Kiristaanu Heeshshonna Soqqanshote Xiinxallote Maxaafichora Qummi Assinoonni Borro
BADHEESSA 6-12
MAGANU QAALI GIDDO NOOTA MUXXE JIRO | 1 DUDUWO 23-26
“Qullaawu Mini Giddo Shiqinshanni Magansiꞌra Lowo Geeshsha Qinaabbinota Ikkitino”
it-2 241
Leewaawoota
Daawiti Leewaawootu loosonsa qinaawino garinni loossanno gede assino; insa giddonni gama albisoota ikkite loosiissannore, gashshaasine, daanyoota, agaraasinenna womaashsha amaddannore asse shoomino; qoleno qullaawu mini, qullaawu mini hoowenna sagale intanni mine loonsanniha addi addi looso lawishshaho, kakkalo shiqishate, feyate, keenanna bikkate looso hattono agarate looso loosanni kakkalaasine kaaꞌlannoha lowo manna worino. Faarsotenni Yihowa galattannore 24 Leewaawootu gaamo qineessino; insa bado badotenni soqqantanno. Insara looso uyinanninsahu hixa tungeeti. Agaraasineteno agartanno waalcho kullanninsahu konni garinniiti.—1Du 23:1-32; 25:1-31; 26:1-32; 2Du 35:3-5, 10.
it-2 686
Kakkalaancho
Kakkalaasine qullaawu mini giddo loosonsa addi addi gashshaasine hunda qinaawino garinni loossanno. Loossanno looso uyinanninsahu hixa tunge hixu garinniiti. Lemiina shoolente gaamo giddo mitte mittenti gaamo mitte lamala soqqantanno; bado iillitannonsahu dirunni lame higgeeti. Qullaawu mini maasso yannara assininte gede, ayyaana ayirrinsanni woggara mannu lowo kume ikkitanno kakkalo shiqishiꞌranno woyite, baalanti kakkalaasine mitteenni soqqantannoha ikkikki digatino. (1Du 24:1-18, 31; 2Du 5:11; 2Du 29:31-35; 30:23-25; 35:10-19 ledo heewisiisi.) Mittu kakkalaasinchi, kakkalaasine badonsanni loossara uyinoonninsa looso kisa hoogi geeshsha wole yannarano soqqama dandaanno. Yihudunnite ammaꞌnote rosiisaano budi garinni, Yesuusi uullate aana noo yannara batinye kakkalaasine no; hakko daafira kakkalaasine lamalate giddo loossanno looso mitte gaamo giddo noote addi addi maatera beenkanni; mitte mittenti maate kiironsa garinni mitto woy hakkiinni saino barra soqqantanno.
it-2 451-452
Faarso
Daawiti qullaawu mini giddo Yihowa Faarsotenni galattannore 4,000 Leewaawootano qixxeessino. (1Du 23:4, 5) Insa giddonni 288 manni ‘faarsote qajeeltinoreeti.’ (1Du 25:7) Baalante qixxaawora albisoota ikkite biddishsha uyitannori faarsote fullakkinori Hemaani, Asaafinna Yidutuniiti (Etaani yineno woshshinanniha ikkikki digatino). Kuri mittu mittunku labballi Leewite sase ooso yaano Gershooni, Qehaatinna Meraari boosaallo ikkitino daafira, sasenti Leewaawootu maate qullaawu minite faarsaanote gaamo albisooti wido ikkitino. (1Du 6:16, 31-33, 39-44; 25:1-6) Kuri sasu manchi ooso xaphoomunni 24te; baalunku aleenni kullihu faarsote qajeelinohu 288 manni giddo nooreeti. Mitto mittonka beetto faarsaanote gaamora albisa assine shoommoonnihu hixunniiti. Kuni albisa ikkinohu aanno biddishshi garinni isi oosonnino ikko wolu Leewaawooti giddonni ‘faarsote qajeeltinore’ 11 doorroonni. Konni garinni 288 ([1 + 11] × 24 = 288) faarsote qajeeltino Leewaawoota, kakkalaasinete gede 24 gaamo assinoonni. Gatinoha 3,712 qajeelanno labballo mitte mittente 24 gaamora gaammiro mitte gaamo giddo mereerimunni 155 ikkanno labballi heeꞌranno yaate; qoleno mittu mittunku faarsote qajeelino Leewaawichira tonaa sasu faarsote addi addi dandoo noonsari iillitanno yaate. (1Du 25:1-31) Xurumba ufuuffannori baalu kakkalaasine ikkitino daafira, insa faarsote Yihowa galattanno Leewaawooti wido diꞌꞌikkitino.—2Du 5:12; Ki 10:8 ledo heewisiisi.
it-1 898
Agaraasine
Qullaawu mini giddo. Moote Daawiti reyara boode yannara albaanni Leewaawoota, qullaawu mini giddo loossannorenna 4,000 agaraasine qineessino. Insa bado badonsa garinni dagge mitte lamala soqqantanno. Insara Yihowa mine agaratenna waalchu yannate faꞌnaminotanna cufaminota towaatate qeechi noonsa. (1Du 9:23-27; 23:1-6) Waalcho agartannotano agurranna insa mannu qullaawu mini loosira abbanno woxe agartanno. (2Mo 12:9; 22:4) Gedensoonni kakkalaanote biili Yoodahe Iyoaasi moote asse buuri woyite, kaajjado mootitte Ataaliya qaaqqo Iyoaasi gawajjitannokki gede qullaawa mine agartannore baxxitino agaraasine worino. (2Mo 11:4-8) Moote Iyoaasi kaphu maganna huni woyite, waalcho agartannori qullaawu mini giddonni Baꞌꞌaali magansiꞌrara horoonsiꞌnanni uduunne huna kaaꞌlitino. Konne uduunne katamu gobbanni massine giirroonni.—2Mo 23:4.
Maganu Qaalinni Ronseemmore
Halaalu Magansiꞌra Hagiirriꞌne Lexxanno Gede Assitanno
10 Roduuwinke ledo faarso faarsineemmo woyite Yihowa magansiꞌnanni heeꞌnoommo. (Far. 28:7) Israeelete manni faarso faarsa magansiꞌransa wido ikkitinohu gede asse laꞌꞌanno. Moote Daawiti qullaawu mini giddo faarsitannore 288 Leewaawoota doorino. (1 Dud. 25:1, 6-8) Xaa yannarano galatu faarso faarsine Magano banxeemmota leellisha dandiineemmo. Faarso faarsineemmo woyite roore hasiisanno coyi dancha huuro afiꞌra diꞌꞌikkitino. Hanni tenne hendo: Coyiꞌneemmo woyite ninke baalunku duucha hinge “soꞌneemmo”; tini kayinni gambooshshunniwanna soqqanshonniwa coyiꞌneemmokki gede diassitannonke. (Yai. 3:2) Hatteente gede ‘Faarseemmo woyite huuroꞌya didanchate’ yine Yihowara galatu faarso faarsa agura dihasiissannonke.
