Qullaawu Maxaafi Himani Woꞌmanno Gede Assinoha Poletiku Gaance

Xaa yannara mannu poletikunni billa biinxa fulino. Heeshshonsa ledo xaadooshshe afiꞌrinohu addi addi seeri daafira afuu dixaadannonsa; qoleno tenne hajubba daafira yekkeeramanno, nyerri yaanno. Gashshootu giddono, seera fushshitannorinna wole biilto duucha woyte lamewa baxxite hettisantanno; sumuu yaateno hasatto dinonsa. Togoo badooshshi poletiku gaanci kaꞌꞌanno gede assanno; togoo gaancinna bibbidama qolte gashshootu loososi loosannokki gede kuttubbe amaddanno.

Hakko iso Ameerikunna Biritaaniyu gobbuwara kaꞌꞌannohu poletiku gaanci roore illacha tunge laꞌnanniho. Mayira? Korkaatuno tenne lamente gobbuwara poletiku gaanci heeꞌrannota Qullaawu Maxaafi giddo balanxe himannoonni; qoleno Maganu xintinohu gordu gashshooti mannu ooso heeshsho woꞌmunni woꞌma soorrara daannohu kuni gaanci noo yannaraati.

“Goofimarchu barruwara” heeꞌrannoha poletiku gaance

Qullaawu Maxaafira Daanieeli maxaafi giddo mitte dhagge ikkitanno masaalo no. Hatte masaalora, Maganu “goofimarchu barruwara ikkannore” egensiisino; tini masaalo hakkawoyte albillitte yaano mannu heeshsho gudisante soorrantanno yannara ikkannore kultanni no.—Daanieeli 2:28.

Tenne Qullaawu Maxaafi masaalo kulloonnihu Maganu Baabiloonete mootera leellishino haaqee widoonniiti. Hatte haaqeera, moote babbaxxitino siwiillanni seekkinoonnita jawa misile laino. Gedensoonni masaalaanchu Daanieeli, tini misile umunni lekkate geeshsha alamete aana addi addi yannara kainohunna uwinohu jajjabbu gashshootira lawishsha ikkitinota xawisino.a Jeefoteno, Maganu xintino gashshootira lawishsha ikkannohu mittu jawu kinchi tenne misile gane cancananno.—Daanieeli 2:36-45.

Tini masaalo kultanno garinni, Maganu Gashshooti uullate gashshoote baala hune insa darga amadanno. Yesuusi rosaanosira “Gashshootikki dayo” yite huuccidhanno gede rosiisi woyte kulanni noohu konni Gashshooti daafiraati.—Maatewoosi 6:10.

Ikkina tenne Qullaawu Maxaafi masaalo giddo poletiku gaanci heeꞌrannota kulannohu hiikkoye qaaleeti? Misilete lekka “gama darate siwiilunni gama darate dorunni seekkinoonni” yinoonnita wodanchi. (Daanieeli 2:33) Kuni karsi siwiilla callatenni seekkinoonnihu wolu misilete bisinni baxxinoho; tini qolte wole gashshootubbanni baxxinohu mittu jawu alamete gashshooti heeꞌrannota leellishshanno. Ikkina kuni gashshooti wolootuwiinni mayinni baxxanno? Daanieeli masaalo togo yite xawissanno:

Tini masaalo kultanno garinni, misilete lekkanni lawinsoonnihu alamete gashshooti giddo poletiku gaanci heeꞌranno. Konni gashshooti giddo heeꞌranno manni uminsa konni gashshootira wolqa woy dhuka hunannore assanno.

Daanieeli masaalo xaa yannara woꞌmitanni no

Misilete lekka, yannankera noohu waaxo alamete gashshootira yaano Ameerikunna Biritaaniyu gashshootira lawishshaho. Yannankera ikkanni noori hatto yineemmo gede assannonke. Hiittoonni?

Misilete lekka “gamu darati siwiila, gamu darati dora” ikkase, lekka wolqiweeltanno gede assitanno. (Daanieeli 2:42) Xaa yannara Ameerikunna Biritaaniyu gashshooti manninsa mereero noo babbadooshshinni kainohunni wolqiweelino. Lawishshaho, lamente gobbuwara heeꞌranno manni insa insanaawa kiphi yaanno. Qoleno mannootu qoossonsara wolqatenni gaarantanno hattono finqilte doogo fultanno. Doorantino gashshaanonsano duucha woyte addi addi hajo lainohunni mitto afoo ikka hoogganno. Manninsa mereero lowo badooshshi noo daafira, lamunku gashshooti assineemmo yiinore assa mito woyte gooddo ikkitannonsa.

Hanni Daanieeli masaalo giddo kulleenna xaa yannara woꞌmitanni noota mite coyibba lende laꞌno:

Masaalo: “Hakko gashshooti lamewa [beehamanno]. Doru ledo karsamino siwiila laittonte gede, hakku gashshootino gamu siwiilu gede kaajjinoha ikkanno.”—Daanieeli 2:41.

Tiro: Ameerikunna Biritaaniyu manninsa mereero poletiku babbadooshshi nooha ikkirono, jawa olantote wolqa noonsareeti. Konni daafira, siwiilu gedee jawaantenni kaajjado qaafo adha dandiitanno silxaane noonsa.

