Alamete Goofimarchi Daannohu Mamooteeti?

Qullaawu Maxaafi mayyaanno?

Alamete goofimarchi daanno yanna afate, “alame” yaanno qaale Qullaawu Maxaafi giddo horoonsiꞌnoonni gara afa hasiissanno. Roore woyite “tini gobba” woy “alame” yine tirrannihu kosmos yaannohu Giriikete Afii qaali, roore anga mannu ooso, roorenkanni Maganunna fajjosi ledo sumuu yaannokki manna kulannoho. (Yohaannisi 15:18, 19; 2 Pheexiroosi 2:5) Mito woyite, kosmos yaanno qaali dagoomu galino wodho, lawishshaho daddalu, poletikunna ammaꞌnote uurrinshuwa kulanno.—1 Qorontoosi 7:31; 1 Yohaannisi 2:15, 16.a

“Alamete goofimarcho” yaa mayyaate?

Batinye Qullaawu Maxaafi tiro giddo nooha “alamete goofimarcho” yaanno qaale, ‘diru goofimarcho’ yineno tira dandiinanni. (Maatewoosi 24:3) Kuni qaali, baatto baꞌannota woy mannu sirchi coꞌo yee baꞌꞌannota kulannoha ikkikkinni, baattote aana nooti mannu wodho baꞌannota kulannoho.—1 Yohaannisi 2:17.

Qullaawu Maxaafi, danchu manni uullate aana hagiidhanni heeꞌranno gede, “bunshe assitannori [murantannota]” kulanno. (Faarso 37:9-11) Tini bao daggannohu “lowo qarri” yannaraati; konni qarrira gumulote Armagedooni yinanni oli kaꞌꞌanno.—Maatewoosi 24:21, 22; Yohaannisi Ajuuja 16:14, 16.

Alamete goofimarchi daannohu mamooteeti?

Yesuusi togo yiino: “Hakkonne barranna hattenne saate Maganu Annu kaꞌa, gordu sokkaasineno ikkito, Beettono ikko, afinohu dino.” (Maatewoosi 24:36, 42) Qoleno isi goofimarchu hedeweelcho daannota kulanni, “Heddinoonnikki saatera daanno” yiino.—Maatewoosi 24:44.

Barranna saate bande afa dandiineemmokkiha ikkirono, Yesuusi addi addi ikkito mitteenni amadino ‘malaate’ kulinonke; tini addi addi ikkito alamete goofimarchi gambise dayinota afate kaaꞌlitannote. (Maatewoosi 24:3, 7-14) Qullaawu Maxaafi tenne yanna, ‘kalqete goofimarcho,’ hattono “goofimarchu barra” yaanno.—Daanieeli 12:4; 2 Ximootewoosi 3:1-5.

Alamete goofimarchi gedensaanni gatannori heeꞌranno?

Ee, heeꞌranno. Baatto dibaꞌanno; mayira yiniro, Qullaawu Maxaafi togo yaanno: “Baatto xintise aana kaajjishshe uurrisootto daafira, horontanni dishashshafantanno.” (Faarso 104:5) Qoleno Maganu Qaali, “Keeraano baatto ragidhanno; ise aanano hegerera heedhanno” yaanno daafira, uullate aana mannu woꞌmanno. (Faarso 37:29) Maganu hunda hedinori baattote aana woꞌmanno gede assanno:

• Uulla gannate ikkitanno.—Isayaasi 35:1; Luqaasi 23:43.

• Mannu waajjishannori nookkiha harshammi yee heeꞌranno.—Mikiyaasi 4:4.

• Mannu baalunku kaaꞌlannonna hagiirsiisanno looso loosanno.—Isayaasi 65:21-23.

• Dhibbunna geedhimma diheedhanno.—Iyyoobi 33:25; Isayaasi 33:24.