XIINXALLOTE BIRXICHO 40
FAARSO 111 Hagiidhineemmo Gede Assannonkere
Yihowa ‘Hagiirsiisannonke Maganooti’
“Hagiirsiisannoe Maganiwa mareemmo.”—FA. 43:4.
GUULCHO HEDO
Hagiirrenke hunannori maatironna galagalle hagiirraamma ikka dandiineemmohu hiittoonniitiro ronseemmo.
1-2. (a) Xaa yannara batinye manna hiittoo hedo waaddannonsa? (b) Konni birxichira maa xiinxallineemmo?
XAA yannara batinyu manni hagiirre afiꞌrate haqqa reejje yaanno. Ikkirono kuni manni geedote hagiirre afiꞌra didandiino. Batinyu manni ditidhinoommoreeti yee hedanno daafira lowo geeshsha dadillanno. Mite Yihowa soqqamaanono togoo hedo waaddannonsa. Heeꞌnoommohu “goofimarchu barruwa” giddo ikkino daafira, ninkerano lowo geeshsha yaandeemmo woy dadillineemmo gede assannonke qarri iillankera dandaannota anfoommo.—2 Xi. 3:1.
2 Konni birxichira hagiirrenke hunara dandaannori maatironna galagalle hagiirraamma ikka dandiineemmohu hiittoonniitiro ronseemmo. Kayinni hanni balanxe addu hagiirri Buicho ayetiro laꞌno.
ADDU HAGIIRRI BUICHO
3. Kalaqamu Yihowa daafira maa rosiisannonke? (Misillano lai.)
3 Yihowa woꞌmanka woyite hagiirraamoho. Ninkeno hagiirraamma ikkinammora hasiꞌranno. Isi hagiidhineemmo gede assannoha batinye coye kalaqinohu iseraati; lawishshaho biifado uulla, addi addi kuula, godoꞌlitannota addi addi saadanna falakkinota coommitanno sagale kalaqino. Maganu addinta baxannonke hattono hagiirru noo heeshsho heeꞌnammora hasiꞌranno!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Godoꞌlitanno saada Yihowa hagiirraamo ikkinota leellishshanno (Gufo 3 lai))
4. (a) Yihowa alamete aana noo qarra laꞌꞌannoha ikkirono hagiirraamo ikke heeꞌrinohu hiittoonniiti? (b) Yihowa uyinonke elto maati? (Faarso 16:11)
4 Yihowa ‘hagiirraamo Magano’ ikkirono uullate aana noo qarranna shetto seekke afino. (1 Xi. 1:11) Ikkirono tini hagiirresi huntara diwodhino. Isi baalunku qarri yannate geeshshiha ikkinota afino; hattono isi umisi konne qarra hunanno yanna murino. Qoleno Yihowa baalanka dadillenna shetto hegerera hunanno yanna iillita geeshsha cince agare no. Hatti yanna iillita geeshsha Yihowara qarrinke leellannosi; hattono isi kaaꞌlankera hasiꞌranno. Isi kaaꞌlannonkehu hiittoonniiti? Yihowa hagiirre elto asse uyinonke; ninke kaaꞌlannonketi mitte doogo tenneeti. (Faarso 16:11 nabbawi.) Hanni isi tenne elto Beettisi Yesuusira uyino gara laꞌno.
5-6. Yesuusi hagiirraamo ikkinohu mayiraati?
5 Yihowa kalaqino kalaqami baalu giddo Yesuusi geeshsha hagiirraamu dino. Mayira? Hanni lame korkaata laꞌno. (1) “Isi leellannokki Maganira lawishshaho;” hattono Annisi akata duucha doogganni guutu garinni leellishanno. (Qol. 1:15; 1 Xi. 6:15.) (2) Yesuusi roore yanna heeꞌrinohu hagiirru Buicho ikkinohu Annisi ledooti.
6 Yesuusa Annisi assi yaannosire baalankare assa woꞌmanka woyite hagiirsiissannosi. (Law. 8:30, 31; Yoh. 8:29) Isi ammanaminoha ikkino daafira Yihowa lowo geeshsha hagiirsiisino.—Mat. 3:17.
