Kiristaanu Heeshshonna Soqqanshote Xiinxallote Maxaafichora Qummi Assinoonni Borro
© 2024 Watch Tower Bible and Tract Society of Pennsylvania
BADHEESSA 3-9
MAGANU QAALI GIDDO NOOTA MUXXE JIRO LAWISHSHA 3
Yihowa Addaxxitinannita Leellishshe
ijwbv birxicho14 guf.4-5
Lawishsha 3:5, 6—“Umikki Egennora Irkidhooti”
“Woꞌmu wodanikkinni Kaaliiqa addaxxi.” Mitto coye Yihowa hasiꞌranno garinni assine iso addaxxineemmota leellinsheemmo. Yihowa woꞌmu wodaninkenni addaxxa hasiissannonke. Qullaawu Maxaafi giddo wodana yaanno qaale duucha woyite giddooyidi ayimma lawishshaho, mittu manchita hasattosi, hedosinna laosi xawisate horoonsiꞌnoonni. Konni daafira Magano woꞌmu wodaninni addaxxate yaa mulla yinoomme geeshsha assinannire diꞌꞌikkino. Togoo doorsha doodhineemmohu Kalaqaanchinke ninkera woyyannore malannonketa woꞌmunni woꞌma ammanneemmohuraati.—Roomu Sokka 12:1.
“Umikki egennora irkidhooti.” Guuntete xeꞌne noonke daafira ninkeneeto addaxxa didandiineemmo; konnira Magano addaxxa hasiissannonke. Ninkeeneto calla addaxxineemmoha woy wodaninke yaannota calla macciishshineemmoha ikkiro, umi qara gara lawannoha gale hose kayinni qarra abbanno doorsha doodhinammora dandiineemmo. (Lawishsha 14:12; Ermiyaasi 17:9) Maganu hayyo ninke hedo koꞌo hunte roortanno. (Isayaasi 55:8, 9) Isi hedonni massagammeemmoha ikkiro heeshshonke seekkanno.—Faarso 1:1-3; Lawishsha 2:6-9;16:20.
ijwbv birxicho 14 guf. 6-7
Lawishsha 3: 5, 6—“Umikki Egennora Irkidhooti”
“Assattorira baalaho Magano albaanni qoꞌli.” Barru baala mitto mittonka coye assineemmo woyitenna lowo geeshsha hasiisanno doorsha doodhineemmo woyite Yihowa hedo afate sharrama hasiissannonke. Isi biddishsha afiꞌrate huuccatto assiꞌnenna qaalisi Qullaawu Maxaafi widoonni yaannore haꞌrunsine tenne assa dandiineemmo.—Faarso 25:4; 2 Ximootewoosi 3:16, 17.
“Isino halaalaancho doogo kulannohe.” Maganu keeraancho wodhosi garinni heeꞌneemmo gede kaaꞌlenke, halaalaancho doogo kulannonke. (Lawishsha 11:5) Tini qarru giddo umbeemmokki gedenna hagiirraame heeshsho heeꞌneemmo gede kaaꞌlitannonke.—Faarso 19:7, 8; Isayaasi 48:17, 18.
be 76 guf. 4
Ayyaanaamittetenni Lopha Agurtooti
Mittu manchi heeshshosi giddo addi addi qarri iillannosi woyite, ‘Togoori konni albaanni iillinoe daafira xa maa assa hasiissannoero afoommo’ yee hedara dandaanno. Togo yee heda hayyote? Lawishsha 3:7te togo yine qorowisiinsoonni: “‘Ani egennaamoho’ yitooti.” Hige heeshshonke giddo iillinonkeri, qarra ikkanno coyi tuncu yaannonke woyite, coye halashshine hendeemmo gede kaaꞌlannonketi dihuluullissannote. Ayyaanaamittete lophineemmoha ikkiro, heeshshonke giddo iillinonkeri Yihowanni addaxxa ma geeshshi geeshsha hasiisannoro huwanteemmo gede kaaꞌlannonke. Qarru iillannonke woyite uminkenni addaxxantenni biddishsha afiꞌrate alba Yihowawa higanke, ayyaanaamittetenni gikki yinoommota leellishshanno. Hattono aye coyino Yihowa afikkinni ikkannokkita huwante, albinni roore Yihowa addaxxinenna isi ledo noonke jaalooma kaajjishiꞌne tenne leellisha dandiineemmo.
Maganu Qaalinni Ronseemmore
w06 9/15 17 guf. 7
Lawishshu Maxaafita Luphi Yitino Hedo
3:3. Halaalaanchimmanna ammanama lowo geeshsha naadanna goowaho wodhinanni irri gede mannaho xabbe leeltanno gede assa hasiissannonke. Hattono kuriuu akatta wodaninke giddo wodhanna heeshshonke woꞌmantenni leellishsha hasiissannonke.
Lallawo
Soqqanshote Gara Ikkitino Lao Heedhannoꞌne Gede Assidhe
15 Yihowa kaaꞌlannohe gede huuccatto assiꞌri. Soqqansho fulatto yanna baalantera Yihowa kaaꞌlannohe gede huucciꞌri. Wolqaataamu qullaawu ayyaanisi kaaꞌlinkekkinni ninke giddonni mittuno aye coyeno assa didandiineemmo. (Far. 127:1; Luq. 11:13) Yihowa kaaꞌlannohe gede huucciꞌratto woyite hasiisannohere badde kuꞌli. Lawishshaho suwashshu wodani noonsarinna macciishsha hasiꞌranno manninni xaadatto gede kaaꞌlahera huucciꞌri. Hakkiinni xaaditto mannira baalaho farcidhe huucciꞌrootto huuccatto ledo sumuu yaannore assi.
16 Yanna gaaꞌmite hojju xiinxallo xiinxalli. Qullaawu Maxaafi, “Maganu hedo dancha, hagiirsiissannotanna guuta ikkitinota [affe]” yaanno. (Rom. 12:2) Maganu daafira ronsoommori halaale ikkinota seekkine buunxummoro, soqqammeemmo woyite mannaho mittoreno huluullammummokkinni farciꞌneemmo. Aleenni kulliti Katariina togo yitino: “Boode yannara albaanni, mito xinta ikkinoha Qullaawu Maxaafi roso seekke buuxiꞌra hasiissannoeta huwatoomma. Konnira Kalaqaanchu noota, Qullaawu Maxaafi addinta Maganu Qaale ikkinota hattono xaa yannara Maganoho iso riqibbanno dirijjite noosita leellishshanno taje buuxate seekke xiinxalloomma.” Katariina seekkite xiinxallase ammanase kaajjitanno gedenna soqqanshosenni albinni roore hagiirraame ikkitanno gede kaaꞌlitinoseta coyidhino.
BADHEESSA 10-16
MAGANU QAALI GIDDO NOOTA MUXXE JIRO LAWISHSHA 4
‘Wodanaꞌne Agadhe’
Wodananke Agadha Dandiineemmohu Hiittoonniiti?
4 Lawishsha 4:23te kulloonnihu “wodana” yaanno qaali “giddoyidi hedo” woy ayimmanke leellishanno. (Lawishsha 20:27 nabbawi.) Wole yaattonni “wodanu” aaniidi ayimma calla ikkikkinni giddiidi ayimma, hasattonna yorto xawisanno.
Wodananke Agadha Dandiineemmohu Hiittoonniiti?
