Kiristaanu Heeshshonna Soqqanshote Xiinxallote Maxaafichora Qummi Assinoonni Borro
© 2023 Watch Tower Bible and Tract Society of Pennsylvania
BOCAASA 6-12
MAGANU QAALI GIDDO NOOTA MUXXE JIRO | IYYOOBI 13-14
“Mannu Reyotenni Kae, Lubbotenni Heeꞌranno?”
w99 10/15 3 guf. 1-3
Mannu Seeda Diro Heeꞌrate Assannore
HEESHSHO harancho ikkitinota kultanno hedo mitu 3,500 diri albanni borreessinoonniha ikkirono, xaa yannara noohu batinyu manni tini halaale ikkase ammananno. Mannu harancho yanna heeꞌne hakkunni gedensaanni geedhinannihunna reyinannihu mayiraatiro woꞌmunni woꞌma dihuwatino. Konnira mannu seeda diro heeꞌra dandiinanni doogga hasiꞌranni keeshshino.
Iyyoobi waro Gibitsete manni wedellimmate widira higa hasiꞌre saadanniha sirote biso itirono hedinori diqiniinonsa. Gedensoonni mitu manni heeshsho seedisara dandaanno yee hedanno xagga qixxeessate woꞌnaalino. Hakkawaro kuri manni giddo batinyu, mannu qixxeessino culki reyinannikki heeshsho aanno, hattono konni culkinni qixxeessinoonni uduunnichira itanno manchi seeda diro heeꞌranno yee hedanno. Hundi waro heedhinori Chayinu fullahaano hiinca, foollanni gara rosiisiꞌranna fayyimmate kaaꞌlitanno sagale ita mannimmanke loossanno gara soorritanno hattono reyinannikki gede assitanno yite heddanno.
Ispeenete gobba xiinxallaanchi Huwan Poonse de Liyoni wedellimmate buicho maatiro diinaggaawe xiinxallatenni egennaminoho. Mittu 18ki sanira heeꞌrino akimichi Herimipaasi Rediviviyesi yaanno maxaafisira badheessu woggara aja seenne ruukkashsho kifilera mitteenni worre foolensa xarmusete gamba assiniro kuni heeshsho seedisate kaaꞌlanno xagicho ikkanno yee coyiꞌrino. Kayi mannu seeda diro heeꞌrate kageeshshi geeshsha sharramirono diqiniinonsa.
Karroonni Haqqicho Galagalte Ciirtara Dandiitanno?
LIBAANOOSIRA heedhannote Libaanoosi hooncho yinannite hulqa haqqicho ledo heewisiinsiro, shokkitannotinna rogge batidhinoti ejersu haqqicho hoola yinannita lawa hooggara dandiitanno. Ikkollana, ejedhete haqqe injiitannokkita ayyarete gade dandiite heedhanno. Mite ejedhe 1,000 diro heeꞌra dandiitanno yine hendanni. Ejersu haqqicho damattese moolturo nafa, rumuddase raga baala halaꞌlitinota ikkitinohura galagalte ciirtara dandiitanno. Rumuddasella moola hoogguro, tini haqqicho galagalte ciirtanno.
Ammanamino manchi Iyyoobi reyiro nafa kaꞌꞌannota ammanino. (Iyo. 14:13-15) Isi Maganu iso reyotenni kayisate wolqa afiꞌrinota ammanannota kulate haqqicho lawishsha asse horoonsiꞌrino; isi yii haqqicho miteekkite ejersu haqqicho ikkitukki digattino. Isi togo yiino: “Haqqichote nafa hexxo noose. Karriro nafa, galagalte ciirtanno.” Lowo moolle gedensaanni xeena gananno wote, moolinohu ejersu tutumi lubbo qoꞌlara dandaanno; rumuddate aaninni ciiru fulanno daafira, haqqicho “haaru kaashshi gede ikkite sinna fushshitanno.”—Iyo. 14:7-9.
w11 3/1 22 guf. 5
“Halchatto”
Iyyoobi coyiꞌrinorinni Yihowa baxilli daafira maa ronseemmo? Yihowa isi hasiꞌrinori gedeeri ikkate quxansara maahoyye yitannorira Iyyoobi gedee mannira jaalansa ikkanno. (Isayaasi 64:8) Yihowa ammanantino soqqamaanosi lowo geya baxanno. Isi insa reyotenni kayisate “halchanno.” Mittu fullahaanchi koye horoonsiꞌnoonnihu Ibiraawootu Afii qaali “lowo geya qalli yine quqquxammonnita kulate horoonsiꞌnanni qaalla giddo mitto ikkinoti dihuluullissannote” yiino. Ee, Yihowa soqqamaanosi qaagannoha calla ikkikkinni insa reyotenni kayisate lowo geya quqquxamanno.
Maganu Qaalinni Ronseemmore
it-1 191
Buluulo
Buluulo waagu nookkire woy baraasinokkire kulateno horoonsiꞌnoonni; lawishshaho, Abirihaami Yihowa albaanni “ani bukonna buluulo ikkoommohu” yiino. (Ka 18:27; Is 44:20; Iyo 30:19 no lai.) Iyyoobino suꞌmira sheshifachinsheemmosi yite martinori coyidhinore, “Maammaashshiꞌne buluulu gede kaaꞌlannori dinooho” yiino.—Iyo 13:12.
BOCAASA 13-19
MAGANU QAALI GIDDO NOOTA MUXXE JIRO | IYYOOBI 15-17
“Elfaazi Lawishshi Woloota Sheshifachinsheemmo Woyite Qorophineemmo Gede Kaaꞌlannonke”
w05 9/15 26 guf. 4-5
Busha Hedo Gargadhe!
Elfaazi sasente yannara coyiꞌri woyite Maganu soqqamaanosi lowore assitara hasiꞌranno daafira insa assitanno coyinni dihagiidhanno yitanno hedo coyiꞌrino. Elfaazi Iyyoobira, “Maganu soqqamaanosi diaddaxxanno; sokkaasinesi giddono soꞌro dihooganno” yiino. (Iyyoobi 4:18) Elfaazi Maganu daafira coyiꞌranni, “Kuneeti, Maganu qullaawoota sokkaasinesi nafa diammaꞌnanno; isi albaanni gordu kalaqami nafa keeraancho diꞌꞌikkino” yiino. (Iyyoobi 15:15) Isi, “Keeraanchimmakki Woꞌmanka Dandaanno Magano hagiirsiissannoni?” yee xaꞌmino. (Iyyoobi 22:3) Beldaadino isi coyiꞌrinotera sumuu yee togo yiino: “Kuneeti Maganu albaanni aganu nafa xawado diꞌꞌikkino; beeddaheno albasiinni coꞌo yitinota diꞌꞌikkitino.”—Iyyoobi 25:5.
Togoo hedo daaffannonkekki gede gargadha hasiissannonke. Togoo hedo, Maganu ninke wolqankera alee ikkinore assinammora hasiꞌranno yine hendeemmo gede assitankera dandiitanno. Tini Yihowa ledo noonkeha muli jaalooma huntara dandiitanno. Togoo hedo daaffankera sammi yine wodhinummoro, seejjinanninke woyite hiitto ikkinammora dandiineemmo? Uyinoonninke seejjo umo heeshshi assine macciishsha agurre Yihowa ‘abbooshshiꞌnammoranna’ iso koꞌminammora dandiineemmo. (Lawishsha 19:3) Tini ayyaanaamittenke baasa gawajjitanno.
Yesuusi Gede Shooshaqootanna Shaqqadda Ikke
16 Shaqqillunni coyiꞌra. Wolootaho shaqqillu heeꞌrinkero, ‘dadillitinore sheshifachishannore coyiꞌneemmo.’ (1 Tes. 5:14) Togoo manna mayine sheshifachisha dandiineemmo? Insa daafira addinta assaambeemmota kulle jawaachisha dandiineemmo. Noonsaha dancha akatanna dandoonsa huwattanno gede godowinta naadano dandiineemmo. Qoleno, Yihowa Beettisiwa qole goshooshinonsa daafira isi albaanni lowo waagi noonsata qaagiissinammonsara dandiineemmo. (Yoh. 6:44) Yihowa ‘xissiisidhinonna’ “hexxo mudhitino” soqqamaanosi daafira lowo geeshsha assaawannota buuxinsammonsara dandiineemmo. (Far. 34:18) Shaqqillunni coyiꞌneemmo qaali shesho hasiissinonsarira hurre abbara dandaanno.—Law. 16:24.
