Taashsho Xeꞌinore Assinanni Woyite Maa Assa Dandaatto?

1-2. Taashsho xeꞌinore assinanni woyite batinyu manni maa assanno? Mayine hendammora dandiineemmo?

HEEꞌNOOMMOHU taashsho xeꞌino alameraati. Mannu manna duuchu korkaatinni lawishshaho, buxane ikkansa, labbaaha woy meyata ikkansa hattono gaꞌrensa woy sirchonsa lae miicanno. Mite dureeyye daddalaano woy gashshaano woxe afiꞌrate yite assitannori manna baasa gawajjanno. Togoo coyinna wole taashshote xeꞌne ninke baalanka xaaddotenni woy wolu garinni gawajjitannonke.

² Batinyu manni xaa yannara alamete aana noota taashshote xeꞌne laꞌꞌanno woyite hanqansa dhagge diꞌꞌikkitannonke. Ninke baalunku beꞌe assannorinna taashshote xeꞌne nookki alamera heeꞌra hasiꞌneemmo. Mitu manni taashshote xeꞌne hunate sharramanno. Kuni manni gashshooteho finqilanno mannira halamanno woy taashshote xeꞌne hunneemmo yite qaale eꞌanno gashshaano doorate mirca tuganno. Ikkirono, ninke Kiristaana ikkinoommo daafira, “alamete wido” ikka hasiissannonkekkitanna taashshote xeꞌne baala hunannoha Maganu Gashshoote agadha hasiissannonketa ronsoommo. (Yoh. 17:16) Ikkirono, mitto mancho miincanna laꞌneemmo woyite dadillineemmo; isinni mito woyite hanqineemmo. Togo yine hendeemmoha ikkara dandaanno: ‘Togoori kalaqamanno woyite maa assa dandeemmo? Manna miincanna laeemmo woyite xaa yannara assa dandeemmori no?’ Hanni kuri xaꞌmuwara dawaro afiꞌrate, taashsho xeꞌinore assinanna laꞌanno woyite Yihowaranna Yesuusira mayi macciishshamannonsaro laꞌno.

YIHOWANNA YESUUSI TAASHSHOTE XEꞌNE GIBBANNO

3. Taashsho xeꞌinore assinanna laꞌneemmo woyite hanqanke nooreentilla yineemmohu mayiraati? (Isayaasi 5:7)

³ Qullaawu Maxaafi taashsho xeꞌinore assinanna laꞌneemmo woyite hanqanke nooreentilla yineemmo gede assannonke korkaata kulanno. Qullaawu Maxaafi, Yihowa danisinni kalaqinonketanna isi “keeraanchimmanna halaalaancho yoo baxannota” kulanno. (Fa. 33:5; Kal. 1:26) Isi horonta taashsho xeꞌinore diassanno; hattono aye manchino togoore assara dihasiꞌranno! (Mar. 32:3, 4; Mik. 6:8; Zak. 7:9) Lawishshaho, masaalaanchu Isayaasi yannara, batinye Israeelete manna gobbansa manni ‘gadadise raashshiishinonsa’ raare Yihowa macciishshino. (Isayaasi 5:7 nabbawi.) Yihowa duucha higge Seerasi lashshi assitinorenna woloota miiccinore qorichishe qaafo adhino.—Isa. 5:5, 13.

4. Yesuusi taashshote xeꞌne ma garinni laꞌꞌannoro leellishshannoti Wongeelluwate giddo noo xagge hiittenneeti? (Misileno lai.)

⁴ Yihowa gede Yesuusino taashsho baxanno hattono taashshote xeꞌne giwanno. Mitte yannara Yesuusi uullate aana soqqamanni heeꞌre mitte anga laanshaawino mancho laino. Yesuusi konne mancho marare kaaꞌla hasiꞌrino; kakkachootu ammaꞌnote massagaano kayinni tennera hanqitino. Insa konne qarramino mancho kaaꞌlantenni, Sambatu seeri daafira fushshitinota furro fuuqqo hooltanno wodho agadhate hajo huluullissinonsa. Insa ikkito daafira Yesuusira mayi macciishshaminosi? Isi, ‘Wodaninsa dillaawinotera baasa dadillino.’—Maq. 3:1-6.