Lallawo
w11 6/1 14-15
Hundi Kiristaani Dancha Gede Qinaawinoho
Soqqamaasinenna rosaano diinaggaabbe sabbakkino daafira, umi xibbi diro Iisiyahonna Awuroppaho batinyu qooxeessira songuwa xintantino. Tini songuwa addi addi qooxeessira heedhannota ikkiturono wole songuwa ledo xaaddannokkitanna biddishshu hasiisinsakkinni uminsanni heedhanno gaamo diꞌꞌikkitino. Hatteentenni tini songuwa dancha gede qinaabbinoreetinna soqqamaasine baxillunni uyitannonsa biddishsha harunsitannoreeti. Lawishshaho, Phaawuloosi ‘biddi yiinokki coye biddi assara’ Tiito Qerxeesi worino. (Tiito 1:5) Qoleno Phaawuloosi Qorontoosi songora sokka borreessi woyite mitu roduuwira ‘gashshate’ woy qineessate dandoo noonsata xawisino. (1 Qorontoosi 12:28) Ikkina konni qineessate loosira annu ayeti? Phaawuloosi songo ‘sufinohu’ woy qineessinohu Magano ikkinota coyiꞌrino.—1 Qorontoosi 12:24.
Kiristaanu songora albisa ikkite soqqantara shoommoonniri ammanate roduuwinsara mootooꞌmitannore diꞌꞌikkitino. Hatteentenni insa Maganu ayyaani biddishshi garinni ammanate roduuwinsa ‘ledo loossannoreeti;’ hattono ‘hoshshate dancha lawishsha’ ikka hasiissannonsa. (2 Qorontoosi 1:24; 1 Pheexiroosi 5:2, 3) “Beetekiristaanete” woy songote umo ikkinohu reyotenni kainoho Yesuusi Kiristoosaati ikkinnina aye manchono diꞌꞌikkino; woy guuntete xeꞌne noonsa manni gaamo diꞌꞌikkitino.—Efesooni Sokka 5:23.
Qorontoosi heedhanno songo mito coye wole songuwawiinni baxxino garinni assa hanaffuta Phaawuloosi togo yee borreessino: “Isi anfina, Maganu qaali kiꞌnewiinni dayino? Woy kiꞌnewa calla iillino?” (1 Qorontoosi 14:36) Phaawuloosi tenne xaꞌmo xaꞌminohu hedonsa biddi assateetinna mitto coye biddishsha harunsitukkinni loosa gara ikkitinokkita huwattanno gede kaaꞌlateeti. Songuwa soqqamaasine uyitanno biddishsha harunsituti kiirotenni lexxitanninna halaꞌlitanni hadhino.— Soqqamaasinete Looso 16:4, 5.
Maganu Baxille Leellishannore
Yannankerana? Mitu manni ammaꞌnote dirijjite miila ikka hasiꞌra hoogara dandaanno. Ikkollana Qullaawa Borro taje Maganu hedinore wonshate woꞌmanka woyite dirijjitesi horoonsiꞌrannota leellishshanno. Maganu hundi Israeele waro isira soqqamanno manna qineessino; umi xibbi diri Kiristaanino iso qinaawino garinni magansiꞌranno gede assino.
Maganu hundi waro assinte gede xaa yannarano mannasi massaganni no yee ammana garankolla. Maganu iso magansidhannore qineessasinna mitto assasi isi baxillunni towaatannonsata leellishshanno. Xaa yannarano Maganu mannu oosora hedinore wonshate dirijjitesi horoonsiꞌranno. Ikkina Maganu dirijjite bande afa dandiineemmohu hiittoonniiti? Hanni bade afate kaaꞌlannonkere aane noore laꞌno.
Addu Kiristaani mittu gari looso loosara qinaawinoho. (Maatewoosi 24:14; 1 Ximootewoosi 2:3, 4) Yesuusi harunsaanosi Maganu gashshootiha dancha duduwo daga baalate sabbakkanno gede hajajino; alamete deerrinni qinaabbino dirijjite hoogguro konne looso loosa didandiinanni. Lawishshaho, mitto mancho ati callu itisa dandaatto; kayinni lowo kume woy lowo miliyoone ikkanno manna itisate qinaabbino gaamo buusante loosa hasiissanno. Addu Kiristaani uyinoonninsa looso umo fushshate ‘baalunku mitteenni soqqama’ hasiissannonsa. (Soffooniyaasi 3:9) Mittimma nootinna sumuu yite loossanno dirijjite nookkiha batinye gobbuwara heeꞌrannohu addi addi afoo coyiꞌranno mannira sabbaka dandiinannikkiti egennantinote.
Addu Kiristaani mimmito kaaꞌlatenna jawaachishate qinaawinoho. Callisi ilaala gidda hasiꞌranno manchi hiikkoye ilaala gidda hasiꞌrannoro umisi doodha dandaanno; hattono ilaala giddate hakkeeshshi geeshsha dandoo noonsakki manna kaaꞌleemmo yaanni diqarramanno. Ikkollana dano iillitusiro kaaꞌlannosihu nookki daafira buutote qarri giddo uwanno. Addanko mannunniwa gambo giwa dancha diꞌꞌikkitino. (Lawishsha 18:1) Kiristaanu Yesuusi uyinonsa hajajo wonshate mimmito kaaꞌlanna irkisa hasiissannonsa. (Maatewoosi 28:19, 20) Songo, baalunku Kiristaani uyinoonninsa looso agurikkinni umo fushsha dandaanno gedenna hexxo mudhannokki gede Qullaawu Maxaafi biddishsha uyitanno, qajeelsitanno hattono jawaachishshanno. Yihowa magansiꞌnannihunna biddishsha afiꞌnannihu qinaawino gambooshshi hoogiro mittu manchi Yihowa daafira rosate hiikka haꞌranno?—Ibiraawoota 10:24, 25.