Maganu Qaalinni Ronseemmore
w06 3/15 14 guf. 11
Iyyoobi Maxaafita Luphi Yitino Hedo
7:9, 10; 10:21; 16:22—Iyyoobi coyiꞌrinori isi kaote hexxo ammaninokkita leellishannoreeti? Kuri qummeeshshuwara Iyyoobi coyiꞌranni noohu muli yannara tuncu yaannosireeti. Ikkina isi hatto yiinohu mayyaateeti? Isi hatto yiinohu reyiro hakkawaro noo manni giddo mittuno laꞌꞌannosikkita kulate ikkara dandaanno. Insa hedora isi minisira dihiganno woy Maganu murino barri iilla geeshsha afannosihu diheeꞌranno. Iyyoobi mittu manchi umisi wolqanni sioolete giddonni fula dandaannokkita coyiꞌranni noohano ikkara dandaanno. Iyyoobi, albillitte kaote hexxo noota ammanannota Iyyoobi 14:13-15 xawisse kultanno.
BOCAASA 20-26
MAGANU QAALI GIDDO NOOTA MUXXE JIRO | IYYOOBI 18-19
“Ammanate Roduuwaꞌne Horonta Callachishshinoonte”
Yesuusi Wiꞌlinota Kultanno Xaggenni Maa Ronseemmo?
9 Shiidhe xissiisidhinore kaaꞌla dandiineemmo. Yesuusi Maartanna Maariyaami ledo wiꞌlinoha calla ikkikkinni, insa hasaaphanna macciishshinonsa hattono sheshifachishannore coyiꞌre jawaachishinonsa. Ninkeno shiidhe xissiisidhinore sheshifachishanna jawaachisha dandiineemmo. Awustiraaliyaho heeꞌrannohu Daani yinannihu songote cimeessi togo yiino: “Minaamaꞌya shiiꞌrummohu gedensaanni kaaꞌlo hasiissinoe. Batinyu minaannuwinna minaamuwi hashsha barra dagge hasaapheemmo woyite macciishshitannoe. Insa xissoꞌya fushshe hasaapheemmo gede kaaꞌlitinoe; hattono wiꞌlanna laꞌe disaalfattino. Qoleno insa mitore assite kaaꞌlitinoe; lawishshaho makeena hayishshiꞌra, suuqete mitore hidha hattono sagale qishiꞌra hoogeemmo woyite kuri coyibba assite kaaꞌlitinoe. Qoleno insa duucha woyite huuccatto ledoꞌya assidhanno. Insa ‘qarru barra iillitannore’ addu jaallanna roduuwa ikkansa leellishshinoe.”—Law. 17:17.
Banxeemmo Manni Yihowara Soqqama Aguranno Woyite
16 Ammanantinore maatete miilla kaaꞌla agurtinoonte. Wolu woyitinni roore insara kiꞌne baxillinna jawaante hasiissannonsahu xaati. (Ibi. 10:24, 25) Mito woyite, bohamino manchi maate songote giddo mitootu insano bohantinohu gede assite kiirte gambo gibbannonsata wodanchitino. Togoori kalaqamanno gede assinoonke! Roorenkanni anninsa woy amansa bohamino wedelloota galatanna jawaachisha hasiissanno. Minaannise bohame maatesi agure haꞌrinoti Maariya togo yitino: “Mitu roduuwi minira dagge sagale wortinonke; hattono maatete magansiꞌra assiꞌneemmo gede kaaꞌlitinonke. Insara xissoꞌya leeltinonsa; hakko daafira ledoꞌya wiꞌlitino. Mannu ane daafira gara ikkinokkire coyiꞌri woyiteno insa anera haꞌlite coyidhino. Insa addinta wodanaꞌya diggi assitinoe.”—Rom. 12:13, 15.
w90 9/1 22 guf. 20
Sharrantanni Nootto?
20 Alba songote cimeessa woy soqqamaancho ikkinohu mittu rodii qoossosi umisi fajjonni hoogiro nafa, cimeeyyete bisi tini iso yaachishshasira dandiitannota huwata hasiissannosi. Hakko rodii bohaminokkiha ikkiro hattono songote cimeeyye isi yaadinota huwatturo iso baxillunni ayyaanaamittetenni jawaatanno gede kaaꞌla hasiissannonsa. (1 Teselonqe 5:14) Isi xaano songote lowore kaaꞌlannota huwata hasiissannonsa. Amaalloonnisiha nafa ikkiro, isi umosi heeshshi assiꞌronna galatannoha ikkiro songote giddo keeshshikkinni soqqanshote qoossosi wirro afiꞌrara dandaanno.
Maganu Qaalinni Ronseemmore
w94 10/1 32
Shaqqillunni Coyiꞌra Afidhino Wolqa
Ikkirono, Iyyoobira jawaante hasiissusi woyite Elfaazinna jaallasi shaqqillunni dihasaawissinosi. Insa Iyyoobira togoo qarri iillinosihu maaxe bunshe loosino daafiraati yite bushiishshinosi. (Iyyoobi 4:8) Mittu maxaafi (Interpreter’s Bible) togo yaanno: “Iyyoobira hasiisannosihu mararanno wodani noosi manchooti. Ikkirono wolootu isira marro marro higge woꞌmunni woꞌma halaale lawannore, kayi giwisanno coye coyidhino.” Konnira Iyyoobi, Elfaazinna jaallasi coyidhinore macciishshe lowo geya giirame, “Lubboꞌya caacceessitinanni, afuunni qaqqassinanniehu mamooti geeshshaati?” yiino.—Iyyoobi 19:2.
Ninke ledo Maganoho soqqamanno rodoonke shaqqillu nookki garinni coyiꞌne iso yaachisha dihasiissannonke. (Marro 24:15te ledo heewisiisi.) Qullaawu Maxaafi, “Reyonna heeshsho arrawu aana no; kunnira, mannu coyiꞌrinore adhanno” yee qorowisiisanno.—Lawishsha 18:21.
Lallawo
Qullaawu Maxaafi Rosaanchi Ayyaanaamittetenni Lophe Cuuamanno Gede Kaaꞌlineemmo Gara—Gafa Lame
ROSAANCHIKKI SONGOTE GIDDO JAALLA KALAQIꞌRANNO GEDE JAWAACHISHISI
10 Rosiisaanchu rosaanosi daafira lowo geeshsha heda hasiissannosi. Insa albillitte ayyaanaamittete roduuwakki ikkitannota hedi. (1 Teselonqe 2:7, 8 nabbawi.) Insara alamete noo jaalla aguranna biddi assiꞌra hasiissannonsare baala biddi assidhe Yihowara soqqama shota diꞌꞌikkitannonsa. Songote giddo addu jaalla afidhanno gede kaaꞌla hasiissannonke. Qullaawa Maxaafa xiinxallisatto yannara calla ikkikkinni wole woyiteno rosaanchikki ledo yanna sayisse isira jaala ikkisi. Xiinxallisatto yannara calla ikkikkinni wole barrano marte xaꞌmite, silke bilbilte woy harancho sokka borreessite isira hedattota leellishi.
11 “Mitto qaaqqo lossannohu qachaho” yinanni yaatto no. Ninkeno “Mitto mancho Yesuusi rosaancho assitannoti songote” yaa dandiineemmo. Woꞌnaalshu noonsari Qullaawu Maxaafi rosiisaano, rosaanonsa songote roduuwi ledo egensiissannohu iseraati; songote roduuwi rosaanchu ayyaanaamittetenni lophanno gede kaaꞌlitannosi. Qullaawu Maxaafi rosaano ayyaanaamittete kaaꞌlannonsahunna qarru iillannonsa woyite jawaachishannonsahu Maganu manni ledo jaalooꞌma baxxara dandiitanno. Qullaawu Maxaafi rosaanchi songote miilanna ayyaanaamittete maatenke wido ikkinohu gede asse hedara hasiꞌneemmo. Isi hagiirsiisannohunna baxisannohu roduuwu maamari wido ikkara hasiꞌneemmo. Hatto assinummoro Yihowa baxannokki manni ledo noosi aante agura diqarrissannosi. (Law. 13:20) Albi jaallasi gibbusirono, Yihowa dirijjite giddo addu jaalla afiꞌra dandaannota huwatanno.—Maq. 10:29, 30; 1 Phe. 4:4.
