Sheexaaneho hexxo dinosi. (Kal. 3:15; Aju. 20:10) Sheexaanu, hakko iso isi hoogino atoote afiꞌrate hexxo noonke daafira hexxo dinonke yine hendammora hasiꞌrannoti dihuluullissannote. Ikkirono hexxo noonke. Isinni Qullaawu Maxaafi Yihowa kaaꞌlankera hasiꞌrannotanna baxannonketa buuxisanno. Isi, “Baalunku maaro eara ikkinnina ayino baꞌꞌara [dihasiꞌranno].”—2 Ph. 3:9.

⁷ Busha yorto qeeꞌlate wolqa woy hexxo dinonke yine hendeemmoha ikkiro, Sheexaanu hasiꞌranno garinni hendanni heeꞌnoommo. Tenne wodanchanke, kaajjine uurrine iso giwate albinni roore murciꞌneemmo gede kaaꞌlitannonke.—1 Ph. 5:8, 9.

CUBBU MAYINE HENDEEMMO GEDE ASSANNONKE?

8. Busha yorto qeeꞌlate sharrammeemmo woyite wolqanna hexxo dinonke yine hendeemmo gede assannonkeri woluri maati? (Faarso 51:5) (“Harancho Xawishshano” lai.)

⁸ Busha yorto qeeꞌlate sharrammeemmo woyite wolqanna hexxo dinonke yine hendeemmo gede assannonkeri wolurino no. Hakku maati? Addaaminna Heewaniwiinni ragiꞌnoommo cubbooti.a—Iyo. 14:4; Faarso 51:5 nabbawi.

9-10. (a) Cubbu Addaaminna Heewani gawajjinohu hiittoonniiti? (Misileno lai.) (b) Cubbu ninke gawajjannonkehu magarinniiti?

⁹ Hanni cubbu Addaaminna Heewani gawajjino gara laꞌno. Insa Yihowara hajajama giwihu gedensaanni, maaxamino hattono bisonsa diphate woꞌnaalino. Qullaawa Borro Seekke Huwata yaanno maxaafi tenne daafira kulanni togo yaanno: “Konni garinni cubbu insaneeto bushiishshanno gede, yaaddanno gede, masillaabbanno gedenna saaltanno gede assinonsa.” Addaaminna Heewani shoole kifile calla afiꞌrino minira cunfoonnihu gedeeti. Insa mitte kifilenni wole kifile haꞌra dandiitannoha ikkirono, mininni fula kayi didandiitanno. Insa cubbunni gata didandiitanno.

¹⁰ Hige ninke heeꞌneemmo heeshsho Addaaminna Heewani heedhino heeshsho gedeeta diꞌꞌikkitino. Wodo Addaaminna Heewani dikaaꞌlitanno; ninke kayinni cubbunni keeraaꞌmineemmo gedenna xalalu tiiꞌꞌi heeꞌrannonke gede kaaꞌlitannonke. (1 Qo. 6:11) Ikkirono cubbo ragiꞌnoommo. Hakko daafira ninkeneeto bushiisha, yaada, masanna saala dhagge diꞌꞌikkitanno. Isinni Qullaawu Maxaafi kuni cubbi mannu ooso gawajja agurinokkita kulanno. “Addaami Maganu hajajo diige loosino gedee cubbo [loossinokkire]” nafa gawajjino. (Rom. 5:14) Tini hexxo mursiissannota labburono, wolqanna hexxo dinonke yine hendeemmo gede diassitannonke. Tenne gara ikkitinokki hedo qeeꞌla dandiineemmo. Magarinni?

11. Wolqa dinonke yine hendeemmoha ikkiro ma assa hasiissannonke? Mayira? (Rooma 6:12)

¹¹ Busha yorto qeeꞌlate sharrammeenna qiniinonkekki daafira, wolqa noonkekkihu gede assine hendeemmoha ikkiro, tenne cubbu “hasaawisanni” noonkehu gede assine heda dandiineemmo; cubbu hasaawisannanke qole macciishsha dihasiissannonke. Mayira? Korkaatuno Qullaawu Maxaafi, cubbu mannimmankera “moohe” heeꞌrara wodha hasiissannonkekkita kulanno. (Rooma 6:12 nabbawi.) Hatto yaa busha yorto wonsha hooga doodha dandiineemmo yaate. (Gal. 5:16) Yihowa fonqolo qeelleemmota dihuluullamanno; hatto ikka hoogoommero isi tenne asse diyaannonke. (Mar. 30:11-14; Rom. 6:6; 1 Te. 4:3) Addanko, busha yorto qeeꞌlate sharrammeemmo woyite wolqiweeloota diꞌꞌikkinoommo.

