“Suwashshu Wodani” Noonsare Kaaꞌle

1. Mannaho danchu duduwira noonsa lao babbaxxitannohu hiittoonniiti? (Soqqamaasinete Looso 13:47, 48; 16:14, 15)

UMI xibbi diro batinyu manni Kiristaanu sabbakinonsa sokka macciishshanni heeꞌre ammane adhino. (Soqqamaasinete Looso 13:47, 48; 16:14, 15 nabbawi.) Hatteente gede xaa yannarano mitu manni dancha duduwo mite yee macciishshanno woyite hagiidhanno. Maganu Gashshooti sokkara umi qara hasatto noonsakki manni nafa gedensoonni macciishshe adhara dandaanno. Soqqammeemmo yannara “suwashshu wodani” noonsa manninni xaandeemmo woyite maa assa hasiissannonke?

2. Manna rosaano assate loosinke baatto loosiꞌre galino manchi assannori gedeeti yineemmohu mayiraati?

² Hanni mitto lawishsha laꞌno. Manna rosaano assate loosonke baatto loosiꞌre galino manchi assannori ledo heewisiisa dandiinanni. Baatto loosiꞌre galino manchi baatto loose shaqqishanninna wole muro kaasanni heeꞌrenni leꞌino laalo xinqe haaꞌranno. Hatteente gede kulleemmo sokka macciishshe adhate qixxaawino manchinni xaandeemmo woyite, dandaami deerrinni mulenni Kiristoosi rosaancho ikkanno gede kaaꞌla hasiꞌneemmo. Tenne assinanni heeꞌnenni kulleemmonsa sokka mageeshshi geeshsha kaaꞌlitannonsaro huwatate yanna hasiissannonsarono kaaꞌla diagurreemmo. (Yoh. 4:35, 36) Wodancha macciishshanno manna kaaꞌlanno garinni hasaawinseemmo gede kaaꞌlitannonke. Hanni xa, kulleemmo sokka macciishshe adhate qixxaawino manna kaaꞌlate umo hasaawinseemmo woyite maa assa dandiineemmoro laꞌno. Qoleno togoo manni ayyaanaamittetenni lophanno gede kaaꞌla dandiineemmo gara ronseemmo.

HASATTO NOONSA MANNA KAAꞌLINEEMMO GARA

3. Soqqammeemmo woyite hasatto noonsa manninni xaandummoro maa assa hasiissannonke? (1 Qorontoosi 9:26)

³ Soqqammeemmo yannara hasatto noonsa manninni xaandeemmo woyite bayichonkonni insa heeshshote doogora haꞌra hanaffanno gede kaaꞌla hasiꞌneemmo. Togoo manninni umo xaande hasaambeemmo woyite, Qullaawa Maxaafa xiinxallanno gedenna gambooshshe daanno gede koyisate badhera dihingeemmo.—1 Qorontoosi 9:26 nabbawi.

4. Bayichonkonni Qullaawa Maxaafa xiinxallate qixxaabbino beetto woꞌnaalsha kuli.

⁴ Xiinxallanno gede koyisa. Hasaawinseemmo manni giddo mitu bayichonkonni Qullaawa Maxaafa xiinxallate qixxaawinoho. Lawishshaho, mitte yannara Hamusete barra Kanaadaho heedhannoti mitte wedellitte borro worroonni gaarewa marte Hegerera Hagiidhitanni Heeꞌra Dandaatto! yitanno biroshere adhitino. Borrote gaarewa noo rodoo tenne wedellittera tenne biroshere horoonsiꞌne mannaho mulla Qullaawa Maxaafa xiinxallinseemmota kultuse. Tini wedellitte xiinxalla hasidhannota kulte rodoote silkese kiiro uyitu. Gedensoonni hakko barranni tini wedellitte, rodoote sokka borreessite mamoote xiinxallannoro xaꞌmituse. Rodoo Qidaamete barra xiinxalla dandiineemmo yituseta, “Yanna nooena gaꞌa xiinxalla didandiineemmo?” yituse. Hakkiinni Arbete barra xiinxallissuse. Tini wedellitte hatte lamalara Sambatu barri gambooshshe hadhino hattono ayyaanaamittetenni rakke lophitino.

