Anje heedhe ubbe gaꞌnootto yanna qulli yitannohe? Hatte yannara anga mudhoottoha woy gaꞌnite gulucho luqqaoottoha ikkara dandaanno. Hatte yannara amakki dogisiissinohe gara qaagatto? Ise mundee fiite kaꞌe mada hoccunni usurtinoheha ikkara dandaanno. Hakka wote ati wiꞌloottoha ikkirono, ise xoꞌnite iseneetiwa qolte rimmi assite amadduheta hakka wontenni woyyimma afiꞌritto. Anje heeꞌnoonni wote shiimuri sheshifachishanno.

Ikkollana, lophinanni haꞌnanni wote heeshsho qarru batiꞌrinota ikkitanni hadhanno. Qoleno, qarru batiꞌranni haꞌranno wote, anje wari gede shiimurinni sheshifata gooddo ikkitanno. Hige jajjabbu mannira iillanno qarri, hoccunni usurreenna woy ama rimmi assite amaddeenna gatannoha diꞌꞌikkino. Hanni mite lawishshuwa laꞌno.

• Loosu bayichinni fushshine hunneennahe kadde amadattori bae egenninohe? Huliyaani loosu bayichinni fushshine hunnisi yannara lowo geeshsha masinota coyiꞌrino. Isi togo yee hedino: ‘Maateꞌyara hasiisannore mamiinni abbeemmo? Kageeshshi diro, wolqaꞌya badhera qoꞌlummokkinni loosanni heeꞌreennanni, tini dirijjite ane kaaꞌlinori nookkihu gede assite laꞌinoehu mayiraati?’

• Miteekke adhamakki diiganteenna ragu baalu tunsinoheha ikkara dandaanno. Rakeeli togo yitino: “Minaanniꞌya mittu dirrinna lewu agani albaanni hedeweelcho mininni fule haꞌri yannara, lowo geeshsha dadilloomma. Hatte yannara wodaniꞌya lamewa talka yiinohu gedeeti. Tini mannimmaꞌyano hedoꞌyano gawajjitino. Qoleno ragu baalu tunsinoe.”

• Miteekke hurannokki xibbi amadinoheha ikkara dandaanno. Hatto ikkiro ammanamino manchi Iyyoobi hedino gede assite hedatto woti heeꞌrara dandaanno; isi togo yiino: “Heeshshoꞌya mishoommo; heeꞌrammora horontanni dihasiꞌreemmo.” (Iyyoobi 7:16) Qoleno, Luwesi yinannihu 80 diri balla ikkannosi manchi coyiꞌrinori ledo sumuu yaattoha ikkara dandaanno; isi giddosita maaxikkinni, “Mito wote reyo agadhe noommoha lawannoe” yiino.

• Shesho hasiꞌratto gede assinohe coyi shiiꞌro ikkitara dandiitanno. Rooberti togo yiino: “Qaaqqiꞌya horophillu danonni reyi yannara, umi qara tenne ammane adha qarrissinoe. Hakkuyi gedensaanni bise xorrite saꞌeenna xissannohu gede xissiisiꞌroommo.”—Luqaasi 2:35.

Rooberti, Luwesi, Rakeelinna Huliyaani buutote qarri iillinsa yannara nafa shesho afidhino. Insa sheshifachishate taalle noosikkihu Duuchanka Dandaanno Magani sheshifachishinonsa. Isi insa sheshifachishinohu hiittoonniiti? Insante gede aterano shesho hasiissannohe yannara sheshifachishahe ikka?

Soqqamaasinchu Phaawuloosi, Yihowaa ‘jawaante baalate Maganonna qarrinke baalu giddo jawaachishannonkeha’ ikkinota coyiꞌrino. (2 Qorontoosi 1:3, 4) Konnira Qullaawu Maxaafi Maganu kaaꞌlo hasiissannokki manchi nookkitanna iimi Anninke sheshifachishannonkekki gede wolqasira aleenni higanno qarri nookkita buuxisannonke.

Maganu sheshifachishankera hasiꞌnummoro, assa hasiissannonkeri nooti egennantinote. Lawishshaho, akimete minira haꞌra hoongummoro akimootu kaaꞌlitannonke gari nooni? Qullaawu Maxaafi, “Maganunniwa shiqqi yiiyye; isino kiꞌnewa shiqqi yaanno” yee jawaachishannonkehu iseraati.—Yaiqoobi 4:8.

