Israeelete manni Siina Ilaalinni kae, Faaraani Halalli widoonni hige Qaadesi yinanniwa haꞌri. Hakkiicho Yihowa Musera togo yii: ‘Israeelete mannira eemmo yoommota Kanaani gobba qotte higganno gede, gaꞌre gaꞌrentenni doorte 12 manna soyi.’ Konni daafira Muse 12 manna doore togo yiinsa: ‘Kanaani gobba hadhine, baatto shaqqadoteronna moolatero, mannu laafahoronna jawaatahoro, hattono dunkaanaho heeꞌrannohoronna katamaho heeꞌrannoro laꞌine amme.’ Tonaalame qotaano Kanaani gobba hadhu; insa giddo lamu Iyyaasunna Kaaleebiiti.

Shoyilluu barri gedensaanni qotaano woyinete, roomaanetenna balasete laalo haadhe daggu. Qotaano togo yitu: ‘Baatto shaqqadote; mannu kayinni wolqaataamoho; katammano jajjabbate.’ Hakkiinni Kaaleebi, ‘Qeelleemmonsana haꞌno!’ yii. Kaaleebi togo yiinohu mayiraatiro afootto? Isinna Iyyaasu Yihowa addaxxitino daafiraati. Kuꞌuri tonne qotaano kayinni togo yitu: ‘Dihaꞌneemmo! Hakko heeꞌranno manni jigeeyyete! Insa mule ninke koroꞌmiisu geeshshire ikkinoommo.’

Israeelete manni waajji. Insa insanaawa togo yii: ‘Amme hakkira haꞌne reyine goonfammonte, massagannonkeha doodhine Gibitse hingona.’ Iyyaasunna Kaaleebi kayinni togo yitu: ‘Yihowara hajajama gibbinoonte, hattono waajjitinoonte. Yihowa agarannonke.’ Israeelete manni kayinni insa yitinore dimacciishshino. Insa Iyyaasunna Kaaleebi shaa nafa hasidhino!

Hakkiinni Yihowa maa assinoro afootto? Isi Musera togo yii: ‘Israeelete manni assoommo maalale afanni heeꞌrenni hajajama giwinoe. Konni daafira insa 40 diro halalla raataabbanni keeshshite reyitanno. Eemmoꞌne yee xaaroommo gobba oosonsa, Iyyaasunna Kaaleebi calla ragidhanno.’

Shiima yanna gedensaanni, Israeelete manni halalla heeꞌreenna Qore, Daataani, Aberooninna wolu 250 manni Musera finqili. Insa Muse togo yitu: ‘Kiꞌne quwa mayira saꞌinanni? Ati massagaanchonke ikka dihasiissannohe; Aaroonino kakkalaanote biilo ikka dihasiissannosi. Yihowa atenna Aarooni ledo calla ikkikkinni ninke ledono noowe.’ Tini ikkitonsa Yihowa dihagiirsiissino. Yihowa Isiraeele Isira finqiltinohu gede asse laino!

Muse Qoreranna ledosi noorira togo yii: ‘Gaꞌa soodo hixaananna baccichoho giira haadhine qullaawu dunkaaniwa amme. Hakkiinni Yihowa doodhino manchi ayetiro hakkawote anfanni.’

Layinki barra, Qore 250 manni ledo qullaawu dunkaaniwa dayi. Hakkiicho insa kakkalaasinete gede hixaana giirtu. Yihowa Musenna Aarooni ‘Kiꞌne Qorenna ledosi noo manni mulinni hoꞌle’ yiinsa.

Qore qullaawu dunkaaniwa marinoha ikkirono, Daataani, Aberooninna mininsa manni kayinni didangeemmo yiino. Yihowa Israeelete manna, ‘Qore, Daataaninna Aberooni dunkaani mulinni hoꞌle’ yiinsa. Israeelete manni bayichonko hakkiinni hoꞌli. Daataani, Aberooninna mininsa manni fulte dunkaaninsa xullichira uurritu. Hakkiinni hedeweelcho baatto dadhante egemmitunsa! Qullaawu dunkaaniwa giira dirrite, Qorenna ledosi nooha 250 manna shakki assite ittu.

Hakkiinni Yihowa Musera togo yiisi: ‘Mitte mittente gaꞌre sooreeyyeta siqqonsa haadhe aanaho suꞌmansa borreessi. Leewi gaꞌre siqqo aana Aarooni suꞌma borreessi. Tenne siqquwa qullaawu dunkaani giddo wori. Hatte yannara ani dooroommo manchi siqqo daraartanno.’

Layinki barra, Muse baalanta siqquwa haaꞌre sooreeyyete leellishi. Aarooni siqqo daraarte kookete guma laaltino. Konni garinni Yihowa Aarooni kakkalaasinete biilo asse doorinota leellishi.