Maganu Musenna Aarooni hadhine Ferioonira togo yiiyye yiinsa: ‘Mannaꞌya agura giwittoro toronde soyeemmo.’ Torondu, dureessuno buxichuno gatikki Gibitsete manni baalunku minira ei. Gibitsete gobbara torondu nookkiwi dino. Israeelete manni heeꞌrannote Geeseemi yinanni baattora kayinni torondu dino. Shoolkihunni kayise dirrino qoomami Gibitsete manna calla gawajjino. Hakkiinni Feriooni Muse togo yii: ‘Atinna mannikki hadhinannina Yihowa konne toronde hoolanno gede huucceꞌꞌe.’ Yihowa toronde hoolita kayinni Feriooni xaano Israeelete manna diagurino. Feriooni Maganu assi yiinosire assiyya?

Yihowa togo yii: ‘Feriooni mannaꞌya agura giwiro, Gibitsete manni saada dhiwante reyitanno gede asseemmo.’ Layinki barra Gibitsete manni saada reya hanaffu. Israeelete saada kayinni mitteno direyitino. Ikkirono Feriooni xaano Yihowa yiinosire dimacciishshino; xaano Israeelete manna diagurino.

Hakkiinni Yihowa Muse galagale Feriooniwa mare buluulo fincanno gede kulisi. Hakku buluuli buko ikke Gibitsete gobba baala woꞌmi. Buko Gibitsete manninna saadansa bisi darshanno gede assitu. Feriooni kayinni xaano Israeelete manna haꞌrannota hooli.

Yihowa Muse galagale mare Ferioonira togo yaanno gede kulisi: ‘Xaano mannaꞌya agura giwootto? Gaꞌa kaade xeenimma dirriseemmo.’ Layinki barra Yihowa kaade, banqonna giira dirrisi. Gibitsete gobbara hattoo kaade dirrite horo diegentino. Kaade haqqenna wixa baala uullate gantu; Geeseemi baattora kayinni kaade didirritino. Hakkiinni Feriooni togo yii: ‘Hadhinanni gede agureemmoꞌnena Yihowa konne qoomama dirrisa aguranno gede huuccenke!’ Kaadenna xeenu dirra agurita kayinni, Feriooni Israeelete manna haꞌrannota hooli.

Hakkiinni Muse togo yii: ‘Gaꞌa kaadetewiinni gattino haqqe kanchafaru coꞌo asse itanno.’ Lowo kanchafari daye gattino haqqe ite gudi. Konni daafira Feriooni togo yee huucciꞌri: ‘Yihowa konne kanchafare hoolanno gede huucceꞌꞌe.’ Yihowa kanchafare hooli gedensaannino, Feriooni Israeelete manna haꞌrara diagurino.

Yihowa Muse ‘Angakki iima qolte kayisi’ yiisi. Hakkiinni xiꞌmu tunsichi gobba gudise amadi. Gibitsete manni sase barra woꞌma mittoreno laꞌꞌa didandiino. Israeelete manni noowi kayinni xawaabbaho.

Hakkiinni Feriooni Muse togo yii: ‘Atinna mannikki haꞌra dandiitinanni. Saadaꞌne kayinni koye wortine hadhe.’ Muse Feriooni togo yii: ‘Maganoho kakkalo shiqishiꞌneemmo gede saadanke adhine haꞌneemmo.’ Konni daafira Feriooni lowo geeshsha hanqi. Isi togo yee hanqe coyiꞌri: ‘Albiꞌyanni hoꞌli! Layinkita kowiicho afummohero sheemmohe.’

Muse Ferioonira ‘Layinkita atewa didayeemmo’ yiino. Kayinni isi Feriooniwiinni haꞌrara albaanni isira togo yii: ‘Hashshu mereero, Feriooni beettinni kayise borojjicho iltino beetti geeshsha, Gibitsete baattora umo ilaminohu baalu reyanno.’

Yihowa Israeelete manni baxxino hurbaate qishiranno gede kulinsa. Isi togo yiinsa: ‘Mittu diriha geꞌrechu woy meichu wiliiꞌlicho gorritine gama mundee waalchoho gaꞌne. Maala durishidhine shiishinokki timinni itte. Haꞌrara kaino manchi gede uduunne uddidhine, caamma wodhitine agadhe. Techo hashsha Gibitsete gobbanni fushsheemmoꞌne.’ Hakkawote Israeelete manni mageeshshi geeshsha hagiidhinoha lawannohe?

Hashshu taalo Yihowa sokkaasinchi Gibitsete manni minira mari. Sokkaasinchu waalchoho mundee gannoonnikki mine nooha umi umiricho shii. Waalchoho mundee gannoonni mine kayinni agure saino. Gibitsete manni baalaho, yaano buxichohono dureessahono bayiru beettinsa reyino. Kayinni Israeelete ooso giddo mittu nafa direyino.

Feriooni beetti nafa reyino. Feriooni xaate Israeelete manna haꞌranno gede aguraraati. Konni daafira isi Muse togo yii: ‘Hadhe kawiinni. Hadhine Maganoꞌne magansidhe. Saadaꞌneno adhitine hadhe!’

Aganu waraꞌa yee heeꞌreenna, Israeelete manni minu minunninna gaꞌre gaꞌretenni Gibitsete gobbanni fuli. Israeelete manni kiiro meentonna qaaqquulle agurranna 600,000 ikkitanno. Wolu lowo mannino Yihowa magansiꞌrate insa ledo haꞌrino. Israeelete manni xaate lubbo gatino!

Israeelete manni Yihowa gatisinonsa gara qaagate diru kiiro baxxino hurbaate qixxeessiꞌranno. Hakkonne hurbaate Mararrote Ayyaana woy Faasikaho yinanni.