Bashsho Ammantinanniha Mito Coye Xa Agurtinoonnihu Mayiraati?
Woꞌmanka woyite ammanankera xintu Qullaawa Maxaafaati; hakko daafira Qullaawa Borro yitannori albinni roore xawe leellinketa alba ammanneemmore biddi assiꞌnoommo.a
Togoo taashsho Lawishsha 4:18 noohu Qullaawu Maxaafihu xintu seeri ledo sumuu yitannote: “Keeraanote doogo, soodo arrishsho gedeete; barri taalooti geeshsha lexxitanni hadhanno.” Soodo arrishshote xawaabbi lexxi kiiro qooxeessaho noori sunu sununni gudisame leellanni haꞌrannonte gede, Maganu Qullaawu Maxaafi halaale xawisannohu sunu sununni yannasiraati. (1 Pheexiroosi 1:10-12) Qullaawu Maxaafi giddo balanxe masaalloonninte gede, Maganu tenne ‘goofimarchu yannara’ mannisira egenno batisanni no.—Daanieeli 12:4.
Ammanneemmoha mito coye biddi assiꞌranke dhaggeeffantannita diꞌꞌikkitino. Korkaatuno hundiri Maganu soqqamaasineno heddinohu woy agadhitinohu mitu coyi gara ikkinokki daafira taashshiꞌra hasiissinonsa.
Muse Israeelete daga gatisate kainohu Maganu iso tennera hedara 40 diri albaanniiti.—Soqqamaasinete Looso 7:23-25, 30, 35.
Mesihichu (Buuramino Moote) reyannotanna reyotenni kaꞌꞌannota kultanno masaalo Yesuusi soqqamaasine dihuwattino.—Isayaasi 53:8-12; Maatewoosi 16:21-23.
Umi xibbi dirira heeꞌrinohu mitu Kiristaanira “Mootichu barri” daafira gara ikkitinokki lao noonsa.—2 Teselonqe 2:1, 2.
Maganu gedensoonni hedonsa biddi assidhanno gede kaaꞌlinonsa; ninkeno konni garinni kaaꞌla agurannokki gede huucciꞌneemmo.—Yaiqoobi 1:5.
a Qullaawa Maxaafa huwantoommo gari soorramanno woyite, togoo taashsho dimaanxeemmo. Isinni togoo taashsho borronke aana fultanno gede assineemmo. Lawishshaho, Xiinxallote Kaaꞌlitanno Borro yitanno borronke aana Yihowa Farciꞌraasine > Laonna Ammana > Ammananke Aana Taashshinoonnire yaannohu hunda lai.