Sioole Maati?

QULLAAWA MAXAAFA umo borreessinoonnihunni Ibirayisxete afiinni sioolenna Girikete afiinni heedisi yaanno qaali 70 saꞌino basera no. Lamenka qaale horoonsiꞌnoonnihu reyote ledo xaadinseeti. Mite Qullaawu Maxaafi tiro kuri qaalla “waamma,” woyi “bale” yite tirtino. Ikkollana batinynyu afiinni konne Ibirayisxetenna Girikete qaali tiro garunni sayisanno qaali dino. Konni daafira, Haaro Alame Tiro tenne qaalla “Sioole” nna “Heedisi” yite tirtino. Ikkina lamunku qaali tiro maati? Hanni Qullaawu Maxaafi tenne qaalla babbaxxitino xiqissara horoonsiꞌrino gara laꞌno.

Mekibibi 9:10, “Ati haꞌrattowa Sioolete loosu woyi iqqide woyi egenno woyi hayyo dino” yitanno. Togo yaa Sioole mitte baxxitinote waammate baseeti yaateni? Deeꞌni. Qullaawu Maxaafi baxxitinota madaarshu base woyi moogo xawisate sioole woyi heedisi ikkikkinni wole Ibirayisxetenna Girikete qaale horoonsiꞌranno. (Kalaqo 23:7-9; Maatewoosi 28:1) Hakkii saeno, Qullaawu Maxaafi “Sioole” yaanno qaale ayiddu moogga woyi duuchcha manna madaarranni base xawisate dihoroonsiꞌranno.—Kalaqo 49:30, 31.

Ikkina “Sioole” hiittoo baseetiyya? Maganu Qaali “Sioole” woyi “Heedisi” yaanno qaale duuchcha manna madaarroonni basenni roorinorira horoonsiꞌranno. Lawishshaho Isaayaasi 5:14 aanna, Sioole “halaꞌlitinonna afoose dannimale fantino” yaanno. Sioole kiiro afiꞌrinokki manna egemmitinoha ikkirono, ayee woteno diduubbannote. (Lawishsha 30:15, 16) Sioole wossanamino manna madaarranni base gede illete leeltannotanna ‘duubbannota’ diꞌꞌikkino. (Lawishsha 27:20) Hatto yaano Sioole horonta diwoꞌmitannote yaate. Ise danna afidhinota diꞌꞌikkitino. Konni daafira, Sioole woyi Heedisi wossanantino base diꞌꞌikkitino. Hatteentenni, reyino manni baalu, fooliishshiꞌrannote lawishshu baseeti.

Qullaawu Maxaafi kaote hexxore rosiisanno rosi, “Sioole” nna “Heedisi” maatiro seekkine buuxate kaaꞌlannonke. Sioolenna Heedisi kao afiꞌnanni reyo ledo xaado afidhinota Maganu Qaali coyiꞌranno.a (Iyyoobi 14:13; Soqqamaanote Looso 2:31; Ajuu[j]a 20:13) Hakkii saeno Maganu Qaali, Yihowara soqqantinori calla ikkikkinni isira soqqantinokkirino Sioolete woyi Heedisi giddo noota kulanno. (Kalaqo 37:35; Faarso 55:15) Konni daafira Qullaawu Maxaafi, ‘Cubbaataammunna keeraano reyotenni [kaꞌanno]’ yaanno.—Soqqamaanote Looso 24:15.