BOCAASA 27–SADAASA 3
MAGANU QAALI GIDDO NOOTA MUXXE JIRO | IYYOOBI 20-21
“Keeraanchimma Jirotenni Dikeennanni”
w07 8/1 29 guf. 12
‘Maganu Albaanni Jiro Duuꞌnitinoonni?’
12 Yesuusi Maganu albaanni jiro duuꞌna, meessaneetira jiro duuꞌnate ledo woy dureessa ikkate ledo heewisiisino. Konnira Yesuusi heeshshonke giddo balaxisiisa hasiissannonkehu maalaamittete jiro duuꞌna woy afiꞌnoommo jironni hagiidha ikkitinokkita coyiꞌrino. Hatteentenni jironke Yihowa ledo noonke jaalooma woyyeessiꞌrate woy kaajjishiꞌrate horoonsiꞌra hasiissannonke. Hatto assanke Maganu albaanni dureeyye ikkineemmo gede assitannonketi dihuluullissannote. Mayira yiniro, tini Yihowawiinni lowo atoote afiꞌneemmo gede faro fantannonke. Qullaawu Maxaafi, “Kaaliiqi maasso jiro abbitanno; aanahono mitiimma dileddanno” yaanno.—Lawishsha 10:22.
Maganu Qaalinni Ronseemmore
w95 1/1 9 guf. 19
Sheexaanenna Loososi Qeelle
19 Maganu soqqamaanchi Iyyoobi Sheexaanu Elfaazinna Soofaari kaxxe coyiꞌrinota waaddanno hedo qeelate sharrama hasiissinosi. (Iyyoobi 4:13-18; 20:2, 3) Konnira Iyyoobi baasa ‘dadillino’ daafira lowo geya mase ‘qasanno coye coyiꞌrino.’ (Iyyoobi 6:2-4; 30:15, 16) Eelihu Iyyoobi seekke macciishshe Yihowa baalanka coye laꞌꞌannota huwatanno gede godowinta kaaꞌlinosi. Hatteente gede xaa yannara noori mannu qarri leellannonsa cimeeyye gara ikkitinokki hedo waaddannonsa roduuwi aana ‘diwolqissanno’ woy aanansa duha dileddanno. Hatteentenni insa Eelihu gede togoo roduuwa cincite macciishshitanno hattono Maganu Qaali zayite buurtannonsa; Konni garinni togoo roduuwa towaattannota leellishshanno. (Iyyoobi 33:1-3, 7; Yaiqoobi 5:13-15) Konnira Iyyoobinte gede iillinonsa qarrinni kainohunni woy ‘haaqeetenni waajjitinorinna ajuujatenni massinori’ songote giddo Qullaawa Borronni shesho afiꞌra dandiitanno.—Iyyoobi 7:14; Yaiqoobi 4:7.
Lallawo
g 5/09 12-13
Qullaawu Maxaafi Mayyaanno?
Maganu Dureessa Ikkattora Hasiꞌranno?
“Barru fulaeraati! Dureessa hoqa ikkammoraati!”
“Gordoho noori baalu dureessa ikkammora hasidhino daafira, dureessa ikkate halcho nooe.”
“Maganu dureeyye ikkineemmo gede kaaꞌlannonke.”
“Dureessa ikkoommohu Qullaawu Maxaafinni kainohunniiti.”
JIRO Maganu atooteeti yite heddannori batinye ammaꞌno togoo hedo coyidhanno. Insa Maganu hedinore wonshittoro xaa yannara dureessa ikkatto gede kaaꞌlannohe; albillitte qole baꞌraasannohe yite coyidhanno. Togoo rosonna tenne daafira kultanno maxaaffa mannu roore baxanni dayino. Kayi dureessa ikkatto yine rosiinsanni rosi Qullaawu Maxaafi ledo sumuu yaannoho?
Qullaawu Maxaafi kulannonte gede “hagiirraamo Magano” ikkinohu Kalaqaanchinke hagiirraamenna dancha heeshsho heeꞌnammora hasiꞌrannoti dihuluullissannote. (1 Ximootewoosi 1:11, NW; Faarso 1:1-3) Qoleno isi hagiirsiissannosire maassiꞌranno. (Lawishsha 10:22) Ikkirono Maganu yannankera maassiꞌrannonkehu maalaamittete jironniiti? Heeꞌnoommohu hiittoo yannaraatiro huwatanke tenne xaꞌmora dawaro afiꞌneemmo gede kaaꞌlitannonke.
Tini Dureessa Ikkinanni Yannaati?
Hunda Yihowa mite soqqamaanosira maalaamittete jiro oye maassiꞌrinonsa; Maganu manchi Iyyoobinna Moote Selemooni lawishshi tenne leellishanno. (1 Mootoolla 10:23; Iyyoobi 42:12) Wolu batinyu Magano waajjanno mannira, lawishshaho cuuaanchu Yohaannisiranna Yesuusi Kiristoosira maalaamittete jiro dinonsa. (Maarqoosi 1:6; Luqaasi 9:58) Tini maa leellishshanno? Qullaawu Maxaafi xagge leellishshanno garinni Maganu soqqamaanosira mitore assannohu hatte yannara insara hedino hedo ledo sumuu yaanno garinniiti. (Rosiisaancho 3:1) Xaa yannara kuni xintu seeri kaaꞌlannonkehu hiittoonniiti?
Qullaawu Maxaafi masaalo heeꞌnoommohu goofimarchu yannara ikkinota leellishshanno. Tenne goofimarchu barruwa giddo olu, dhibbu, hude, baattote huxano heedhannotanna dagoomittete mittimma baꞌannota masaalloonni; 1914 kawa tini masaalo albinni roore woꞌmitanni no. (Maatewoosi 24:3; 2 Ximootewoosi 3:1-5; Luqaasi 21:10, 11; Yohaannisi Ajuuja 6:3-8) Haranchunni, tini alame baaru giddo lixxara kaꞌe noo markaawe gede ikkite no. Tenne hendiro Maganu soqqamaanosira maalaamittete jiro oye maassiꞌrannonsa yine heda garahonso, balaxisiinsammora hasiꞌrannori wolu coyi no?
Yesuusi Kiristoosi ninke heeꞌnoommo yanna Nohi yanna ledo heewisiisino. Isi togo yiino: “Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no. Baote wayi daye baalanka fee haaꞌre haꞌra geeshsha diaffino. Manchi Beetti daanno yannano hattoota ikkitanno.” (Maatewoosi 24:37-39) Yesuusi heeꞌnoommo yanna Looxi yanna ledono heewisiisino. “Hatte yannarano mannu itanninna aganni, hiranninna hidhanni, kaasiꞌranninna miꞌnanni no. Ikkollana, Looxi Soddooma agure fuli barra, gordunni giiranna ruqanu dirre woꞌmanka gudino. Manchi Beetti daanno barrano hatto ikkanno.”—Luqaasi 17:28-30.
Hige noore coyiꞌniro ita, aga, adhanna adhama hattono hiranna hidha qarra diafidhino. Bushate bushalla kuri coyinni egemmamme yanna gooffinota deate. Ateneeto togo yite xaꞌmi, ‘Maganu billaachaambeemmo gede assannore oye maassiꞌrinkero, isi ninkera danchare assino yaa dandiinanni?’ Didandiinanni; hatto assi yaa isi ninke gawajjara dandaannore assi yaate. Baxillaanchu Magani hatto diassanno.—1 Ximootewoosi 6:17; 1 Yohaannisi 4:8.
g 9/15 6
Woxeho Gara Ikkitino Lao Heedhohe
ATERA WOXU DAAFIRA HIITTOO LAO NOOHE?
Tenne daafira ateneeto layiꞌra woxeho gara ikkitino lao heedhannohe gede assiꞌra hasiissannoheronna teꞌee huwatatto gede kaaꞌlitahera dandiitanno. Lawishshaho ateneeto togo yite xaꞌmi:
□ Ranke dureeꞌminanni gede assitanno yinanni hayyo halcheemmo?
□ Wolootaho mitore aa qarra ikkitannoe?
□ Woxunna afiꞌrino jiro daafira hasaawa baxanno manniwa aana hasiꞌreemmo?
□ Woxe afiꞌrate yee doggeemmo? Woy gara ikkinokkire asseemmo?