10 Wodananke agadhate, gawajjanno coye bade afanna hakko coye ranke gargadha hasiissannonke. Lawishsha 4:23te noohu “agadhi” yaanno qaali agaraasine loossanno looso qaangeemmo gede assannonke. Moote Selemooni waro, agaraasine shaete ofolte diinu daanno woyite katamu giddo noo manna qorowisiissanno. Kuni lawishshi, Sheexaanu hedonke daafannokki gede maa assa hasiissannonkero huwatate kaaꞌlannonke.
11 Hunda shaete aana heedhe agartannori xullichu agaraasine ledo buusante loossanno. (2 Sam. 18:24-26) Insa diinu gambisanno woyite, xullicho cuffe kaaꞌlante katama danotenni agartanno. (Neh. 7:1-3) Qullaawu Maxaafinni qajeelino tiiꞌꞌinkeno, Sheexaanu wodananke yaano hedonkenna hasattonke daafate woꞌnaalanno woyite shaete aana agartanno agaraasine gede qorowisiisannonke. Tiiꞌꞌinke qorowisiisannonke woyite macciishshanna lawishshu yaattonni xullicho cufa hasiissannonke.
Wodananke Agadha Dandiineemmohu Hiittoonniiti?
14 Wodananke agadhate bushu coyi eannota gargadha calla ikkikkinni danchu coyi eanno gedeno assiꞌra hasiissannonke. Hanni xaano katamu agaraasine hendo. Xullicho agartannori diinu eannokki gede xullicho cuffanno; ikkollana sagalenna wole coyibba katamu giddora eessinanni woyite xullicho fantanno. Xullicho horo fana hoongiro, katamu giddo heeꞌranno manni hudetenni goofara dandaanno. Hatteente gede, ninkeno ganyine Maganu hedo wodaninke giddora eꞌanno gede assiꞌra hasiissannonke.
w12 5/1 32 guf. 2
‘Wodanaꞌne Agadhe!’
Lawishshu wodananke agadha hasiissannonkehu mayiraati? Maganu ayyaani massageennasi moote Salamooni togo yiino: “Wodanu heeshshote buichootina, woꞌmunkurinni roorsite iso agadhi.” (Lawishsha 4:23) Lawishshu wodaninke noo gari xa dancha woy busha heeshsho heeꞌneemmo gede, albillitte qole hegere heeshsho afiꞌneemmo woy hoongeemmo gede assara dandaanno. Mayira? Korkaatuno Yihowa wodaninke giddo noore laꞌꞌanno. (1 Saamueeli 16:7) Yihowa, danchaho woy bushaho yaannonkehu giddoyidi ayimmanke yaano ‘wodanu giddo nooha giddoyidi manninatenke’ laeeti.—1 Pheexiroosi 3:4.
Maganu Qaalinni Ronseemmore
Yihowa Cincitine Agadhitinanni?
4 Lawishsha 4:18, “Keeraanote doogo, soodo arrishsho gedeete; barri taalooti geeshsha lexxitanni hadhanno” yitanno. Kuni qummeeshshi, Yihowa mannisira hedosi kulannohu suutu suutunni ikkinota leellishanno. Ikkollana, kuni qummeeshshi mittu Kiristaanchi ayyaanaamittetenni lophannohu hiittoonniitiro huwatateno kaaꞌlannonke. Ayyaanaamittete lopho mudda didandiinanni. Ayyaanaamittetenni lophate yanna hasiissanno. Maganu Qaale seekkine xiinxallineemmohanna Yihowa Qaalisinna dirijjitesi widoonni aannonke amaale harunsineemmoha ikkiro, sunu sununni Kiristoosite gede akatta lossiꞌra dandiineemmo. Qoleno Magano albinni roore anfeemmo. Hanni Yesuusi tenne hedo lawishshunni rosiisino gara laꞌno.
Ammanakki Xawisse Kuli
ijwfq birxicho 19
Faasika Ayirrissinannikkihu Mayiraati?
Duuchu manni yaannore
◼ Soꞌrote hedo: Yihowa Farciꞌraasine Faasika ayirrissannokkihu Kiristaana ikkitinokki daafiraati.
Halaale: Yesuusi Kiristoosi Gatisaanchonke ikkinota ammanneemmo; qoleno “isi faale” haꞌrate dandaaminkere baala assineemmo.—1 Pheexiroosi 2:21; Luqaasi 2:11.
◼ Soꞌrote hedo: Yesuusi reyotenni kainota diammantinanni.
Halaale: Yesuusi reyotenni kainota ammanneemmo; Yesuusi kao Kiristaanu ammanara guulcho ikkitinota huwantoommo; qoleno sabbankeemmo woyite kaosi luphi assine kulleemmo.—1 Qorontoosi 15:3, 4, 12-15.
◼ Soꞌrote hedo: Faasika ayirrissinannikki daafira oosoꞌne hagiidhitara dihasidhinanni yaate.
Halaale: Oosonke banxeemmo; hakko daafira insa qajeelsatenna hagiirraamma ikkitanno gede kaaꞌlate dandiinummore baala assineemmo.—Tiito 2:4.
Yihowa Farciꞌraasine Faasika ayirrissannokkihu mayiraati?
◼ Faasiku ayyaani Qullaawu Maxaafi aana xintaminoha diꞌꞌikkino.
◼ Yesuusi kaosi ayirrinsammora ikkikkinni reyosi ayirrinseemmo gede hajajinonke. Diru dirunku konne Yesuusi Reyo Qaagooshshi Ayyaana Qullaawu Maxaafite aganu kiiro garinni ayirrinseemmo.—Luqaasi 22:19, 20.
◼ Faasiku ayyaanira assinanni coyibba hundi waro noote sirote magansiꞌrawiinni dagginote; hakko daafira Faasiku ayyaani Magano dihagiirsiisanno. Yihowa ‘hinaasaancho Maganooti [“iso calla magansiꞌnara hasiꞌranno Maganooti,” Haaro Alame Tiro]’; hakko daafira isi baxannokkire assinanni magansiꞌnannisi woyite dadillanno.—Fulo 20:5; 1 Mootoolla 18:21.
Faasika ayirrinseemmokkihu Qullaawu Maxaafi rosi ledo sumuu yine heeꞌra hasiꞌneemmo daafiraati; Qullaawu Maxaafi qole mannu wodho harunsantenni “egennonna wodancha” seekkine cuꞌmiꞌneemmo gede amaalannonke. (Lawishsha 3:21; Maatewoosi 15:3) Mannu Faasika ayirrinseemmoronna teꞌee xaꞌmannonke woyite ammananke kulleemmonsaha ikkirono, mittu mittunku manchita doodhate qoosso ayirrinseemmo.—1 Pheexiroosi 3:15.