Addu Kiristaani mitto ikke Maganoho soqqamate qinaawinoho. Yesuusi geꞌreewi huurosi macciishshite isi aannonsa biddishshi garinni “mitte hoshsha ikkitanno.” (Yohaannisi 10:16) Insa biddishshu hasiissannonsakkire addi addi beetekiristaanenna gaamo giddo heedhannore woy ammaꞌnote rosinni bebbeehantinore diꞌꞌikkitino. Hatteentenni insa ‘mimmitinsa ledo sumuu yite heedhannoreeti.’ (1 Qorontoosi 1:10) Mittimma agadhine heeꞌrate biddishshunna biddishsha uyitanno dirijjite hasiissanno. Maganu maassiꞌrannonkehu roduuwu maamarinke ledo mittimma heedhunkero callaati.—Faarso 133:1, 3.
Miliyoonetenni kiirranni mannira Maganohonna Qullaawu Maxaafi halaalira noonsa baxilli aleenni kullirenna wole Maganu Qaali kulannore harunsitanno dirijjitewa daanno gede assinonsa. Alamete doyichora noohu Yihowa manni qinaawinohanna mittimma nooha ikkino daafira Yihowa fajjo assate sharramanni no. Maganu insara togo yee qaale einonsa: “Insa giddo heeꞌreemmo, mereeronsa haꞌrameemmo. Ani Maganonsa ikkeemmo, insano gosaꞌya ikkitanno.” (2 Qorontoosi 6:16) Atino dirijjitesi wido ikkite Magano Yihowa magansiꞌrittoro konne dhagge ikkanno atoote afiꞌratto.
BADHEESSA 13-19
MAGANU QAALI GIDDO NOOTA MUXXE JIRO | 1 DUDUWO 27-29
“Annu Beettosi Baxillunni Amaalino Amaale”
w05 2/15 19 guf. 9
Kiristaanu Ayimmanke Baꞌannokki Gede Agadhino
9 Qullaawu Maxaafi kulannori halaale ikkinota buuxiꞌri. Kiristaanu ayimmanke Qullaawa Borro egenno aana xintantinota ikka hoogguro baꞌara dandiitanno. (Filiphisiyusi Sokka 1:9, 10) Mittu mittunku Kiristaanchi yaano ajuno akkaluno ammananno coyi Qullaawu Maxaafi giddo noo halaale ikkinota buuxiꞌra hasiissannosi. Phaawuloosi ammanate roduuwasi, “Baalanka coye fonqoltine laꞌe, dancha ikkinoha adhe” yee amaalino. (1 Teselonqe 5:21) Magano waajjitanno maate giddo lophitino wedellooti, annuwinsanna amuuwinsa ammana insata ikkitinokkita huwata hasiissannonsa. Annisi Daawiti, Selemooni togo yee amaalinosi: “Ane annikki Magano egennatto gede, woꞌmu wodaninninna hagiidhitino hedonni [soqqamisi].” (1 Duduwo 28:9) Wedellichu Selemoonira annisi Daawiti Yihowara kaajjado ammana heedhannosi gede assiꞌrino gara afasi calla diꞌꞌikkitanno. Isi umisi Yihowa afa hasiissannosi; qoleno isi hatto assino. Selemooni Magano “Mannakki taashshe gashsha dandeemmo gede hayyonna egenno uyie” yee huucciꞌrino.—2 Duduwo 1:10.
w12 4/15 16 guf. 13
Yihowara Woꞌma Giddonni Soqqama Agurtinoonte
13 Konni lawishshinni ronseemmo rosi teeꞌlinoha diꞌꞌikkino. Ganyine songote gambooshshe haꞌrankenna soqqansho fulanke danchate; ikkirono Yihowara woꞌmu wodaninkenni soqqamate hakkiinni sainore assa hasiissannonke. (2 Dud. 25:1, 2, 27) Mittu Kiristaanchi wodanisinni ‘badhesiinni noo’ coye yaano alamete nooha mito coye baxa agura hoogiro, Yihowa ledo noosita dancha aante huꞌnara dandaanno. (Luq. 17:32) ‘Maganu gashshootira ikkadda’ ikkineemmohu ‘busha coye gimbe dancha coye cuꞌmiꞌneemmoha’ ikkiro callaati. (Rom. 12:9; Luq. 9:62) Ninke baalunku Sheexaanu alame giddo noohu aye coyino, kaaꞌlannoha woy baxisannoha lawinkero nafa woꞌmu wodaninkenni Maganu gashshoote balaxisiinseemmokki gede assankera wodha dihasiissannonke.—2 Qor. 11:14; Filiphisiyusi Sokka 3:13, 14 nabbawi.
Worbuulle Ikke, Loosono Hanaffe
20 Moote Daawiti Selemoonira, qullaawa mine mine guda geeshsha Yihowa ledosi ikkannota kulinosi. (1 Dud. 28:20) Selemooni annisi kulinosire wodanisira wodhino; qoleno isi anje afiꞌrinohanna gari woꞌnaalshi noosikkiha ikkasi guficho ikkitasira diwodhino. Isi looso hanafe worba ikkinota leellishino, qoleno isi Yihowa kaaꞌlonni dhagge ikkannoha qullaawa mine lamalu dirinninna daratunni mine gudino.
21 Yihowa Selemooni kaaꞌlinte gede, maatenkenna songonke giddo worbuulle ikkineemmo gedenna loosonke umo fushshineemmo gede kaaꞌlannonke. (Isa. 41:10, 13) Yihowara soqqammeemmo wote worbuulle ikkinommota leellinsheemmoha ikkiro, isi xaano ikko albillitte atootesi aannonketa dihuluullammeemmo. Konni daafira, ‘mitte giddore ikke, loosono hanaffe.’
Maganu Qaalinni Ronseemmore
Jaalooma Hunannori Kalaqamanno Yannara Jaala Ikkine Heeꞌra
Daawitira qarru yannara mulisinni faffinokki jaalla noosi. Insa giddo mittu Kuusiiti; Qullaawu Maxaafi isi Daawiti “jaala” ikkinota kulanno. (2 Sam. 16:16; 1 Dud. 27:33) Kuusi mootete mine loosannoha mootete jaala ikkikki digatino; isi mito wote daheessinanni looso loosannoha ikkara dandaanno.
Daawiti beetti Abeseloomi silxaane giddetenni adhate finqili yannara, lowo manni Abeseloomira haꞌlino; Kuusi kayinni hatto diassino. Tennera Daawiti xooqi yannara Kuusi isiwa haꞌrino. Daawiti beettisinna addaxxanno manni kaadinositera lowo geeshsha xissiisiꞌrino. Kuusi kayinni heeshshosira waajja agure, gannoonni gano hunanno gede sonkoonnisi sokka wonshe ammanaminoha ikkinota leellishino. Kuusi hatto assinohu, mootete mine loosannoha ikkino daafira assa hasiissannosihura calla diꞌꞌikkino. Isi tenne assinohu mootete ammanaminoha ikkino daafiraati.—2 Sam. 15:13-17, 32-37; 16:15–17:16.