12. Hexxo dinonke yine hendeemmoha ikkiro ma assa hasiissannonke? Mayira?

¹² Hatteente gede, busha yorto waaddannonke daafira calla Yihowa dibaxannonke yine hexxo noonkekkihu gede assine hendeemmoha ikkiro, tenne cubbu “hasaawisanni” noonkehu gede assine laꞌꞌa dandiineemmo; cubbu hasaawisannanke qole macciishsha dihasiissannonke. Mayira? Korkaatuno Qullaawu Maxaafi Yihowa cubbaataamma ikkinoommota afinota kulanno. (Fa. 103:13, 14) Isi ninke daafira “baalankare afino”; lawishshaho ragiꞌnoommo cubbi mitto mittonka gawajjinonke gara afino. (1 Yo. 3:19, 20) Busha yorto wonshine cubboho qeelama hoongummo geeshsha, Yihowa albaanni keeraano ikka dandiineemmo. Tenne huluullammeemmokkihu mayiraati?

13-14. Busha yorto waaddannonke daafira calla Yihowa hagiirsiisa didandiineemmo yaateni? Xawisi.

¹³ Qullaawu Maxaafi gara ikkinokkire assatenna (gargadha dandiineemmo) gara ikkinokkire assate hasatto (hedeweelcho waaddankera dandiitanno) mereero badooshshu noota kulanno. Lawishshaho umi xibbi diro Qorontoosi songora heeꞌrannohu mitu Kiristaani bashsho labbaahu labbaahu ledo woy meyati meyate ledo foora roso assiꞌrinoho. Phaawuloosi, “Kiꞌne giddo mitu bashsho hattooreeti” yee borreessino. Hatto yaa insa hakkuyi gedensaanni togoo yorto horo diwaaddinonsa yaateni? Hatto yee heda digaraho; korkaatuno togoo yorto qeeꞌla duucha woyite shota diꞌꞌikkitanno. Ikkollana insaneeto eemadhinohunna busha yorto wonsha qorophino Kiristaani Yihowa hagiirsiisino. Isi insa ‘hayishshante keeraaꞌmitinori’ gede asse laino. (1 Qo. 6:9-11) Ateno hakko garinni laꞌꞌannohe.

¹⁴ Qeeꞌlate sharrantanni noottoti busha yorto ikkitutano ikkituro, qeeꞌla dandaatto. Busha yorto woꞌmunni woꞌma qeeꞌla hoogittoro nafa, ateneeto eemadha hattono ‘maalikkinna hedokki fajjo wonsha’ qoropha dandaatto. (Efe. 2:3) Tenne assanna busha yorto qeeꞌla dandaattohu hiittoonniiti?

BUSHA YORTO QEEꞌLA DANDIINEEMMO GARA

15. Busha yorto qeeꞌlate laanfenke ammane adha hasiissannonkehu mayiraati?

¹⁵ Busha yorto qeeꞌlate laanfekki ammante adha hasiissannohe. “Kaphu korkaata” kultanni ateneeto dogattokki gede qorophi. (Yaq. 1:22) Lawishshaho ‘Wolootu ago ani ageemmohunni roorsite agganno,’ woy woloota bushiishshanni, ‘Minaamaꞌya baxille leellishshoommeꞌꞌero teeda baꞌino misilla laꞌꞌate difonqolameemmo’ yitanni korkaata shiqishate woꞌnaaltooti; tini roore qarru giddo uwatto gedella assitannohe. Hakko daafira bushu assootira hedokkinni nafa korkaata shiqishate woꞌnaaltooti. Assootikkira xaꞌmamattohu ateeti.—Gal. 6:7.

16. Albinni roore gara ikkinore assate murciꞌra dandaattohu hiittoonniiti?

¹⁶ Laanfekki ammante adha hasiissannohetano agurranna, tenne laanfera qeelamattokki gede albinni roore murciꞌrano hasiissannohe. (1 Qo. 9:26, 27; 1 Te. 4:4; 1 Ph. 1:15, 16) Roore fonqolo ikkannoheri maatironna fonqolo ikkannohehu mamooteetiro hedi. Roore fonqolo ikkannohehu mitto coye woy yanna ikkitara dandiitanno. Lawishshaho roore fonqolamattohu daafurootto woyite woy hashshu taalooti? Tuncu yaahera dandaanno fonqolo balaxxe hedi; hattono fonqolu iillihero ma assattoro rosiisiꞌri. Tenne assa hasiissannohehu fonqolu iillahera albaanniiti.—Law. 22:3.