□ Woxu nooe daafira mannu baxannoe yee hedeemmo?
□ Duucha woyite woxu daafira hedeemmo?
□ Woxeho nooe lao fayyimmaꞌyano ikko maateꞌya gawajjitanni no?
Kuri xaꞌmuwa giddo mittete nafa ‘Ee’ yite qolattoha ikkiro, togoota maalaamittete hedonna fonqolo effire giwate sharrami. Woxenna jiro orbaasanno manni ledo jaalooꞌma qorophi. Maalaamittete jironni roore amanyootu seera roorsiꞌranno manni ledo jaalooꞌmi.
Woxu baxilli wodanikki giddo rumuxxara wodhitooti. Hatteentenni woxeho gara ikkitino lao heedhannohe gede assiri; woxu baxilli jaallakkinni, maatekkinni hattono fayyimmakkinni roorahera horontanni wodhitooti. Hatto assittoro woxeho gara ikkitino lao nooheta leellishatto.
Maalaamittete Coye Ikkikkinni Maganu Mangiste Hasidhe
‘MANNAHO hasiisannori shiimaho, mannu afiꞌra hasiꞌranno coyiꞌra kayinni gawalo dino’ yinanna macciishshoottoha ikkara dandaanno. Lowo manni kayinni, hasiisannonsahu maalaamittete coyinna afiꞌra hasiꞌranno coyi mereero noo badooshshe buuxinokkiha lawanno. Konni lamunku coyi mereero noo badooshshi maati? “Hasiisanno coyi” heeshshote heeꞌrate afiꞌra hasiissannoho. Sagale, uddanonna gallanni bayichi hasiisannonkereeti. “Afiꞌra hasiꞌneemmori” heeꞌrankera hasiꞌneemmoreeti; kayinni tini coyibba heeshshote heeꞌrate hasiissannonketa diꞌꞌikkitino.
2 Mannu afiꞌra hasiꞌranno coyi, gobba gobbate garinni babbaxxara dandaanno. Lophitanni noo gobbuwara heeꞌrannohu batinyu manni lowo woxe afiꞌre mobayile, dhoqqi dhoqqe, woy shiima baatto hidha hasiꞌrannoha ikkara dandaanno. Lophitino gobbuwara heeꞌranno manni, lowo uduunne afiꞌra, hoola yinoonni mine miꞌna, woy lowo woxinni hidhinanni kaameela hidha hasiꞌrannoha ikkara dandaanno. Heeꞌnoommo gobba ikkitutano ikkituro, maalaamittete coye quwa saꞌne baxa woshshaado ikkitankera dandiitanno; tini qolte mitto coye hidhate anga assitunkerono assa hooggunkerono, woy hakku coyi hasiisannonkeha ikkirono ikka hoogirono maalaamittete coye lexxate hasatto heedhannonke gede assitara dandiitanno.
Lamu Mootichira Borojjicho Ikka Dandaannohu Dino
17 Anninke Yihowa, heeshshonke giddo balanxe Mangistesinna keeraanchimmasi hasiꞌneemmoha ikkiro, addinta hasiisannonkere eemmoꞌne yee qaale eino. (Mat. 6:33) Konni daafira addu Kiristaani ayewoteno fulanno furcho dihooganno. Yihowa aye fatani iillinkero nafa, Qullaawu Maxaafita xintu seerubba lashshi assinummokkinni ‘fulleemmo furcho’ qixxeessate qaale eino. (1 Qor. 10:13) Cincatenni Yihowa agadhineemmoha ikkiro, hattono hayyo aannonke gedenna marraꞌꞌannonke gede huuccatto assiꞌnenna hajajosinna seerasi harunsine iso addaxxineemmota leellinsheemmoha ikkiro, isi haꞌrinshonke seekkanno. (Far. 37:5, 7) Yihowa Mootichanke assiꞌne isira calla soqqamate yine assineemmore isi maassiꞌranno. Iso balaxisiinseemmoha ikkiro, isi heeshshonke “seekkanno.”—Kalaqo 39:3 ledo heewisiisi.
SADAASA 4-10
MAGANU QAALI GIDDO NOOTA MUXXE JIRO | IYYOOBI 22-24
“Mannu Maganoho kaaꞌlannori nooni?”
w05 9/15 27 guf. 1-3
Busha Hedo Gargadhe!
Maganu kalaqamisi lowore assara hasiꞌranno yitanno hedo, mannu ooso isira kaaꞌlitannori dino yitanno hedo ledo mittete. Elfaazi sayikkimeeshsho coyiꞌri woyite, “Halaalinta mannu Maganoho kaaꞌlannori nooni? Egennaamu nafa Maganoho ledannosiri nooni?” yiino. (Iyyoobi 22:2) Beldaadino isi yiinotera sumuu yee, “Maganu albaanni, mannu keeraaꞌmara, ilaminohu baalu fayyaaleessa ikkara dandaannoni?” yiino. (Iyyoobi 25:4) Hatto ikkiro, reyanno manchi Iyyoobi Maganu albaanni keeraancho ikkeemmo yee hiitto ikke hedara dandaanno?
Yannankera mito manna gara ikkitinokki hedo waaddannonsa. Togo yee hedanno gede assinonsari, lophino gari, heeshshonsa giddo tuncu yiinonsari, sircho woy gare bande gimboonninsa daafira ikkara dandaanno. Kayi Sheexaanunna agaanintesi mittu manchi hexxo mudhanno woyite lowo geya hagiidhitanno. Insa mittu manchi ani asseemmori Woꞌmanka Dandaanno Magano kaaꞌlannori dino yee hedanno gede assituro, hakku manchi roore hexxo mudhara dandaanno. Gale hose hakku manchi heeshshote Maganiwiinni xeertiꞌrara dandaanno.—Ibiraawoota 2:1; 3:12.
Geedhimmanna dhibbu dhuka hoongeemmo gede assankera dandaanno. Wedellu heeꞌne dancha ordu fayyimmanna dhuka afiꞌnoommo waro assinoommore hendeemmo woyite, xa Maganoho soqqamate assineemmori hakkeeshshi geeshsha kaaꞌlannori nookkiha lawankera dandaanno. Assineemmori Maganoho kaaꞌlannori dino yine hendammora hasidhannori Sheexaanenna agaaninte ikkitinota huwatanke lowo geeshsha hasiissannote! Togoo hedo gargadha hasiissannonke.
w95 2/15 27 guf. 6
Qarra Tira Dandiinanni Gara Afate Kaaꞌlanno Roso
Iyyoobiti sase jaalla Maganu hayyonni ikkikkinni uminsanni coyidhe isi hexxo mudhanno gede assitinosi. Elfaazi “Maganu soqqamaanosi diaddaxxanno” hattono Iyyoobi keeraancho ikkirono ikka hoogirono tenne Yihowa bushshaho dikiiranno yaate geya iillino. (Iyyoobi 4:18; 22:2, 3) Hexxo mudhinanni gede assannori kawiinni saino coyi dino yaa dandiinanni! Gedensoonni Yihowa Elfaazinna jaallasi coyidhinohu gara ikkinokki coyiꞌra rufasi dhagge diꞌꞌikkitannonke. Isi, “ane daafira taalo coye dicoyidhinoonni” yiino. (Iyyoobi 42:7) Kayi roore xissiissannoti hakkiinni aanchite coyidhinoreeti.
w03 4/15 14-15 guf. 10-12
Yihowa Wodana Hagiirsiissanno Wedella
10 Sheexaanu xaꞌmo kayisinohu Iyyoobi ammanama daafira calla ikkikkinni ateno ikko wolu baalunku Maganoho soqqamanno manni ammanama daafiraati. Isinni Sheexaanu mannu baalunku daafira coyiꞌranni Yihowara togo yiino: “Manchu [Iyyoobi calla ikkikkinni baalunku manni] noosire baala lubbosira yee aanno.” (Iyyoobi 2:4) Tini shota ikkitinokki hajo ati assattori ledo xaadooshshe afidhinota huwatitto? Lawishsha 27:11 kultannonte gede, Yihowa isira aa dandaattori noota coyiꞌrino; isi xonannosihura Sheexaaneho dawaro qolanno gede assa dandaatto. Hanni hedi, kalqete alame Gashshaanchi baalantenni roortinote tenne xaꞌmora dawaro qolate kaaꞌlamatto gede koyisinohe. Dhagge ikkitanno qoosso afiꞌrootto! Yihowa yiinore assa dandaatto ikka? Iyyoobi hatto assa dandiino. (Iyyoobi 2:9, 10) Yesuusino ikko wolu kiirre tunqannikki manni hattono batinyu wedelli hatto assa dandiino. (Filiphisiyusi Sokka 2:8; Yohaannisi Ajuuja 6:9) Atino hatto assa dandaatto. Togoo coyiꞌra anga diwodhineemmo yine heda didandiineemmo. Assattori Sheexaanu Yihowa xonanno gede woy Yihowa isira dawaro qolanno gede assate kaaꞌlamattota leellishanno. Ati ayera kaaꞌlama hasiꞌrattoyya?