Maganu ninkewa shiqannota afa dandiineemmohu hiittoonniiti? Umihunni, isi ninke kaaꞌla hasiꞌrannota marro marro hige coyiꞌrino. (Saaxine lai.) Layinkihunni, Maganu sheshifachishinonsahu biꞌreno yannankerano noo manni coyiꞌrinori tenne buuxisannonke.

Maganuwiinni kaaꞌlo afiꞌra hasiꞌrannohu yannankera noohu batinyu manninte gede Moote Daawitira lowo qarri iillinosi. Isi Yihowa, “Kaaꞌlote huucciꞌreemmo huuccatto macciishshie” yee huucciꞌrino. Yihowa huuccattosi macciishshiyya? Ee, macciishshino. Daawiti lede togo yiino: ‘Kaaꞌlinoe daafira tashshi yaannoe.’—Faarso 28:2, 7.

MAGANU YESUUSI WIDOONNI SHESHIFACHISHANNO GARA

Maganu Yesuusi manna sheshifachishanno gede assino. Maganu Yesuusira uyino loosi giddo mitu “wodana hiiqqantinore dhaawatenna” “wiꞌlitannore baala [jawaachishate].” (Isayaasi 61:1, 2) Masaalotenni kulloonninte gede Yesuusi ‘daafurtinorenna duhu ayirrinonsare’ haja asse kaaꞌlino.—Maatewoosi 11:28-30.

Yesuusi manna dancha gede amaale, insa shaqqillunni amadenna mito xiwamino manna hurse sheshifachishinonsa. Mitto barra dhiigu dhibbi amadinosi manchi Yesuusa, “Baxittoero hursattoera dandaatto” yee huucciꞌri. Yesuusi konne mancho mararino daafira, “Baxoommohena huri!” yiinosi. (Maarqoosi 1:40, 41) Hakkiinnino hakku dhiigu dhibbi amadinosi manchi hurino.

Yannankera Maganu Beetti mitto mittonka sheshifachishannonkekki gede uullate aana dino. Ikkirono, “Jawaante baalate Magani” Annisi Yihowa, kaaꞌlo afiꞌra hasidhannore kaaꞌla diagurino. (2 Qorontoosi 1:3) Hanni, Maganu manna sheshifachishannota shoole qara qara doogga laꞌno.

• Qullaawa Maxaafa. “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.”—Roomu Sokka 15:4.

• Qullaawa Ayyaana. Yesuusi reyihunni shiima yanna gedensaanni Kiristaanu Songo keere afidhino. Songo keere afidhanno gede assinori maati? ‘Magano waajjansaatinna Qullaawu Ayyaani kaaꞌlo afiꞌransaati.’ (Soqqamaasinete Looso 9:31) Maganunnihu qullaawu ayyaani lowo wolqa afiꞌrino. Maganu ayyaanasi addi addi qarri giddo noore baala sheshifachishate horoonsiꞌra dandaanno.

• Huuccatto. Qullaawu Maxaafi togo yee amaalannonke: “[Huuccattotenni] hasidhinoonni coye Maganoho kuꞌle ikkinnina, mittu coyirano yaaddinoonte. Mannu hedora aleenni ikkinohu Maganu keeri, . . . wodanaꞌnenna surreꞌne agaranno.”—Filiphisiyusi Sokka 4:6, 7.

• Ammanate Roduuwinke qarru barra dodde iillitannonke. Soqqamaasinchu Phaawuloosi ledosi soqqantannori “qarrunna mitiimma” amaddusi yannara ‘jawaachishshinosita’ coyiꞌrino.—Qolasiyaasi Sokka 4:11; 1 Teselonqe 3:7.

Miteekkite, ‘Tini baalanti doogo kaaꞌlitannoehu hiittoonniiti’ yite hedattoha ikkara dandaanno. Hanni sai birxichira qummi assinihu addi addi qarri iillinonsa manni woꞌnaalsha laꞌno. Atino insa gede Maganu qarrantinore sheshifachishate eino qaale aye woteno wonshannota huwatatto; isi togo yiino: “Ama qaaqqose dogisiisidhannohu gede, anino kiꞌne . . . hagiidhitinanni heedhinanni gede asseemmoꞌne [“sheshifachisheemmoꞌne,” NW].”—Isayaasi 66:13.

LOOSO HOONGANNI YANNARA

Seetia togo yiino: “Anenna minaamaꞌya loosunni fushshine hunnoonninkehu mitte yannaraati. Lame diro woꞌma maatenke irkissannankenna shiimmaadda looso loonsanni heeꞌra hasiissinonke. Hakko daafira minaamaꞌya Pirisila quwa saꞌe yaada hanaffu; anino aneneeto waagu nooekkihu gede asse laꞌꞌa hanafummo.