5. Manna Qullaawu Maxaafi xiinxallora koyinseemmo woyite wodanchineemmore ikkanke leellisha dandiineemmohu hiittoonniiti? (Misillano lai.)

⁵ Hige kulleemmo sokka macciishshanno manni baalu aleenni kulli wedellitte gede Qullaawa Maxaafa xiinxallate quqquxamanno yaa diꞌꞌikkino. Mitu mannira yanna hasiissannonsaha ikkara dandaanno. Umi qara mittu manchi hasaawa hasiꞌranno birxicho kayinse hasaawa hasiissannonkeha ikkara dandaanno. Ikkirono dancha danchare hendeemmohanna isi daafira hendeemmota leellinsheemmoha ikkiro, muli yanna giddo Qullaawa Maxaafa xiinxalla hanafara dandaanno. Mannu Qullaawa Maxaafa xiinxallanno gede koyisate mayyaa dandiineemmo? Tenne xaꞌmo Qullaawu Maxaafi xiinxallo hanafisiisate qiniinonsare batinye roduuwa xaꞌminoonni.

6. Hasatto noosi manchi Qullaawa Maxaafa xiinxalla hanafanno gede kaaꞌlate mayyaa dandiineemmo?

⁶ Qullaawu Maxaafi xiinxallo hanafisiisate daafira xaꞌminoonni halashshaanonna suwisaano, mite gobbuwara Qullaawu Maxaafi xiinxallora koyinsanni woyite, “xiinxallo,” “Qullaawu Maxaafi roso,” woy “rosiiseemmohe” yitanno yaatto horoonsiꞌra dancha ikkitinokkita coyidhino. Insa “hasaawa” woy “Qullaawu Maxaafi daafira afa” yitanno yaatto horoonsiꞌra woyyitannota huwattino. Hasaawaꞌne suffinannita kulate togo yaa dandaatto: “Heeshshote daafira xaꞌminannite hasiissanno xaꞌmuwara Qullaawu Maxaafi dawaro qolasi dhagge ikkitanno” woy “Qullaawu Maxaafi ammaꞌnote maxaafa calla ikkikkinni duucha doogganni kaaꞌlannonkeho.” Ledde togo yaa dandaatto: “Lowo yanna dihasiissanno; lowo geeshsha hasiisanno coye rosate 10-15 daqiiqi geeshshi ikkanno.” Mannu umosi dandiino loosooti yee hedannokki gede, “dinye” woy “lamalate kiiro” yitanno yaatto horoonsiꞌra dihasiissannohe.

7. Mitootu Qullaawu Maxaafi halaale huwattinohu mamaati? (1 Qorontoosi 14:23-25)

⁷ Gambooshsheho koyisa. Soqqamaasinchu Phaawuloosi yannara mitu manni Qullaawu Maxaafi halaale huwatinohu Kiristaanu gambooshshe dayi woyite ikkikki digatino. (1 Qorontoosi 14:23-25 nabbawi.) Xaa yannarano duucha woyite togoori ikkanno. Haaruuddu ayyaanaamittetenni rakke lophitannohu gambooshshenke daa hanaffanno woyiteeti. Insa gambooshsheho koyisa hasiissannohehu mamooteeti? Hegerera Hagiidhitanni Heeꞌra Dandaatto! yaanno maxaafira roso 10 gambooshsheho koyisa hasiissannota kulloonni; kayinni roso 10 iillatto geeshsha agara hasiissannohe yaa diꞌꞌikkino. Umo xaaddine hasaabbinanni woyite hasaawisatto mancho gambooshsheho koyisa dandaatto; koyisatto woyite dagate lallawo cuꞌmo woy hatte lamalara xiinxallinannite Agarooshshu Shae giddonni mitte hedo qummi assa dandaatto.

