Beebe annase lubbora baxxanno. Maatesera muli jaala ikkitinoti mitte mancho ise sheshifachishate yite coyidhinori roore madiissinose ikkinnina kaaꞌlinoseri dino. Beebe iseneetira “Isi reyasi dancha diꞌꞌikkitino” yite duucha higge coyidhino. Lowo diri gedensaanni Beebe tenne borreessitino; tini ise xissiisiꞌra agurtinokkita leellishshanno.

Beebente gede, mittu manchi hakko iso lubbora baxanno mancho shiiriro xisso seeda yanna keeshshitara dandiitanno. Qullaawu Maxaafi reyo ‘goofimarchu diina’ yaasi garankolla. (1 Qorontoosi 15:26) Reyo hendummokkinni heeshshonke giddora wolqisse eꞌe banxeemmo manna mereerinkenni xoqoltanno. Reyo gawajjitannokki manchi dino. Konnira reyo abbitanno gawajjo dandiine heeꞌneemmo gari bainkero tini dhagge assiꞌnannita diꞌꞌikkitino.

Togo yite hedattoha ikkara dandaanno: ‘Xisso mageeshshi yanna keeshshitanno? Xisso dandiine heeꞌnannihu hiittoonniiti? Shiirino manna sheshifachisha dandeemmohu ma garinniiti? Reyinohu banxeemmo mannira hexxo noonsa?

Dhibbu shiima yanna calla quuxxi asse dhiwe egenninohe? Mulenni huroottoha ikkiro, hakkawote assiheta hawoottoha ikkara dandaanno. Shiiꞌne xissiisiꞌra kayinni hakkiinni saꞌinote. Dr. Alaani Wulfelti galte shiirino manna sheshifachinshanni gara kulanno maxaafisi giddo togo yiino: “‘Xisso hawa’ didandiinanni.” Ikkirono isi lede togo yiino: “Yanna saꞌanni hadhu kiironna wolu manni kaaꞌlonni xissoꞌne ajjanni hadhanno.”

Hanni Abirihaami minaamasi shiiri wote macciishshaminosire hedi. Qullaawu Maxaafi “Abirihaamino Saarara wiꞌle lowo geeshsha manchiti” yaanno. “Manchiti” yaanno qaali isi xissiisiꞌre mito geeshshi yanna keeshshinota leellishanno.a Hattoo coyi tuncu yiinosihu wolu manchi Yaiqoobiiti; iso beettosi Yooseefi moyichu itino yine dongoonnisi. Isi “lowo barra” dadillino, hattono minisi manni sheshifachishinosiha ikkirono sheshifata hoogino. Yaaiqoobi lowo diri gedensaanni nafa Yooseefi reyo qaaganni xissiisiꞌra diagurino.―Kalaqama 23:2; 37:34, 35; 42:36; 45:28.

Yannankerano batinyu manni baxanno mancho shiiranno wote seeda yanna xissiisiꞌranno. Hanni aane nooha lame lawishsha laꞌno.

• “Minaanniꞌya Rooberti reyinohu Maaja 9, 2008nniiti. Reyote geeshsha iillishshanno dano tuncu yitusi barra, hatte soodo bashshowiinni baxxinore assinoommori dino. Afoo seekkiꞌne kaꞌne bashsho isi loosoho haꞌranno wote assineemmonte gede mimmito sunqine, rimmi assine mimmito ‘Baxeemmohe’ yineennalla isi loosoho haꞌrino. Lewu diri gedensaannino, hatti xisso wodaniꞌya giddonni dibaꞌino. Roobiꞌya shiire xissiisiꞌroomma xisso haweemmaha dilawannoe.”—Geeli, 60 diriti.

• “Muxxe minaamaꞌya shiirummonku 18 diri sainoha ikkirono, xaa geeshsha ise qalli assitannoe; hattono ise shiiraꞌya xissiissannoe. Mitto kalaqamunni biifado ikkinore laummo kiiro ise qaageemmo; hattono ani laꞌꞌanni noommore laꞌoommero lowo geeshsha hagiidhitanno yee hedeemmo.”—Etiyeeni, 84, dirihu.