BADHEESSA 20-26
MAGANU QAALI GIDDO NOOTA MUXXE JIRO | 2 DUDUWO 1-4
“Moote Selemooni Gara Ikkinokki Doorsha Doodhino”
it-1 174 guf. 5
Olanto
Selemooni gashshooti yannara Israeelete olanto xagge giddo ikke egenninokkiri ikkino. Isi gashshooti yannara mannu keere afiꞌre heeꞌrinoha ikkirono, Selemooni faradonna faradi-gaare batisiꞌrino. (FARADI-GAARE yaannoha lai.) Rooru faradi Gibitsete gobbanni hirre abbinoonniho. Gashshootu baalu giddo tenne olanto bebbeenke worranni katamma mina hasiissino. (1Mo 4:26; 9:19; 10:26, 29; 2Du 1:14-17) Ikkollana Yihowa konne Selemooni assinore dimaassiꞌrino; hakko daafira Selemooni reyihunna gashshootu beehamihu gedensaanni Israeelete olanto wolqa baꞌanni hadhino. Yannate gedensoonni Isayaasi togo yee borreessino: “Lowo farado, faradi gaarenna gaaddo afidhinota Gibitse hexxite, kaaꞌlote hakkiichira hadhannorira aanneꞌe! Israeelete Qullaawa ikkinoha hexxa agurtino; isi kaaꞌlono dihasidhino.”—Is 31:1
it-1 427
Faradi-gaare
Selemooni gashshooti yanna geeshsha Israeelete batiꞌra faradi-gaarete olanto heedhe diegentino. Kuni ikkinohu mannu ‘Agarooshshe afiꞌneemmohu olantote wolqanniiti’ yee hedannokki gede, Maganu moote umisira farado batisiꞌroonke yee qorowisiisino daafiraati. Gaare goshooshannohu farado ikkino daafira, tini agawo faradi-gaare ajjanno gede assitanno. (Mar 17:16) Saamueeli Israeele moohisidhanno mootoolla gadadissannonsa gara kule qorowisiisi woyite togo yiino: “Oosoꞌne haadhe . . . faradi gaare gantannore” assidhanno. (1Sa 8:11) Abeseloominna Adooniyaasi gashshoote wolqatenni adhate woꞌnaaltu yannara faradi-gaarenna albansaanni doddannore 50 manna qixxeessidhino. (2Sa 15:1; 1Mo 1:5) Daawiti Tsooba yinanni gobba moote qeeli woyite 100 gaare goshooshanno farado gatisino.—2Sa 8:3, 4; 10:18.
Moote Selemooni Israeelete olanto wolqaataame assate faradi-gaarete kiiro batise 1,400 assino. (1Mo 10:26, 29; 2Du 1:14, 17) Yerusaalameno agurranna faradi-gaarete katamma yine woshshinannite wole katammarano, kuri olu uduunne biddi assinannihu baxxino bayichi no.—1Mo 9:19, 22; 2Du 8:6, 9; 9:25.
Maganu Qaalinni Ronseemmore
w05 12/1 19 guf. 6
Layinki Duduwi Maxaafita Luphi Yitino Hedo
1:11, 12. Yihowa Selemooni xaꞌmiꞌrinorinni isi egennonna hayyo afiꞌra hasiꞌrannota afino. Ninke huucciꞌneemmo huuccattono addinta wodaninke giddo noori maatiro leellishshanno. Hakko daafira mayi mayi daafira huucciꞌneemmoro taxxi yee heda danchate.
BADHEESSA 27–DOTTEESSA 2
MAGANU QAALI GIDDO NOOTA MUXXE JIRO | 2 DUDUWO 5-7
“Woꞌmanka Woyite Ille Aanaho Wore Agareemmo”
w02 11/15 5 guf. 1
Mitteenni Gamba Yaaꞌne Agurtinoonte
Daawiti Israeelete moote ikkihu gedensaanni Yihowa ayirranno gede assannoha kaajje heeꞌranno mine minate halchinota coyiꞌrino. Yihowa kayinni Daawiti olamaancho ikkino daafira, “Qullaawa Mine ati diminattoe” yiinosi. Yihowa qullaawa mine minanno gede beettosi Selemooni doorino. (1 Duduwo 22:6-10) Selemooni qullaawa mine lamalu dirinna lewu aganinni mine gude 1026 K.A. maassisino. Yihowa togo yee konni qullaawu mininni hagiidhinota leellishino: “Hegerera ane magansiꞌnannie gede minoottoha konne Mineno qullaawa assoommo. Isono woꞌmanka woyite seekke towateemmo.” (1 Mootoolla 9:3) Israeelete manni isira ammaname heeꞌri geeshsha Yihowa hakkoye mine towaata diaguranno. Ikkollana insa gara ikkinore assa agurturo Yihowa hakkonne mine towaata aguranno; ‘minuno diigame duuno ikke gatanno.’—1 Mootoolla 9:4-9; 2 Duduwo 7:16, 19, 20.
it-2 1077-1078
Qullaawa mine
Xagge. Kuni qullaawu mini Baabiloonete moote Naabukadanatsoori olanto 607 K.A. hunta geeshsha ikkinori dino. (2Mo 25:9; 2Du 36:19; Er 52:13) Israeele kaphu maganna magansidhara higgino daafira, Yihowa wole daga Yihudanna Yerusaalame gadadissara fajjino; qullaawu mini jajja mulqidhanno gede fajjino woyitino no. Qoleno lowo yanna qullaawa mine lashshi assine agurroonni. Selemooni beetti Roobiaami gashshe heeꞌreenna qullaawa mine maassiinsinku mitu 33 diri gedensaanni, Gibitsete moote Shishaaqi (993 K.A.) qullaawu mini jajja mulqiꞌrino. (1Mo 14:25, 26; 2Du 12:9) Moote Aasa (977-937 K.A.) Yihowa mine ayirrissanno; ikkollana isi Yerusaalame agarate yee Sooriyu moote Benihadaadira qullaawu mininni birranna culka afansha asse uyino; isi hatto assinohu Benihadaadi Israeelete moote Baasha ledo einoha qaalu gondooro aguranno gede assateeti; tini gowwimmate.—1Mo 15:18, 19; 2Du 15:17, 18; 16:2, 3.
