Duuchchunku Coyinni Ammanamoottoha Ikki

1, 2. Yihowa ammanammoommore ikkine heeꞌrate assineemmo sharro laꞌꞌanno wote hagiidhannohu mayiraati? Tennera lawishsha kuli.

MITTE manchonna shiimu qaaqqise suuqetenni fule haꞌranni heeꞌreenna, qaaqqu hedeweelcho mase uurri. Ada suuqetenni haaꞌrino kaase angasi no. Haarinowa worikki, woyi amasi hirie yiikki hawe anga adhe dayino. Hakkiinnino mase amasiwa hige wiꞌli. Haarino kaase qolanno gedenna maaro xaꞌmiꞌranno gede amasi sheshifachchishshe suuqe haadhe hadhusi. Qaaqqu mare hatto assita amasi lowo geeshsha hagiidhitu. Mayira?

² Annunna ama, oosonsa ammanama afidhino waaga rossanni noota laꞌuro ayeewoteno lowo geeshsha hagiidhitanno. “Halaalu Magano” ikkinohu iimi Anninkeno tenne lairo hattonni hagiidhanno. (Faarso 31:5) Yihowa ayyaanaamittetenni gikki yinoommorenna ammanammoommore ikkine heeꞌrate assineemmo sharro laꞌꞌanno wote tashshi yaannosi. Iso hagiirsiisanna baxillisinni fullummokki heeꞌra hasiꞌneemmo daafira, hawaariya Phaawuloosi hedo ledo sumuu yineemmo. Isi togo yiino: “Duuchchunku coyinni ammanammoommore ikkine heeꞌrate halchineemmo.” (Ibiraawuyaani 13:18, NW) Hanni heeshshonke giddo ammanammoommore ikka mito wote lowonta kabbaaddannonketa shoole qara kifilla laꞌno. Hakkiinnino ammaname heeꞌra abbitannoha mito mito atoote laꞌneemmo.

UMINKERA AMMANAMMOOMMORE IKKA

3-5. (a) Maganu Qaali meessaneeto doga abbitanno gawajjore mayyee qorowisiisanno? (b) Uminkera ammanammoommore ikkineemmo gede mayi kaaꞌlannonke?

³ Kabbaade ikkannonke coyi giddo umihu, uminkera ammanammoommore ikka rosate. Guunte noonkekkire ikkinoommo daafira, roore wote ninkeneeto dongeemmo. Lawishshaho, Lodoqiyaho heeꞌranno Kiristaani ayyaanaamittetenni jaawe heeꞌrenni, yaano ‘buxane, ballootanna mulloota’ ikke heeꞌrenni dureeyye ikkino gede asse hedino daafira insaneeto doganni noota Yesuusi kulinonsa. (Ajuuja 3:17) Kuri Kiristaanooti konni garinni insaneeto dogansa roore gawajjantanno gede assitinonsa.

⁴ Qoleno Yesuusi rosaanchi Yaaqoobi mayyee qorowisiisinoro wodanchi: “Ayee manchino Magano magansiꞌranni nooha lawisirono arrawosi kayinni qeeꞌlannokkiha ikkiro, isonooto doganni no; konni manchi magansiꞌra beebbate.” (Yaaqoobi 1:26, NW) Arrawonke doogimale horoonsiꞌnanni heeꞌne Yihowa hagiidhanno garinni magansiꞌra dandiineemmo yinummoro, tirfiꞌneemmo coyi ninkeneeto doga callate. Qoleno, Yihowara shiqishiꞌneemmo magansiꞌra beebba ikkitanno, yaano mittu waagi nookkita ikkitanno yaate. Tenne gawajjitanno doogo haꞌneemmokki gede mayi kaaꞌlankera dandaanno?

⁵ Yaaqoobi hattee sokkasinkura, Maganu Qaali halaali hincilaallote gedeeha ikkinota xawisino. Isi Maganunnita guuta higge hixamanynyine laꞌneemmo gedenna hakko garinni heeshshonke biddi assiꞌneemmo gede amaalinonke. (Yaaqoobi 1:23-25) Qullaawu Maxaafi uminkera ammanammoommore ikkineemmo gedenna heeshshonke woyyeessiˈrate maa assa hasiissannonkero wodanchineemmo gede kaaꞌlannonke. (Qurtaancho Ermiyaasi 3:40; Hage 1:5) Qoleno Yihowa marammarannonke gede, hattono buutote laanfe heedhunkero hattee huwanteemmo gedenna taashshiꞌneemmo gede kaaꞌlankera huuccattotenni xaꞌmiꞌra dandiineemmo. (Faarso 139:23, 24) Ammanama hooga lowonta goddaassannote; ninkeno tenne laanfe Yihowa laꞌꞌanno garinni laꞌꞌa hasiissannonke. Lawishsha 3:32 togo yitanno: “Hamintichcha mancho Yihowa effire giwanno; Isi lubbora jaaloomannohu kayinni suwaddu ledooti.” Yihowa hedonke isite gedeeta ikkitanno gedenna, ninkeneeto isi laꞌꞌannonke garinni layiꞌneemmo gede kaaꞌlannonke. Phaawuloosi, “Ammanammoommore ikkine heeꞌrate halchineemmo” yiinota qaagi. Xa guuta ikka didandiineemmo; ikkollana, ammanammoommore ikkate lowo hasatto noonke; hattono tennera qinaannonke gede lowo sharro assineemmo.

MAATETE GIDDO AMMANAMMOOMMORE IKKA

6. Minaannino ikko minaama mimmitinsara ammanaminore ikka hasiissannonsahu mayiraati? Hatto ikkiro hiikko qarrinni gatanno?