“Qarra dandee saꞌꞌate kaaꞌlinonkeri maatiyya? Pirisila Maatewoosi 6:34 aana Yesuusi coyiꞌrino hedo qaagganno. Isi, mittu mittunku barri umisi qarra afiꞌrino daafira gaꞌara yaaddinoonte yiino. Qoleno, ise giddosenni huucciꞌrase, hexxo mudhitannokki gede jawaante uyitinose. Ane Faarso 55:22 sheshifachishshinoe. Faarsaasinchu gede duhaꞌya Yihowa aana tuqqoommo; hakkiinni isi kaaꞌlannae laoommo. Xa loosu nooeha ikkirono, Maatewoosi 6:20-22 aana Yesuusi kulino amaale garinni bikku heeshsho heeꞌneemmo. Roorenkanni, albinni roore Maganunniwanna mimmitinkewa gamba yinoommo.”

Joonaatani togo yiino: “Maatenketi manaado daddalu dirijjite kasaartuta, albillittete daafira yaadoommo. Ikonoomete qarrinni kainohunni 20 diro daafurroommo daafuri mullare ikke gatino. Minaamaꞌyanna ani woxeho giwama hananfummo. Woxe liqiissitanno dirijjite diuyitannonke yine waajjinoommo daafira, liqiiꞌnanni kaarde horoonsiꞌne mitore hidhate nafa diwoꞌnaalloommo.

“Ikkirono, Maganu Qaalinna ayyaanisi dancha doorsha doodhineemmo gede kaaꞌlinonke. Hattono, ani afiꞌrummo looso baala loosa hanafummo; qoleno, hasiissannokki woce baala hooꞌlinummo. Yihowa Farciꞌraasine ikkinoommo daafira ayyaanaamittete roduuwinkeno kaaꞌlinonke. Insa, ninke umonke ajinshe laꞌneemmokki gede kaaꞌlinonke; hattono baasa qarrammummo yannara anga hiixatinonke.”

ADHAMA DIIGANTANNO YANNARA

Rakeeli togo yitino: “Minaanniꞌya hedeweelcho hune haꞌrie yannara xissiisiꞌre hanqumma. Qoleno dadillumma. Kayinni Maganunniwa shiqummata isi sheshifachishinoe. Barru baala Magano huucciꞌraꞌya isi salaame wodanaꞌya agartanno gede assitinoe. Hatte yannara isi madiꞌrino wodanaꞌya xagisinoehu gede ikke macciishshamie.

“Qoleno Qaalisi kaaꞌlonni hanqonna caaccaawa qeeꞌlumma. Hattono, soqqamaasinchu Phaawuloosi Roomu Sokka 12:21 aana, ‘Busha danchu coyinni qeeli ikkinnina, bushu coyinni qeelantooti’ yiinota qaagate woꞌnaaleemma.”

“Mittu danchu amaalaanchi, saino coye heda agure albaanni noore hedeemma gede kaaꞌlinoe. Isi, Rosiisaancho 3:6 leellisheꞌꞌe, ‘afiꞌnoonniha hoogateno yanna noota’ shaqqillunni kulie. Tini amaale adhate shota ikka hooggurono anera hasiisse nooete. Xa qarriꞌya daafira heda agure haaro mixo fushshiꞌroomma.”

Elzaabeeti togo yitino: “Adhama diigantanno yannara kaaꞌlo hasiissanno. Mitte lubbote jaalaꞌya muliꞌyanni xeertidhukki kaaꞌlitinoe. Ise ledoꞌya wiꞌlitanno, hattono sheshifachishshannoe; qoleno, ani mulaaginse agurroonnita ikkikkinni banxanniete yee hedeemma gede assitinoe. Yihowa madiꞌrino wodanaꞌya hursate ise horoonsiꞌrino.

DHIWAMMANNINNA GEEDHINANNI YANNARA

Umi birxichira qummi assinihu Luwesi, wodanu dhibbi noosi daafira lame hige reye hooge gatino. Xa isira barru giddo 16 saate oksiijiine qansannisi. Isi togo yiino: “Yihowa ganye huucciꞌreemmo. Hakkiinni ayyaanisi jawaachishannoe. Huuccatto qarraꞌya dandee heeꞌrate kaaꞌlitanno jawaante uyitannoe; korkaatuno ani iso ammaneemmo; qoleno isi towaatannoeta afoommo.”