17. Yooseefi lawishshinni maa ronseemmo? (Kalaqama 39:7-9) (Misillano lai.)

¹⁷ Hanni Phoxifaari minaama soꞌrisiissasira woꞌnaaltu woyite Yooseefi ma assinoro laꞌno. Yooseefi hasiꞌrannokkita bayichonkonni xawise kulinose. (Kalaqama 39:7-9 nabbawi.) Tini maa leellishshanno? Yooseefi gara ikkinore assate murciꞌrinohu Phoxifaari minaama iso soꞌrisiisate woꞌnaaltara albaanniiti. Hatteente gede atino fonqolo ikkannori tuncu yaahera albaanni, gara ikkinore assate albinni roore murciꞌra dandaatto. Hatto ikkiro, fonqolo ikkannori tuncu yiihero doodhoottore assa qarra diꞌꞌikkitannohe.

“WOꞌMANKA WOYITE KIꞌNENEETO QONQOLCHITINE LAYIDHE”

18. Busha yorto qeeꞌlate wolere maa assa dandaatto? (2 Qorontoosi 13:5)

¹⁸ Busha yorto qeeꞌlate, ‘woꞌmanka woyite ateneeto qonqolchite layiꞌra’ yaano nootto gara ganyite buuxiꞌra hasiissannohe. (2 Qorontoosi 13:5 nabbawi.) Yannate kiiro hedokkinna assootekki layidhe biddi assiꞌra hasiissannori heeꞌriro biddi assiꞌri. Lawishshaho fonqolo gargadhate sharranteenna qiniinoheha ikkiro nafa, ateneeto togo yite xaꞌmi: ‘Bayichonkonni dihasiꞌreemmo yoommo?’ Hatto yaate keeshshoottota wodanchittoro ateneeto bushiishshooti. Hatteentenni woyyeessiꞌrate maa assa dandaattoro hedi. Ateneeto aante noo xaꞌmuwa xaꞌmi: ‘Gara ikkitinokki hedo giwate keeshsheemmo yanna ajisha dandeemmo? Doodheemmo boohaarshi fonqolo ikkannoere gargadha roore qarra ikkitannoe gede assanni nookka? Amanyoote baꞌino misilla laꞌꞌa hoogate bayichonkonni shawwu yeemmo? Aneneeto qeeꞌlate sharrama hasiissannoeha ikkiro nafa, Yihowa aanno biddishshi woꞌmanka woyite kaaꞌlannoha ikkinota huwatoommo?’—Fa. 101:3.

19. Shiima lawannohu gara ikkinokki doorshi busha yorto qeeꞌla roore qarra ikkitannonke gede assannohu hiittoonniiti?

¹⁹ Assootikkira korkaata shiqishattokki gedeno qorophi. Qullaawu Maxaafi, “Mannu wodani baalunkurinni roore xagaraamoho; diinofayyannoho” yaanno. (Erm. 17:9) Yesuusi wodanu giddonni “busha hedo” fultannota coyiꞌrino. (Mat. 15:19) Lawishshaho teeda baꞌino misilla laꞌꞌa agurinohu mittu manchi mite yanna gedensaanni, mannu mulla heeꞌreenna leellishshannota ikkitinokki daafira, “qarra diafidhino” yee hede siimu xaadooshshi hasatto kakkayissanno misilla laꞌꞌannoha ikkara dandaanno. Woy ‘Anilla busha yortora qeelama hoogummo geeshsha gara ikkinokkire heda bunshe diafidhino’ yee hedannoha ikkara dandaanno. Hatto ikkiro, konni manchihu xagaraamu wodani ‘maalu hasatto wonshiꞌrate mixo fushshiꞌranni no’ yaate. (Rom. 13:14) Togoore assattokki gede qoropha dandaattohu hiittoonniiti? Gara ikkinokkiha jawa coye assatto gede assannoheha shiimaadda coye assa qorophi.b Gara ikkinokkire assate korkaata shiqishatto gede assitannoheta “busha hedo” baalanta giwi.

20. Albillitte noonke hexxo maati? Xaa yannara maa addaxxa dandiineemmo?

²⁰ Xaa geeshsha ronsummonte gede, Yihowa kaaꞌlannonke daafira fonqolo gargadhate wolqa afiꞌra dandiineemmo. Qoleno, Yihowa maarinonke daafira haaro alamera hegere heeshsho afiꞌrate hexxo noonke. Xalala surrenninna wodaninni Yihowara soqqama lowo geya fooliishshiishshanno! Hatti yanna dagga geeshsha, busha yorto qeeꞌlate sharrammeemmo woyite, wolqiweeloota woy hexxo noonkekkire ikkinoommokkita addaxxa dandiineemmo. Yihowa assineemmore maassiꞌranno daafira busha yorto qeeꞌla dandiineemmo!