Ayyaanu Coye Heda Heeshshonna Salaame Uyitanno

1, 2. Buuramino Kiristaani Roomu Sokka fooliishsho 8 giddo noori aana illachishannohu mayiraati?

DIRU dirunkunni Yesuusi reyo qaagooshshi ayyaana ayirrinsanni woggara Roomu Sokka 8:15-17 noo hedo nabbabbe egennoottoha ikkara dandaanno. Kuni qummeeshshi Kiristaanu buuraminota afanno gara, yaano qullaawu ayyaani ayyaaninsa ledo farciꞌrannonsata xawissanno. Qoleno, Roomu Sokka 8:1 giddo “Kiristoosi Yesuusinni noori” daafira kulloonni. Ikkina, Roomu Sokka fooliishsho 8 buuramino Kiristaani daafira calla coyidhanno yaateni? Tenne fooliishsho giddo kulloonniri uullate aana heeꞌrate hexxo afiꞌrino Kiristaana kaaꞌlanno?

² Tenne fooliishshora noore borreessinoonnihu roorenkanni buuramino Kiristaaniraati. Insa “ayyaana” adhite ‘mannimmate wolapho afidhe’ Maganu ooso ikkate ‘quqquxante agadhitanni’ no. (Rom. 8:23) Ee, albillittete insa Maganu ooso ikkite iima heedhanno. Insa tenne qoosso afidhinohu cuuante Kiristaana ikkitinohuranna, Maganu wodote kakkalo widoonni cubbonsa maarinonsahura hattono keeraano ayyaanu oososi asse lainonsa daafiraati.—Rom. 3:23-26; 4:25; 8:30.

3. Uullate aana hegerera heeꞌrate hexxo noonsarino Roomu Sokka fooliishsho 8 giddo kulloonniri aana illachisha hasiissannonsahu mayiraati?

³ Ikkollana, uullate aana hegerera heeꞌrate hexxo noonsarino Roomu Sokka fooliishsho 8 giddo borreessinoonniri aana illachishshanno; korkaatuno Maganu insano keeraano ikkitinohu gede asse laꞌꞌannonsa. Phaawuloosi Roomu Sokka giddo qummi assinori tenne leellishanno. Isi fooliishsho 4 giddo Abirihaamire coyiꞌrino. Kaajja ammana noosihu Abirihaami heeꞌrinohu, Yihowa Isiraeelete Higge aaranna Yesuusi cubbinkera reyara lowo yanna albaanniiti. Ikkirono, Yihowa Abirihaamira kaajjado ammana noosita laino, hattono keeraancho asse kiirinosi. (Roomu Sokka 4:20-22 nabbawi.) Hatteente gede, Yihowa Qullaawu Maxaafi yaanno garinni uullate aana hegerera heeꞌrate hexxo noonsaha ammanamino Kiristaana keeraanote gede asse laꞌꞌa dandaanno. Konni daafira, Roomu Sokka fooliishsho 8 giddo nooti buuramino Kiristaanira uyinoonni amaale insarano kaaꞌlitanno.

4. Roomu Sokka 8:21 nabbambeemmo wote hiitte xaꞌmo daafira heda hasiissannonke?

⁴ Roomu Sokka 8:21 haaro alame daggannota buuxissannonke. Konni qummeeshshi giddo “kalaqamu baote borojjimmanni gate, Maganu oosota ayirrinyu wolapho” afiꞌrannota kulloonni. Tini hexxo huluullissannokkita ikkitino daafira, ninke haaro alame eate kaaꞌlannonkere assinanni heeꞌnoommo yine heda hasiissannonke. Haaro alame giddo heeꞌrattoti xabbe leeltannohe? Roomu Sokka fooliishsho 8 giddo noo amaale, haaro alame eate maa assa hasiissannohero kultannohe.

