2023nni Danchare Hexxineemmohu Mayiraati?—Qullaawu Maxaafi Mayyaanno?

2023nnihu haaru dirira, ninke baalunku uminkeranna maatenkera danchare hexxineemmo. Danchare hexxineemmohu mayiraati?

Qullaawu Maxaafi hexxo noonketa kulanno

Qullaawu Maxaafi xa iillannonke qarri yannate geeshsha calla keeshshannoha ikkinotanna muli yannara baꞌꞌannota kulannonke. Isinni, Qullaawa Maxaafa borreessinoonnihu “Qullaawa Maxaaffa widoonni afiꞌneemmo cincanna jawaante hexxo uyitannonke” gedeeti.—Roomu Sokka 15:4.

• Qullaawu Maxaafi kulanno hexxo daafira ledde afate, “Woyyitino Yanna Dagganno Yine Hexxa Dandiineemmo?” yaanno birxicho nabbawi.

Xaa heeshshora nafa kaaꞌlitanno hexxo

Qullaawu Maxaafi kulanno hexxo “heeshshonkera milli miqqi yaannokkihu addaxxinanni mokkollichi gedeete.” (Ibiraawoota 6:19) Tini hexxo wodanaaꞌmineemmo gede assitannonke. Hexxo xa iillannonke qarra cincine saꞌneemmo gede, dancha danchare hendeemmo gedenna geedanno hagiirre afiꞌneemmo gede kaaꞌlitannonke. Lawishshaho:

• Qullaawu Maxaafi aanno hexxo, agu araado qarrissanno mancho kaaꞌlitino gara wodanchi. Alba Heeꞌreemmo Heeshsho Ceeꞌmishshaate yitanno viidiyo lai.

• Qullaawu Maxaafi aanno hexxo shiiꞌneemmo woyite kaaꞌlitannonkehu hiittoonniitiro huwati. Shiidhinorira Jawaante Ikkannore yitanno viidiyo lai.

Hexxokki kaajjishiꞌri

Batinyu manni danchuri ikkanno yee hexxanno; ikkirono hexxonsa woꞌmitannota addaxxa didandaanno. Qullaawu Maxaafi aanno hexxo kayinni hattoota diꞌꞌikkitino. Mayira? Korkaatuno Qullaawu Maxaafi kulanno hexxo, “kaphannokki Magani” Yihowaa uyinote. (Tiito 1:2) Uyino hexxo baalanta wonsha dandaannohu Yihowa callaati; isira “hasiꞌrinore assanno” wolqa noosi.—Faarso 135:5, 6.

Qullaawu Maxaafi kulannote addaxxinanni hexxo daafira ledde rosse horo afiꞌratto gede koyinsoommohe. “Qullaawa borro seekkite [laꞌꞌattoha]” woy xiinxallattoha ikkiro, tenne hexxo roore addaxxa dandaatto. (Soqqamaasinete Looso 17:11) Ninke ledo Qullaawa Maxaafa woxe baaxxittokki mulla xiinxallite tenne hexxo daafira ledde afa dandaatto. 2023ha haaro diro dancha hexxonni hanafi!