Yihowa Towatannohe!
11 Doodhatto doorshi Yihowa hagiirsiisara woy dadillisara dandaanno? Yihowa Sheexaaneho dawaro qolanno gede wonanni isira lowo manni diammaname heeꞌrino? Hige Sheexaanu mannu Yihowara soqqamannohu iso baxe diꞌꞌikkino yee coyiꞌrinoti kapho ikkase wonanni leeltino. Ikkirono Yihowa atera hedanno daafira xaano isi aliidimmara halamattora hasiꞌranno. Yesuusi, “Gordoho heeꞌrannohu Anniꞌneno kuri shiimmaaddu giddonni mittuno baꞌꞌara dihasiꞌranno” yiino.—Maatewoosi 18:14.
12 Doodhatto doorshi Yihowa dadillisasira woy hagiirsiisasira dandaannoti egennantinote. Qullaawu Maxaafi Yihowa mannu assannohu danchu coyinni hagiidhannotanna bushu coyinni qole lowo geya dadillannota xawise kulanno. Lawishshaho, Israeele marro marro higge finqiltu woyite Yihowa lowo geya ‘dadillino.’ (Faarso 78:40, 41) Nohi yannara Baote Wayi daara albaanni “mannu bunshe baattote aana batidhinota” lae Yihowa ‘wodanisinni dadillino.’ (Kalaqama 6:5, 6) Hakko daafira atino bunshe assattoha ikkiro, Kalaqaanchikki lowo geya dadillanno. Hatto yaa kayi Maganu wolqiweeloho woy kai gede dadillannoho yaa diꞌꞌikkino. Hatteentenni isi baxannohehura ate daafira hedanno. Danchare assatto woyite qole Yihowa wodani hagiidhanno. Isi hagiidhannohu Sheexaaneho dawaro qolanno daafira calla ikkikkinni ate baꞌraasa dandaanno daafiraati. Isi ate maassiꞌra hasiꞌranno. (Ibiraawoota 11:6) Annikki Yihowa lowo geya baxannohe!
Maganu Qaalinni Ronseemmore
w04 7/15 21-22
Ayyaanaamittete Mixokki Kalaqaanchokki Ayirrisate Horoonsiꞌri
Hanni Yihowa kalqete alame kalaqinohu hiittoonniitiro hedi. “Barru hashshi; hashshuno soodi” yitanno yaatto Yihowa kalaqama kalaqate aante aantete noo yanna horoonsiꞌrinota leellishshanno. (Kalaqama 1:5, 8, 13, 19, 23, 31) Yihowa umo mittu mittunku kalaqote barra maa assannoro mixo fushshiꞌrino. Qoleno kalaqara hedinore baalare kalaqino. (Yohaannisi Ajuuja 4:11) Maganu manchi Iyyoobi Yihowa “hasiꞌrire assa dandaanno” yiino. (Iyyoobi 23:13) Yihowa ‘kalaqinoha baala lae lowo geya dancha ikkinota’ coyiꞌri woyite baasa hagiidhinoti dihuluullissannote.—Kalaqama 1:31.
Ninkeno mixonkewa iilla hasiꞌnummoro, tenne mixonke wonshiꞌrate lowo hasatto heedhannonke gede assiꞌra hasiissannonke. Togooti lowo hasatto heedhannonke gede assiꞌrate mayi kaaꞌlannonke? Yihowa baatto suudiweelonna mullicho ikkite noo woyite nafa, albillitte biifado ikkitannotanna isi ayirranno gede asitannota hedino. Ninkeno assinammora hendoommori, mayi guma afiꞌrinoronna hiittoonni kaaꞌlannonkero hiincanke mixonke wonshiꞌrate hasatto lexxitanno gede assitanno. Tooni yinannihu 19 diri wedellichira togoori tuncu yiinosi. Isi Galchimi Awuroppira noota sinu biiro daaꞌꞌati woyite dhagge assiꞌrinota horontanni dihawanno. Daaꞌꞌatihunni kayise Tooni, ‘Togoo basera heeꞌne soqqama maa labbanno ikka?’ yee hedino. Isi Beeteele eꞌꞌe soqqamate daafira horontanni heda diagurino; qoleno tenne mixo wonshiꞌrate agurikkinni sharramino. Isi Beeteele eate forme wonsheenna, yannate gedensaanni fajjinisi woyite lowo geya hagiidhino.
Lallawo
Soqqanshote Gara Ikkitino Lao Heedhannoꞌne Gede Assidhe
SOQQANSHOTE GARA IKKITINO LAO HEEDHANNONKE GEDE ASSIꞌRA HASIISSANNONKEHU MAYIRAATI?
17 Yesuusi mitu manni sokkasi macciishsha giwirono, hexxo mudhe farciꞌra diagurino. Mayira? Isi mannu halaale macciishsha hasiissannonsata afino; qoleno dandaamisi deerrinni lowo manni Maganu Mangiste sokka macciishshanno gede kaaꞌla hasiꞌrino. Hakkiinnino sae, umi qara sokkasi macciishsha giwinohu mitu manni gedensoonni kayi macciishshannota afino. Hanni maatesi giddo ikkinore laꞌno. Yesuusi soqqaminohu sasu dirinna lewu agani giddo, roduuwisi giddo rosaanosi ikkinohu dino. (Yoh. 7:5) Ikkirono isi reyotenni kaihu gedensaanni insa rosaanosi ikkitino.—Soq. 1:14.
18 Rosiinseemmoha Qullaawu Maxaafi halaale gedensoonni macciishshe adhannohu ayetiro dianfoommo. Mitu manni sokkanke macciishshe adhannohu lowo yanna gedensaanni ikkara dandaanno. Kulleemmonsa sokka macciishsha hasiꞌrannokki manni nafa, dancha amanyootenke lae gedensoonni ‘Magano galatara’ dandaanno.—1 Phe. 2:12.
19 Kaanseemmorinna waa hayikkinseemmori ninke ikkinummorono, lossannohu kayi Magano ikkinota dea dihasiissannonke. (1 Qorontoosi 3:6, 7 nabbawi.) Itiyophiyaho soqqamannohu Geetahuni yinanni rodii togo yiino: “Gari geeshsha soqqammoonnikkihu mittu qoqqowira 20 saꞌꞌanno diro calliꞌya soqqamoommo. Xa kayinni kowiicho 14 halashshaano no. Insa giddo 13 cuuantinoreeti; kuri giddo mitte minaamaꞌyaati, sasu oosoꞌyaati. Gambooshshe daanno manni kiiro mereerimunni 32te.” Roduu Geetahuni Yihowa suwashshu wodani noonsa manna dirijjitesiwa abba geeshsha cince soqqamasinni lowo geya hagiidhino.—Yoh. 6:44.
20 Mannu baalunku heeshsho Yihowara muxxete. Isi tini alame baꞌara albaanni Beettisi ledo baalante daga giddonni manna gamba assate looso loonseemmo gede asse ayirrisinonke. (Hag. 2:7) Sabbakate loosinke taqu toe amadino manna hasate gedeeti. Ninke konne manna hasse fushshitannori gedeeti. Reyikkinni fushshinanni manni kiiro shiima ikkiturono, hassuri baalu loossino loosi shaaꞌꞌa diꞌꞌikkino. Sabbakate loosinkeno hattooti. Sheexaanu alamenni gatannohu mageeshshi manni nooro dianfoommo. Ikkollana, Yihowa insa gatisate ninke giddo ayeno horoonsiꞌrara dandaanno. Boliiviyaho heeꞌrannohu Andireyaasi yinanni rodii togo yiino: “Qullaawu Maxaafi halaale rose cuuamannoha mitto mittonka halashshaancho, lowo roduuwi kaaꞌliteenna dayinohu gede asse laeemmo.” Ninkeno soqqanshote togoo lao heedhannonke gede assiꞌno. Hatto assinummoro Yihowa maassiꞌrannonke, soqqanshonkennino addu hagiirre afiꞌneemmo.
