Magano Lae Egenninohu No?
Qullaawu Maxaafi mayyaanno?
Maalu illenni Magano lae egennino manchi dino. (Fulo 33:20; Yohaannisi 1:18; 1 Yohaannisi 4:12) Qullaawu Maxaafi “Maganu Ayyaanaho” yaanno; ayyaanu qole mannu illera dileellanno.—Yohaannisi 4:24; 1 Ximootewoosi 1:17.
Ikkollana, sokkaasine ayyaanu kalaqama ikkitino daafira, Magano illetenni laꞌꞌa dandiitanno. (Maatewoosi 18:10) Qoleno, mitu manni reyotenni kae ayyaanu biso uddiꞌre gordo haꞌranno; hakka woyte kuni mannino Magano laꞌꞌa dandaanno.—Filiphisiyusi 3:20, 21; 1 Yohaannisi 3:2.
Xaa yannara Magano “laꞌꞌa” dandiinanni gara
Qullaawu Maxaafi duucha woyte mitto coye seekkine huwata laꞌꞌate gede asse masalse kulanno. (Isayaasi 6:10; Ermiyaasi 5:21; Yohaannisi 9:39-41) Tenne hendiro, mittu manchi Magano afatenna akattasi wodanchate ikkitanno ammana heedhusiro, ‘wodanisi illenni’ xaa yannara Magano laꞌꞌa dandaanno. (Efessooni 1:18) Qullaawu Maxaafi togoo ammana afiꞌra dandiinanni gara kulanno.
Kalaqama laꞌe Maganu akatta, lawishshaho baxillesinna shaqqillesi hattono hayyosinna wolqasi huwatate woꞌnaali. (Rooma 1:20) Iyyoobira Maganu kalaqinore qaagiissinisihu gedensaanni, Magano illesinni afinohu gede ikke macciishshaminosi.—Iyyoobi 42:5.
Qullaawa Maxaafa xiinxallite Magano seekkite afate sharro assi. Qullaawu Maxaafi togo yee jawaachishannonke: “[Maganunniwa] gamba yiittoro, isino atewa gamba yaannohe.”—1 Duduwo 28:9; Faarso 119:2; Yohaannisi 17:3.
Yesuusi heeshshore xiinxallite Magano seekkite egenni. Yesuusi Annisi Maganu Yihowa akatta woꞌmunni woꞌma leellishino daafira, “Ane lainohu Annaꞌyano laino” yaasi garankolla.—Yohaannisi 14:9.
Magano hagiirsiisanno garinni heeꞌri; hattono isi atera yee assannore wodanchate woꞌnaali. Yesuusi, “Xalalu wodani noonsari hagiirraammaho, Magano laꞌannona” yiino. Aleenni laꞌnummonte gede, Magano hagiirsiissinori giddo mitootu reyotenni kaꞌe gordo hadhanno daafira, hakko “Magano laꞌanno.”—Maatewoosi 5:8; Faarso 11:7.
Muse, Abirihaaminna wolootu Magano illetenni dilaꞌino?
Qullaawu Maxaafi giddo mite xagge nabbambeemmo woyte, mannu Magano illetenni lainoha lawankera dandaanno; kay hattoo baycho Maganu sokkaasinchu widoonni coyiꞌrinota woy ajuujatenni leellinota qooxeessaho noo hedonni huwata dandiinanni.
Sokkaasine.
Biꞌree waro, Maganu sokkaasine riqiwaasinesi gede asse mannunniwa soyenna, dagge isi suꞌminni coydhanno. (Faarso 103:20) Lawishshaho, Maganu mitte hige buwanno citi giddo heeꞌre Muse coyshiishino; Qullaawu Maxaafi kulanno garinni, “Museno Magano laꞌꞌa waajjino daafira alba diphi.” (Fulo 3:4, 6) Ikkollana, Muse hakka woyte Magano lainokkiti egennantinote; mayra yiniro, qooxeessu hedo kultanno garinni isi hakka woyte ‘Kaaliiqi sokkaasincholla’ laino.—Fulo 3:2.
Hattonni, Qullaawu Maxaafi Maganu “alba Musewa hige hasaawanno” yaanno woyte, jaalu ledo hasaambannihu gede ikke hasaawisinosi yaate. (Fulo 4:10, 11; 33:11) Muse Maganu alba addinta laino yaa diꞌꞌikkino; korkaatuno, isira Maganu sokka iillitinohu ‘sokkaasinete widoonniiti.’ (Galaatiya 3:19; Soqqamaasinete Looso 7:53) Ikkirono, Muse ammana lowo geeshsha kaajjado ikkitino daafira, Qullaawu Maxaafi isi “illete leellannokki Magano lainohu gede asse [hedinota]” kulanno.—Ibiraawoota 11:27.
Maganu Muse ledo hasaawinte gede, Abirihaami ledo hasaawinohuno sokkaasinete widoonniiti. Hige Qullaawu Maxaafi yaannore iimi adda nabbambummoro, Abirihaami addinta Magano lainoha lawankera dandaanno. (Kalaqama 18:1, 33) Ikkollana, qooxeessu hedo leellishshannonte gede, Abirihaamiwa dayhu “sasu manni” Maganu soyenna daggino sokkaasineeti. Abirihaami insa Magano riqibbe dagginore ikkitinota huwatino daafira, Magano hasaawisanni noohu gede ikke hasaawisinonsa.—Kalaqama 18:2, 3, 22, 32; 19:1.
Ajuuja.
Maganu ajuujatenni woy mannu surrera misilla leeltanno gede asseno mannu oosora leellino. Coy gedera, Qullaawu Maxaafi Musenna wolu Israeelooti “Magano laꞌu” yaanno woyte, Israeelete Magano ajuujatenni laꞌinota kulanni no. (Fulo 24:9-11) Hatteente gede, masaalaano ‘Kaaliiqa afoommo woy laoommo’ yitino baychi no. (Isayaasi 6:1; Daanieeli 7:9; Amootsi 9:1) Hatto yitino baycho baala qooxeessa laꞌnummoro, kuri masaalaano Magano ajuujatenni affinota ikkinnina illensanni laꞌinokkita wodanchineemmo.—Isayaasi 1:1; Daanieeli 7:2; Amootsi 1:1.