BADHEESSA 17-23
MAGANU QAALI GIDDO NOOTA MUXXE JIRO LAWISHSHA 5
Foorretewiinni Xooqqe
w00 7/15 29 guf. 1
Maaeela Alame Giddo Coꞌoota Ikkitine Heeꞌra Dandiitinanni
Konni lawishshira amanyoote baꞌino mancho, fotaancho woy ‘foora mancho’ gede assine kulloonni. Manna woshshaadate coyidhanno qaalla malawu gede coommitannotenna ejedhete zayitenni roore shaqqadote. Duucha woyite foorrenniwa massitanno haꞌrinsho hanaffannohu togoonniiti. Lawishshaho hanni 27 diro ikkannosete Eemi yinannite mitte biirora borreessaancho ikkite loossannote mitte xuma beettora iillinosere laꞌno. Ise togo yitino: “Loosunniwa mittu manchi ille wore laꞌꞌannoe hattono assummare baalare iima gananno. Wolootu naaddannonke woyite hagiidha nooreentilla. Kayinni konni manchiti qara hasatto ane ledo siimu xaadooshshe assa ikkitinoti xawoho. Ani kayinni didoogamoomma.” Mittu manchi ninke dogate yaannore ma hede yiinoro huwata hoongummoro, coyiꞌrannori duucha woyite baxisankera dandaanno. Konnira hedate dandoonke lossiꞌra hasiissannonke.
w00 7/15 29 guf. 2
Maaeela Alame Giddo Coꞌoota Ikkitine Heeꞌra Dandiitinanni
Foorre abbitanno gumi gedensoonni argiisimma qaraaranno; lamenka wido gamaxantino bise gede xissiise muranno hattono reyonniwa massanno. Togoo assooti duucha woyite qaraaro guma laalanno; tiiu uurra ofolla hoꞌlanno gede, hasiꞌnikkinni godowu gatanno gede woy siimu xaadooshshinni saꞌꞌanno xibbinni amadammanni gede assanno. Adhantinori giddo mittu fooriro baddalaminohu mageeshshi geeshsha xissiisiꞌranoro heda dandiineemmo. Ammanama xeꞌinohu togoohu mittu assooti heeshshonke diro woꞌma baꞌara dandiitannokki mada kalaqara dandaanno. Ee, foorre lowo geeshsha gawajjitanno.
w00 7/15 29 guf. 5
Maaeela Alame Giddo Coꞌoota Ikkitine Heeꞌra Dandiitinanni
Dandiinummo deerrinni maaeela coye assanno manniwiinni xeertiꞌra hasiissannonke. Shollado muuziiqa macciishshinanni, daafanno boohaarsha woy teeda baꞌino misilla laꞌnanni togoo manni hunankera wodhine angankenni qarru giddora mayira eꞌneemmo? (Lawishsha 6:27; 1 Qorontoosi 15:33; Efesooni Sokka 5:3-5) Qoleno gara ikkinokki baxille leellinshe woy kawajjaamo ikkinokki garinni seensenna uddiꞌne, maaeela coye assanno manni ninke illachishanno gede assa gowwimmate!—1 Ximootewoosi 4:8; 1 Pheexiroosi 3:3, 4.
Maganu Qaalinni Ronseemmore
w00 7/15 29 guf. 7
Maaeela Alame Giddo Coꞌoota Ikkitine Heeꞌra Dandiitinanni
Salamooni foorre lowo geeshsha gawajjitannota luphi asse kulino. Foorrenna ayirrinye baꞌꞌa babbande dilaꞌnannireeti. Amanyoote baino garinni hasattonke wonshiꞌrate woy wolu manchi hasatto wonshate yine togoorira meessaneeto sayise aa lowo shollinye diꞌꞌikkitino? Meessi galte ikkinokkihu ledo togoore assa ayirrinye baꞌꞌa diꞌꞌikkitino?
BADHEESSA 24-30
MAGANU QAALI GIDDO NOOTA MUXXE JIRO LAWISHSHA 6
Gooxaamuwiinni Maa Rosa Dandiineemmo?
it-1 115 guf. 1-2
Gooxaamo
‘Kalaqamunni Afiꞌrino Hayyo.’ Gooxaamu hayyo, hedate dandoonni afiꞌrinota ikkitukkinni Kalaqaanchu uyinonsate kalaqamunni afiꞌrino dandooti. Qullaawu Maxaafi gooxaamu ‘arro itannore duuꞌnannotanna gide gudhinanni yannara sagale gamba assiꞌrannota’ kulano. (La 6:8) Paalestiinaho heeꞌrannohu addi addi sircho afiꞌrino gooxaami giddo mittu yaano gide gamba assiꞌrannohu woy baatto loosiꞌranno gooxaami (Meeseri semirefesi) wocawaaru woggaranna arro lowo sagale gamba assire, sagale afiꞌra qarra ikkitanno yannara, lawishshaho hawado sagaꞌlanno. Togoo gooxaami heeꞌrannohu wixunna gidu batiꞌrannowa ayiddummete muleeti. Kuni gide gamba assanno gooxaami, duuꞌnino gide xeenu shanshiro moolanno gede fushshe arrishshote haqqanno. Wole agurina duuꞌnino gidi mure baꞌꞌannokki gede muranno widiido gaꞌme tayise hoolanno. Kuni gooxaami noota anfannihu haꞌrammanni fushshiꞌrino doogonniitinna balesi afiira duunino kurinniiti.
Lawishsha ikkitanno akatta. Gooxaamu daafira laꞌnummohu haranchu xawishshi, “Ati ceeꞌmaleessu hanni gooxaamunniwa mari; ikkitosi buuxxe laꞌe atino hayyooꞌmi” yitanno amaale huwanteemmo gede assannonke. (La 6:6) Gooxaamu kalaqamunni konni kaꞌira sagale qixxeessiꞌransanni calla ikkikkinni kaajje uurratenninna muratinoha ikkatenni egennaminoho; qoleno insa eronna hakkunni ale ikkinore duha woy goshoosha dandaanno; hattono loosonsa loosate dandiire baala assanno; uwiro, shalaqiro woy bagate aaninni gongoꞌmiro nafa badhera dihigano. Gooxaamu kaaꞌlamanno garino dhaggete; heeꞌrannowa seekke fiiꞌranno; hattono ledonsa loosannoha mararanno. Mito woyite daafurinoha woy madiꞌrino gooxaancho irkise qaera massanno.
w00 9/15 26 guf. 3-4
Suꞌmikki Baꞌꞌannokki Gede Agadhi
Gooxaamu gede diinaggaambe loonseemmore ikka hasiissannonke. Illaallisannohu heeꞌrirono hoogirono dinggaambe loosankenna isilancho looso loosate dandoonke woyyeessiꞌranke kaaꞌlitannonke. Ee, rosu mine, loosu bayichono ikko ayyaanaamittete coye assineemmo woyite, wolqanke assiture baala assa hasiissannonke. Gooxaamu daafure loose lowo horo afiꞌrannonte gede, Maganu ninkeno ‘daafurinkeni hagiidhinammora’ hasiꞌranno. (Rosiisaancho 3:13, 22; 5:18) Jawaate loosanno manchira danchu tiiꞌꞌi heeꞌrannosi daafira harshammo afiꞌranno.—Rosiisaancho 5:12.
Salamooni ceeꞌmaleeyye loosoho kakkayisate togo yee lame xaꞌmo xaꞌmino: “Ati ceeꞌmaleessu mamooti geeshsha goxattoyya? Goxoottowiinni mamoote kaꞌꞌatto?” Moote haariimote gede asse coyiꞌranni lede togo yiino: “‘Shiima geeshsha goxeemmo; shiima yanna liphi asseemmo; shiima geeshsha anga gamba assiꞌre fooliishshiꞌreemmo’ yaatto. Hatto ikkite heedheenna buxima addi-fulu gede, hoongu bagado amaxxino manchi gede hedeweelcho daannohe.” (Lawishsha 6:9-11) Ceeꞌmaleessu manchi goxicho iibbishiꞌre goxe heeꞌreenna buxima addi-fulu gede hedeweelcho amaddannosi; hoonguno bagado amaxxino manchi gede siannosi. Ceeꞌmaleessu manchi gati mulenni dubbanno. (Lawishsha 24:30, 31) Daddalisino mulenni waaga itanno. Loosiisaanchuno togoo mancho mamooti geeshsha cincanno? Ceeꞌmaleessu rosaanchi dancha guma afiꞌreemmo yee hedasi beebbatella!