“MAALU HEDONNI AMADAMA”

5. Phaawuloosi Roomu Sokka 8:4-13 noo hedo giddo hiitte hajore coyiꞌrino?

⁵ Roomu Sokka 8:4-13 nabbawi. Roomu Sokka fooliishsho 8, ‘maalu garinni heedhannorinna ayyaanu garinni heedhannori’ mereero noo badooshshe kultanno. Mitu mannira kuni qummeeshshi halaalu mine noohunna halaalu mine nookkihu, yaano Kiristaana ikkinonna Kiristaana ikkino manni mereero noo badooshshire kulannoha lawansara dandaanno. Ikkollana, Phaawuloosi tenne sokka borreessinohu ‘Maganu baxinonsariranna qullaawoota ikkitara woshshinonsarira Roomaho heeꞌranno’ Kiristaaniraati. (Rom. 1:7) Konni daafira, Phaawuloosi maalu coye assanno Kiristaana ayyaanu coye assanno Kiristaani ledo heewisiisanni no. Insa mereero noo badooshshi maati?

6, 7. (a) Qullaawu Maxaafi giddo “maala” yaanno qaale horoonsiꞌnoonniti mite doogga hiitteeti? (b) Phaawuloosi Roomu Sokka 8:4-13 noo hedo giddo “maala” yaanno qaale horoonsiꞌrinohu maa kulateeti?

⁶ Hanni balanxe “maala” yaanno qaalire hasaambo. Phaawuloosi konne qaale horoonsiꞌrinohu maa kulateeti? Qullaawu Maxaafi giddo “maala” yaanno qaale addi addire kulate horoonsiꞌnoonni. Mite basera bisonke kulate horoonsiꞌnoonni. (Rom. 2:28; 1 Qor. 15:39, 50) Konne qaale fiixooma kulateno horoonsiꞌnoonni. Yesuusi “Daawiti sirchinni ilaminota” woy isi maala ikkinota kulloonni; qoleno Phaawuloosi Yihudu manni ‘maalu fiixasi’ ikkinota coyiꞌrino.—Rom. 1:3; 9:3.

⁷ Ikkollana, Phaawuloosi Roomu Sokka fooliishsho 7 borreessinori, Roomu Sokka 8:4-13 noo hedo giddo qummi assinohu “maala” yaanno qaali maa leellishannoro afate kaaꞌlannonke. Isi ‘maalu garinni heeꞌra’, hakko heeꞌranno Kiristaani “mannimma giddo loossanni” noote “busha yorto” ledo xaadise kulino. (Rom. 7:5) Tini hedo, Phaawuloosi “maalu garinni heedhannori, maalu halchonni amadantanno” yaasi mayyaatero afate kaaꞌlitannonke. Isi, guuntete xeꞌnensanni kainohunni yortonsa woy afiꞌrate halchanno coyi aana illachishanno mannire coyiꞌranni no. Kuni manni halchonsa, afiꞌrate hasiꞌrannore woy laalaattanno coye wonshiꞌrate hedanno mannaati; insa wonshiꞌra hasiꞌranno hasattonsa siimu xaadooshshi hasatto woy wole hasatto ikkitara dandiitanno.

8. Qorontoosi Kiristaani buuraminoha ikkirono “maalu garinni” haꞌrannokki gede qorowisiisa hasiissinohu mayiraati?

⁸ Phaawuloosi buuramino Kiristaanira “maalu garinni” heeꞌra gawajjitannota xawise kulinohu mayiraati yitine heddinanniha ikkara dandaanno. Yannankera Maganu jaallasi assinonsariranna keeraano ikkitinohu gede asse laꞌꞌannonsarira togoo coyi iillara dandaanno? Aye Kiristaanchino cubbaataamu maalisi hasatto garinni heeꞌra hanafara dandaanno. Lawishshaho, Phaawuloosi Roomaho heeꞌranno roduuwi giddo mitu “kokkensara” woy halchonsara borojje ikkinota borreessino; tini hasatto siimu xaadooshshi halcho hattono itatenna agate woy wole hasatto ikkitara dandiitanno. Insa giddo mitootu “beebbaataamo manna dogganno.” (Rom. 16:17, 18; Fil. 3:18, 19; Yih. 4, 8, 12) Qoleno, Qorontoosi heeꞌranno mittu rodii boode yanna geeshsha ‘annisi galte adhinota’ qaagge. (1 Qor. 5:1) Konni daafira Maganu, Kiristaanu ‘maalu garinni heeꞌrannokki’ gede Phaawuloosi widoonni qorowisiisinohu dimullaati.—Rom. 8:5, 6.