Maganu Qaalinni Ronseemmore
w10 12/1 11 guf. 7
Isi “Mannu Wodanira Noo Hedo” Afino
Selemooni huucciꞌrino huuccattonni shesho afiꞌra dandiineemmo. Mannu giddonketa yaano ‘dadillenkenna’ xissonke woꞌmunni woꞌma afa hoogara dandaanno. (Lawishsha 14:10) Yihowa kayinni wodaninketa afanno hattono ninke daafira seekke hedanno. Wodaninketa huuccattotenni isira hasaapha duhanke shaashshitanno. Qullaawu Maxaafi, “Kiꞌnere malannohu isootina, qarrisannoꞌnere baala isi aana tuqqe” yaanno.—1 Pheexiroosi 5:7.
Lallawo
w93 2/1 31
Nabbawaano Xaꞌmitanno Xaꞌmo
Mittu Kiristaanchi dhiwame woy doogo haꞌre Qaagooshshu Ayyaana ayirrisikki gatiro aganu gedensaanni ayirrisa dandaanno?
Hundi Israeele waro Faasiku Ayyaana diru kiiro umikki aganira yaano Niisaani (Abiibi) 14 ayirrinsanni. Ikkollana Kiiro 9:10, 11 baxxitino qixxaawo noota kultanni togo yitanno: “Israeelete mannira, ‘Kiꞌnenna ilamaꞌne giddonni ayino reeshsha kisino daafira lagaawironna xeerto gobba haꞌrara kairo Mararrote Ayyaana ayirrisa dandaanno.’ Layinki agani [Iyaari woy Ziifi] eihunni tonaa shoolki barra hawarro ayirrisona; ayirrisanno yannarano geꞌrechu goco shiishinokki timinna qaraaranno darchi ledo itona.”
Tini qixxaawo aye Israeelichi woy maate Faasiku Ayyaana injaannonsa barra yaano (Niisaani 14 woy Ziifi 14) giddo mitto doorte ayirrissanno gede qixxeessinoonni qixxaawo ikkitinokkita qaango. Faasiku Ayyaani sagale layinki aganira ita hakkeeshshi geeshsha dirosantinote. Tenne qixxaawo qixxeessinoonnihu Niisaani 14nni ammaꞌnote amanyooti garinni keereeꞌminokki Israeelichira woy ayyaana ayirrinsannihu rosamino bayichinni lowo geeshsha xeertiꞌre noo Israeelichira callaati.
Tenne qixxaawo halaꞌladunni horoonsiꞌnoonnihu ammanamino moote Hiziqiyaasi Faasiku Ayyaana albi gede ayirrinsanni gede assi yannara calla ikkinota kulloonni. Hatte yannara (kakkalaasine qixxaabbinokkihuranna mannuno gamba yiinokki daafira) umi aganira agurre layinki aganira 14ki barra ayirrinsoonni.—2 Duduwo 29:17; 30:1-5.
Wolu togoohu baxxino coyi xaada hoogiro Ayihudete manni Faasiku Ayyaana Maganu hajajino barra ayirrissanno. (Fulo 12:17-20, 41, 42; Leewaawoota 23:5) Yesuusinna harunsaanosino konne ayyaana Seeru kulanno garinni ayirrissino ikkinnina shotisse dilaꞌino. Luqaasi togo yee borreessino: “Agure Saꞌꞌate Ayyaani geꞌrecho gorriꞌnannihu Timu Ayyaani iilli. Yesuusi, ‘Agure Saꞌꞌate Ayyaaniha hashshi hurbaate inteemmowa hadhine biddi assenke’ yee Pheexiroosinna Yohaannisi soyi.”—Luqaasi 22:7, 8.
Hatte yannara Yesuusi diru kiiro ayirrinsanniha Kiristaanu Mootichu Hurbaate yee woshshanno ayyaana xintino. Kuni ayyaani Kiristaanu ayirrisa hasiissannonsaho yaa garankolla. Diru giddo mitte hinge ayirrinsannihu kuni ayyaani Yihowa Farciꞌraasinera baxxinoho. Yesuusi “konne ane qaaggora assidhe” yee coyiꞌrinori tenne leellishanno. (Luqaasi 22:19) Yihowa Farciꞌraasincho ikkinohu mittu mittunku manchi konne ayyaana ayirrinsanni aganni iillara albaanni balaxe pirogiraamesi biddi assiꞌra hasiissannosi. Tayixe Mootichu Hurbaate ayirrinsannihu Maakisanyo Dotteessa 6, 1993 arrishsho eꞌuhu gedensaanniiti.
Mittu manchi hedeweelcho dhiwame woy haꞌrino widoonni keeshshe konne ayyaana ayirrisikkinni gataaha ikkara dandaanno. Togoo woyite maa assa dandiinanni?
Konne ayyaana ayirrinsanni woyite, shiishinokki timanna duume woyine doyissinanni; qullaawu ayyaaninni buurantinorinna iimira haꞌrate doorantinori timanna woyine qamassanno. (Maatewoosi 26:26-29; Luqaasi 22:28-30) Diru kiiro timanna woyine qamasannohu mittu Kiristaanchi dhiwame minesi woy hospitaalete goxiro, songote cimeeyye timanna woyine massitannosi; hattono Qaagooshshu Ayyaani ledo xaado afidhino qummeeshshuwa nabbabbannosi; qoleno timanna woyine uyitannosi. Mittu buuramino Kiristaanchi songosiwiinni xeertiꞌre haꞌre nooha ikkiro marino qooxeessira noo songo haꞌre ayirrissa hasiissannosi.
Hakko daafira, Mootichu Hurbaate Kiiro 9:10, 11 hajanjoonni hajajo garinninna 2 Duduwo 30:1-3, 15 kulloonni lawishshi garinni mittu buuramino Kiristaanchi 30 barri (mittu agani) saihu gedensaanni ayirrisanno tunceenyi shiimaho.
Gannate ikkitino uullara hegerera heeꞌrate hexxo noonsari Yesuusire ‘wolu geꞌreewi wido ikkitinore’ timanna woyine qamassanno gede dihajanjoonninsa. (Yohaannisi 10:16) Insa timanna woyine qamassannokkiha ikkirono konne ayyaana ayirrisa hasiissannonsa. Hakko daafira, insa giddo mittu dhiwame woy doogo haꞌre Qaagooshshu Ayyaana ayirrinsanni hawarro songo haꞌra hoogiro, umisinni konni ayyaani ledo xaado afidhino qummeeshshuwa (Yesuusi konne ayyaana xintinota kultanno xaggeno) nabbawa dandaanno; hattono Yihowa konne alamete deerrinni ayirrinsanni ayyaana maassiꞌranno gede huuccatto assa dandaanno. Aganu gedensaanni konne ayyaana ayirrisate wole gambooshshe woy baxxinoha Qullaawu Maxaafi hasaawa hasaambanni qixxaawo qixxeessa dihasiissanno.
