Lame Haaro Aliidi Bisi Miilla
BIRRA 5, 2024 diru gambooshshiwa mitto baxxino egensiishsha kulloonni: Roduu Jodiy Jeedilinna Jeekoobi Remfi Yihowa Farciꞌraasineha Aliidi Bisi miilla ikkite shoomantino. Lamunku roduuwi lowo diro Yihowara ammanante soqqantino.
Jodiy Jeedilinna minaamasi Damaariisi
Roduu Jodiy Jeedili ilaminohu Yunayitidi Isteetisete Mizuuri yinanniwaati; hattono lophinohu halaalu mineeti. Maatesi heedhannohu gari geeshsha sabbankoonnikki qoqqowiraati. Hakko daafira isi hakko qooxeessira dancha duduwo sabbakate daggannori addi addi budi noonsa roduuwi ledo egennamino. Insa leellishshanno baxillinna mittimmansa iso lowo geeshsha kaaꞌlitinosi. Isi Birra 15, 1983 cuuamino. Roduu Jodiy Jeedili soqqansho baxanno hattono layinki dirimi roso gudihu gedensaanni Wocawaaro 1989 woꞌma yanna suwisaancho ikke soqqama hanafino.
Roduu Jodiy Jeedili wedellichu noo waro annisinna amasi isonna meya rodoosi Beeteele daaꞌꞌatara haadhe hadhannonsa. Tini kuri lamunku qaaqquulli Beeteelete soqqamate mixo fushshiꞌranno gede kakkayissinonsa; gedensoonni mixonsa woꞌmitino. Roduu Jodiy Jeedili Wocawaaro 1990 Wolkiili Beeteele eino. Isi umi qara Mine Fiinanni Golira loosino; gedensoonni Beeteelete Maatehu Fayyimmate Owaante Golira soqqamino.
Hatte yannara qooxeessaho nooti Ispeenete afiinni massanganni songuwa lophitanni no; hattono kaaꞌlitannori labballu roduuwi hasiisse no. Hakko daafira Roduu Jodiy Jeedili Ispeenete afiinni massanganni songo ei hattono konne afoo rosa hanafi. Shiima yanna gedensaanni hakko woradi giddo suwisaancho ikkite soqqantannote Damaariisi yinanni rodoo ledo egennami. Gedensoonni insa adhamino hattono Beeteelete mitteenni soqqama hanafino.
Insa 2005 annuwansanna amuuwansa towaaxxate Beeteeletenni fulino. Hatte yannara insa woꞌma yanna suwisaano ikke soqqamino. Roduu Jodiy Jeedili Suwisaanote Soqqansho Rosi Mine rosiisa kaaꞌlino hattono qooxeessunnite Hospitaalete Ledo Xaadissanno Komite giddonna Qooxeessunnite Gimbaatu Komite giddo loosino.
Hakkiinni 2013 Rodoo Jodiy Jeedilinna Damaariisi Woorwiiki loonsanniha ijaarshu looso loosara galagalle Beeteele koyinsinsa. Qoleno insa hatte yannanni hanaffe Paaterseninna Wolkiili Beeteelera soqqantino. Roduu Jodiy Jeedili Qooxeessunnihu Akeekunna Gimbaatu Goliranna Hospitaalete Mashalaqqe Aanno Golira soqqamino. Hakkiinni isi Badheessa 2023 Soqqanshote Komite kaaꞌlaancho ikke soqqamanno gede shoommisi. Isi uyinoonnisiha addi addi looso qaage togo yiino: “Haaro looso uyinannihe woyite mito woyite lowo geeshsha waajjattora dandaatto. Kayinni mittu coyi ikkanno gede assannohu Yihowa ikkino daafira togoo woyite iso addaxxa hasiissannoheta qaagatto.”
Jeekoobi Remfinna minaamasi Inga
Roduu Jeekoobi Remfi ilaminohu Yunayitidi Isteetisete Kalifoorniyahooti. Isi anje noo yannara amasi ayyaanaamittetenni qiiddino; ikkirono isira Qullaawu Maxaafi halaale rosiisate sharrantino. Qoleno isi diru kiiro Yihowara ammanante soqqantanno ahaahesi laꞌꞌara haꞌranno. Ise isira halaaleho noosi hasatto lexxitanno gede kaaꞌlitinosi hattono isi 13 dirihu heeꞌre Qullaawa Maxaafa xiinxalla hanafino. Wocawaaro 27, 1992 wedellichu heeꞌre cuuamino. Amasi ayyaanaamittetenni galagalte jawaattino; qoleno annisinna roduuwisi baalu ayyaanaamittetenni lophite cuuantino.
Roduu Jeekoobi Remfi wedellichu heeꞌre suwisaano hagiirraamma ikkitino gara laino. Hakko daafira isi layinki dirimi roso gudihu gedensaanni Wocawaaro 1995 suwisaancho ikke soqqama hanafino. Isi sabbakkannori roore hasiissannowa soqqamate 2000 Ikuwadoore haꞌrino. Hakkiicho isi Kanaadunni dagginote Inga yinannite suwisaancho ikkite soqqantanno rodoo ledo egennami; gedensoonni insa adhamino. Insa adhame Ikuwadoori katamira noote shiima halashshaano noo gaamo ledo soqqama hanafi. Xaa yannara hatti gaamo jawa songo ikkitino.
Roduu Jeekoobi Remfinna Inga mite yanna geeshsha baxxitino suwisaano ikke soqqamino hattono gedensoonni woradu looso loosino. Hakkiinni insa 2011 Giliyaadi Rosi Mine 132 kifile eꞌꞌe rosanno gede koyinsinsa. Insa maassamihu gedensaanni addi addi bayicho duuchu gari soqqansho soqqamino; lawishshaho Beeteelete soqqamino, misiyoone ikke soqqamino hattono woradu looso loosino. Roduu Jeekoobi Remfi Maganu Mangiste Sawaakooti Rosi Mine rosiisate qoossono afiꞌrino.
Koroonu fayya ubbino daafira Roduu Jeekoobi Remfinna minaamasi agure Yunayitidi Isteetise higino. Insa Wolkiili Beeteele eanno gede koyinsoonninsa; hakkiicho Roduu Jeekoobi Remfi Soqqanshote Golira loonsanni gara qajeelino. Gedensoonni insa galagale Ikuwadoore haꞌre sinu biirora soqqamanno gede gaamminsa; hakkiicho Roduu Jeekoobi Remfi Sinu Biiro Komite miila ikke soqqamino. Hakkiinni insa 2023 Woorwiiki soqqantanno gede koyinsinsa. Arfaasa 2024 Rodoo Jeekoobi Remfi Soqqanshote Komite kaaꞌlaancho assine shoommoonni. Isi soqqamino bayichuwa qaage togo yiino: “Uyinannihe looso baxxinoha assanno coyi loosatto bayicho ikkikkinni ledo soqqamatto mannaati.”
Diinaggaabbe loossannore kuri roduuwa lowo geeshsha naandeemmo; hattono ‘insa gedee manna ayirrinseemmo.’—Fil. 2:29.