Maganu Qaalinni Ronseemmore
w00 9/15 27 guf. 3
Suꞌmikki Baꞌꞌannokki Gede Agadhi
Lawishshu Maxaafira kulloonnihu lamalu coyi, bushu coyira xinta ikkino daafira baalanta bunshe amadanno yaa dandiinanni. ‘Booꞌnaleette illenna busha malanno wodani’ hedotenni loonsanni cubbooti. “Kaphaancho arrawootinna kaphu aana kapho leddanno naqaashsheeti” yiniri afuunni loonsanni cubbooti. ‘Keeraancho manna shitanno anganna bunshete rakkanno lekka’ bunshete assooteeti. Yihowa hakko iso keerunni heeꞌranno manni keere hunatenni hagiidhitannore effire giwanno. Kowiicho qummi assinoonni bunshe lamala ikkase, bunshe tenne calla ikkitinota leellishshannota ikkitukkinni mannu ooso bunshe yannate kiiro lexxitanni hadhannota leellishshannote.
BADHEESSA 31–DOTTEESSA 6
MAGANU QAALI GIDDO NOOTA MUXXE JIRO LAWISHSHA 7
Fonqolu Giddo Ubbinanni Gede Assannore Qorophe
Jifamate Giddora Eꞌinannikki Gede Qorophe
8 Cubbo loonseemmokki gede qoropha dandiineemmohu hiittoonniiti? Hanni Lawishshu maxaafa fooliishsho 7te kulloonni wedellichi lawishshinni maa ronseemmoro laꞌno. Isi foora mancho ledo foorino. Kiiro 22 kuni wedellichi “sammi yee hoodese haꞌri” yitanno. Isi woshshaadote giddora einohu hedeweelcho lawara dandaanno. Kayinni hakkuyira aleenni noo kiiro leellishshannonte gede, isi sunu sununni cubbunniwa massannosiha haammata coye assino.
9 Iso cubbo loosanno gede assinosiri maati? Umo isi leeshshote “minise [foora mancho] maddera noo doogo amade” haꞌrino. Hakkiinni minisewa hige haꞌrino. (Lawishsha 7:8, 9 nabbawi.) Mancho laiti qole isewiinni agure dihaꞌrino. Hatteentenni isi sunqitasira sammi yee wodhino; hattono mittimmate kakkalo shiqishidhinota kultannasi sammi yee macciishshino; tenne kultinosihu ise busha mancho ikkitinokkihu gede asse hedara yite ikkara dandaanno. (Lawishsha 7:13, 14, 21 nabbawi.) Kuni wedellichi cubbo loosanno gede assannosi coye qorophoommero, fonqolu giddora dieanno hattono cubbo diloosanno.
Amanyootu Xuri Noonkekkire Ikkine Heeꞌra Dandiineemmo
8 Lawishsha 5:8 togo yitanno: “[Amanyoote baꞌino] manchowiinni xooqi; minise nafarira higge martooti.” Tenne amaale lashshi assa abbitanno gawajjo Lawishsha fooliishsho 7te xawinsoonni; kuni qummeeshshi mittu aju beetti amanyoote baꞌino mancho nafarira hige marinota kulanno. Yanna leeshshote. Isi haꞌranni mare doogote tenne manchonni xaadi; ise hakkawote teeda baino garinni uddidhino. Ise iso rinte amadde sunqitusi. Ise coyidhinori giddosi busha yorto kakkaꞌanno gede assinosi; isino tenne yortosi qeeꞌla didandiino. Hakkiinni lamunku foortino. Kuni beetti soorrate hede fulinoha ikka hoogara dandaanno. Isi afa gattinohonna wodancha xeꞌinosiho. Ikkirono, assootisi abbinosi guma mixxa gidde ikkitinosi. Kuni beetti tenne mancho qooxo mara hoogoommero hanni mayi no!—Law. 7:6-27.
Magano Waajja Woꞌmanka Woyite Kaaꞌlitannonke
10 Foorre saallanni gedenna meessaneeto gimbanni gede assitara, hasiꞌnikkinni godowu gatanno gede assitaranna maate diiggara dandiitanno. Hakko daafira hawanya mancho ‘minira’ haꞌranna ise sagale ita giwa hayyote. Batinyu fooranno manni Yihowa ledo noonsa jaalooma huꞌnannotano agurranna foorretenni saꞌꞌanno dhibbinni yannimale reyanno. (Law. 7:23, 26) Lawishsha fooliishsho 9 kiiro 18 “minisera marannohu baalu reyannotanna jeennaate dirrannota” kultanno. Ikkina batinyu manni togoo qarra abbannoha ise koyishsha adhannohu mayiraati?—Law. 9:13-18.
Maganu Qaalinni Ronseemmore
Jifamate Giddora Eꞌinannikki Gede Qorophe
11 Ninke tennenni maa ronseemmo? Cubbo calla ikkikkinni cubbunniwa massannoreno qoropha hasiissannonke. Salamooni wedellichunna foora mancho xagge kulihu gedensaanni “hoodese hadhooti” yee borreessino. (Law. 7:25) Qoleno isi “Hattoo manchowiinni xooqi; nafaraseenni higge nafa saꞌooti” yiino. (Law. 5:3, 8) Addanko woꞌmanka woyite cubbu widira massannonke coyiwiinni xeertiꞌne cubbo loosa qoropha dandiineemmo. Togo yaa Kiristaanaho hoolloonnikkiha ikkirono, fonqolammeemmo woy gara ikkinokkire assineemmo gede assannonkeha ikkiro hakko coyiwiinni xeertiꞌneemmo yaate.—Mat. 5:29, 30.
DOTTEESSA 7-13
MAGANU QAALI GIDDO NOOTA MUXXE JIRO LAWISHSHA 8
Yesuusi Hayyo Yitannore Macciishshe
cf 131 guf. 7
“Ani Annaꞌya Baxeemmo”
7 Kiiro 22te hayyo togo yitanno: “Kaaliiqi baalunkura alba asse kalaqinoe; biꞌre wolere kalaqi waro ane umita assinoe.” Hayyo ‘kalaqantinota’ ikkitinokki daafira kawiicho kulloonni hayyo wolere riqibbanno. Hayyo heedhinokki yanna dino; korkaatuno Yihowa hegeri hegerehonna isi woꞌmanka woyite hayyichaho. (Faarso 90:2) Maganu Beetti kayinni “kalaqamu baalunkura umiidiho.” Isi kalaqaminoho; Yihowa kalaqino kalaqami giddo umiho. (Qolaasiyaasi 1:15) Lawishshu maxaafira kulloonninte gede, Maganu Beeti kalaqaminohu iiminna uulla kalaqamara albaanniiti. Isi Qaale yaano Maganu sokka sayisannoha ikkino daafira daafira, Yihowa hayyo woꞌmunni woꞌma xawisanno.—Yohaannisi 1:1.