DOTTEESSA 10-16
MAGANU QAALI GIDDO NOOTA MUXXE JIRO | 2 DUDUWO 8-9
“Ise Hayyo Lowo Geeshsha Naaddino”
w99 11/1 20 guf. 4
Batiꞌra Afansha
Saaba mootitte Selemooni laꞌara haꞌrate lowore assitinoti dihuluullissannote. Saaba noohu xaa yannara Yemenete gobbara ikkino daafira, ise gaallase ledo Yerusaalame iillate 1,600 km saꞌanno doogo hadhino. Yesuusi yiinte gede ise “gobbate qaccenni kaꞌe daggino.” Saaba mootitte kageeshshita xeerto doogo hadhinohu mayiraati? Ise kageeshshi doogo hadhinohu qaru coyi ‘Selemooni hayyo macciishshateeti.’—Luqaasi 11:31.
w99 7/1 30 guf. 4-5
Daaꞌꞌattara Martinowa Lowo Geeshsha Kiinsoonnise
Ikkihano ikkiro, mootitte “lowo manni dukkiseennase gaallate shitto, ayirrado ilkanna lowo culka hogobbe” Yerusaalame iillitu. (1 Mootoolla 10:2a) Mitu manni “lowo manni dukkiseennase” yiniri giddo gamu ise agartanno olantooti yaanno. Saaba mootitte lowo silxaane noosetanna lowo miliyoone doolare ikkannoha muxxe ikkino uduunne haadhe hadhanni noo daafira lowo olanto dukkissinose yee heda garankolla.
Saaba mootitte ‘Kaaliiqi Selemoonira maalaꞌlinanni egenno uyinota macciishshitinota’ qaango. Hakko daafira Saaba mootitte hadhinohu daddaloho calla diꞌꞌikkino. Ise hadhinohu umihunni Selemooni hayyo macciishshate ikkinoti dihuluullissannote; hattono Maganisi Yihowa daafira mitore rosa hasidhinoha ikkara dandaanno. Ise Yihowa magansidhannori Seeminna Kaami sircho ikkitukkinni digattino; hakko daafira ise akaakkase ammaꞌno daafira afa hasidhinoha ikkara dandaanno.
w99 7/1 30-31
Daaꞌꞌattara Martinowa Lowo Geeshsha Kiinsoonnise
Saaba mootitte Selemooni hayyonna gashshootisi giddo noo jiro laꞌe ‘dhaggeeffattino daafira yitannori bainose.’ (1 Mootoolla 10:4, 5) Mitootu tini yaatto “foolu qocci yiise” yaate yitanno. Mittu fullahaanchi isinni dammitino yaa ikkitukki digattino yiino. Ikkihano ikkiro Saaba mootittera macciishshitinorinna laꞌinori dhagge ikkinose. Ise Selemooni soqqamaasine hayyosi macciishshitanno daafira baraadhinore ikkitinota coyidhino. Hattono Selemooni moote assino daafira Yihowa guwissino. Hakkii ise mootete lowo waaga fushshanno afansha uyitino; ise Selemoonira uyitino culki callu, xaa waaginni mite 40,000,000 doolaare ikkanno. Selemoonino Saaba mootitte “xaꞌmidhinore baala” uyinose.—1 Mootoolla 10:6-13.
it-2 990-991
Selemooni
Saaba mootitte qullaawu mininna Selemooni mini biinfille, Selemooni mini sagale, loosaasine qixxaabbino garanna uddidhino imaana, angannire shiqinshannirenna ganyine qullaawu mini giddo shiqinshanni kakkalo laꞌuhu gedensaanni ‘dhaggeeffattino daafira yitannori baise;’ hakkiinni ise togo yitino: “Maccaꞌyanni macciishshoommahu xa illeꞌyanni laummahu darate nafa diꞌꞌikkino. Egennokkinna jirokki gobbaꞌyara heeꞌreenna kulloonnietenni lowo geeshsha roorete.” Hakkiinni ise togoo mootera soqqantannori baꞌraadhinore ikkitinota coyidhino. Tini baala ise Israeelete noosi baxilli hegereha ikkino daafira, taashshonna halaale agaranno gede Selemooni Israeelete moote assinoha Magano Yihowa galattanno gede assitinose.—1Mo 10:4-9; 2Du 9:3-8.
Maganu Qaalinni Ronseemmore
it-2 1097
Ayirrado Barcima
Israeelete gashshaano seekkisiissinohu ayirradu barcimi woy zuufaane giddo mitto mittonka coye tittire kulloonniti Selemooni seekkisiisino zuufaane callate. (1Mo 10:18-20; 2Du 9:17-19) Tini zuufaane noohu Yerusaalamete noohu Mooriyu Ilaalira minnoonni minna giddo mittoho yaano “Yoote Barcimi Haꞌra” yinannihu giddo ikkikki digatino. (1Mo 7:7) ‘Daaniichu hinkonni seekkine fila culka xallinoonnihu kuni jawu barcimi badheenni golannore midaadoho kawanna kaꞌaanni qole anga irkisiꞌnanniwa afiꞌrinoho’. Konne mootete barcima roore anga daaniichu hinkonni seekkinoonniha ikkara dandaanno; ikkirono, qullaawa mine minni garinni konne barcima haqqunni loonse fila culkanna daaniichu hinko xalline seesiinsoonniha ikkikki digatino. Laꞌꞌanno mannira kuni barcimi woꞌmunni woꞌma culkunninna daaniichu hinkonni seekkinoonniha lawanno. Barcimunniwa marranniha lee dirima kulihu gedensaanni qummeeshshu togo yaanno: “Anga irkisiꞌnanniwa lamenka widoonni mitte mitte doobbiichu misile no. Mittu mittunku dirimira lamenka widoonni mitte mitte doobbiichu misile no; mitteenni tonaa lamete.” (2Du 9:17-19) Gashshootu silxaane leellishate doobbiichu misile maltinote. (Ka 49:9, 10; Aj 5:5) Tonaa lamu doobbiichi 12 Israeelete gaꞌre leellishannoha ikkara dandaanno; tini Israeelete gaꞌre konni barcimira ofollino gashshaanchira maahoyye yite galtannotanna isira kaaꞌlantannota leellishshannota ikkitara dandiitanno. Ayirradu barcimi ledo mitu garinni xaadinsoonnihu culkunni seekkinoonnihu lekkatenni kaxxinanni dargi no. Daaniichu hinkonninna culkunni seekkine gotti yiino bayicho worroonnihu badheenni golannore afiꞌrinohu hattono albaanni jajjabba doobbiichu misilla noohu hakkawaro togoohu wolu barcimi dino. Arkiyolojete xiinxallaano affinohu, hawultuwate aana borreessinoonnihu woy borrote xawinsoonnihu hakkawari barcimi giddo Selemooni loosino barcimi geeshsha ikkannohu dino. Qullaawu Maxaafi “Hattoohu ayirradu barcimi wole mitte gobbarano dino” yaasi garankolla.—2Du 9:19.