7. Addu hagiirre afiꞌra dandiineemmohu hiittoonniiti?
7 Hagiirru Buicho ikkinohu Yihowawa gamba yine ninkeno addu hagiirre afiꞌra dandiineemmo. Yihowa daafira ronsummonna isi lawishsha haꞌrunsinummo kiiro albinni roore hagiirraamma ikkineemmo. Maganu fajjo assanna iso hagiirsiinsoommota afano hagiirraamma ikkineemmo gede assitannonke.a (Fa. 33:12) Kayinni mito woyite woy woꞌmanka woyite hagiirrinke baꞌꞌannohalla ikki? Hatto yaa Yihowa dihagiirsiinsoommo yaateni? Deeꞌni! Ninke guuntete xeꞌne noonkereeti hattono mito woyite xissiisiꞌneemmo, dadillineemmo qoleno quwa saꞌne yaandeemmo. Yihowara tini leeltannosi. (Fa. 103:14) Hanni hagiirrenke hunara dandaannori maatironna galagalle hagiirraamma ikka dandiineemmohu hiittoonniitiro laꞌno.
AYE COYINO HAGIIRREꞌNE HUNARA WODHITINOONTE
8. Iillannonke qarri ma ikkineemmo gede assankera dandaanno?
8 Hagiirrenke hunannore Kiiro 1: Iillannonke qarra. Dartu, kalaqamu dano, buxima, dhibbu woy geedhimma waaddanni noohe? Togoo qarri iillannonke woyite roorenkanni konne qarra hooꞌlate assa dandiineemmori nookkiha ikkiro hagiirrinke baꞌꞌara dandaanno. Qullaawu Maxaafi ‘dadillu wodana hiiqqannota’ kulanno. (Law. 15:13) Shoolu diri giddo rodoosi hattono annasinna amasi shiiꞌrinohu Beebisi yinannihu songote cimeessi togo yiino: “Callatoommo hattono kaaꞌlannoehu dino yee hedoommo. Qoleno anniꞌyanna amaꞌya hattono rodiiꞌya reyara albaanni anga mitiiꞌmeemmo daafira insa ledo dancha yanna sayisa dandoommokkihura mito woyite lowo geeshsha xissiisiꞌreemmo.” Addanko iillannonke qarri wolqa baꞌneemmo gedenna hexxo mudhineemmo gede assankera dandaanno.
9. Galagalle hagiirraamma ikkineemmo gede kaaꞌlannonkeri maati? (Ermiyaasi 29:4-7, 10)
9 Galagalle hagiirraamma ikkineemmo gede kaaꞌlannonkeri maati? Soorra dandiineemmokki coyira yaada agurre noonke coye naandeemmoha ikkiro galagalle hagiirraamma ikka dandiineemmo. Alamete noo manni hagiirraamma ikkinannihu hasiꞌnoonni gedee heeshsho heeꞌniro calla ikkinohu gede asse hedanno. Kayinni tini digaraho. Lawishshaho, Yihowa Ayihudete manni Baabiloonete qafadame noo yannara iillinonsa qarra ammane adhanno gedenna hagiirru noo heeshsho heeꞌrate dandiire baala assanno gede kulinonsa. (Ermiyaasi 29:4-7, 10 nabbawi.) Ninke maa ronseemmo? Iillanni noohere ammante adhi hattono noohehu danchu coyira galatattoha ikki. Tenne assatto woyite Yihowa kaaꞌlannoheta qaagi. (Fa. 63:7; 146:5) Hedeweelcho danonni kainohunni laanshaabbinoti Eefi yinanni rodoo togo yitino: “Yihowa, maateꞌyanna songote giddo noo roduuwi lowo geeshsha kaaꞌlitinoe. Hakko daafira hexxo mudha galata baꞌꞌate yee hedoomma. Yihowanna lowo geeshsha kaaꞌlitinoe jaallaꞌya galateemmansata leellisha hasiꞌreemma.”
10. Qarru iillinkerono hagiirraamma ikka dandiineemmohu mayiraati?
10 Heeshshonke gari ninke hasiꞌneemmo gedeeha ikka hoogiro nafa woy ninkera woy maatenkera buutote qarri iillinkerono hagiirraamma ikka dandiineemmo.b (Fa. 126:5) Mayira? Korkaatuno hagiirraamma ikkineemmo gede assannonkehu heeꞌnoommo gara diꞌꞌikkino. Maariya yinanni suwisaancho togo yitino: “Qarru iille heeꞌreennahenni hagiirraamo ikkatto yaa macciishshamannohere lashshi assatto yaa diꞌꞌikkitino. Hatteentenni Yihowa eino qaale dihawootto yaate. Anninke hagiirrinke baꞌꞌannokki gede assiꞌneemmo gede kaaꞌlannonke.” Xaa yannara iillannonke qarri ikkihano ikkiro, iillannonke qarri baalu yannate geeshshiha ikkinota yaano wayi qaccera shaafu aana noo haꞌrumi gedeeha ikkinota qaango. Muli yannara Yihowa dadillineemmonna qarrammeemmo gede assannonkere baala hunanno.