Seeda yanna xissiisiꞌra nooreentilla. Mittu mittunku manchi caacce fulanno gari babbaxxara dandaanno; hakko daafira wolu manchi dadillisanno coyi iilleennasi xissiisiꞌranno gara misha hayyo diꞌꞌikkitino. Qoleno quwa saꞌne xissiisiꞌnoommoha lawinkero ninkeneeto bushiisha dihasiissannonke. Ikkina xisso dandiine heeꞌnannihu ma garinniiti?

Tenne hajo daafira amaalanno manni lowoho. Ikkollana tini baalanti amaale kaaꞌlitannote yaa diꞌꞌikkino. Lawishshaho, mitu manni xissokki wiꞌlite woy wole doogonni fushshiꞌrattokki gede amaalannoheha ikkara dandaanno. Wolu manni kayinni quwa saꞌe xissiisiꞌratto gede xixxiiwannoheha ikkara dandaanno. Qullaawu Maxaafi kayinni yannanke xiinxallaano sumuu yitannota mereerima amaale aanno.

Mitu budi garinni labbaa beetti wiꞌliro tini labballimma diꞌꞌikkitino yine hendanni. Ikkollana mannu albaanni wiꞌla saallannire afidhinoni? Surrete hikkiminni fullahaano shiiꞌne xissiisiꞌnanni wote wiꞌla noore ikkinota ammantanno. Tuncu yiinohe coyi lowo geeshsha dadillisannoha ikkirono, wiꞌlakki tenne dandiite heeꞌratto gede kaaꞌlitannohe. Xisso fuqqa gawajja agurranna kaaꞌlitannori dino. Qullaawu Maxaafi xissiisiꞌne wiꞌla digaraho woy labballimma diꞌꞌikkitino diyaanno. Lawishshaho, hanni Yesuusi daafira hedi. Isira reyitinore reyotenni kayisate wolqa noosiha ikkirono, lubbote jaalisi Aliaazaari reyi yannara mannu albaanni wiꞌlino!—Yohaannisi 11:33-35.

Shiiꞌne xissiisiꞌneemmo yannara hakko iso hedeweelcho shiiro amaddannonke wote hifatama nooreeti. Shiirino manchi hifatamanno gede assannohu babbaxxino korkaati no; lawishshaho, ayirrinseemmo manchi gara garimmo laikki woy sheshifachishate yee nookkire coyiꞌranno yannara hifatammeemmoha ikkara dandaanno. Wodiidi Afirikira heeꞌrannohu Mayiki togo yiino: “Anniꞌya reyinohu ani 14 dirihu heeꞌreennaati. Madaarshu yannara Angilikaanete ammaꞌno soqqamaanchi Maganu danchuulle manna hasiꞌrannohura isiwa adhannota coyiꞌrino.a Anninke ledonke heeꞌrara hasiꞌneemmo daafira hatto yee coyiꞌrasi hanqissinoe. Xa 63 diri sainoha ikkirono hatti xaano xissiissannoe.”

Meessaneeto bushiisha garaho? Hakko iso shiiꞌnoonnihu hedeweelcho ikkiro, shiirino manchi hige hige ‘Konne coye assoommoro isi reyannokkihu baino’ yee hedannoha ikkara dandaanno. Woy hakkonni manchi ledo godowa baꞌine heedhineenna reyinoha ikkara dandaanno. Tini roore gaabbatto gede assitahera dandiitanno.

Atino gaabbattohanna hifatamattoha ikkiro, tenne fuqqa dancha diꞌꞌikkitino. Hatteentenni, giddokkita seekke macciishshannohehuranna shiiꞌnanni yannara togooti alba noonkekki hedo macciishshama noore ikkinota kulannohe jaalikkira hasaaphi. Qullaawu Maxaafi togo yaannonke: “Jaalu woꞌmanka wote jaalaholla; roduuno qarru barra iillanno.”—Lawishsha 17:17.