8. Mitto mancho gambooshsheho koyinseemmo woyite gambooshshinke daafira maa kula dandiineemmo? (Isayaasi 54:13)

⁸ Hasatto noosi mancho gambooshsheho koyisatto woyite gambooshshinke isi ammaꞌnowiinni baxxanno gara kulisi. Mitte Qullaawa Maxaafa xiinxallitanno beetto gambooshshe dagge Agarooshshu Shae xiinxallinanni gara laꞌe xiinxallissannose rodoo togo yite xaꞌmitino: “Massaganni noohu baalunku suꞌma afino yaate?” Rodoono, “Mininke manni suꞌma anfoommonte gede baalunku songote giddo noohu mittu mittunku manchi suꞌma afate woꞌnaalleemmo” yite qoltinose. Tini rosaancho ise hadhanno beetekiristaanera noohu rooru manni mimmitu suꞌma afinokkita coyidhino. Qoleno mittu rosaanchira gambooshshinke baxxinoha ikkinota wole doogono kula dandiineemmo. (Isayaasi 54:13 nabbawi.) Gamba yineemmohu Yihowa magansiꞌrate, isiwiinni rosateetinna mimmito jawaachishateeti. (Ibi. 2:12; 10:24, 25) Hakko daafira gambooshshinke ammaꞌnote seera wonshinanniha ikkikkinni amanyootu noohonna kaaꞌlannoho. (1 Qo. 14:40) Gambooshshu bayichino bikkunnihonna rosate injaannoho. Qoleno poletikaho anga wodhineemmokki daafira poletiku daafira kayinse dihasaambeemmo hattono diheewisammeemmo. Rosaanchoho Gambooshshu Addaraashenkera Maa Maa Assinanni? yitanno viidiyo balanxe leellinshummosiro kaaꞌlitannosi. Hatto ikkiro, gambooshshunniwa assinanniri haaro diꞌꞌikkannosi.

9-10. Mitto mancho gambooshsheho koyinseemmo woyite daa waajjannokki gede maa assa dandiineemmo? (Misileno lai.)

⁹ Mitootu “Ammaꞌnonke soorriꞌneemmo gede xaꞌminanninke” yite waajjitanno daafira gambooshshe daate hobbi ruxxi yitanno. Hasaawisatto manchira, wosinu daannota banxeemmota hattono ammaꞌnonke wido ikkanno gede woy dawaro qolanno gede giddeessineemmokkita buuxisisi. Maate qaaqquullinsa ledo gambooshshenke daa dandiitanno. Gambooshshinkewa qaaqquulleho addi roso diqixxeessinanni. Hatteentenni annuwunna amuuwu oosonsa ledo mitteenni ofolle rosanno. Konni garinni annuwunna amuuwu oosonsa ayee ledo nooronna maa rossannoro affanno. (Mar. 31:12) Woxe gamba diassineemmo woy mutsuwaateho saffe didoyissineemmo. Hatteentenni Yesuusi “Mulla adhitinoonnire mulla uuyye” yee hajajino hajajo wonshineemmo. (Mat. 10:8) Gambooshshe daate lowo woxinni hirroonni uddano hasiissannosikkitano kula dandaatto. Maganu aana ikkikkinni wodana laꞌꞌanno.—1 Sa. 16:7.

¹⁰ Koyisootto manchi gambooshshe dayiro boorrasannokki gede dandiittore baala assi. Songote cimeeyyenna wole halashshaano ledo egensiisisi. Isi boorrasa hoogiro galagale gambooshshe daa hasiꞌrannoha ikkara dandaanno. Gambooshshu yannara Qullaawu Maxaafi noosikkiha ikkiro ate ledo laꞌꞌanno gede assi; hattono lallawo shiqqanno woyite woy Agarooshshu Shae xiinxallinanni woyite haꞌrunsineemmo gara leellishisi.