5. Taashshote xeꞌne laꞌne hanqineemmo woyite maa qaaga hasiissannonke?

⁵ Yihowanna Yesuusi taashshote xeꞌne laꞌanno woyite hanqitanno; ninkeno hanqanke soꞌro diꞌꞌikkitino. (Efe. 4:26) Ikkirono, hanqineemmo gede assannori nooha ikkiro nafa, taashshote xeꞌne huna dandiineemmokkita qaaga hasiissannonke. Isinni hanqine keeshshineemmoha ikkiro dhiwammammora woy baasa yaandammora dandiineemmo. (Fa. 37:1, 8; Yaq. 1:20) Hakko daafira taashsho xeꞌinore assinanna laꞌneemmo woyite maa assa hasiissannonke? Yesuusi lawishshinni ronseemmori no.

YESUUSI TAASHSHOTE XEꞌNE LAI WOYTE ASSINORE

6. Yesuusi uullate aana noo yannara mito manna miincoonnihu ma garinniiti? (Misileno lai.)

⁶ Yesuusi uullate aana noo yannara lowo manna beebba assiꞌnanna laino. Isi ammaꞌnote massagaano manna beebba assidhanna laino. (Mat. 23:2-4) Roomu gashshaanono manna beebba assidhanno gara afino. Batinyu Yihudu manni Roomu gashshootinni wolapho afiꞌrate quqquxamino. Mitu Yihudu manni isinni Roomu manni ledo olamate kaino. Kayinni Yesuusi gashshoote soorrate olamannohu konni manni ledo horonta dihalamino. Isi mannu moohisasira hedinota afiti albinsanni agure haꞌrino.—Yoh. 6:15.

7-8. Yesuusi uullate aana noo yannara taashshote xeꞌne hunate woꞌnaalinokkihu mayiraati? (Yohaannisi 18:36)

⁷ Yesuusi uullate aana noo yannara taashshote xeꞌne hunate poletiku gashshaano ledo loosate diwoꞌnaalino. Mayira? Isi mannaho umonsa gashshate qoossono dandoono noonsakkita afino. (Fa. 146:3; Erm. 10:23) Qoleno mannu ooso taashshote xeꞌnera kaima ikkinore huna didandiitanno. Alame gashshe noohu Sheexaane Daawuloosiiti; isi lubbo shaannoho ayyaanu kalaqooti hattono silxaanesi horoonsiꞌre taashshote xeꞌne halashshanni no. (Yoh. 8:44; Efe. 2:2) Qoleno guuntete xeꞌne danchu manni nafa duucha woyite taalo coye assannokki gede assitanno.—Ros. 7:20.

⁸ Yesuusi taashshote xeꞌnera kaima ikkinore hunannohu Maganu Gashshoote calla ikkinota afino. Hakko daafira isi yannasinna wolqasi ‘Maganu Gashshootiha dancha duduwo sabbakatenna duduwate’ horoonsiꞌrino. (Luq. 8:1) Isi ‘keeraanchimma hudidhannoriranna goodhannorira’ qarrunna taashshote xeꞌne baꞌanno yanna daggannota buuxisinonsa. (Mat. 5:6; Luq. 18:7, 8) Ikkirono, tenne assannohu gashshoote soorrate sharramanno manna ikkikkinni ‘tenne alame wido ikkinokkiho’ iimiho Maganu Gashshooteeti.—Yohaannisi 18:36 nabbawi.

TAASHSHO XEꞌINORE ASSINANNA LAꞌꞌATTO WOYITE YESUUSI LAWISHSHA HAꞌRUNSI

9. Taashshote xeꞌne baala hunannohu Maganu Gashshoote calla ikkinota ammanatto gede assinoheri maati?

⁹ Xaa yannara Yesuusi uullate aana noo warinni roore taashshote xeꞌne batidhino. Tenne ‘goofimarchu barruwarano’ taashshote xeꞌnera kaimu Sheexaanehonna isi massagannoho busha mannaati. (2 Xi. 3:1-5, 13; Aju. 12:12) Yesuusi gede ninkeno taashshote xeꞌnera kaima ikkinore hunannohu Maganu Gashshoote calla ikkinota anfoommo. Ninke Maganu Gashshootira halammeemmo daafira, taashshote xeꞌne hunate gashshoote giwe finqilanno mannira dihalammeemmo hattono gashshaano diaddaxxineemmo. Hanni Isteesia yinanni rodoo woꞌnaalsha laꞌno. Ise halaale rossara albaanni taashshote xeꞌne hunate gashshooteho finqilino mannira halantanno. Ikkirono, ise assitanni noori gara ikkasinna teꞌee huluullantino. Togo yitino: “Gashshooteho finqilino manni ledo fulloommowa heeꞌre assootiꞌya garahoronna teꞌee huluullameemma. Xa Maganu Gashshootira halamanni noomma; assanni noommarino gara ikkasi afoomma. Yihowa ani assa dandeemmahu aye coyinni roore qarranna taashshote xeꞌne hunannota afoomma.”—Fa. 72:1, 4.

