Armagedooni Oli Kaꞌꞌannohu Israeeleteeti?—Qullaawu Maxaafi Mayyaanno?

Qullaawu Maxaafi kulanno garinni, Armagedooni mittu qooxeessira calla kaꞌꞌanno ola ikkikkinni uullate gashshooti baalunna Maganu mereero kaꞌꞌanno olaati.

•  “Battete ayyaanna Woꞌmanka Dandaanno Maganihura batiꞌru barri olira gosa baalate mootoolla gamba assate hadhanno. Battete ayyaannano mootoolla gamba assite Ibiraawootu afiinni, ‘Armagedooni’ yinanni darga xaadissu.”—Yohaannisi Ajuuja 16:14, 16.

“Armagedooni” yaanno qaali, Haar Megidoon yaannohu Ibiraawootu qaalinni dayinoho; hatto yaa “Megido Ilaala” yaate. Megido hundi Israeelera noo katamaati. Hakko daafira, mitu manni Armagedooni oli Israeelete gobbara kaꞌꞌanno yee hedanno. Ikkollana, Megido noo bayichino ikko Mereerimu Soojjaatira noohu wolu aye bayichino “gosa baalate mootoolla” hattono olantonsa dihaaꞌranno.

Ajuujate maxaafa borreessinoonnihu malaattatenni woy lawishshu yaattonniiti. (Yohaannisi Ajuuja 1:1) Armagedooni addinta noo bayicho ikkikkinni daga alamete deerrinni Maganu gashshoote gibbe jeefote kaꞌanno woyite heedhanno ikkitooti.—Yohaannisi Ajuuja 19:11-16, 19-21.