SADAASA 11-17
MAGANU QAALI GIDDO NOOTA MUXXE JIRO | IYYOOBI 25-27
“Guuta Ikka Hoongummorono Ammanama Dandiineemmo”
it-1 1210 guf. 4
Ammanama
Iyyoobi. Yooseefi reyihu gedensaanninna Muse yannara albaanni heeꞌrino yine hendannihu “Iyyoobi bunshetewiinni fafe Magano waajjannohonna sao nookki keeraanchooti.” (Iyo 1:1; IYYOOBI yaannoha lai.) Sokkaano iima Maganu albaanni gamba yitu yannara Sheexaanuno ledonsa gamba yiino; hakka woyite Yihowa Iyyoobi daafira Sheexaane xaꞌmino xaꞌmo, Sheexaanunna Yihowa mereero kaꞌino heewo mannu ooso ammanama ledo xaadooshshe afidhinota leellishshanno. Sheexaanu, ‘Iyyoobi Magano magansiꞌrannohu suwashshu wodaninni Maganoho galino daafira ikkikkinni umisi horora yeeti’ yee Iyyoobi kaphunni kassasino. Konni garinni isi ‘Iyyoobi Maganoho ammanamannonso diammanamanno?’ yitanno xaꞌmo kaꞌanno gede assino. Sheexaanu Iyyoobi jironna oososi nafa gudanno gede fajjinoonnisiha ikkirono, Yihowara ammanamannokki gede assa didandiino. (Iyo 1:6–2:3) Hakkiinni xaano Sheexaanu jajjisinna oososi gooffurono Iyyoobi Yihowara ammanaminohu bisisi kisama hoogino daafiraati yiino. (Iyo 2:4, 5) Hakkunni gedensaanni Iyyoobi buuto xiwaminoha, minaamasi hexxo mudhanno gede assitinosiha hattono Maganu seeranna hedo shokkishshanno jaallasi qacifattinosiha ikkirono (Iyo 2:6-13; 22:1, 5-11), isi Yihowara ammaname heeꞌrannota coyiꞌrino. Isi, “reyammo geeshsha keeraanchimmaꞌya diagureemmo. Keeraanchimmaꞌya kulanni heeꞌreemmo; wodaniꞌyano busha assootto yaannoeri diheeꞌranno” yiino. (Iyo 27:5, 6) Isi ammaname heeꞌrino daafira Maganu diini Sheexaanu kaphaancho ikkinoti leeltino.
Minshe Nookkire Ikkitine Heedhe!
3 Maganu soqqamaasine minshe nookkire ikkitinota leellisha dandiitannohu hiittoonniiti? Yihowa woꞌmu wodaninninna geedote baxillinni baxxe, hattono woꞌmante yannara isi fajjo assiteeti. Hanni Qullaawu Maxaafi giddo minshe nookkire ikka yaanno qaali mayi tiro afiꞌrinoro laꞌno. Minshe nookkire ikkate yaa, xalala, keeraancho woy xeꞌne nookkire ikkate yaate. Lawishshaho Muse Seeri, Yihowara kakkalo assine shiqinshanni saada keeraancho woy muso afidhinokkita ikka hasiissannota kulanno. (Lew. 22:21, 22) Maganu manni naaffinota, macca taꞌinota woy ille baꞌinota, hattono dhiwantino saada kakkalo asse shiqishara difajjinanni. Yihowa isira kakkalo assine shiqinshanni saada xalala, keeraancho woy xeꞌne nookkita ikkitara hasiꞌranno. (Mil. 1:6-9) Yihowa keeraanchimma woy xalalle hasiꞌrasi dhagge diꞌꞌikkitannonke. Mayira? Dikkotenni mitore hidhineemmo woyite lawishshaho laalo, maxaafu woy wolu uduunni muso nooha woy gama wido dadhaminoha ikkiro hakkonne uduunne hidha dihasiꞌneemmo. Ninke baalunku xeꞌne nookkire hidha hasiꞌneemmo. Hatteente gede Yihowa, isira noonke baxillinna ammanama woꞌmanna xeꞌne nookkita ikkitara hasiꞌranno.
4 Minshe nookkire ikkate guuta ikka hasiissannonke yine heda garaho? Soꞌneemmore ikkinoommo daafira, minshe nookkire ikka didandiineemmo yine hendeemmoha ikkara dandaanno. Minshe nookkire ikkate guuta ikka hasiissannokkita leellishannoha lame korkaata laꞌno. Umihunni, Yihowa soꞌronke aana diꞌꞌillachishanno. Qaalisi togo yaanno: “Cubbonke kiiroottoha ikkoommero, gatara dandaannohu ayeti?” (Far. 130:3) Isi guuntete xeꞌne noonketanna cubbaataamma ikkinoommota afino daafira, shaqqillunni maarannonke. (Far. 86:5) Layinkihunni, Yihowa dhukanke afino daafira wolqankera aleenni ikkino coye asse diyaannonke. (Faarso 103:12-14 nabbawi.) Ikkina isi albaanni keeraano, xalaloota woy xeꞌne nookkire ikka dandiineemmohu ma garinniiti?
5 Yihowa soqqamaasine minshe nookkire ikkitanno gede assannonsahu qaru akati baxilleho. Maganoho noonke baxillinna ammanama woꞌmanna guuta ikka hasiissannose. Baxillinke hattooha ikkiro, fonqolu iillannonke woyite nafa minshe nookkire ikkine heeꞌra dandiineemmo. (1 Dud. 28:9; Mat. 22:37) Hanni umo laꞌnummore sase Yihowa Farciꞌraasine hendo. Insa hatto assitinohu mayiraati? Wedellitte beetto rosu mine hagiirsiisannore assa giwisinoseni? Minunni mine haꞌre soqqamanno wedellichi minshasira hasiꞌrannoni? Qoleno maatete hasiisannore shiqishate sharramanni noo rodii loosu noosikkiha heeꞌra hasiꞌrannoni? Hatto diꞌꞌikkino. Hatteentenni insa Yihowa biddishshi qullaawa ikkinota affino; hattono iimi Annansa hagiirsiisate aana illachishshino. Insa iso baxxanno daafira, mitto coye doodhitara albaanni woꞌmanka woyite iso heddanno. Insa hatto assite minshe noonsakkire ikkitinota leellishshino.
Maganu Qaalinni Ronseemmore
Maganu Qaali Garinni Qinaabbino Dirijjite
3 Maganu kalaqinori isi taalamannosihu nookki Qineessaancho ikkinota leellishanno. Qullaawu Maxaafi togo yaanno: “Kaaliiqi egennosinni baatto kalaqino; afasinni gordo mitto darga uurrisino.” (Law. 3:19) Ninke “Maganu loosinori” daafira anfoommori “shiimiidiho”; qoleno isi daafira “macciishshinoommori hilireeti.” (Iyo. 26:14) Ikkirono, pilaaneettate, beeddahetenna gaalaksuwate daafira shiimare afanke, tini iimi bissa dhagge ikkanno garinni qinaabbinota huwatate kaaꞌlitannonke. (Far. 8:3, 4) Gaalaakse lowo miliyoone ikkitanno beeddahe gambooshsheeti; tini beeddahe iima qinaawino garinni millissanno. Arrishshote budi giddo nooti pilaaneetta, tiraafiikete higge agadhinannihu gede uminsa doyichonni fultukkinni arrishshote gaangaawira doyitanno gari dhaggete! Ee kalqete alame maalaꞌlisanno garinni qinaabbino gari, Yihowa “ogimmasinni” iimanna uulla kalaqinota huwanteemmo gede kaaꞌlitannonke; tini ninke iso guwisiꞌneemmo, isira ammanamme heeꞌneemmonna iso magansiꞌneemmo gede assitannonke.—Far. 136:1, 5-9.