DOTTEESSA 17-23
MAGANU QAALI GIDDO NOOTA MUXXE JIRO | 2 DUDUWO 10-12
“Hayyote Amaalenni Hoꞌro Afiꞌra”
Magano Hagiirsiisa Dandaannohu Baino
Roobiaamira assannori bainosiha ikkara dandaanno. Daga xaꞌmidhinore macciishshe duhansa shaashshiro isinna maatesi, hattono isi ledo gashshootu mine heeꞌranno manni afiꞌranno qawaaxxo gatte baꞌanno. Daga xaꞌmidhinore giwiro kayinni mannu finqilara dandaanno. Isi maa assiyya? Isi umo annisi Selemooni amaaꞌlannore jajjabba manna amaaꞌlino. Ikkollana, gedensaanni Roobiaami isi darawo ikkitino wedella amaaꞌlino. Isi darawosi yitinosire harunse togo yiino: “Ani kayinni hakkiinni saino duha duhisiiseemmoꞌne. Anniꞌya halangetenni ganinoꞌne. Ani kayinni haffarraame lichenni ganeemmoꞌne.”—2 Dud. 10:6-14.
“Egennaamu Coyiꞌrannore Macciishshi”
Hanni Roobiaami lawishsha laꞌno. Isi Israeelete moote ikkita gashshino manni isiwa daye mitte xaꞌmo xaꞌmino. Insa annisi Selemooni duhisiisinonsa duha shaashshansara xaꞌmidhino. Roobiaami mayyee dawara hasiissannosiro afate, Israeelete geerra amaaꞌlino; hatto assasi danchate. Israeelete geerri, moote mannu yiinore assannonsaha ikkiro, mannu maahoyye yee galannosita kultinosi. (1 Mot. 12:3-7) Roobiaami tini amaale diduushshitinosi; hakko daafira isi darawosi amaaꞌlino. Konni mannira mitu 40 diri balla ikkinsakkinni digatino; hakko daafira mito geeshshi woꞌnaalshshi noonsare ikkitinoti dihuluullissannote. (2 Dud. 12:13) Ikkollana insa tenne yannara Roobiaamira busha amaale amaaltino. Insa, isi mannaho duha ledanno gede amaaltinosi. (1 Mot. 12:8-11) Roobiaami tenne lamente addi addi amaale giddo hiittee amaale adha hasiissannosiro afate huuccattotenni Yihowa xaꞌmiꞌra dandaanno. Isi kayinni maccate baxissinosita darawosi amaaltinosi amaale adhino. Tini abbitino qarri isono Israeelete mannano gawajjino. Ninkeno mito woyite amaallanninke amaale baxa hoongammora dandiineemmo. Ikkirono Maganu Qaali aana xintantinota ikkitu geeshsha macciishshine adha hasiissannonke.
it-2 768 guf. 1
Roobiaami
Roobiaami booꞌnasinna silxaane garimale horoonsiꞌrasi lowo manni isiwiinni xeertiꞌranno gede assitino. Daawiti mine kaaꞌla agurtinokkiti Yihudunna Biiniyaami gaꞌre callate; qoleno lamunku gashshooti giddo noo kakkalaasinenna leewaawooti hattono tonne gaꞌre giddonni fulinohu mitu manni kaaꞌla diagurino.—1Mo 12:16, 17; 2Du 10:16, 17; 11:13, 14, 16.
Maganu Qaalinni Ronseemmore
‘Insa Kaaliiqi Yiino Coye Macciishshitu’
Roobiaami olama aguraraati yaate? Kuni coyi Roobiaami mageeshshi geeshsha yaachishinosiro heda dandaatto. “Haffarraame lichenni ganeemmoꞌne” yee waajjishiishino moote xa kayinni tenne finqille uurrisate mittoreno assa aguranno woyite mannu mayyaanno? (2 Duduwo 13:7 te ledo heewisiisi.) Ikkollana mootenna olantosi Yihowa ‘yiino coye macciishshite mini mininsara higgino.’
Tenne xaggenni maa ronseemmo? Maganoho hajajama mannu mishannonke gede assitannoha ikkiro nafa, isi yaannore assa hayyoota ikkinoommota leellishshanno. Maganoho hajajama iso hagiirsiinseemmo gedenna atootesi afiꞌneemmo gede assitannonke.—Mar. 28:2.
Roobiaami Yihowara hajajamino daafira maa afiꞌrino? Isi Maganoho hajajame haaro xintamino gashshoote qasate hedino hedo agurino, hattono isi gashshooti giddo noohu Yihudunna Biiniyaami qooxeessira katamma mina hanafino. Qoleno katamma kaajjishino. (2 Dud. 11:5-12) Baalunkunni roore yannate geeshsha Yihowa seerira hajajamino. Tonne gaꞌre amadinohu Iyorbiaami moohinohu Israeelete gashshooti giddo noo manni kaphu maganna magansiꞌrita halaalu magansiꞌra irkisanno manni Yerusaalame haꞌre ‘Roobiaami kaaꞌlino.’ (2 Dud. 11:16, 17) Roobiaami Yihowara hajajamasi, gashshootisi kaajjanno gede assitino.
Lallawo
be 69 guf. 4-5
Meessi Doorshanna Tiiaho Agurroonni Coye
Mittu Qullaawu Maxaafi rosaanchi woy ammanate rodiikki mitte hajo daafira maa assa hasiissannosiro xaꞌmihero, mayite qolatto? Hatte hajora ate ikkoottoro maa assa hasiissannohero afoottoha ikkara dandaanno. Ikkollana mittu mittunku manchi umisi doorsha doodha hasiissannosi. (Gal. 6:5) Soqqamaasinchu Phaawuloosi Maganu Qaale sabbakino manni “ammaꞌne hajajamara” jawaachishino. (Rom. 16:26) Kuni harunsa hasiissannonkeho dancha lawishshaati. Mittu manchi mitto coye assannohu Qullaawu Maxaafi rosiisaanchosi woy wole manna hagiirsiisate yee ikkiro, ammaꞌnatenni heeꞌranni nooha ikkikkinni mannaho soqqamanni noohu gedeeti. (Gal. 1:10) Maa doodha hasiissannosiro afate xaꞌminohe manchira haranchonna xaaddote dawaro qolittosiro tashshi yaa hoogasira dandaanno.