Shiire xissiisiꞌrino manchira baalunkunni roore jaala ikkara dandaannohu Kalaqaanchonke Magano Yihowaati. Huuccattotenni giddokkita isira kuꞌli; korkaatuno isi atera ‘malannohe’ woy ate daafira hedanno. (1 Pheexiroosi 5:7) Qoleno; isi huuccidhannorira baalaho “mannu hedora aleenni ikkinohu Maganu keeri” widoonni hedonsanna wodanansa agarate qaale eino. (Filiphisiyusi Sokka 4:6, 7) Maganu sheshifachishanno Qaalisi yaano Qullaawu Maxaafi widoonni kaaꞌlannohe gede assiꞌri. Sheshifachishshanno qummeeshshuwa borreessite amaxxa dandaatto. (Saaxine lai.) Kuri giddo mite wodanikkinni amada dandaatto. Tenne hiincakki hakko iso hashsha callikki nootto yannaranna goxichu daa giwannohe wote kaaꞌlitahera dandiitanno.—Isayaasi 57:15.

Jaaki yinannihu 40 diro ikkannosi manchira muli yanna giddo muxxe galtesi sukkaarete dhibbinni reyitino. Jaaki hatte yannara callimma macciishshantinosita coyiꞌrino. Ikkirono, huuccatto assiꞌrasi lowo geeshsha kaaꞌlitinosi. Isi togo yiino: “Yihowa huucciꞌreemmo yannara callatoommoha horo dilawannoe. Duucha wote hashsha goxoommowiinni baqqi yuummoro wirro goxichu didaannoe. Qullaawa Borro giddonni mite sheshifachishshanno hedo nabbawummonna hiincummo gedensaanni hattono, huuccatto assiꞌre kaummoro laꞌꞌanni heeꞌreenna malalli yaannoe, hattono salaame afiꞌreemmo; hakkiinni surreꞌyanna wodaniꞌya fooliishsho afiꞌrannohura goxichu daannoe.”

Vaneesa yinannite mitte wedellitte beettora amase xiwante reyitino. Iseno huuccatto wolqa afidhinota huwattino. Ise togo yitino: “Duucha wote fonqolannori tuncu yaannoe yannara Maganu suꞌma gane wiꞌlanni huucciꞌreemma. Yihowa ayewoteno huuccattoꞌya macciishshe hasiissannoe jawaante aannoe.”

Mitootu xissiisiꞌrino manna amaaltannori, shiire dadillino manni uminsa fajjonni manna kaaꞌlanno looso loosanni yanna sayisansa dancha ikkitinota kultanno. Tenne assa shiire xissiisiꞌrino manni hagiidhannonna xissonsa ajjanno gede assitara dandiitanno. (Soqqamaasinete Looso 20:35) Batinyu shiire xissiisiꞌrino Kiristaanino wole manna kaaꞌlanno looso loosa lowo geeshsha sheshifachishshannota huwatino.—2 Qorontoosi 1:3, 4.

Jaalikki baxanno mancho shiireenna yaattori bae egenninohe? Mito wote, yine coyiꞌneemmori woy assineemmori baeennanke mittore coyiꞌnummokki woy assinummokki gantammora dandiineemmo. Ikkollana, iso kaaꞌlannoha babbaxxino coye assa dandiineemmo.

Duucha wote, shiirino manchiwa marre “Xissiisiꞌro ani” yaa calla ikkitara dandiitanno. Batinyu budira, shiirino mancho rimmi assine hanqanfanniha woy sununni assine dasa amandanniha ikkiro tini dadillinoonnita leellishshanno. Shiirino manchi hasaapha hasiꞌranno wote coyiꞌrannore seekkite macciishshi. Shiidhino maatera mitore assate woꞌnaali; lawishshaho, sagale wora, qaaqquulle towaata woy madaarshu ledo xaado afiꞌrinore biddi assa woy wole shiirino manchi assiꞌre afannokkire loosa dandaatto. Tenne assa mararsiꞌne coyiꞌnannirinni roore danchate.