Yesuusa Maganu Beettooti Yinoonnihu Mayiraati?
Isi Annisi wole baalanka kalaqama kalaqi woyite looso kaaꞌlino. Yesuusi “qara loosaasincho ikke” Maganu ledo loosino. (Lawishsha 8:30, NW) Qullaawu Maxaafi Yesuusi daafira kulanni togo yaanno: “Maganu [wole] baalanka coye kalaqinohu isinniiti.”—Qolasiyaasi Sokka 1:16.
Maganu wole baalanka kalaqama kalaqinohu Yesuusi widoonniiti. Kalqete alamenna sokkaasine kalaqinohuno isi widoonniiti. (Yohaannisi Ajuuja 5:11) Mito widoonni laꞌniro, Maganunna Yesuusi mitteenni loossino gari, maandisootunna gimbanyootu loossanno garinniiti. Maandisootu akeeka fushshitanno, gimbanyootu kayinni hakko akeeki garinni looso loossanno.
w09 4/15 31 guf. 14
Bayiriidi Daawitinna Bayiriidi Salamooni Yaano Yesuusa Naadde
14 Salamooni hayyonni roortino hayyo noosihu mitto mancho callaati. Hakkuno Yesuusi Kiristoosiiti; isi umisi daafira coyiꞌranni, “Salamooni rooru kowiicho no” yiino. (Mat. 12:42) Yesuusi “hegere heeshsho [qaale]” coyiꞌrino. (Yoh. 6:68) Lawishshaho, isi Ilaalu Sibikatira coyiꞌrinori Salamooni coyiꞌrino lawishshi roore xawe leellanno gede assannoho. Salamooni Yihowa manni hagiidhanno gede assannoha lowo coye xawisino. (Law. 3:13; 8:32, 33; 14:21; 16:20) Yesuusi addu hagiirri Yihowa magansiꞌrate ledonna Maganu uyino hexxo woꞌmase ledo xaadooshshe afiꞌrinota luphi asse xawisino. Isi, “Ayyaanaamittete coye goodhinori hagiirraammaho, gordu Gashshooti insahona” yiino. (Mat. 5:3) Yesuusi rosiisinore loosu aana hosiissannori “heeshshote buicho” ikkinohuwa Yihowawa shiqqanno. (Far. 36:9; Law. 22:11; Mat. 5:8) “Maganu hayyo” Kiristoosinni leeltino. (1 Qor. 1:24, 30) Buuramino Moote ikkino daafira Yesuusira, ‘hayyote ayyaani noosi.’—Isa. 11:2.
Maganu Qaalinni Ronseemmore
Addu Hayyo Qoonqose Naggi Assite Woshshitanni No
1 BATINYE gobbuwara hagiirraammu Maganu Mangiste halashshaano lowo manni saꞌꞌanno doogora mannaho borro uyitanna laꞌꞌa rosantinote. Atino konni gari soqqansho soqqante egennootto? Hatto ikkiro lawishshu maxaafi giddo nooha hayyo mannu amaalese macciishshanno gede woshshitannota kulanno lawishsha qaagoottoti dihuluullissannote. (Lawishsha 1:20, 21 nabbawi.) Qullaawu Maxaafinna borruwanke giddo “addu hayyo” yaano Yihowa hayyo no. Mannu heeshshote doogora haꞌra hanafate balaxe tenne hayyo afiꞌra hasiissannonsa. Mannu borronke adhanno woyite tashshi yaannonke. Kayinni adhannohu baalanka manna diꞌꞌikkino. Mitu manni Qullaawu Maxaafi rosiisannore afa dihasiꞌranno. Wolootu kayi osoꞌlitannonke. Insa Qullaawu Maxaafi yannankera dikaaꞌlannoho yite heddanno. Wolootu kayinni Qullaawu Maxaafi roso harunsanno manni kaajjadohonna woloota mishannoho yite hedde, Qullaawu Maxaafi amanyootu daafira rosiisannore mishshanno. Ikkirono Yihowa shaqqillunni xaa geeshsha baalunku manni addu hagiirre afiꞌranno faro fane no. Hiitte doogganni?
2 Yihowa mannu addu hayyo yitannore macciishshanno gede assanno doogga giddo mitte Qaalesi Qullaawa Maxaafaati. Konne maxaafa baalunku manni afiꞌranno yaa dandiinanni. Qullaawu Maxaafi aana xintantino borruwankena? Yihowa maassiꞌrinonke daafira borruwanke 1,000 saꞌꞌanno afiinni qixxeessinoonni. Macciishshe adhannohu yaano borruwanke nabbawannohunna rosinore loosu aana hosiisanno manni lowo horo afiꞌranno. Ikkirono rooru manni addu hayyo yitannore macciishsha dibaxanno. Insa mitto coye assate kaꞌanno woyite umonsa addaxxitanno woy jaallansa yitannore macciishshitanno. Insa ninke Qullaawu Maxaafi rosiisannore harunsa doodhinoommo daafira woffi assite nafa laꞌankera dandiitanno. Konni birxichira mannu togoore assannohu mayiraatiro ronseemmo. Hanni balanxe Yihowa aanno hayyo afiꞌra dandiineemmohu hiittoonniitiro laꞌno.
Ammanakki Xawisse Kuli
ijwbq birxicho 160
Yesuusa Maganu Beettooti Yinoonnihu Mayiraati?
Qullaawu Maxaafi mayyaanno?
Qullaawu Maxaafi duucha basera Yesuusa “Maganu Beetto” yaanno. (Yohaannisi 1:49) “Maganu Beetto” yaamamasi, Yesuusirano ikko wolu baalunku kalaqamira heeshsho uyinohu Magano ikkinota leellishshanno. (Faarso 36:9; Yohaannisi Ajuuja 4:11) Qullaawu Maxaafi, Maganu mannu gede ooso ilannota dikulanno.
Qullaawu Maxaafi sokkaasineno “Maganu ooso” yaanno. (Kalaqama 6:2) Qoleno Qullaawu Maxaafi umi mancho Addaami “Maganu Beettooti” yaanno. (Luqaasi 3:38, Haaro Gondooro) Ikkollana, Maganu kalaqami giddo Yesuusi umiha ikkino daafira, hattono Maganu xaaddotenni kalaqinohu iso ikkino daafira Qullaawu Maxaafi Yesuusi Maganunniha bayira Beetto ikkinota kulanno.
Yesuusi uullara daye ilamara albaanni heeꞌrannohu iimaati?
Yesuusi uullara daara albaanni maa assanno?
Yesuusi uullara daye ilamara albaanni heeꞌrannohu iimaati?
Ee. Yesuusi uullara daye mancho ikke ilamara albaanni iima ayyaanu kalaqo ikke heeꞌrino. Yesuusi umisi, “Ani gordunni dayoommo” yiino.—Yohaannisi 6:38; 8:23.
Maganu wole baalankare kalaqara albaanni balaxe Yesuusa kalaqino. Qullaawu Maxaafi Yesuusi daafira togo yaanno:
◼ “Isi kalaqamu baalunkura umiidiho.”—Qolasiyaasi Sokka 1:15.
◼ Isi “Maganu kalaqino kalaqamira kaimaho.”—Yohaannisi Ajuuja 3:14.