XIINXALLO HANAFISIINSEEMMO WOYITE

11. Hasaawisatto manchi yannanna pirogiraamesi ayirrisattota leellisha dandaattohu hiittoonniiti?

¹¹ Mittu manchira Qullaawa Maxaafa xiinxallinseemmo woyite dea hasiissannonkekki coyi maati? Xiinxallisatto manchi yannanna pirogiraamesi ayirrisi. Lawishshaho, dinye amadoottoha ikkiro qooxeessikki mannira dinye ayirrisate daafira noonsa lao ikkitutano ikkituro, dinye amadootto saatera mari. Qoleno umo xaaddine xiinxallitinanni yanna haransa dancha ikkitara dandiitanno. Mite woꞌnaalshu noonsa halashshaano xiinxallinsanni manchi lede xiinxalla hasiꞌrannoha ikkiro nafa mulenni uurrisa dancha ikkitinota coyidhino. Qoleno lowore coyidhooti. Xiinxallisatto manchi coyiꞌranno gede assi.—Law. 10:19.

12. Qullaawu Maxaafi xiinxallo hanafisiinseemmo woyite mixonke maa ikka hasiissannose?

¹² Qullaawu Maxaafi xiinxallo hanafisiisatto woyite umonni xiinxallisatto manchi Yihowanna Yesuusa afanno gede hattono insa albinni roore baxanno gede kaaꞌlate mixiꞌra hasiissannohe. Ate woy Qullaawu Maxaafi egennokki ikkikkinni Maganu Qaale illachishanno gede assite tenne assa dandaatto. (Soq. 10:25, 26) Soqqamaasinchu Phaawuloosi duucha woyite rosiisanno yannara Yihowa iso anfeemmonna banxeemmo gede ninke kaaꞌlara soyinoha Yesuusi Kiristoosi illachishanno. (1 Qo. 2:1, 2) Qoleno Phaawuloosi haaro rosaanora culkunni, birrunninna dilqa kinnanni lawinsoonniti kaajja akatta heedhannonsa gede kaaꞌla hasiissannota ikkitinota xawisino. (1 Qo. 3:11-15) Tenne akatta giddo gama ammanate, hayyote, wodanchatenna Yihowa waajjate. (Fa. 19:9, 10; Law. 3:13-15; 1 Ph. 1:7) Rosaanoꞌne ammanansa kaajjishidhanno gedenna baxillaanchu iimi Anninsa ledo kaajja jaalooma kalaqidhanno gede kaaꞌlitine Phaawuloosita rosiisate hayyo haꞌrunsa dandiitinanni.—2 Qo. 1:24.

13. Hasatto noonsare kaaꞌlineemmo woyite cincineemmorenna wodanchineemmore ikkanke leellisha dandiineemmohu hiittoonniiti? (2 Qorontoosi 10:4, 5) (Misileno lai.)

¹³ Cincitinannirenna wodanchitinannire ikkitine rosiissinanni woyite Yesuusi lawishsha haꞌrunse. Rosaanchu saalanno gede assitanno xaꞌmuwa xaꞌmitinoonte. Huwatate qarrissinosi hedo heedhuro agurtine saꞌine hatte hedowa gedensaanni higa dandiitinanni. Leellinosikki coye ammananno gede xixxiiwantenni halaalu wodanisira rumuxxa geeshsha agarre. (Yoh. 16:12; Qol. 2:6, 7) Qullaawu Maxaafi diigate sharrammeemmoha kaphu roso qiishote ledo heewisiisanno. (2 Qorontoosi 10:4, 5 nabbawi.) Rosaanchinkera lowo diro ammane keeshshino roso agura shota ikka hooggasira dandiitanno. Konnira balanxe, Yihowa ledo kaajjado jaalooma kalaqiꞌranno gede kaaꞌla hasiissannonke. Hatto ikkiro isira, cuꞌmiꞌre keeshshino roso agura qarra diꞌꞌikkitannosi.—Fa. 91:9.