Mito wote, reyino manchiha dancha akata woy isi lubbote noowaro loosinoha dancha looso kayisse hasaawattoha ikkara dandaanno. Togoo hasaawi shiiꞌrino manchi hisatanno gede assasira dandaanno. Lawishshaho, lewu diri albaanni Iyaani yinanni minaannase shiidhinoti Paami yinanni rodoo togo yitino: “Mannu mito wote ani horo afoommakkiha Iyaani loosinoha dancha looso kulannoe; tini wodaniꞌya giddo dancha hedo macciishshantannoe gede assitannoe.”

Xiinxallaano shiirinoha batinye manna jaallansa umi qara kaaꞌlitannonsaha ikkirono, insa uminsa dilgora higgannohura shiirino mannira hasiissannonsare qaagannohu hoogannota kultanno; tini dadillissannote. Konni daafira, shiirino jaalikki ledo hawittokkinni aganu woy diru giddo xaadatto yanna gaaꞌmi.a Batinyu shiirino manni lowo yanna keeshshitino xissonni shesho afiꞌranno gede assannonsahura konne tunceenya baasa naadanno.

Hanni Jaappaanete gobbara heedhannote Kayori lawishsha laꞌno; ise amase shiidhuhunni 15 agani gedensaanni bayira rodoose shiidhe baasa xissiisidhino. Ammanantino jaallase agurtukkinni kaaꞌlitinose; tini hagiirsiissannote. Rutisuko yinanniti Kayori lowo geeshsha bayidhannoha ikkirono, isera amate gede ikkitinose yaa dandiinanni. Kayori togo yitino: “Noore coyiꞌniro tini tashshi diassitinoe. Mittuno amaꞌya riqiwara dihasiꞌreemma; qoleno amaꞌya gede ikke afannohu nooha dilawinoe. Ikkollana, Maama Rutisuko towaattannoe gari isewa shiqeemma gede assinoe. Lamalate kiiro ise ledo wongeela sabbankeemmo, hattono Kiristaanu gambooshshe mitteenni haꞌneemmo. Ise duucha wote shae ledose ageemma gede koyissannoe; sagale abbitannoe; sokka borreessitannoe, hattono kaardete aana mitore borreessite uyitannoe. Maama Rutisukora nooseti gara ikkitino lao anera baasa kaaꞌlitinoe.

Kayori ama reyitunku 12 diro ikkino; xa isenna minaannise woꞌma yanna wongeelu looso loosanni sayisanno. Kayori togo yitino: “Maama Rutisuko xaano ane daafira heda diagurtino. Ise silke bilbiltannoe; hattono imeelete sokka sokkannoe. Ayiddira haꞌreemma wote isewa marummakkinni dihigeemma; hattono kianno hasaawa hasaambeemmo.”

Qophiroosi heedhannota Pooli yinannita Yihowa Farciꞌraasinchono agurrikkinni kaaꞌlinoonnise. Poolira Soozoosi yinannihu shaqqadu minaanni noose; isi annanna ama shiidhinori, hattono gunnootu minisira dagge sagale ittannonna hasaabbanno gede koyisanno. (Yaiqoobi 1:27) Ikkirono, Soozoosi 53 dirisinni surrete muje dhibbinni reyino. Pooli togo yitino: “Adhame 33 diro ledosi heeꞌroommaha ammanamino minaannaꞌya shiiroomma.”

Minaannise reyihu gedensaanni, Pooli Daanieeli yinannihu 15 diro ikkannosiha maaꞌniidi qaaqqise ledo Kanaada hadhino. Hakkiicho insa Yihowa Farciꞌraasine gambooshshe haꞌra hanafino. Pooli togo yitino: “Haaro songora noo roduuwi, ninke daafiranna tuncu yiinonkeri daafira afinori dino. Ikkollana, tini ninkewa shiqe jawaachishannore coyiꞌrenna mitore asse sheshifachishannokki gede diassitinonsa. Qaaqqiꞌya annisira qasiꞌre noote tenne yannara togoo kaaꞌlo lowo geeshsha hasiissannote! Songote albisa ikkitinori Daanieeli ille worte towaattanno. Mittu rodii isinni songote miilla ledo yanna sayisanno wote woy kaase godoꞌlara haꞌranno wote Daanieeli woshsha dideanno.” Lamunku xa ayyaanaamittetenni jawaate no.