“Hundinni kayise hegerera ikkannohu” yine masaalloonni masaalo Yesuusi aana woꞌmitino.—Mikiyaasi 5:2; Maatewoosi 2:4-6.
Yesuusi uullara daara albaanni maa assanno?
Isira iima lowo silxaane noosi. Yesuusi “Annaꞌya, kalqe kalaqantara albaanni, atewa nooe ayirrinyinni xaano ayirrisie” yee huucciꞌri yannara iima noosi silxaane kulino.—Yohaannisi 17:5.
Isi Annisi wole baalanka kalaqama kalaqi woyite looso kaaꞌlino. Yesuusi “qara loosaasincho ikke” Maganu ledo loosino. (Lawishsha 8:30, NW) Qullaawu Maxaafi Yesuusi daafira kulanni togo yaanno: “Maganu [wole] baalanka coye kalaqinohu isinniiti.”—Qolasiyaasi Sokka 1:16.
Maganu wole baalanka kalaqama kalaqinohu Yesuusi widoonniiti. Kalqete alamenna sokkaasine kalaqinohuno isi widoonniiti. (Yohaannisi Ajuuja 5:11) Mito widoonni laꞌniro, Maganunna Yesuusi mitteenni loossino gari, maandisootunna gimbanyootu loossanno garinniiti. Maandisootu akeeka fushshitanno, gimbanyootu kayinni hakko akeeki garinni looso loossanno.
Yesuusi Qaale ikke soqqamino. Qullaawu Maxaafi Yesuusi mancho ikkara albaanni ‘Qaale’ ikkinota kulanno. (Yohaannisi 1:1) Tini yaatto Maganu wole ayyaanu kalaqora hedosinna biddishshasi kulate Beettosi horoonsiꞌrinoha ikkara dandaanno.
Qoleno Yesuusi Magano riqiwe uullate aana heeꞌranno mannira sokka sayisikkinni digatino. Maganu Edeni gannatete Addaaminna Heewanira biddishsha uyi woyite Yesuusa Qaale asse horoonsiꞌrikkinni digatino. (Kalaqama 2:16, 17) Qoleno halalla Israeelete daga massagihunna qaalisira hajajantara kullinsa sokkaasinchi Yesuusa ikkikkinni digatino.—Fulo 23:20-23.
DOTTEESSA 14-20
MAGANU QAALI GIDDO NOOTA MUXXE JIRO LAWISHSHA 9
Egennaamo Ikki Ikkinnina Booꞌnaleessa Ikkitooti
“Egennaamu Coyiꞌrannore Macciishshi”
4 Noore coyiꞌniro xaaddote amaallanninke amaale macciishshe adha qarra ikkitankera dandiitanno. Wole agurina koffi nafa yinammora dandiineemmo. Mayira? Guuntete xeꞌne noonkere ikkinoommota anfoommoha ikkirono, mittu manchi soꞌronke bade kule amaalannonke woyite macciishshe adha qarra ikkitankera dandiitanno. (Rosiisaancho 7:9 nabbawi.) Soꞌronke gara lawisate nafa woꞌnaallammora dandiineemmo. Mitto mancho amaalannonke gede assinosire huluullammammora woy amaalinonke gari koffi assankera dandaanno. ‘Isi ane amaalannoehu maa ikkeeti? Isi umisi disoꞌro loosanni no?’ yinanni amaalinke manchi soꞌro xinqisiisiꞌneemmoha ikkara dandaanno. Amaalloonninke amaale baxisa hooggunkero lashshi assinammora woy macciishsha banxeemmo amaale hasiꞌnanni wolewa haꞌneemmoha ikkara dandaanno.
“Egennaamu Coyiꞌrannore Macciishshi”
12 Amaale macciishshine adhate kaaꞌlannonkeri maati? Guuntete xeꞌne noonkere ikkinoommotanna mito woyite mito coye gowwimmatenni assinammora dandiineemmota qaange umonke heeshshi assa hasiissannonke. Aleenni laꞌnummonte gede Iyyoobira gara ikkitinokki lao noosi. Ikkirono isi gedensoonni hedosi biddi assiꞌrino; Yihowano tennera maassiꞌrinosi. Mayira? Korkaatuno Iyyoobi umosi heeshshi assanno manchooti. Iyyoobi, diro Eelihu lowo geeshsha roorannoha ikkirono, Eelihu amaalinosi amaale macciishshe adhe umosi heeshshi assannoha ikkinota leellishino. (Iyo. 32:6, 7) Hatteente gede umonke heeshshi assanke, amaale hasiissannonkekkiha lawinkerono woy amaalinonke manchi diro ninkenni ajannoha ikkirono amaale macciishshine adhate kaaꞌlitannonke. Kanaadaho heeꞌrannohu mittu cimeessi togo yiino: “Ninkeneeto wolootu laꞌannonke garinni layiꞌra dandiineemmokki daafira, wolootu amaala hooggunkero woyyeessiꞌra hasiissannonkere woyyeessiꞌra didandiineemmo.” Ninke baalunku albinni roore ayyaanu gumi laalo laalanna dancha duduwo sabbakatenna rosiisate dandoonke woyyeessiꞌra hasiissannonke.—Lawishsha 27:6 nabbawi.
13 Amaale Maganu baxannoꞌneta leellishanno doogo gede assitine laꞌe. Yihowa ninkera woyyannore malanno. (Law. 4:20-22) Isi Qaalisi, Qullaawu Maxaafi aana xintantino borro widoonni woy ayyaanaamittetenni gikki yiino rodii widoonni amaalannonke woyite baxannonketa leellishanni noonke. Ibiraawoota 12:9, 10 isi tenne assannohu “ninkera seyara yee” ikkinota kultanno.
14 Amaallanniꞌne gara ikkikkinni amaale illachishshe. Mito woyite, amaalloonninke gari didanchaho yine hendeemmoha ikkara dandaanno. Hige amaalanno manchino amaale macciishshe adha qarra ikkitannokki garinni amaalate woꞌnaala hasiissannosi. (Gal. 6:1) Mittu manchi amaalinonke gari baxisa hooginkero nafa amaale illachisha hasiissannonke. Ninkeneeto togo yine xaꞌma dandiineemmo: ‘Amaalloonnie gari baxisa hoogiero nafa amaaletenni afiꞌreemmo rosi no? Amaalie manchi soꞌro agure amaale illachisha dandeemmo?’ Amaallanninke amaale baalantenni horo afiꞌrate woꞌnaala hayyote.—Law. 15:31.
w01 5/15 30 guf. 1-2
‘Hayyo Heeshshonke Diro Leddanno’
Hayyichu manchi seejjinannisi woyite booꞌnaleessu manchi gede diꞌꞌikkanno. Salamooni, “Egennaamu seejjittosiro baxannohe. Egennaamo rosiisittoro, egenno lexxanno” yiino. (Lawishsha 9:8b, 9a) Hayyichu manchi togo yitanno hedo seekke afino: “Qorichu yannasira yaachishannota ikkinnina dihagiirsiisanno. Gedensaanni kayinni rosino mannira keeru giddo woꞌminoha keeraanchimmate guma laalannonsa.” (Ibiraawoota 12:11) Amaale xissiissannoha labbunkerono, macciishshinummoro roore hayyicha assitannonkeha ikkina, amaallanninke amaale macciishsha gimbeemmohu mayiraati?