10. Gashshoote soorrate sharramanno manni assannori, Yesuusi Maatewoosi 5:43-48 coyiꞌrinori ledo sumuu yaannokkihu ma garinniiti? (Misileno lai.)

¹⁰ Xaa yannara batinyu manni gashshoote soorrate sharramanno; ikkirono kuni manni lowo geeshsha hanqanno, seera diiganno hattono woloota gawajjanno; togoo assooti qole Yesuusi rosiisino rosi ledo sumuu diyaannoho. (Efe. 4:31) Jeefirii yinanni rodii togo yiino: “Umi qara keeru dira fulinoha lawanno manni gedensoonni finqilannotanna mulqiꞌrannota huwatoommo.” Ikkirono Yesuusi baalanka manna, ninke ledo sumuu yaannokkiha woy xiiwannonke manna nafa banxeemmo gede rosiisinonke. (Maatewoosi 5:43-48 nabbawi.) Kiristaana ikkinoommo daafira Yesuusi rosiisinonke rosi ledo sumuu yaannokki coye baala giwate dandiinummore baala assineemmo.

11. Gashshoote soorrate woꞌnaalanno mannira halammeemmo gede fonqolankera dandaannori maati?

¹¹ Taashshote xeꞌne woꞌmunni woꞌma hunannohu Maganu Gashshoote ikkinota anfoommoha ikkirono, miincanninke woyite Yesuusi lawishsha haꞌrunsa qarra ikkitankera dandiitanno. Hanni miincoonnisete Jaaniya yinanni rodoo woꞌnaalsha laꞌno. Ise togo yitino: “Lowo geeshsha hanqoomma. Qoleno xissiisiꞌroomma hattono taashsho xeꞌinore assanno manna rabbisiꞌra hasiꞌroomma. Hakkiinni manna sircho laꞌne gimbannitanna mallaandannita giwe keeru dira fulanno mannira kaaꞌlamate hedumma. Tenne assa hanqoꞌya xawisate kaajja doogo ikkitinohu gede asse hedoomma.” Ikkirono Jaaniya gedensoonni soorrante biddi yaa hasiissannoseta wodanchitino. Ise ledde togo yitino: “Yihowanni roore mannu yaannore ammananna insa addaxxa hanafoommata huwatoomma. Hakko daafira togoo manni ledo nooe aante woꞌmunni woꞌma aguroomma.” Ninke woy woloota miincanni woyite hanqine tenne alame coyira anga wodhineemmokki gede qoropha hasiissannonke.—Yoh. 15:19.

12. Macciishshineemmo mashalaqqe doodha hayyo ikkitinohu mayiraati?

¹² Taashsho xeꞌinore assinanninke woyite hanqo eemadhineemmo gede kaaꞌlannonkeri maati? Batinyu manni nabbawannore, laꞌꞌannorenna macciishshannore doodha kaaꞌlitannota huwatino. Mitu dagoomittete miidiyira taashshote xeꞌne daafira calla kullanni; tini mannu gashshoote soorrate sharramanno gede kakkayissanno. Duucha woyite odoo borreessitannori insara lawinonsare calla borreessitanno. Taashshote xeꞌne daafira kultannoti mitte odoo gara ikkituro nafa, tenne daafira calla heda kaaꞌlitannonkeri no? Lowo yanna tenne mashalaqqe daafira calla hendeemmoha ikkiro, hasiisikkinni caaccaambammora woy hexxo mudhinammora dandiineemmo. (Law. 24:10) Hakkiino sae taashshote xeꞌne baala hunannohu Maganu Gashshoote ikkinota deꞌnammora dandiineemmo.

13. Ganyine Qullaawa Maxaafa nabbawa taashshote xeꞌnera gara ikkitino lao heedhannonke gede kaaꞌlitannonkehu hiittoonniiti?

¹³ Qullaawa Maxaafa ganyine nabbawanna hiinca taashsho xeꞌinore assinanni woyite ma assineemmoro afate kaaꞌlitannonke. Aaliya yinanni rodoo qooxeessisera heeꞌranno manna miincoonni gara laꞌe lowo geeshsha xissiisidhino. Ise konne manna miiccinore diqorichinshanni yite heddino. Ise togo yitino: “‘Yihowa konne qarra hoolannota addinta ammaneemma?’ yee aneneeto xaꞌma hasiissinoe. Hatte yannara Iyyoobi 34:22-29 nabbawoomma. Kuni qummeeshshi Yihowawiinni goꞌla dandaannohu mittuno nookkita qaagiissinoe. Guutu garinni taashshannohunna qarra woꞌmunni woꞌma huna dandaannohu iso callaati.” Ikkirono, addu taashsho abbannoha Maganu Gashshoote agadhine heeꞌnoommote tenne yannara taashshote xeꞌne dandiine heeꞌra hasiissannonke. Hiittoonni?