Petira yinanniti 80 diri balla ikkannoseti togo yitino: “Lowore assa hasiꞌreemmaha ikkirono assa didandeemma. Jawaanteꞌya ajjanni hadhanna laꞌꞌa shota diꞌꞌikkitinoe. Dhuka baoomma, qoleno xagichiweelo heeꞌre diafeemma. Yesuusi, ‘Annaꞌya, dandaamannoha ikkiro, kuni qarri anewiinni saona!’ yee huucciꞌri gara duucha hige hedeemma. Yihowa Yesuusira jawaante uyinosi; aneno jawaachishinoe. Huuccatto barru barrunkunni egemmeemma xagichi gede ikkitinoe. Maganoho kuꞌlummahu gedensaanni aaninni malalli yaannoe.”—Maatewoosi 26:39.

Mito 30 meddi yaanno diro, maltipili iskilerosisi yinannihu nervete xibbi waadannasi heeꞌrannohu Huliyaanirano togoo hedo noosi. Isi togo yiino: “Alba biirote wombarera ofolleemmohu gaarete ofolleemmoha ikkoommo. Ikkollana, wolootaho soqqameemmo daafira heeshshoꞌya waagu noota ikkitino. Mannaho aa qarru yannara beya afiꞌrate kaaꞌlitanno; Yihowano kaaꞌlo hasiissannonke yannara kaaꞌlate eino qaale wonshanno. Anino soqqamaasinchu Phaawuloosi gede ‘wolqa aannoehunni’ Maganunni ‘baalankare assa dandeemmo’ yee huluullamummokki coyiꞌra dandeemmo.”—Filiphisiyusi Sokka 4:13.

SHIIꞌRO AMADDANNO YANNARA

Antooniyo togo yiino: “Anniꞌya makeenu danonni reyi yannara, umi qara tenne ammane adha qarrissinoe. Isi doogaanchote haꞌranni heeꞌre beebbate reyino daafira, ‘Kuni coyi ikka dihasiissannoho’ yee hedummo. Kayinni asse afeemmori dino. Isi fooliishshiꞌrara albaanni damme onte barra keeshshino. Amaꞌya albaanni wiꞌloommokkiha ikkirono, calliꞌya noommo wote kayinni hooꞌle diafeemmo. Marro marro hige, ‘Isi kuni coyi mayira ikki?’ yeemmo.

“Hattee busha yannara Yihowa aneneeto eemadheemmo gede kaaꞌlaeranna salaame aaera ganye huucciꞌrummo. Qoleno gale hosanni wodana qoꞌlummo. Qullaawu Maxaafi baalunkura ‘hedeweelchu coyi’ iillara dandaannota kulannota qaagummo. Maganu kapha dandaannokki daafira, anniꞌya reyotenni kaeenna galagale isinni xaadeemmota dihuluullameemmo.”—Rosiisaancho 9:11, NW; Yohaannisi 11:25; Tiito 1:2.

Hanafote birxichira qummi assinihu Roobertirano togoo hedo noosi. Isi togo yiino: “Galteꞌyanna Ani Filiphisiyusi Sokka 4:6, 7 aana kullita giddoyidi salaame afiꞌnoommo. Tenne salaame afiꞌneemmo gede assitinonketi Yihowa huucciꞌrankeeti. Tini giddoyidi salaame duduwu odeessaanora kaote hexxore coyiꞌra dandiineemmo gede kaaꞌlitinonke. Horophillu dano qaaqqinke heeshsho xoqoltinoha ikkirono, isi ledo haammata hinge dancha yanna sayinsoommo. Tenne yanna qaagate woꞌnaalleemmo.

“Roduuwinke televizhiinete giddo ammananke daafira beꞌe yinummokki coyiꞌnanna laꞌinota kultunketa, tenne assa dandiinoommohu lowo roduuwi ninke daafira huuccatto assitinohura ikkitinota kullummonsa. Yihowa, roduuwinke sokkinote batinye sokka widoonni jawaachishinonketa dihuluullameemmo.”

Aleenni laꞌnummo lawishshuwa mannaho babbaxxino qarrinna fonqoli iillanno wote Maganu sheshifachishannota leellishshannote. Atino heeshshokki giddo baxi gedee qarri iilliherono, qarru yannara shesho afiꞌra dandaatto.b Ikkina, Yihowa kaaꞌlannohe gede mayira iso dihuucciꞌratto? Isi “jawaante” woy shesho baalate Maganooti.—2 Qorontoosi 1:3.