Hayyichu moote lede, “Keeraancho mancho rosiisittoro, lede wodanchanno” yiino. (Lawishsha 9:9b) Aye geeshsha hayyoota ikkinummorono woy jawooꞌminummorono, tini lende ronseemmokki gede diassitannonke. Lowo geya geedhitinori nafa halaale macciishshite Yihowara heeshshonsa sayisse uyitanna laꞌꞌa lowo geya hagiirsiissannote. Ninkeno rosatenna surrenke baqqi yitinota assiꞌrate hasatto baꞌannonkekki gede sharrammo.
w01 5/15 30 guf. 5
‘Hayyo Heeshshonke Diro Leddanno’
Hayyo afiꞌrate sharrama hasiissannonkeri ninke umonkeeti. Salamooni tenne luphi assanni togo yiino: “Egenno heedhuhero, umokki kaaꞌlitannohe; egenno giwittoro umikki qarramatto.” (Lawishsha 9:12) Egennaamu woy hayyichu manchi hayyosinni umosi kaaꞌlanno; hayyo giwannohu qarru giddo uwiro, tennera wole bushiisha didandaanno. Mixxineemmohu wixiꞌnoommoreeti. Konnira ‘maccanke egennote widira qollo.’—Lawishsha 2:2.
Maganu Qaalinni Ronseemmore
Magano Waajja Woꞌmanka Woyite Kaaꞌlitannonke
9 Foorretewiinni xeertiꞌneemmo gede assannohu ikkadu korkaati no. Hawanya mancho, ‘moorre anganni wayi coommanno’ yitanni noohu gede assine kulloonni. “Moorre anganni wayi” maati? Qullaawu Maxaafi minaanninna minaama siimu xaadooshshe asse afiꞌranno hagiirre gooꞌro qolanno wayi gede asse kulanno. (Law. 5:15-18) Konni garinni hagiirre afiꞌra dandaannori seerunni adhamino minaannanna minaama callaho. ‘Moorroonni wayi’ kayinni kawiinni lowo geeshsha baxxanno. Kuni wayi foorre leellishannoho. Mooranno manchi maaxame moorannonte gede fooranno manchino foorannota wolootu affannokki gede assate woꞌnaalanno. Foortannori assootensa wolu manni diafino yite heddanno daafira, kuni ‘moorte aggino wayi’ coommannoha lawansara dandaanno. Tini insaneeto dogate! Yihowa baalankare laꞌꞌanno. Yihowa dadillisate geeshsha qaraarannori dino; hakko daafira togoore assine afiꞌnanniri ‘coommannore’ diꞌꞌikkino. (1 Qor. 6:9, 10) Qoleno wole gawajjono no.
DOTTEESSA 21-27
MAGANU QAALI GIDDO NOOTA MUXXE JIRO LAWISHSHA 10
Addu Jiro Afiꞌnanni Gede Assannori Maati?
w01 7/15 25 guf. 1-3
Keeraano Atoote Afidhanno
Keeraano wole widoonnino maassantanno. “Ceeꞌma buxissanno; jaate loosiꞌra kayinni duroonsitanno. Busulu manchi gide yannatenni gamba assiꞌranno; gide gamba assiꞌnanni yannara, goxannohu kayinni shollinyeho uwanno.”—Lawishsha 10:4, 5.
Moote coyiꞌrino hedo hakko iso gide gamba assidhannorira lowo geya hasiissannote. Gide gamba assiꞌnanni yanna gonxanni yanna diꞌꞌikkitino. Tini yanna seeda saate wiinamme loonsannite. Ee, tini yanna diinaggaambe loonsannite.
Yesuusi gide ikkikkinni manna gamba assinanni yanna daafira coyiꞌranni rosaanosi togo yiino: “Gidu lowoho; gide midanno manni kayinni shiimaho. Konnira gatu Anni [Yihowa] middannore soyanno gede huuccidhe.” (Maatewoosi 9:35-38) 2000 M.D. Yesuusi reyo Qaagooshshi Ayyaana ayirrisate 14 miliyoone saꞌꞌanno manni yaano Yihowa Farciꞌraasine kiironni ero rooranno manni gamba yiino. ‘Gidu midote iille waajjiꞌrinota’ moromannohu dino. (Yohaannisi 4:35) Addu Kiristaani huuccattonsa ledo sumuu yaanno garinni manna rosaano assate looso dinaggaawe loosannoha calla ikkikkinni, gidu Anni loosaasine ledanno gede huuccatto assanno. (Maatewoosi 28:19, 20) Yihowano assitinore lowo geya maassiꞌrino. 2000 soqqanshote diro, 280,000 saꞌꞌanno manni cuuamino. Cuuamino manni qole Maganu Qaali rosiisaano ikkate lowo geya sharramanno. Manna rosaano assate loosira woꞌmunni woꞌma kaaꞌlamme, tenne gide gamba assinanni yannara hagiidhinenna harshammi yine heeꞌno.
w01 9/15 24 guf. 3-4
Suwashsho Doogora Hadhe
Salamooni keeraanchimma lowo geya hasiissannota kulanni togo yiino: “Dureeyye jironsa, qiishote gede ikkite agartannonsa; buxane kayinni buximansa huntannonsa. Danchumma [“Keeraanchimma,” NW] heeshsho uyitanno; cubbu kayinni cubbolla ledanno.”—Lawishsha 10:15, 16.
Qiinshoonni katami giddosi heeꞌranno mannira mito geyano ikkiro agarooshshe ikkannonte gede, jirono mitu yaachishanno coyinni agarooshshe ikkitara dandiitanno. Buxima kayi hendoonnikkiri tuncu yaanno woyite lowo qarri giddo tugganno. (Rosiisaancho 7:12) Ikkirono, hayyichu moote jirono ikkito buxima qarra afidhinota eersino. Dureessu manchi jirosi ‘kinchu huxxi’ gede asse hede, woꞌmunni woꞌma jiro addaxxate widira hige dooara dandaanno. (Lawishsha 18:11) Buxichu qole buximasinni kainohunni hexxo dinoe yee hedara dandaanno. Konni garinni hedannohu lamunku gari manni Maganu albaanni suꞌnaadu suꞌmi heeꞌrannonsa gede diassiꞌranno.
it-1 340
Maasso
Yihowa Manna Maassiꞌranno Gara. “Kaaliiqi maasso jiro abbitanno; aanahono mitiimma dileddanno.” (La 10:22) Yihowa baxannonsare, agare, dureense, massage, qinaannonsa gede assenna hasiisannonsare wonshe maassiꞌrannonsa; tini qolte lowo guma abbitannonsa.
Maganu Qaalinni Ronseemmore
Kaote Hexxo Maganu Baxille, Hayyonna Cinca Leellishshanno
12 Lawishsha 10:22 Yihowa “maasso jiro abbitanno; aanahono mitiimma dileddanno” yitanno; Maganu Mangiste hunda heedhanno soqqamaasinesi baala tini halaale ikkitinota laꞌanno. Yihowa ayyaani kaaꞌlannonsa daafira Maganu manni ayyaanaamittetenni durooꞌmanno; insa albinni roore Kiristoosi faale hadhanno daafira guuta ikkitanno. (Yoh. 13:15-17; Efe. 4:23, 24) Insa barru baala gellessanna dancha manna ikkitanni hadhanno. Hakka woyite heeshsho baxissanno gari addiiti! (Iyo. 33:25) Kaote hexxo hiincakki xaa yannara kaaꞌlitannohehu hiittoonniitiyya?