Shiirino manna kaaꞌlannoha babbaxxino coye assine insa sheshifachisha dandiineemmo. Qullaawu Maxaafino hagiirsiissanno hexxo oye sheshifachishannonke.

Albiidi birxichira qummi assiniti Geeli minaannase shiidhe xissiisidhino xissonni sheshifata dandiitannokkiha lawinoseta laꞌnoommo. Ikkollana, ise Maganu qaale einote haaro alamera Roobi galagale heeshshote heeꞌranno yite agadhitanni no. Ise togo yitino: “Lowo geeshsha baxisannoe qummeeshshi Yohaannis Ajuuja 21:3, 4.” Qummeeshshu togo yaanno: “Maganu insa ledo heeꞌranno; . . . hindiiddo baala illensanni feyanno; albi ikkito saꞌino daafira reyo woy dadillu woy wiꞌla woy shetto kunni kaꞌa diheedhanno.”

Geeli togo yitino: “Kuni qummeeshshi kiꞌanno hedo amadinoho. Baxxanno manna shiidhinorinna reyino manni galagale heeshshote heeꞌrannota kultanno hexxo affinokkiri lowo geeshsha mararsitannoe.” Geeli woꞌma yanna wongeelu looso loosse ammantannori ledo sumuu yaannore assitanni no; ise Maganu “reyo diheedhanno” yee uyino hexxo olliichisera kultanno.

‘Kuni horo diwoꞌmannoreeti!’ yite hedattoha ikkara dandaanno. Hanni Iyyoobi yinanni manchi lawishsha laꞌno. Isi reyote geeshsha iille gatino. (Iyyoobi 2:7) Iyyoobi hatte yannara reyo halchinoha ikkirono, Maganoho isi galagale uullate aana heeshshote heeꞌranno gede assate wolqa noosita dihuluullamino. Isi togo yiino: ‘Jeennaatu giddo daheessite . . . woshshattoe, ani yee yeemmo; atino kalaqamakki ikkoommoha ane laꞌꞌate halchatto.’ (Iyyoobi 14:13, 15) Iyyoobi Maganu iso laꞌꞌate halchannotanna galagale heeshshote heeꞌranno gede assannosita dihuluullamino.

Muli yanna giddo, Maganu uulla gannate ikkitanno yannara Iyyoobino wole kiirre gundannikki mannano reyotenni kayisanno. (Luqaasi 23:42, 43) Soqqamaasinete Looso 24:15, “Maganu cubbaataammanna keeraano reyotenni kayisanno” yitanno. Yesuusi togo yee buuxisinonke: “Waammate giddo noori huurosi macciishshitanno yanna daggannona, maalaꞌlitinoonte.” (Yohaannisi 5:28, 29) Iyyoobi albillitte tini hexxo woꞌmitanna laꞌꞌanno. Isira “anje wolqasi galagalte daggannosi,” hattono “manninaatisi bashshowa higanno.” (Iyyoobi 33:24, 25) Maganu qixxeessinote kaote qixxaawora diniqo noonsata leellishshannori albillitte uullate aana togoo atoote afidhanno.

Baxatto mancho shiiroottoha ikkiro, xaa geeshsha laꞌnummori xissokki woꞌmunni woꞌma hawatto gede assannoheha ikka hoogara dandaanno. Ikkollana, Qullaawu Maxaafi giddo Maganu eino qaale hiincakki addu hexxonna jawaante afiꞌratto gede kaaꞌlitannohe.—1 Teselonqe 4:13.

Xisso dandiine heeꞌnanni gara ledde afa hasiꞌratto? Woy “Maganu bunshenna qarru heeꞌrara fajjinohu mayiraati?” yite hedde egennootto? Qullaawu Maxaafi qolannota sheshifachishshannonna kaaꞌlitanno dawaro afate jw.org yinanni webisayitenke daaꞌꞌati ballo.