Masaalote Gumulo

Gashshootubba 2023nni olantote fushshitino woxe hendiro, Ameerikunna Biritaaniyu calla fushshino woxi insanni aante nooti 12 jajjabba gobbuwa fushshitino woxe rooranno.—Stockholm International Peace Research Institute.

“Biritaaniyunna Ameeriku gobbansara gaaramatenna gobbansa agarate mitteenni loosanno gari . . . wole aye gobba mereero noo aante rooranno; qoleno tennera yannittenna xurqa ikkitino tekinooloje horoonsiꞌneemmo. . . . Mitteenni loonseemmo, mimmitoho halammeemmo, mitteenni kaaꞌlamme olammeemmo.”—Strategic Command, U.K. Ministry of Defence, April 2024.

Masaalo: “Lekkate qubbe gamu darati siwiila, gamu darati dora ikkinonte gede, hakku gashshootino gamu darati jawaata, gamu darati wolqiweelo ikkanno.”—Daanieeli 2:42.

Tiro: Ameerikunna Biritaaniyu jawa olanto noonsare ikkiturono, dimokiraasete gashshootinsa loosanno gari fajjannonsakki daafira, assa hasidhinore baala assite diaffanno. Mitte wodho rooru manninsa sumuu yee adhannokkiha ikkiro, heddinore assa gooddo ikkitannonsa.

Masaalote Gumulo

“Mite fullahaano yitanno garinni, Ameeriku gashshooti giddo noohu poletiku babbadooshshi kuni gashshooti alamete asseemmo yaannore asse afannokki gede wolqa huninosi; lawishshaho hobbaatetenna daddalu daafira coyiꞌrannore assa qarra ikkitanni noosi.”—“The Wall Street Journal.”

“Biritaaniyaho konni albaanni ikke egenninokkihu poletiku qarri no; kuni qole gashshaasinete hedo billaallitanno gede assino. Konninni kainohunni, gashshootu loosaasineb qansoota kaaꞌlate soorra hasiissannonsa coye soorrite woyyeessate wolqa hooggino.”—Institute for Government.

Masaalo: “Lamunku gashshooti manni mimmitu ledo adhame karsamanno. Ikkirono, . . . mitto ikka didandiitanno.”—Daanieeli 2:43.

Tiro: Dimokiraasete gashshooti giddo mullu mannino uminsa hedo coyiꞌrara dandaanno; ikkirono, tini abbitanno gumi woꞌmunni woꞌma gashshaasine woy doodhitunsare dihagiirsiisanno.

Masaalote Gumulo

“Xaa yannara, rooru Ameeriku manni poletikunnino ikko poletiku mannootinni hagiirraamma diꞌꞌikkino.”—Pew Research Center.

“Biritaaniyu daga saihu ontawu dirinni roore xaa yannara gashshootensanna poletiku mannootansa diammaꞌnitanno.”—“National Centre for Social Research.”

Daanieeli masaalo—albillitte

Daanieeli masaalora kulloonni garinni, Maganu Gashshooti uullate gashshoote baala hunannohu Ameerikunna Biritaaniyu waaxo ikke gashshe heeꞌreennaati.—Daanieeli 2:44.

Ajuujate maxaafi giddono hattenne yanna daafira kultanno masaalo no; hatte masaalo garinni, “gosa baalate mootoolla” Maganu Yihowac ledo olamate Armagedooni olira gamba yitanno; kuni ‘Woꞌmanka Dandaanno Maganihu batiꞌru barri olaati.’ (Yohaannisi Ajuuja 16:14, 16; 19:19-21) Konni oli yannara, Yihowa mannu gashshoote baala feye hunanno; konni garinni, Daanieeli masaalora kulli misilenni lawinsoonni gashshooti baalu coꞌo yee baꞌꞌanno.

Ledde afate, “Armagedooni Oli Maati?” yaanno birxicho lai.

Poletiku gaanci daafira kultannote Daanieeli masaalonni ronseemmore

Xaa yannara Ameerikahonna Biritaaniyaho noohu poletiku gaanci daafira Qullaawu Maxaafi giddo balanxe masaalloonni; tenne afakki yannankera ikkanni noore baxxino garinni hedatto gede assitannohe.

• Yesuusi haꞌrunsaanosi tenne alame poletikira anga wodhitannokki gede rosiisinohu mayiraatiro huwatatto. (Yohaannisi 17:16) Maganu Gashshootisira Moote asse shoominohu Yesuusi “Gashshootiꞌya tenne alameha diꞌꞌikkino” yiinohu mayiraatirono leellannohe.—Yohaannisi 18:36.

• Maganu uyino hexxo garinni, Gashshootisi muli yannara baalankare biddi assannotanna falahino atoote abbannota afakkinni jawaatatto.—Yohaannisi Ajuuja 21:3, 4.

• Gashshootubbate mereero noo yekkeero alame huntanno yite yaadantenni, albillittete yanna hexxotenni agadhatto.—Faarso 37:11, 29.

Misilete lekkanni lawinsoonnihu Ameerikunna Biritaaniyunnihu waaxo gashshooti alame gashshannoha jeefote gashshoote ikkinota Daanieeli masaalo xawisse kultanno. Hakkiinni aane baatto gashshannohu gordoho nooho guuta Maganu Gashshooteeti!

Maganu Gashshooti mannu oosora assannore ledde afate, Maganu Mangiste Maati? yitanno viidiyo lai.