Ikkina Qullaawu Maxaafihu xintu seeri ledo sumuu yaanno garinni dawaro qola dandaattohu hiittoonniiti? Hajote ledo xaado afiꞌrinoha Qullaawu Maxaafiha xintu seeranna Qullaawu Maxaafi giddo noo lawishsha kulattosira dandaatto. Qoleno mito woyite togooha Qullaawu Maxaafiha xintu seeranna lawishshuwa isi umisi xiinxalle afiꞌra dandaanno gara leellishattosira dandaatto. Qullaawu Maxaafihu xintu seerinna lawishshuwa kaaꞌlitannosita kulattosira dandaatto; kayinni isi kayisino hajo ledo xaadissooti. Qullaawu Maxaafihu xintu seerinna lawishshuwanni dancha doorsha doodhate kaaꞌlannosire maa afiꞌrinoro xaꞌmi. Qullaawu Maxaafiha xintu seeranna lawishshuwa horoonsiꞌre, Yihowa hagiirsiisa dandaannohu hiittoo doorsha doodhirootiro hedanno gede jawaachishisi. Hatto assittoro “danchanna busha” umisinni bade afanno gede kaaꞌlitanni noottosi.—Ibi. 5:14.
DOTTEESSA 24-30
MAGANU QAALI GIDDO NOOTA MUXXE JIRO | 2 DUDUWO 13-16
“Yihowa Addaxxe—Mamoote?”
Wedella, Wolootu Ammantannoꞌne Gede Assiꞌra Dandiitinannihu Hiittoonniiti?
12 Moote Aasa wedellichu noo yannara isonooto heeshshi assannohonna worbaho. Lawishshaho isi annisi Abiyanni aane moote ikkiti kaphu maganna hunate kaino. Qoleno “Yihudu manni akaakkansa Maganita Kaaliiqi hedo wonshanno gedenna seerasinna hajajosi agadhanno gede hajajino.” (2 Dud. 14:1-7) Itiyophiyu moote Zaara 1,000,000 olanto adhe Yihudu daga qasara dayita, Aasa Yihowa kaaꞌlannosi gede togo yee huucciꞌrino: “Kaaliiqaꞌya! Wolqa hoogginore wolqaataammuwiinni gatisannohu ate gedeehu dino. Maganonke Kaaliiqa! Ninke kune ate hexxine suꞌmakki addaxxine tenne wolqaataame olanto ledo gaarammammora dangoommona kaaꞌlinke.” Tini Aasa Yihowa isono ikko mannasi gatisate wolqa noosita addaxxannota leellishshannote. Aasa iimi Annasi addaxxino daafira Yihowa Itiyophiyu olanto qeelanno gede assinosi.—2 Dud. 14:8-12.
Wedella, Wolootu Ammantannoꞌne Gede Assiꞌra Dandiitinannihu Hiittoonniiti?
13 Togoote 1,000,000 ikkitanno olanto ledo olama shota ikkitinokkiti egennantinote; Aasa qeelinoti togoo olantooti. Ikkollana Aasa konni geeshsha ikkannokki qarri iillisi yannara Yihowa addaxxa hoogasi dadillissannote. Bushu Israeelete Moote Baasha waajjishiishisita Aasa kaaꞌlo afiꞌrate alba Sooriyu mootewa higino. Hatto assasi lowo qarra abbitino. Yihowa kuni ikkinohu mayiraatiro masaalaanchisi Hanaani widoonni kulanni, “Maganokki Kaaliiqa addaxxa agurte Sooriyu moote hexxootto” yiinosi. Hatte yannanni kayise Aasa olamanni heeꞌrino. (2 Dud. 16:7, 9; 1 Mot. 15:32) Ninke tennenni maa ronseemmo?
Wedella, Wolootu Ammantannoꞌne Gede Assiꞌra Dandiitinannihu Hiittoonniiti?
14 Woꞌmanka woyite kiꞌneneeto heeshshi asse hattono Yihowa addaxxe. Cuuantini woyite kaajja ammana nooꞌnetanna Yihowa addaxxitinannita leellishshinoonni. Hattono Yihowa maatesi miilla ikkate qoosso uyinoꞌne. Xa assa hasiissannoꞌnehu qaru coyi woꞌmanka woyite Yihowa addaxxate. Shotare ikkinokkire assate kaꞌinanni woyite Yihowa addaxxitinanniti dihuluullissannote; kayinni wolere assitinanni woyitena? Boohaarshanna looso doodhitinanni woyite hattono heeshshoꞌne giddo mixo fushshidhinanni woyite Yihowa addaxxa hasiissannoꞌne. Umiꞌne hayyo addaxxitinoonte. Hatteentenni, kaaꞌlannoꞌneha xintu seera afiꞌrate Qullaawa Maxaafa xiinxalle hattono hakkonne seera harunse. (Law. 3:5, 6) Hatto assitiniro Yihowa hagiirsiissinanni; qoleno songoꞌnera noo roduuwi ayirrissannoꞌne.—1 Ximootewoosi 4:12 nabbawi.
Maganu Qaalinni Ronseemmore
Yihowara Woꞌmu Wodaninni Soqqamme!
7 Mittu mittunku Kiristaanchi Yihowara woꞌmu wodanisinni soqqamanni nooronna teꞌee layiꞌra hasiissannosi. Ateneeto togo yite xaꞌmi: ‘Yihowa hagiirsiisate, addu ammaꞌnora gaaramatenna mannasi daafannore hoolate murciꞌroommo?’ Aasa, mootitte Maaka mootimmatenni hoolate waajjannokkiha ikka hasiissinosita hedi. Ati Ise gedee manninni xaadde egennoottokkiha ikkara dandaanno; ikkirono Aasa gede diinaggaabbe sharrama hasiissannohe coyi tuncu yaahera dandaanno. Lawishshaho, maatekki miili woy lubbora baxatto jaalikki cubbo loose maaro ea giwella bohami? Bohamihu ledo xaada giwate murciꞌratto? Wodanikki assi yaannoheri maati?