Daanieeli Masaalo Mesihichchu Daanno Yanna Xawissinohu Hiittoonniiti?

MASAALAANCHU Daanieeli Yesuusi ilamara 500 diri albaanni heeꞌrino manchooti. Ikkeennano, Yesuusi Mesihichcha woyi Kiristoosi ikke buuramannota woyi shoomamanno yanna Daanieeli bade afanno gede Yihowa kulinosi. Isira togo yine kulloonnisi: “Yerusaalame gatamaratenna galagale minate awaajju fulihunni kayise Gashshaancho ikkanno Mesihichchi daa geeshsha lamala saammintenna leyana lame saamminte ikkannota afanna wodancha hasiissannohe.”—Daanieeli 9:25.

Mesihichchu daanno yanna bade afate, umo assine Mesihichchu daannota kultannoti Daanieeli masaalo woꞌma jammartinohu mamooteetiro buuxa hasiissannonke. Tini masaalo woꞌma jammartinohu “Yerusaalame gatamaratenna galagale minate awaajju” fulanno yannaraati. ‘Awaajju fulinohu’ mamooteetiyya? Qullaawu Maxaafi borreessaanchi Nehimiya xawisino garinni Yerusaalamete gimbe gatamarate awaajju fulinohu “Arxekisisi nugusa ikkihunni lemiikki diriraati.” (Nehimiya 2:1, 5-8) Arxekisisi gashsha jammarinku mitto diro ikkinosihu 474 K.I.A. ikkinota xaggete borreessaano buuxxino. Konni daafira, gashshootisihu 20⁠^ki diri 455 K.I.A. woꞌmino. Mesihichchu daannota kultannoti Daanieeli masaalo woꞌma jammartinohu 455 K.I.A. ikkinota buunxoommo.

Daanieeli, “Gashshaancho ikkanno Mesihichchi” daa geeshsha mageeshshi yanna saꞌannoro xawisino. Daanieeli masaalo “lamala saammintenna leyana lame saamminte” yaano mitteenni 69 saamminte qummi assitanno. Tini yanna mageeshsha ikkitanno? Tini saammintuwa lamala barra amaddinota ikkitukki diru saammintuwa ikkitinota haammata Qullaawu Maxaafi tiro xawissanno. Konni daafira mitte mittenti saamminte lamala diro riqibbanno. Tini diru saammintuwa biꞌree Yihudootira wosincho coye diꞌꞌikkitino; yaano yanna lamalu dirira beeha insa rossino coyeeti. Lawishshaho, insa ayeewoteno lamalki diro Sambatu diro ayirrissanno. (Wolaphpho 23:10, 11) Konni daafira, masaalotenni kulloonniti 69 saamminte mitte mittenti lamala diro amaddanno; konni garinni tini yanna 483 dirooti yaate.

Xa gattinonketi shallaga callate. Kunino 455 K.I.A. kayinse 483 diro kiirrummoro, 29 M.D. iillineemmo. Kuni diri Yesuusi cuuaminohonna Mesihichcha ikkinoho!a (Luqaasi 3:1, 2, 21, 22) Tini Qullaawu Maxaafi masaalo xagge ikkanno garinni diwoꞌmitino?