Yaiqoobite maaꞌnuulle ooso giddo mittu Yooseefiiti. Bayiruuddu roduuwisi, anninsa Yaiqoobi Yooseefi lowo geeshsha baxannota affu. Yooseefi roduuwisi ma assitinoro afootto? Insa iso hinaassino; hattono gibbinosi. Mitte hige Yooseefi haaqee haaqiiꞌre, hattee roduuwisira kuli. Tini haaqee insa Yooseefira kumbuultannota leellishshannote. Konni daafira insa iso albinni roore gibbu!

Mitto barra Yooseefi roduuwi Sekeemi yinanni katami mule geꞌreewo allaaꞌlitara hadhu. Hakkiinni anninsa Yaiqoobi roduuwasi laꞌꞌara Yooseefi hakkiira soyi. Insa xeertote heedhe rodiinsa Yooseefi daanna laꞌu; hakkiinni mimmitoho, ‘Hakku haaqiiꞌraanchu kuuee dayino; amme shinona’ yitu. Hakkiinni insa iso amadde balete tuggu. Yooseefi rodii Yihuda kayinni, ‘Rodoonke shaa agurre borojjicho assine hirro’ yii. Konni daafira iso Gibitsete gobba hadhanni noorira Ismaeelete daddalaasinera 20 birrira hirtino.

Yooseefi roduuwi uddanosi haadhe meichu goco gorrite mundeete giddo worte fushshitu; hakkiinni anninsara massite ‘Tini dibeettikki uddanooti?’ yitu. Konni daafira Yaiqoobira Yooseefi moyichu itinoha lawisi. Isi lowo geeshsha dadillino. Mittu manchino Yaiqoobi sheshifachisha didandiino.

Yooseefi Gibitsete gobbara Phoxifaari yinanni manchira borojjicho assine hirroonni; Phoxifaari, Feriooni yinanniha Gibitsete gobba moote agaranno manni roorrichaati. Yihowa kayinni Yooseefi ledo no. Phoxifaari Yooseefi looso dancha gede asse loosannohanna ammanaminoha ikkinota afi. Konni daafira Phoxifaari noosire baala Yooseefi anga wori.

Phoxifaari galte Yooseefi xumanna worba ikkinota huwattu. Ise barru baala Yooseefi ledose goxanno gede huuccitanni qarrissusi. Yooseefi maa assiyya? Isi togo yiinose: ‘Dihasiꞌreemmo, kuni busha coyeeti. Mootichiꞌya ane ammanannoe, ati isi galteeti. Ani ledokki goxummoro Maganu albaanni cubbo looseemmo!’

Mitto barra Phoxifaari galte Yooseefi ledose fooranno gede giddeessate woꞌnaaltu. Ise uddanosi cuꞌmite amaddu, Yooseefi kayinni xooqe bai. Phoxifaari minira dayita galtesi, ‘Yooseefi shollishe hooginoe’ yite kuꞌlitu. Ise hatto yaase kaphoho. Phoxifaari lowo geeshsha hanqe Yooseefi usuru minira eessi. Yihowa kayinni Yooseefi dihawino.

Yooseefi usuru mine heeꞌreenna Gibitsete moote Feriooni haaqee haaqiiꞌri; tenne haaqee mittu manchino tira hoogino. Mittu Feriooni soqqamaasinchi Yooseefi haaqeesi tira dandaannota kulisi. Feriooni hakkawontenni Yooseefi woshshe abbisiisi.

Feriooni Yooseefi, ‘Haaqiiꞌroommo haaqee tira dandaatto?’ yee xaꞌmisi. Hakkiinni Yooseefi Feriooni togo yii: ‘Gibitsete gobbara lamala diro sagale batidhanno; hakkunni gedensaanni kayinni lamala diro hude batidhanno. Mannikki reye goofannokki gede, gide gamba assannoha hayyicha mancho doori.’ Hakkiinni Feriooni togo yii: ‘Ate dooroommohe. Ati Gibitsete gobbara layinki moote ikkatto!’ Yooseefi Feriooni haaqiiꞌrino haaqee tiranno gede kaaꞌlinosihu ayetiro afootto? Yihowaati.

Hakkiinni Yooseefi lamalu diri giddo gide gamba assi. Hakkunni gedensaanni Yooseefi coyiꞌrinonte gede uulla woꞌmate aana hude batidhu. Mannu base baalatenni Yooseefiwa sagale hidhara dayi. Yooseefi anni Yaiqoobino Gibitsete gobbara sagale noota macciishshe sagale hirtara tonne oososi soyi.

Yaaiqoobi ooso Yooseefiwa martuta Yooseefi insa ayeootiro bayichonko afi. Roduuwisi kayinni isi Yooseefi ikkinota diaffino. Yooseefi wedellichu heeꞌre haaqiiꞌrino garinni roduuwisi umonsa heeshshi assite ayirrissusi. Yooseefi roduuwisi bunshe agurtinoronna teꞌee afa hasiꞌri. Konni daafira togo yiinsa: ‘Kiꞌne qotaanote. Gobbankera mayi xeinoro laꞌine hadhinara dagginoonni.’ Hakkiinni insa togo yitu: ‘Deeꞌni! Ninke Kanaani gobbanni dangoommo roduuwaati, ninke anninkera tonaa lameho. Mittu rodiinke reyino, maaꞌniidihu kayinni mine anninke ledo no.’ Hakkiinni Yooseefi togo yiinsa: ‘Coyidhinoonniri adda ikkinota ammaneemmo gede, hadhine maaꞌne rodooꞌne anewa abbe.’ Konni daafira, insa anninsawa qaera higgu.

Yaaiqoobi minensa sagale gooffuta xaano oososi Gibitsete gobba soyi. Hatte yannara insa maaꞌniidi rodoonsa Biiniyaami haadhe hadhino. Yooseefi giddonsata afara yee, Biiniyaami gide wodhara adhe haꞌrino ogori giddo birrunni seekkinoonni finiinchosi wori; hakkiinni roduuwasi, ‘Finiinchoꞌya moortinoonni’ yiinsa. Yooseefi soqqamaasine finiinchosi Biiniyaami ogori giddo affuta, roduuwisi lowo geeshsha masse huxidhu. Hakkiinni insa Yooseefi Biiniyaami agure insa qorichishanno gede huuccidhu.

Xa Yooseefi, roduuwisi bashsho gede bushuulle ikkitinokkita huwati. Hakkiinni Yooseefi cinca hooge hururame wiꞌli. Isi togo yiinsa: ‘Ani rodooꞌne Yooseefiiti. Anniꞌya xaa geeshsha lubbote no?’ Roduuwisi masse jalli yitu. Yooseefi togo yiinsa: ‘Hirtinoonnie daafira dadillitinoonte. Maganu lubboꞌne gattanno gede kawiira soyinoe. Xa rakkine annaꞌya anewa abbe.’

Insa qaera hadhe anninsara Yooseefi lubbote noota kultusi; hakkiinni annansa haadhe Gibitsete gobba hadhu. Lowo diri gedensaanni Yooseefi annisi ledo galagale xaadi.