9. Phaawuloosi Roomu Sokka 8:6 giddo borreessinori maa kulannoha diꞌꞌikkino?

⁹ Kuni qorowishshi yannankerano kaaꞌlannoho. Korkaatuno mittu Kiristaanchi Maganoho lowo diro soqqamanni keeshshihu gedensaanni nafa, maalu hasattosi wonshiꞌrate hedannoha ikkara dandaanno. Togo yaa kayinni sagalete, loosu, boohaarshu woy baxillu daafira sae sae hedanno Kiristaancho yinanni heeꞌnoonniha diꞌꞌikkino. Maganu togoo hasatto giddonke wore kalaqinonke. Yesuusi sagale itino hattono wolootaho itisino. Isi fooliishshiꞌra hasiissannota afino. Qoleno, Phaawuloosi adhamino manni mimmitinsa hasatto wonsha hasiissannonsata borreessino.

10. Roomu Sokka 8:5, 6 giddo noohu “maalu halchonni amadama” yaanno qaali mayi tiro afiꞌrino?

¹⁰ Ikkina, Phaawuloosi “maalu hedonni amadama” yiinohu mayyaateeti? Phaawuloosi horoonsiꞌrinohu Girikete qaali “mittu manchi surresi woy wodanisi mittu coyi aana illachishanno gede assa, hedate dandoosi seekke hedino coye wonshiꞌrate horoonsiꞌra, duucha wote hedanno coyi woy lao aana illachisha” yitanno tiro afiꞌrino. Maalu garinni heeꞌranno manni, cubbo loosate hasatto illaallissansara wodhanno. Mittu fullahaanchi Roomu Sokka 8:5 giddo noohu “maalu halchonni amadama” yitanno yaatto, “maalu coye lowo geeshsha afiꞌrate hasiꞌra, ganye hatte hajore coyiꞌra, hattoo coye assanna deerra sae baxa” yitanno tiro afiꞌrinota coyiꞌrino.

11. Heeshshonke giddo hiikkuri coyibba aana roore illachinsheemmoha ikkara dandaanno?

¹¹ Roomaho heeꞌranno Kiristaani heeshshonsa giddo roore illachishannohu maahootiro layiꞌra hasiissinonsa. Heeshshonsa xaaxe amadinohu woy insa roore hedannohu “maalu” coyeeti ikka? Ninkeno heeshshonke giddo roore illachinsheemmohu maatiro heda hasiissannonke. Lowo geeshsha banxeemmo coyi woy hasaawa baxisannonkeri maati? Barru baala hendeemmo coyi maati? Mitu manni babbaxxitinota woyinete xajje qamase laꞌꞌate, minensa biifisiꞌrate, haarote daggino uddano hidhate, daddalo fanate, fooliishshote haꞌrate woy wolu hattoo coyi aana illachishanno. Togoo coyibba bunshe afidhinota diꞌꞌikkitino; qoleno togoore assa noote. Lawishshaho, Yesuusi mitte hige waa woyinete soorrino; qoleno Phaawuloosi Ximootewoosi godowisi xissora “shiima woyinete xajje” aganno gede amaalinosi. (1 Xim. 5:23; Yoh. 2:3-11) Ikkina, Yesuusinna Phaawuloosi togoo coye calla heddanno, assitanno woy woyinete wojji yitanno yaateni? Insa ganyite coyiꞌra baxxannohu togoo coyeeti? Deeꞌni. Ninkena? Togoo coyi heeshshonke giddo umi bayicho amadinoni?