XAA YANNARA MA ASSA DANDIINEEMMO?

14. Taashsho xeꞌinore assineemmokki gede qorophate ma assa dandiineemmo? (Qolaasiyaasi 3:10, 11)

¹⁴ Wolootu taashsho xeꞌinore assitannokki gede hoola dandiineemmokkiha ikkirono, ninke assineemmore eemadha dandiineemmo. Aleenni ronsummonte gede baxille leellinshe Yesuusi lawishsha haꞌrunsino. Togoo baxilli woloota wole agurina taashsho xeꞌinore assitannore nafa ayirrinseemmo gede kakkayisannonke. (Mat. 7:12; Rom. 12:17) Yihowa baalunku mannira shaqqille leellinshanna hattono taalo ikkinore assinanna laꞌꞌanno woyite hagiidhanno.—Qolaasiyaasi 3:10, 11 nabbawi.

15. Qullaawu Maxaafi halaale kulle woloota kaaꞌla dandiineemmohu hiittoonniiti?

¹⁵ Manna kaaꞌla dandiineemmoti qara doogo insara Qullaawu Maxaafi halaale kulate. Hatto yineemmohu mayiraati? Korkaatuno ‘Yihowa aanno egenno’ hanqaaleessunna finqilu manchi soorrame shaqqadonna keere baxannoha ikkanno gede assitanno. (Isa. 11:6, 7, 9) Jiimaali yinanni manchi halaale macciishshara albaanni manna okkino yee hedino gashshoote soorrate hakkonne gashshoote galchate gaarantannote finqiltino gaamora halamino. Isi togo yiino: “Manna giddeessite soorramanno gede assa didandaatto. Ani soorramoommohu giddeessineennae ikkikkinni rosoommohu Qullaawu Maxaafi halaalinniiti.” Jiimaali rosinori assootesi aguranno gede assinosi. Qullaawu Maxaafi halaali soorrino manni kiiro lexxitanni hadhanno woyite taashsho xeꞌinore assanno manni kiiro ajjanno.

16. Maganu Gashshooti hexxo wolootaho kulatto gede kakkayisannoheri maati?

¹⁶ Yesuusi gede ninkeno, taashshote xeꞌne hunannohu Maganu Gashshoote calla ikkinota mannaho kulate quqquxammeemmo. Tini hexxo miincanninsa manna sheshifachishshanno. (Erm. 29:11) Aleenni qummi assiniti Isteesi togo yitino: “Rosoomma halaali wolootanna ane umoꞌya miincannita dandee saeemma gede kaaꞌlinoe. Yihowa Qullaawu Maxaafi sokka widoonni manna sheshifachishanno.” Sheshifachishshannota Qullaawu Maxaafi sokka wolootaho kulate dancha gede qixxaawa hasiissannohe. Qullaawa Borro rosiissannoha konni birxichira ronsummo halaale roore ammanitto kiiro rosu mine woy loosu bayicho togoo hajo kaꞌanno woyite hayyotenni hasaawate roore qixxaawoottoha ikkatto.b

17. Yihowa xaa yannara taashshote xeꞌne dandiine heeꞌneemmo gede kaaꞌlannonkehu hiittoonniiti?

¹⁷ Sheexaanu ‘tenne alame gashshaancho’ ikke noo geeshsha taashsho xeꞌinore assinanninketa anfoommo. Kayinni iso “fushshine tunga” geeshsha kaaꞌlannohu nookkirenna hexxo nookkire diꞌꞌikkinoommo. (Yoh. 12:31) Yihowa Qullaawa Borro widoonni taashshote xeꞌne batidhinohu mayiraatiro calla ikkikkinni taashsho xeꞌinore assinanninke woyite hiitto ikkineemmorono afinota kulinonke. (Fa. 34:17-19) Yihowa Beettisi widoonni, taashsho xeꞌinore assinanninke woyite ma assa hasiissannonkeronna muli yannara gashshootisi taashshote xeꞌne baala woꞌmunni woꞌma hunannota rosiisinonke. (2 Ph. 3:13) ‘Taashshonna halaalu’ uulla woꞌmannota quqquxamme agadhine heeꞌnoommote tenne yannara, Maganu Gashshootiha dancha duduwo diinaggaambe sabbaka agurroonke.—Isa. 9:7.