11. Soqqamaasinchu Phaawuloosi lawishshi jawaachishannohehu hiittoonniiti?
11 ‘Qarru iillanni noonkehu Yihowa hagiirsiinsoommokki daafiraati’ yine heda hananfoommohalla ikki? Togoo woyite lowo qarri iillinonsari Yihowari ammanantino soqqamaano daafira heda kaaꞌlitankera dandiitanno. Hanni soqqamaasinchu Phaawuloosi lawishsha laꞌno. ‘Dagate, mootoollatenna Israeelete oosora’ halaale kulanno gede iso Yesuusi umisi doorino. (Soq. 9:15) Tini dhagge ikkitanno qoossooti! Ikkirono, Phaawuloosi qarru nookki heeshsho heeꞌrino yaa diꞌꞌikkino. (2 Qo. 11:23-27) Phaawuloosira uurrannokkiha lawanno qarri iillinosi yaa isi Yihowa dihagiirsiisino yaateni? Hatto yaa diꞌꞌikkino! Hatteentenni isi qarra cince saꞌꞌasi Yihowa maassiꞌrinosita leellishshanno. (Rom. 5:3-5) Hanni xa atera iillanni nooheri daafira hedi. Iillinohe qarra baala ammanante dandiite saꞌꞌanni nootto. Hakko daafira atino Yihowa hagiirsiisoottota addaxxa dandaatto.
12. Woꞌmitukkinni keeshshitanno hexxo hagiirrenke huntara dandiitannohu hiittoonniiti?
12 Hagiirrenke hunannore Kiiro 2: Woꞌmitukki keeshshitanno hexxo. (Law. 13:12) Yihowara noonke baxillinna galati isira soqqamate mixo fushshiꞌneemmo gede kakkayisannonke. Ikkirono fushshiꞌnoommo mixo wonshiꞌra qarra ikkitunkero hexxo mudhinammora dandiineemmo. (Law. 17:22) Hoolii yinanni suwisaancho togo yitino: “Wole gobba haꞌre soqqamate Maganu Mangiste Sawaakooti Rosi Mine eꞌꞌe rosa woy Ramapo loonsanniha ijaarshu looso haꞌre loosa hasiꞌroomma. Kayinni noomma gari soorramino daafira tenne mixo wonshiꞌra didandoomma. Hexxo mudhoomma. Mitto coye assa hasiꞌne heeꞌnenni dandaa hooga caacceessitanno.” Lowo manni tenne hedora sumuu yaanno.
13. Assa hasiꞌnoommo geeshshire assa dandiinoommokkiha ikkiro hiittoo mixo fushshiꞌra dandiineemmo?
13 Galagalle hagiirraamma ikkineemmo gede kaaꞌlannonkeri maati? Yihowa assa dandiineemmokkire asse yaannonkekkita qaango. Wolootu assitanno geeshshire assa dandiineemmokkiha ikkiro nafa isi assineemmore naadanno. Yihowa dhukanke anfoommorenna ammanammoommore ikkinammora hasiꞌranno. (Mik. 6:8; 1 Qo. 4:2) Isi assineemmorinni roore giddoyidi ayimmanke laꞌꞌanno. Ninke, Yihowa assinammora hasiꞌrannokki geeshshire assa hasiꞌra garahoni?c Digaraho! Assa hasiꞌratto geeshshire assa dandoottokkiha ikkiro wonshiꞌra dandaatto mixo illachishate woꞌnaali. Wedella qajeelsa woy geedhitino roduuwa jawaachisha dandaatto? Mitto mancho noowa marte, silke dowwolte woy sokka borreessite jawaachishate mixo fushshiꞌra dandaatto? Yihowa kaaꞌlitannotanna wonshiꞌra dandaattota togoo mixo fushshiꞌrate sharramatto woyite hagiidhatto gede asse maassiꞌrannohe! Qoleno muli yanna giddo haaro alamera, heda nafa dandiineemmokki garinni Yihowara hegerera soqqamate faro noonketa deꞌooti. Aleenni kulliti Hoolii togo yitino: “Badhe hige irkiꞌre ofolle aneneetira, ‘Hegerera heeꞌrate hexxo nooe; Yihowa kaaꞌlonni haaro alamera mite mixoꞌya wonshiꞌra dandeemma’ yeemma.” Ninkeno hatto yaa dandiineemmo.