SADAASA 18-24
MAGANU QAALI GIDDO NOOTA MUXXE JIRO | IYYOOBI 28-29
“Iyyoobihu Gedee Suꞌmi Nooꞌne?”
w02 5/15 22 guf. 19
Qarraataammaho Baxillenna Shaqqille Leellishshe
19 Aleenni laꞌnummoti Qullaawu Maxaafi xagge, kaaꞌlo hasiissannonsarira baxillenna shaqqille leellishsha hasiissannota xawisse kultanno. Abirihaamira maatesi sirchi kali baꞌꞌannokki gede assate Beetueeli kaaꞌlo hasiissinosi. Yaiqoobi reeshsha Kanaani haaꞌre haꞌrate Yooseefi kaaꞌlo hasiissino. Naoomirano ragge afiꞌrate Ruuti kaaꞌlo hasiissinose. Abirihaami, Yaiqoobino ikko Naoomi kaaꞌlannonsahu nookkiha uminsanni tenne assa didandiitanno. Hatteente gede xaa yannarano kaaꞌlo hasiissannonsarira baxillenna shaqqille leellisha hasiissanno. (Lawishsha 19:17) Maganu manchi Iyyoobi lawishsha harunsa hasiissannonke; isi “kaaꞌlote raaranno qarraataamonna, towatannohu nookki anniweeloota” hattono ‘reyote gambissinore’ kaaꞌlino. Qoleno Iyyoobi, ‘galte shiiꞌrino meento kaaꞌleennansa hagiidhino, ballicha massagino, naafichano irkisino.’—Iyyoobi 29:12-15.
it-1 655 guf. 10
Uddano
Wole batinye basera uddano lawishsha assine horoonsiꞌnoonni. Yuniforme woy baxxitino uddano mittu manchi hiitte dirijjite wido ikkinoro woy mitte millimillo irkisannota leellishshanno; hatteente gede Qullaawu Maxaafi giddo uddano mittu manchi doodhino doorshinninna assannorichinni kainohunni ayimmasi hiittootero leellishate horoonsiꞌnoonni; Yesuusi sargete uddano daafira kulino lawishshi tenne leellishanno. (Mt 22:11, 12) Yohaannisi Ajuuja 16:14, 15te Mootichu Yesuusi Kiristoosi mittu manchi ayyaanaamittetenni mugiro halaalaanchu Maganira ammanaminota leellishshanno ayimmasi baꞌara dandiitannota kule qorowisiisino. Tini, ‘Woꞌmanka Dandaanno Maganihu batiꞌru barri oli’ yannara baꞌnanni gede assitara dandiitanno.
w09 2/1 15 guf. 3-4
Suꞌmu Maa Leellishanno?
Ilammeemmo woyite suꞌmanke doodha didandiineemmo. Kayi wolootu dancha woy busha suꞌma uyitannonke gede assiꞌneemmori ninkeeti. (Lawishsha 20:11) Ateneeto togo yite xaꞌmi: ‘Yesuusi woy soqqamaasinesi anera suꞌma fushshate faro afidhoommero, mayite fushshitannoe? Akattaꞌya woy ayimmaꞌya leellishannohu hiikkonne suꞌmaati?’
Kuri xaꞌmuwa seekkine heda hasiissannonke. Mayira? Moote Selemooni “Lowo jironni danchu suꞌmi woyyanno” yiino. (Lawishsha 22:1) Heeꞌnoommo dagoomi giddo danchu suꞌmi heeꞌrinkero tini lowo jiro gedeeti. Baalunku coyinni roore Maganu albanni danchu suꞌmi heeꞌrinkero, hegerera baꞌannokki jiro afiꞌneemmo. Hiittoonni? Maganu iso ‘waajjitannore suꞌmansa maxaafisira borreessannotanna’ hegerera heeꞌrate hexxo aannonsata coyiꞌrino.—Milkiyaasi 3:16; Yohaannisi Ajuuja 3:5; 20:12-15.
Maganu Qaalinni Ronseemmore
g00 7/8 11 guf. 3
Hisata Kaaꞌlitannohe!
Hisata woy muushshi yaa addinta kaaꞌlitannori no? Mittu manchi alba hisateennahe woy muushshi yeenna hagiidhootto yanna qaagatto? Woy alba kolossi yiino daafira waajjootto woy dibaxannoe yite hedootto yaanna qaagatto? Addanko, muushshi yaa woy hisata kaaꞌlitanno. Muushshi yaannohano ikko muushshi assanno mancho kaaꞌlitanno. Qullaawu Maxaafi giddo kulloonnihu Iyyoobi diinnasi daafira coyiꞌranni togo yiino: “Waajjitanno woyite alba hisateemmonsa; albiꞌya hisatanno woyiteno jawaante afidhanno.” (Iyyoobi 29:24) Iyyoobi ‘albi hisatasi’ isi baxisannohanna hagiirraamo ikkinota leellishannoha ikkara dandaanno.
SADAASA 25-31
MAGANU QAALI GIDDO NOOTA MUXXE JIRO | IYYOOBI 30-31
“Iyyoobi Amanyootunni Keeraancho Ikke Heeꞌrino Gara”
w10 4/15 21 guf. 8
Illeꞌne Haafa Coye Laꞌannokki Gede Assidhe!
8 Addu Kiristaanano illete halchishannorinna maalu yorto waaddannonsa. Hakko daafira Maganu Qaali laꞌneemmorinna halchineemmori daafira ninkeneeto eemadhineemmo gede jawaachishannonke. (1 Qor. 9:25, 27; 1 Yohaannisi 2:15-17 nabbawi.) Keeraanchu manchi Iyyoobi laꞌꞌatenna yortote mereero lowo xaadooshshi noota huwatino. Isi, “Aja meyata laeemmokki gede, aneneete qorophisiisoommo” yiino. (Iyo. 31:1) Iyyoobi meyata amanyoote baino garinni kisa qorophinoha calla ikkikkinni isi togoo hedo heda nafa dihasiꞌrino. Yesuusi amanyoote bainore heda hasiissannonkekkita luphi asse kulino; isi togo yiino: “Meyata lae yorinoha baala wodanisinni ise ledo foorinohu gede assine kiirranni.”—Mat. 5:28.
w08 9/1 11 guf. 4
Gawalokki Mamaatiro Hedi
Mitte doogo haꞌra hanafattora albaanni, ‘Tini doogo mamira massitannoe?’ yite ateneeto xaꞌmi. Marte gawaꞌlattowa balaxxe hedakki lowo qarri giddo tuggahera dandiitanno doogo haꞌra hanafattokki gede kaaꞌlitahera dandiitanno. Maganu fushshino biddishsha dulli assitanno mannoota Eedisinna siimu xaadooshshinni saꞌꞌannohu wolu dhibbi amadansara dandaanno; hattono hasiꞌnoonnikki godowi gatansaranna godowu gato huntara dandiitanno; qoleno jaaloominsa baꞌꞌaranna tiiꞌꞌinsa xurara dandaanno. Soqqamaasinchu Phaawuloosi amanyootu maaeelle assanno manni gawalo maatiro xawise coyiꞌrino. Insa, “Maganu Gashshoote diragidhanno.”—1 Qorontoosi 6:9, 10.
w10 11/15 5-6 guf. 15-16
Wedella, Maganu Qaali Massagannoꞌne Gede Assidhe
15 Maganoho ammanamattokki gede assanno fonqoli tuncu yaannohehu roorenkanni hiittoo woyiteeti? Wolootu ledo nootto woyiteetinso callu nootto woyiteeti? Rosu mine woy loosu basewa nootto woyite ayyaanaamittekki gawajjara dandaannore gargadhate qixxaawattoti egennantinote. Togoo woyite ayyaanaamittekki gawajjara dandaannore baqqi yite agadhatto. Boohaaratto woyitenna iillannohe fonqolo gargadhate qixxaawoottokki woyite kayi amanyoote bainore assate faro roore lexxitara dandiitanno.
16 Callu heeꞌratto woyite nafa Yihowara hajajama hasiissannohehu mayiraati? Yihowa dadillisattora woy wodanasi hagiirsiisattora dandaattota qaagi. (Kal. 6:5, 6; Law. 27:11) Assattori Yihowa dadillisanno woy hagiirsiisanno; mayira yiniro isi ate daafira hedanno. (1 Phe. 5:7) Isi seyannohe gede macciishshattosira hasiꞌranno. (Isa. 48:17, 18) Hunda Israeelete waro mite soqqamaanosi hajajosi dulli assitu woyite isi lowo geya dadillino. (Far. 78:40, 41) Yihowa masaalaancho Daanieeli kayinni lowo geya baxannosi; korkaatuno sokkaasinchu iso “Maganu lowo geeshsha baxannohehu” yiinosi. (Dan. 10:11) Yihowa Daanieeli lowo geya baxinosihu mayiraati? Isi mannu ledo noo woyite calla ikkikkinni callu noo woyiteno Maganoho ammaname heeꞌrino daafiraati.—Daanieeli 6:10 nabbawi.