DOTTEESSA 28–ONKOLEESSA 4
MAGANU QAALI GIDDO NOOTA MUXXE JIRO LAWISHSHA 11
Coyidhinoonte!
w02 5/15 26 guf. 4
Ammanama Keeraano Massaggannonsa
Keeraanote ammanama woloota kaaꞌlitara, bushuullu assooti kayinni woloota gawajjara dandaanno. Israeelete moote, “Bushu manchi arrawisinni olliichosi gawajjanno; danchu manchi kayinni egennosinni gatanno” yiino. (Lawishsha 11:9) Suꞌma huna, heme, amanyoote bainore coyiꞌranna haafare totaꞌꞌa woloota gawajjitannoti egennantinote. Keeraanchu manchi kayinni seekke hede danchare coyiꞌranno. Togoo manchi ammanama, suꞌmasi huntannori kaphitanni noota leellishshannota ammansiissanno hedo coyiꞌra dandaanno gede assitannosi daafira egennosinni gatanno.
w02 5/15 27 guf. 2-3
Ammanama Keeraano Massaggannonsa
Subbino doogora haꞌrannohu katamu manni dagoomu giddo heeꞌrannohu wolu manni keerenna owaante afiꞌranno gede assanno. Hakko daafira katamu qawaaxxiꞌranno woy durooꞌmanno. Suꞌma huntannori, gawajjannorenna gara ikkinokkire coyidhannori keeru, hagiirrunna mittimma baꞌanno gede assitanno hattono qarra kalaqqanno. Hakko iso hatto assitannori maccare ikkituro, togoori ikkasi digattano. Togo katami giddo gaancu heeꞌrara, mussinnu batiꞌrara, amanyootu baꞌꞌara hattono miinju qarri kalaqamara dandaanno.
Lawishsha 11:11te noohu xintu seeri katamunni lawinsoonni songo giddo mimmitinsawa shiqannohu Yihowa mannino harunsa hasiissannonsaho. Yihowa baxxannori yaano ammanante suwashsho doogo aana hadhannori, songote giddo noori hagiirraamma, diinaggaabbannore, manna kaaꞌlitannorenna Yihowara ayirrinye abbitannore ikkitanno gede kaaꞌlitanno. Yihowa songo maassiꞌranno daafira ayyaanaamittetenni halja yitanno. Mito woyite, mito coye assinoonni gari egemmaminonsakkiri, qacifattannorinna soꞌro xinqisiisidhannori, “qaraaranno [hadho noo] rumushshi” gede ikkite woloota daaffara dandiitanno. (Ibiraawoota 12:15) Duucha woyite togoori wole silxaane afiꞌra woy maccare ikka hasidhanno. Insa songote giddo woy cimeeyyete mereero taashshote xeꞌne, garete babbadooshshi, woy woluri togoori no yite totaꞌara dandiitanno. Ee, arrawinsa songote giddo babbadooshshu kalaqamanno gede assanno. Konnira insa coyidhannorira macca qola agurre songote giddo keerunna mittimma heedhanno gede assine, ayyaanaamittete gikki yinoommore ikkate sharrama dandiineemmo.
Coyiꞌra Hasiissannonkehu Mamooteeti?
12 Mittu rodii woy rodoo fojo ikkino coye affinota huwattiniro maa assitinanni? Lawishshaho, loosonke agamboonni gobbara heeꞌranno rodiinni xaaddiniro, hatte gobbara sabbakate loosonke loonsannihu hiittoonniitiro xaꞌma rakkannoꞌne? Xaꞌmitinannihu gawajjate heddine ikkinokkiti egennantinote. Roduuwanke banxeemmo daafira noo gara afa hasiꞌneemmo. Qoleno, insara huuccatto assineemmo woyite mitto mittonka coye bande kula hasiꞌneemmo. Kayinni tini yanna “afoonke bixaaꞌla” woy sammi yaa hasiissannonkete. Mittu rodii fojo ikkino coye kulannonke gede wotawaanteemmoha ikkiro, tini isirano ikko fojonke maaxanno yite addaxxitannosi roduuwira baxillu noonkekkita leellishshanno. Loosonke agamboonni gobbara heedhanno roduuwira qarra leda horo dihasiꞌneemmo. Qoleno, hattoo gobbara heedhanno roduuwi hatte gobbara Yihowa Farciꞌraasine sabbakate loosonsa loossannohu hiittoonniitiro kula dihasiissannonsa.
13 Roorenkanni cimeeyye fojo ikkino coye wolootaho kula qorophite Lawishsha 11:13 nooha Qullaawu Maxaafiha xintu seera harunsa hasiissannonsa. (Qummeeshsha nabbawi.) Tini cimeessu adhinoha ikkiro roore qarra ikkitasira dandiitanno. Minaanninna minaama, baxillinsa lexxanno gede assiꞌrate duucha woyite fojonsa, hedonsanna huluullonsa mimmitoho hasaaphitanno. Kayinni cimeessu fojo ikkinoha songote coye minaamasira kula dihasiissannosi. Hatto assiro, roduuwu ammaꞌnitannosikkiha ikkanno; hattono suꞌnaado suꞌmasi huꞌnanno. Songote giddo qoosso noonsa roduuwi lamu afiinni coyidhannore ikka dihasiissannonsa. (1 Xim. 3:8) Hatto yaa doggannore woy hemaasine ikka dihasiissannonsa yaate. Mittu cimeessi minaamasi baxannoha ikkiro, isera hasiisannosekki coye kule duha diledannose.
Maganu Qaalinni Ronseemmore
Shooshanqe—Coyiꞌneemmorinninna Assineemmorinni Leellinsheemmo Akata
Qullaawu Maxaafi, “Wolootaho shaqqa meessanaa kaaꞌlitanno” yaanno. (Law. 11:17) Mannu shooshaqu manchiwa aana baxanno, hattono insano isira shooshaqa ikkitara dandiitanno. Yesuusi, “Woleho safartine uyitinanni safaraanchinni safarranniꞌne” yiino. (Luq. 6:38) Konni daafira shooshaqu manchi dancha jaalla afiꞌranno hattono jaaloomisi geedonniha ikkanno.
Soqqamaanchu Phaawuloosi Efesooni songora noorira “Mimmitiꞌnera shaqqaddanna shooshaqoota ikke. . . . Mimmitiꞌne sao agurre” yiino. (Efe. 4:32) Songote giddo noohu baalunku shooshaqanna shaqqado ikkiro, songo lowo horo afidhanno. Togoo roduuwi mimmitoho gawajjannore dicoyiꞌranno, suꞌma dihunanno, hattono kuꞌu koꞌoye coyinni dikisanno. Insa arrawonsa hemete ikkikkinni woloota kiate horoonsidhanno. (Law. 12:18) Hatto ikkiro, songo jawaattanno, hattono hagiirrunni Yihowara soqqantanno.
Ee, coyiꞌneemmorinninna assineemmorinni shooshanqe leellisha dandiineemmo. Shooshaqoota ikkinummoro shaqqadu Maganinke Yihowa lawishsha harunsineemmo. (Efe. 5:1) Tini songonke jawaattanno gede assitanno, hattono wolootu Yihowara soqqantanno gede kakkayissanno. Konni daafira, shooshanqetenni egennammoommore ikkate sharrammo!