14. Hagiirrinke baꞌꞌanno gede assara dandaannori woluri maati?
14 Hagiirrenke hunannore Kiiro 3: Maalu hagiirre calla shorra. Mitootu addu hagiirre afiꞌnannihu meessaneeto hagiirsiinsirooti yitanno hedo dagoomittete miidiyi widoonni tareessitanno. Banxeemmo coye assinummoro, hasiꞌnoommo coye hidhinummoronna addi addi bayicho haꞌnummoro addu hagiirre afiꞌneemmo yine heda hananfammora dandiineemmo. Hagiirsiisannonke coye assa qarra diafidhino. Yihowa dancha coye naada dandiineemmo gede asse kalaqinonke. Ikkirono batinyu manni hagiirre abbannonke yee hedanno coyi hagiirrensa huninota wodanchino. Suwisaancho ikkite soqqantannoti Eeva yinanni rodoo togo yitino: “Ateneeto calla hagiirsiisate illachishattoha ikkiro ikkinoe yaatto coyi diheeꞌranno.” Maalu hagiirre calla shorrineemmoha ikkiro dadillineemmo hattono hexxo mudhineemmo.
15. Moote Selemooni lawishshinni maa ronseemmo?
15 Moote Selemooni lawishshinni maalu hagiirre calla shorre dadille abbitannota ronseemmo. Isi halchosi wonshiꞌre hagiirre afiꞌrate woꞌnaalino; lawishshaho dancha sagale, baxisanno muuziiqanna hatte yannara woxu hirara dandaanno coye baala gamba assiꞌrino. Ikkirono isi kassi diyiino. Isi “Ille laꞌe diduubbanno; maccano macciishshite dibagganno” yee borreessino. (Ros. 1:8; 2:1-11) Alame addu hagiirre abbanno yite heddanno coy kaphu birri gedeeti. Kaphu birri addunniha lawanno; kayinni mitto coyeno hira didandaanno.
16. Wolootaho aa galagalle hagiirraamma ikkineemmo gede kaaꞌlitannonkehu hiittoonniiti? (Misillano lai)
16 Galagalle hagiirraamma ikkineemmo gede kaaꞌlannonkeri maati? Yesuusi “Adhannonkunni aannohu roore hagiirraamoho” yee rosiisino. (Soq. 20:35) Alekoosi yinannihu songote cimeessi togo yiino: “Wolootaho shiimaadda coye assa illachishoommo. Wolootaho uyummo kiiro aneneeti daafira illachisha agureemmo hattono hagiirraamo ikkeemmo.” Ati woloota kaaꞌlate maa assa dandaatto? Dadillino mancho afittoro iso jawaachishate woꞌnaali. Qarrasi tira hoogattora dandaatto; kayinni mararattosita leellishanno garinni macciishshite, shaqqille leellishshenna duhasi Yihowa aana tuqqanno gede qaagiissite sheshifachishattosira dandaatto. (Fa. 55:22; 68:19) Yihowa tuge agurannosikkita buuxisseno kaaꞌlattosira dandaatto. (Fa. 37:28; Isa. 59:1) Sagale qixxeessitesi woy lekkatenni ledosi milli yite nafa iso kaaꞌla dandaatto. Ledokki soqqansho fulanno gede koyisisi; tini hagiirre afiꞌranno gede assitannosi. Yihowa horoonsiꞌrahera maahoyye yii. Ninkeneeto ikkikkinni woloota illachisha addu hagiirre afiꞌneemmo gede assitannonke!—Law. 11:25.
Umikki hasatto ikkikkinni wolootaho hasiisannore illachishi (Gufo 16 lai)d
17. Addu hagiirre afiꞌrate maa assa hasiissannonke? (Faarso 43:4)
17 Iimi Anninkewa albinni roore shinqummoro addu hagiirre afiꞌra dandiineemmo. Qullaawu Maxaafi Yihowa ‘hagiirsiisannonke Magano’ ikkinota kulanno. (Faarso 43:4 nabbawi.) Iillannonke coyi ikkihano ikkiro beꞌe diyineemmo. Hakko daafira woꞌmanka woyite hagiirrinke Buicho Yihowa illachisha agurroonke!—Fa. 144:15.
FAARSO 155 Hegere Hagiirrenke
a “Hagiirre Afiꞌrate Alba Yihowawa Higi” yitanno saaxine lai.
b Lawishshaho 2023 Aliidi Bisi Rippoorte Kiiro 5 Deennisinna Iriina Kiristenseni Xaꞌminoonnita Qaalu Xaꞌmo lai.
c Ledde afate Maaja 15, 2008 Agarooshshu Shaera (Amaaru Afoo) fulinoha “Uminkewiinni Agadhineemmo Coyira Dhukanke Anfoommore Ikkine Hagiirraamma Ikka” yaanno birxicho lai.
d MISILETE XAWISHSHA: Mitte rodoo hasiisannosere lowore hidhitino; kayinni jawaante hasiissannosete mitte jawa rodoora awawa hirte uyituti roore hagiidhitino.