Maariyaami Maganu Amaati?

Qullaawu Maxaafi mayyaanno?

Deeꞌni. Qullaawu Maxaafi, Maariyaami Maganu amaati diyaanno; qoleno ise magansiꞌra woy isera kumbuula hasiissanno diyaanno.a Hanni aane noore hedi:

• Maariyaami ‘Ani Maganu amaati’ horo diyitino. Qullaawu Maxaafi, ise iltinohu Magano ikkikkinni “Maganu Beetto” ikkinota xawise kulanno.—Maarqoosi 1:1; Luqaasi 1:32.

• Yesuusi Kiristoosi, Maariyaami Maganu amaati yee dirosiisino; qoleno ise magansiꞌra hasiissanno diyiino. Isinni mitte mancho Maariyaami iso iltino daafira maassantinote yite guwissuta Yesuusi, “Maassantinori Maganu qaale macciishshite hajajantannoreeti” yee qolino.—Luqaasi 11:27, 28.

• “Maganu Ama” hattono “Tiotokoosi” (Magano Iltinoti) yaanno qaali Qullaawu Maxaafi giddo dino.

• Qullaawu Maxaafi giddo “Gordu Mootitte” yinoonniti Maariyaami ikkitukkinni, kaadaasine Israeele magansidhinote kaphu maganchooti. (Ermiyaasi 44:15-19) “Gordu Mootitte” yiniti Baabiloonete daga magansidhannota Ishitaari (Astaarte) ikkitukkinni digattino.

• Hundi Kiristaani Maariyaami dimagansiꞌrino; qoleno isera baxxino ayirrinye diuyino. Mittu xaggete fullahaanchi yiino garinni, hundi Kiristaani “wosincho ammaꞌno effire giwino; qoleno Maariyaamira quwa saino ayirrinye aa, meya magano magansidhannoreeti yinanninke gede assitara dandiitanno yee waajjikki digatino.”—Ini Kuwesti ofi ze Jiwishi Meerii.

• Qullaawu Maxaafi, Maganu woꞌmanka woyite nooha ikkinota kulanno. (Faarso 90:1, 2; Isayaasi 40:28) Isira hanafo noosikki daafira, ama dinosi. Qoleno, Maariyaami Magano godowisera duha didandiitanno; Qullaawu Maxaafi, Magano gordu nafa haaꞌre afannokkita xawise kulanno.—1 Mootoolla 8:27.

Maariyaami Yesuusi Amaati Ikkinnina “Maganu Ama” Diꞌꞌikkitino

Maariyaami Yihudu manni widooti; qoleno ise ayiddi Moote Daawiti gaꞌre widira kiiramanno. (Luqaasi 3:23-31) Maariyaami ammana noosetanna Magano waajjitannota ikkitino daafira isi albaanni ayirrinye afidhino. (Luqaasi 1:28) Maganu ise Yesuusi ama ikkitanno gede doorino. (Luqaasi 1:31, 35) Maariyaami Yooseefira assidhe wole oosono iltino.—Maarqoosi 6:3.

Qullaawu Maxaafi, Maariyaami gedensoonni Yesuusi rosaancho ikkitinota qummi assannoha ikkirono, hakkunni kaꞌa ise daafira garire kulannori dino.—Soqqamaasinete Looso 1:14.