12, 13. Heeshshonke giddo illachinsheemmo coye lainohunni qoropha hasiissannonkehu mayiraati?

¹² Ninkeneeto seekkine layiꞌra hasiissannonke. Mayira? Phaawuloosi togo yee borreessino: “Maalu hedonni amadama reyo abbitanno.” (Rom. 8:6) Togoo assooti xa ayyaanaamittetenni, albillittete kayinni maalaamitteteno reyinanni gede assannohura shotinse laꞌnannire diꞌꞌikkino. Phaawuloosi maalu coyinni amadamino manchi reyasi digattanno diyiino. Kuni manchi heeshshosi soorriꞌra dandaanno. Qorontoosi heeꞌrinohu maalu hasattosi harunse amanyoote bainore assino daafira bonkoonni manchire hedde. Kuni manchi soorramino. Isi maaeelare assa agure gara ikkitino doogo higino.—2 Qor. 2:6-8.

¹³ Togoo manchi soorrama dandiinoha ikkiro, Qorontoosi heeꞌrino manchi gede maalu coyinni amadaminokki Kiristaanchi isinni soorrama dandaanno. Ee, Phaawuloosi coyiꞌrinohu ‘maalu garinni heeꞌrannohura woy heedhannotera’ iillannori, Kiristaanu maalu coyinni amadamannokki gede dandaannore baala assate kaꞌꞌanno gede assannonsa!

“AYYAANU HEDONNI AMADAMA”

14, 15. (a) Phaawuloosi mayi daafira hendeemmo gede rosiisino? (b) “Ayyaanu hedonni amadama” yaa mayyaa diꞌꞌikkitino?

¹⁴ Phaawuloosi “maalu garinni heeꞌra” gawajjitannota kule qorowisiisihu gedensaanni hagiirsiissanno hedo coyiꞌrino; togo yiino: “Ayyaanu hedonni amadama kayinni heeshshonna keere uyitanno.” Heeshshonna keere woy salaame afiꞌra lowo atooteeti! Konne atoote afiꞌra dandiineemmohu hiittoonniiti?

¹⁵ “Ayyaanu hedonni amadama”, hashsha barra ayyaanaamittete coye calla assate yaa diꞌꞌikkino. Togoo coye hedanno manchi eꞌꞌe fuli kiiro Qullaawu Maxaafire, Maganoho noosi baxillire woy albillittete hexxosire calla hedanno woy coyiꞌranno yaa diꞌꞌikkino. Phaawuloosinna umi xibbi diro heeꞌrinohu wolu Kiristaani Magano hagiirsiisinoha ikkirono, babbaxxitino doogonni wolu manni heeꞌranno gedee heeshsho heeꞌrino. Insa sagale itino hattono agino. Insa giddo batinyu mine kalaqiꞌre maatete heeshsho heeꞌrinoho; hattono heeꞌrate hasiissannonsare afiꞌrate looso loosino.—Maq. 6:3; 1 Tes. 2:9.

16. Phaawuloosi wolu manni heeꞌranno gedee heeshsho heeꞌrinoha ikkirono roore mayi aana illachishino?

¹⁶ Ikkollana, kuri Maganu soqqamaasine togoo coyi xaaxe amadansara diwodhitino. Qullaawu Maxaafi Phaawuloosi dunkaana gowannoha ikkinota kulihu gedensaanni, isi roore assanno coyi maatiro qummi assino: Isi ganye sabbakatenna rosiisate looso loosanno. (Soqqamaasinete Looso 18:2-4; 20:20, 21, 34, 35 nabbawi.) Qoleno, Phaawuloosi Roomaho heeꞌrannohu ayyaanaamittete roduuwisi konne looso loosara amaalino. Ee, Phaawuloosi ayyaanaamittete qixxaawonna loosi aana illachishino. Roomu Kiristaanino isi lawishsha harunsa hasiissinonsa; ninkeno hatto assa hasiissannonke.—Rom. 15:15, 16.

