Yaaddo Amadduero Qullaawu Maxaafi Kaaꞌlannoe?

Qullaawu Maxaafi mayyaanno?

Ee, kaaꞌlannohe; korkaatuno, aye manchinni roore kaaꞌlankera dandaannohu ‘dadillitinore jawaachishanno Maganooti.’—2 Qorontoosi 7:6.

Maganu yaaddinore kaaꞌlannohu hiittoonniiti?

• Jawaante aanno. Maganu qarrakki baalanka haaꞌre hoolannoha ikkikkinni, qarrakki dandaatto gede kaaꞌlitannohe jawaante aannohe; konni garinni huuccattokkira dawaro qolanno. (Isayaasi 40:29) Maganu huuccattokki macciishshate ayewoteno qixxaawinoho; korkaatuno Qullaawu Maxaafi, “Kaaliiqi [“Yihowa,” Haaro Alame Tiro] dadillunni hiiqqantinorira mule noonsa; hexxo hoogginore gatisannonsa” yaanno. (Faarso 34:18) Wole agurina, Maganu giddokkita coyidhe kuꞌla hoogge hinciiccamatto woyite nafa, wodanikki hedo afanno.—Roomu Sokka 8:26, 27.

• Dancha lawishsha ikkitanno xagge worino. Mittu Qullaawu Maxaafi borreessaanchi Magano togo yee huucciꞌrino: “Kaaliiqaꞌya ballo, hexxo mudhoommowa heeꞌre, atewa hige raareemmo.” Kuni faarsaasinchi hexxo mudhe noo yannara sheshifatinohu, Maganu cubbonke maara hasiꞌrannoha ikkinota qaagino daafiraati. Konni daafira kuni faarsaasinchi Magano togo yiino: “Cubbonke kiiroottoha ikkoommero, gatara dandaannohu ayeti? Kayinnilla ate waajjine hajajammeemmohe gede, maarattonkehu ateeti.”—Faarso 130:1, 3, 4.

• Hexxo uyinonke. Maganu xaa yannara sheshifachishannonketano agurranna, yaandeemmo woy dadillineemmo gede assannonke qarra baalanka huneemmo yee hexxo uyino. Hatti hexxo woꞌmitanno woyite, “sainore baala [yaaddonna dadilluno gatikkinni] hambanni; horonta diqaanganni.”—Isayaasi 65:17.

Qaagiishsha: Yihowa Farciꞌraasine Maganu manna kaaꞌlannota ammantannoha ikkirono, addi addi dhibba lawishshaho darga assidhino yaaddo xagisiꞌrate woꞌnaaltanno. (Maarqoosi 2:17) Ikkollana, mitte xaginsanni ogimma bande tini woyyitanno diyineemmo; togoo hajo lainohunni mittu mittunku manchi woyyannosire umisi doodha hasiissannosita ammanneemmo.