Maganu Qaalinni Ronseemmore
w05 11/15 11 guf. 3
Baxillunni Macciishshate Hayyo
Iyyoobi jaalla isi tonne meddi yitanno yanna hige coyiꞌrinore macciishshitino. Ikkirono Iyyoobi, “Ani coyiꞌroommota macciishshannoehu heeꞌroommero” yiino. (Iyyoobi 31:35) Isi hatto yiinohu mayiraati? Korkaatuno, insa macciishshitino gari iso disheshifachishinosi. Insa isira diheddino, woy qarrisi leellansara dihasidhino. Insa iso shaqqillunni macciishshite marartannota dileellishshino. Soqqamaasinchu Pheexiroosi kayi togo yee amaalinonke: “Baalunku mimmitiꞌne ledo suumuu yitine heedhe; wolu manni qarra umiꞌnehu gede assitine hedde. Rodiimmate baxillinni baxamme; shaqqaddanna jooguulle ikke.” (1 Pheexiroosi 3:8) Wolu manni qarra uminkehu gede assine hendeemmota leellisha dandiineemmohu hiittoonniiti? Togo assa dandiineemmo doogga giddo mitte insara hendeemmota leellishatenna qarransa huwatate woꞌnaalate. Insara hendeemmota leellinsheemmo doogga giddo mite, “Lowo geya qarrante nootto yaate” woy “Qarrikki wolu mannira dileellino yaate” yitanno gedee hedo mararsiꞌne coyiꞌrate. Wole doogo qole isi coyiꞌrinore uminke yaattonni coyiꞌne coyiꞌrinore huwantoommota leellishate. Baxillunni macciishshineemmo yaa, coyiꞌrinore calla macciishshineemmo yaa ikkikkinni macciishshaminosireno huwatate woꞌnaalleemmo yaate.
Lallawo
g16.4 8-9
Qullaawu Maxaafi Labbaahu Labbaahu Woy Meyati Meyate Ledo Akkimalate Daafira Mayyaanno?
Qullaawu Maxaafi Amaale Kaajjadote?
Meyaati meyate ledo woy labbaahu labbaahu ledo akkimalate dooꞌꞌo noonsari daafira mayyaa dandiinanni? Insa kalaqamanka togooreeti? Hatto ikkiro, akkimalate halchonsa wonshiꞌra soꞌrote yaa kakkacha diꞌꞌikkitino?
Qullaawu Maxaafi mannu konni garinni akkimalate hasatto heedhannonsa gede assinori maatiro kulannokkiha ikkirono, mite mannu akatta kayi bayicho assidhinota kulanno. Ikkirono, Qullaawu Maxaafi Magano hagiirsiisa hasiꞌnummoro mito assoote giwa hasiissannonketa, lawishshaho labbaahu labbaahu ledo woy meyati meyate ledo akkimalate ikkitowiinni xooqa hasiissannonketa kulanno.—2 Qorontoosi 10:4, 5.
Mitootu Qullaawu Maxaafi amaale kaajjadote yitanno. Insa hatto yitannohu ‘Halchonke wonshiꞌra hasiissannonke; woy siimu xaadooshshi lowo geya hasiisannoha ikkino daafira togoo hasatto eemadha dihasiissannonke; isinni eemadha didandiinanni’ yite heddanno daafiraati. Ikkirono Qullaawu Maxaafi ninke baalunku yortonke eemadha dandiineemmota kule ayirrisannonke. Mannu ooso saada ikkitinokki daafira yortonsa eemadhate doodha dandiitanno.—Qolasiyaasi Sokka 3:5.
Hanni aane noo coye hendo: Mite fullahaano, mite akatta lawishshaho hanqe boolaqiꞌrate akati sirchunni saꞌꞌara dandaannota coyidhanno. Qullaawu Maxaafi hanqe boolaqiꞌrate kaimu maatiro bade kulannokkiha ikkirono, mitu manni ‘hanqaaleessa’ ikkinota kulanno. (Lawishsha 22:24; 29:22) Ikkirono, “fooggaltooti; hanqonna giirama aguri” yeeno kulanno.—Faarso 37:8; Efesooni Sokka 4:31.
Togoo amaalera sumuu yaannokkihu woy hanqe boolaqiꞌranno mannira togoo amaale kaajjadote yee coyiꞌrannohu boode mannaatilla. Isinni, hanqu sirchunni saꞌꞌanno yite heddanno fullahaano nafa mannu hanqo eemadhanno gede kaaꞌlate sharrantanno.
Yihowa Farciꞌraasine Qullaawu Maxaafihu xintu seeri ledo sumuu yaannokki assoote baalanka effidhe gibbanno; lawishshaho, insa meyatinna labbaahu adhamikkinni siimu xaadooshshe assannota effidhe gibbanno. Tenne daafira Qullaawu Maxaafi togo yee amaalano: “Mittu mittunku galteꞌne ledo hiitto ikkitine qullaawanna ayirrado heeshsho heedhinanniro afa hasiissannoꞌne. Magano affinokki daga gede foorrete hamaande heedhoonkeꞌne.”—1 Teselonqe 4:4, 5.
“Kunni Albaanni Kiꞌne Giddonni Mitu Mitu Hattooreeti”
Umi xibbi diro Kiristaana ikkino manni addi addi budi noonsaho; heeshshonsa garino addi addiiti; insa giddo mitu heeshshonsa giddo lowo coye biddi assidhino. Lawishshaho Qullaawu Maxaafi, “saalimalootu woy kaphu maganna magansidhannori woy foortannori woy labbaahu ledo akkimaltannori” daafira kulanno. Hakkiinni, “Kunni albaanni kiꞌne giddonni mitu mitu hattooreeti” yaanno.—1 Qorontoosi 6:9-11.
Qullaawu Maxaafi, “Kunni albaanni kiꞌne giddonni mitu mitu hattooreeti” yaanno woyite labbaahu labbaahu ledo woy meyati meyate ledo akkimala agurtinorira konni kaꞌa horo togoo yorto diheedhannonsa yaanni no? Hatto yaa didandiineemmo; mayira yiniro Qullaawu Maxaafi, “Ayyaanu garinni heedhe! Maalu yorto horonta wonshitinoonte!” yee amaalanno.—Galatiyu Sokka 5:16.
Qullaawu Maxaafi mittu Kiristaanchira busha yorto horo diheedhannosi yee kulannokkita qaaga hasiissannonke. Hatteentenni, mittu Kiristaanchi togoo yorto wonshiꞌra hoogate doodha dandaannota kulanno. Kiristaanu togoo yorto eemadha dandaanno; busha yorto daafira hiinca qarru giddo tuggannota afino daafira togoo yorto daafira dihedanno.—Yaiqoobi 1:14, 15.
Konnira Qullaawu Maxaafi yortotenna assootu mereero badooshshu noota kulanno. (Roomu Sokka 7:16-25) Meyati meyate woy labbaahu labbaahu ledo akkimalate hasatto noosihu mittu manchi busha akatta lawishshaho, hanqo, foorre hattono hafuurre qeeꞌla dandaannonte gede, togoota busha hasattono qeeꞌla dandaanno.—1 Qorontoosi 9:27; 2 Pheexiroosi 2:14, 15.
Yihowa Farciꞌraasine Qullaawu Maxaafi biddishshira halantannoha ikkirono, wolu mannirano insati gedee lao heedhannonsa gede assate digiddeessitanno. Qoleno insatenni baxxitino heeshsho heeꞌra hasiꞌranno manni qoosso agarsiisate fushshinoonni seera soorrate diwoꞌnaaltanno. Yihowa Farciꞌraasine dudubbanno sokka mannu qoosso kissannota diꞌꞌikkitino; hatteentenni insa macciishsha hasiꞌrannohura dancha duduwo diinaggaabbe kultanno.—Soqqamaasinete Looso 20:20.