HAAROTE GAMBOOSHSHE DAGGINORE KAAꞌLA DANDIINEEMMO GARA

14. Haarote gambooshshenke dayino manna ma garinni kaaꞌla hasiissannonke?

¹⁴ Yihowa, gambooshshenke haarote daanno manni budinsa, sirchinsa, dagoomu giddo noonsa bayichi woy lophino gari ikkihano ikkiro, mallaandummokkinni kaaꞌlinammora hasiꞌranno. (Yaq. 2:1-4, 9) Ikkina gambooshshenke daanno mannira baxille leellisha dandiineemmohu hiittoonniiti?

15-16. Gambooshshenke haarote dagginori borsitannokki gede kaaꞌla dandiineemmohu hiittoonniiti?

¹⁵ Mitootu gambooshshenke daggannohu laꞌꞌate quqquxantino daafira woy wolu qooxeessira heeꞌranno manchi gambooshshe hadhanno gede jawaachishinonsa daafira ikkara dandaanno. Hakko daafira gambooshshenke daannoha togoo manna shinqe hasaawisate hobbi ruxxi yaa dihasiissannonke. Insa saalfattanno gede assitinikkinni anga fantine haadhe. Ledoꞌne ofoltanno gede asse. Qullaawa Maxaafaꞌnenna xiinxallinanni borro leellishshensa woy insara wole uuyyensa. Qoleno borsitannokki gede kaaꞌlate wolere maa assa dandiitinanniro hedde. Gambooshshu Addaraashe dayinohu mittu manchi anga fane haaꞌrinosi rodiira uddiꞌre dayino uduunni saalfatanno gede assinosita kulino. Roduuno qarru nookkita kulisihu gedensaanni, Yihowa Farciꞌraasineno wolu manni gedeereentilla yiinosi. Kuni manchi gedensoonni ayyaanaamittetenni lophe cuuamino; kayinni kuni rodii assinosire horo dihawino. Haaruuddu gambooshshenke dagganno woyite gambooshshu hanafara albaanni woy goofihu gedensaanni insa daafira heddinannita leellishshe; kayinni uminsa hajo giddora eꞌinoonte.—1 Ph. 4:15.

¹⁶ Qoleno mannu ledo hasaambeemmo woyite, dawaro qolleemmo woyitenna kifile shiqinsheemmo woyite Yihowa Farciꞌraasine ikkinokki manna woy ammaꞌnonsa ayirrinseemmota leellishannore coyiꞌne insa anga fanne haaꞌneemmota leellisha dandiineemmo. Insa gufidhanno woy koffi yitanno gede assannore coyidhinannikki gede qorophe. (Tit. 2:8; 3:2) Lawishshaho, ammaꞌnonsa daafira gara ikkinokkire dicoyiꞌneemmo. (2 Qo. 6:3) Roorenkanni dagate lallawo shiqishshannori togoore qoropha hasiissannonsa. Qoleno insa huwatate qarrisanno qaale woy hedo xawisse kulte macciishshaanote giddo noohu Yihowa Farciꞌraasine ikkinokki mannira heddannota leellisha dandiitanno.

17. Soqqanshonniwa “suwashshu wodani” noonsarinni xaandeemmo woyite mixonke maati?

¹⁷ Manna rosaano assate loosinke hashshe soodi kiiro albinni roore wiinamme loonsanniho; hattono “hegere heeshshowa massannohu suwashshu wodani noonsa” manna hasa diagurreemmo. (Soq. 13:48) Tenne assineemmo woyite insa Qullaawu Maxaafi xiinxalloranna gambooshsheho koyisate hobbi ruxxi diyineemmo. Konni garinni insa ‘heeshshote widira massitanno doogora’ haꞌrate umi qaafo adhitanno gede kaaꞌla dandiineemmo.—Mat. 7:14.