WEDELLOOTU XAꞌMITANNO XAꞌMO
Ago Aga Soꞌrote?
Qullaawu Maxaafi, heeꞌnanni gobba seeri hoola hoogi geeshsha quwa saꞌnikki angannita dihoolanno. Ikkollana dimbinannita hoolanno.—Faarso 104:15; 1 Qorontoosi 6:10.
Heeꞌratto gobba seeri woy annikkinna amakki fajjihekkinni agatto gede mannu xixxiiwannohehalla ikki?
Agu abbannore hedi
Darawokki giddo mitootaho, boohaarate ago aga hasiissannonsaha lawansara dandaanno. Ikkollana agitto gedensaanni mayi kalaqamara dandaanno?
Seeru garinni qorichishamattora dandaatto. Heeꞌratto gobba seeri fajjikkinni ago agattoha ikkiro, woxunni qorichinshahera, jaddo loosino yine kassansahera, makeena kadate fajjokki adhinahera, mito looso loosi yine qorichinshahera, wole agurina usurrahera dandiinanni.—Roomu Sokka 13:3.
Suꞌmikki baꞌꞌara dandaanno. Agu mayinae baꞌnanni gede assara dandaanno. Agunni kainohunni gedenaa gaabbattore coyiꞌrattora woy assattora dandaatto. (Lawishsha 23:31-33) Dagoomittete webisayite halaꞌlitinote tenne yannara, assattori seeda yanna suꞌmakki hunara dandaanno.
Gawajjinanniheta gargadhite afattokki gede assannohe. Agu mannimmakki gawajjinannita woy seyantanniheta hooꞌlite afattokki gede assahera dandaanno. Qoleno wolootu xixxiibbeennahe roore gawajjannore woy gobbate seeri fajjannokkire assatto gede assahera dandaanno.
Araado. Mite xiinxallo leellishshanno garinni, anje heeꞌre aga hanafino manni roore agu araadonni amadamanno. Yaaddo gargadhate, callimma hooꞌlate, woy malalli yaankera yine ago aga fulle anfeemmokki gede assite sakaalte amaddankera dandiitanno.
Reyo. Muli diro Yunayitidi Isteetisete ago age oofanno manni abbino danonni, 52 daqiiqi sai kiiro mittu manchi reyino. Mitte yannara ontu diri giddo, ago age oofanno manni abbino danonni 21 diri woro ikkinonsari 1,500 saꞌꞌanno wedelli reyino. Ati ago agoottokkiha ikkiro nafa, age heeꞌre oofanno manchi makeena eittoro dano iillitahera dandiitanno.
Maa assattoro balaxxe doodhi
Assattore balaxxe hedittoro, ago doogimale aga abbitanno gawajjonni gata dandaatto.
Qullaawu Maxaafi Biddishsha: “Egennaamu manchi bushare afiro maaxamanno.” (Lawishsha 22:3) Makeena kandara albaanni woy woꞌma hedo uyine loonsanni looso loonsammora kaꞌne heeꞌne ago aga dancha diꞌꞌikkitino.
Togo Assate Murciꞌri: ‘Ago aga hasiꞌrummoro nafa, ageemmohu gobbate seeri fajjannohanna noommo gari injaannoha ikkiro callaati.’
Qullaawu Maxaafi Biddishsha: ‘Hakkunni hajajantinanni manchi borojje ikkitinanni.’ (Roomu Sokka 6:16) Ago darawoꞌne aggino daafira calla agginanniha ikkiro, insa shombinni fooltinanni yaate. Malalli yaannoꞌne gede woy yaaddo gargadhate yitine ago agginanniha ikkiro, qarra cince saꞌꞌate dandoo diheedhannoꞌne.
Togo Assate Murciꞌri: ‘Darawoꞌya ageemmo gede xixxiibbaera diwodheemmo.’
Qullaawu Maxaafi Biddishsha: “Agaasinete ledo hossooti.” (Lawishsha 23:20) Busha jaalla assate murciꞌroottore assattokki gede assitahera dandiitanno. Ago quwa sayise aganno manniwa aanattoha ikkiro, umikkira qarra abbiꞌratto.
Togo Assate Murciꞌri: ‘Ago quwa sayise aganno manni ledo dijaalooꞌmeemmo.’