17. Ayyaanunnire hendeemmoha ikkiro hiittoo heeshsho heeꞌneemmo?

¹⁷ Ayyaanaamittete coyi daafira hendeemmoha ikkiro maa afiꞌneemmo? Roomu Sokka 8:6 tenne xaꞌmora dawaro xawisse qoltanno; togo yitanno: “Ayyaanu hedonni amadama kayinni heeshshonna keere uyitanno.” Togo yaa qullaawu ayyaani hedonke illaallisanno gede assiꞌrate; qoleno Maganu ledonna isi hedo garinni heeꞌrate. Heeshshonke giddo roore ayyaanunnire hendeemmoha ikkiro, xa nafa hagiirraame heeshsho heeꞌra dandiineemmo. Qoleno, hexxonke iimira haꞌra woy uulla heeꞌra ikkiturono, hegerera heeꞌneemmo.

18. “Ayyaanu hedonni amadama” salaame afiꞌnanni gede assitannohu hiittoonniiti?

¹⁸ Phaawuloosi “ayyaanu hedonni amadama . . . keere uyitanno” yiinohu mayyaateeti? Lowo mannira giddoyidi keeri woy salaame dinonsa. Togoo manni afiꞌrate hasiꞌrannota tenne salaame ninke afiꞌne heeꞌnoommo. Mininke woy songote giddo salaametenni heeꞌranke tenne leellishshanno. Ikkollana, ninkeno roduuwinkeno guuntete xeꞌne noonkereeti. Konni daafira, koffi assannori sae sae mereeronke kalaqamara dandaanno; togoo yannara Yesuusi, “rodiikki ledo araarami” yee amaalino amaale harunsa hasiissannonke. (Mat. 5:24) Roduuwinke, “keere aanno Magani” Yihowara soqqantannore ikkitinota qaaga kalaqamino qarra tirate kaaꞌlitannonke.—Rom. 15:33; 16:20.

19. Ayyaanaamittete coye hendeemmoha ikkiro afiꞌneemmoti baxxitino salaame hiitteeti?

¹⁹ Hakkiinni saeno togo assinummoro afiꞌneemmoti wole taalle nookki salaame no. “Ayyaanu hedonni amadama” Kalaqaanchinke ledo salaametenni heeꞌrate kaaꞌlitannonke. Masaalaanchu Isayaasi togo yee borreessino: “Kaaliiqa, ate hexxatenni kaajjite heedhannorira woꞌma keere aattonsa”; kuni qaali Isayaasi yannara woꞌme sainoha ikkirono yannankerano woꞌmanni no.—Isa. 26:3; Roomu Sokka 5:1 nabbawi.

20. Maganu Roomu Sokka fooliishsho 8 giddo borreessinanni gede assino amaalera iso galata hasiissannohehu mayiraati?

²⁰ Konni daafira, qullaawu ayyaaninni buurantinorino gannate ikkitanno uulla aana hegerera heeꞌrate hexxo noonsarino, Roomu Sokka fooliishsho 8 giddo qullaawu ayyaaninni borreessinoonni amaalera Magano galata hasiissannonsa. Qullaawu Maxaafi uminke hasatto calla wonshiꞌrantenni, Maganoho soqqammeemmo gede jawaachishannonketa afanke lowo geeshsha hagiirsiissannote! Hatto assineemmoha ikkiro qullaawu ayyaanunni borreessinoonnita aante noo amaale harunsa hayyo ikkitinota buunxeemmo: “Ayyaanu hedonni amadama . . . heeshshonna keere uyitanno.” Togo assinummoro geedanno baꞌraaꞌra afiꞌneemmo; korkaatuno Phaawuloosi togo yee borreessino: “Cubbu laalchi reyote; Maganuwiinni afiꞌnanni baꞌraaꞌri kayinni, Kiristoosi Yesuusi widoonni hegere heeshshooti.”—Rom. 6:23.