⁶ Ammanama Kiristaanu maatera qara malaate ikka hasiissannose. Konni daafira minaannino ikko minaama mimmitoho noore coyiꞌrannorenna ammanaminore ikka hasiissannonsa. Galte agurre wole meyaate woyi labbaahu ledo baxillunni quraanynyama, Interneetete widoonni maaxamme wolu ledo jaalooma kalaqiꞌra woyi ayee garita teeda baꞌino misilla laꞌꞌa lawinori battaawinohunna gawajjanno assooti Kiristaanu maate giddo horonta heeꞌra dihasiissannosi. Mitu adhamino Kiristaani galtensa maaxame togoore gara ikkinokkire assino. Togoore assa ammanama baꞌꞌate. Ammanamino Nugusi Daawiti yiinore wodanchi: “Kaphphaanote ledo diofolloommo; ayiimmansa maaxxannori ledono sumuu diyeemmo.” (Faarso 26:4) Galte nooheha ikkiro, galtekkira ayiimmakki maaxatto gede assannohere mittoreno assitooti!

7, 8. Ooso ammanama afidhino waaga huwattanno gede kaaꞌlitannonsari Qullaawu Maxaafi lawishshubba hiikkuriiti?

⁷ Annunna ama oosonsara ammanama afidhino waagire rosiissanno wote, Qullaawu Maxaafi lawishshubba horoonsiꞌransa hayyote. Ammanantinokki mannire kulate, moore kae moorinota maaxate woꞌnaalinoha Akaani, woxeho yee kaphphinoha Giyaazi, hattono mooraanchonna Yesuusa sayise aate kaphpho coyiꞌrinoha Yihuda lawishsha assine kula dandiinanni.—Iyyaasu 6:17-19; 7:11-25; 2 Negesti 5:14-16, 20-27; Maatewoosi 26:14, 15; Yohaannisi 12:6.

⁸ Ammanamino mannire kulate kayinni, soꞌne worroonniha laweennasi oososi ogorinsa giddo afidhino woxe qoltara hajajinoha Yaaqoobi, Yoftahe, hattono umiseta lowo xiqime agurte annise xano wonshitinota beettosi, qoleno isire kultanno masaalo woꞌmitanno gedenna jaallasi gawajjotenni gatisate amadasira dayino mannira bareendetenni isonooto egensiisinoha Yesuusa lawishsha assine kula dandiinanni. (Kalaqo 43:12; Mesaafinti 11:30-40; Yohaannisi 18:3-11) Annunna ama oosonsa ammanama baxxannorenna kaffi assite laꞌannore ikkitanno gede rosiisate kaaꞌlitannonsate Maganu Qaali giddo noote horoontanno lawishshubba giddo gama kuriiti.

9. Annunna ama ammanama lainohunni oosonsara lawishsha ikka hasiꞌriro, mayinni xeertiꞌra hasiissannonsa? Konni garinni lawishsha ikkansa mayi horo afidhino?

⁹ Ooso konni garinni rosiisa annahonna amate halaafinate leddanno. Hawaariya Phaawuloosi togo yee xaꞌmino: “Ati wole rosiisattohu umokki dirosiisatto? ‘Moortinoonte’ yite kulattohu, ati umikki mooratto?” (Roomu Sokka 2:21) Mitu anninna ama oosonsa ammanantinore ikkitanno gede rosiissanni insa kayinni ammanantinokkire ikkitanno daafira oosonsara coyi gurchaawanno gede assitanno. Togoo annuwinna amuwi shiimaaddare mooranna kaphpho coyira gara ikkitinoha lawisse, “Konne mannu adhannota woxu anni wonanni afe no” hattono “Kuni shiinqa kaphphootilla” yitanno. Noore coyiꞌniro kayinni, adhinoonnirichchi baxi geeshshihano ikkiro mooru moorankolla; qoleno coyiꞌnoonniri ajo batiro, kaphphu kaphphonkolla.a (Luqaasi 16:10) Kaꞌaa wolere yinanni kawaa wolere assinannita ooso rakke affanno; togoore laꞌannoha ikkiro, bushare rossanni lophphitanno. (Efesooni 6:4) Ikkollana, anninsanna amansa lawishsha laꞌe ammanama rossannoha ikkiro, tenne ammanama baꞌino alame giddo Yihowara ayirrinynye abbitannore ikkitara dandiitanno.—Lawishsha 22:6.

SONGOTE GIDDO AMMANAMMOOMMORE IKKA

10. Kiristaanu roduuwinke ledo ammanama noo coye hasaawa lainohunni, hawa hasiissannonkekki qorowishshi hiikkonneeti?

¹⁰ Ammanate roduuwinke ledo gamba yaanke ammanammoommore ikka ronseemmo gede roore faro fantannonke. Fooliishsho 12⁠te ronsummonte gede, coyiꞌrate eltonke qorophphotenni horoonsiꞌra hasiissannonke; hakko iso ammanate roduuwinke ledo heeꞌnummoro roore qorophpha hasiissannonke. Fayyu hasaawi sununni hemete widira, hakkiinnino sae wolootu suꞌma hunate widira soorramara dandaanno! Halaale ikkinoronna teꞌee anfoommokkiha mitto coye woleho kulleemmoha ikkiro, kaphpho tareessinanni heeꞌnoommoha ikkara dandaanno; konni daafira suumenke eemadha hasiissannonke. (Lawishsha 10:19) Wole widoonni kayinni, mittu coyi halaale ikkinota anfoommo daafira calla woleho kula hasiissannonke yaa diꞌꞌikkitino. Lawishshaho, hakku coyi ninke eessannonkekkiha ikkara dandaanno, woyi hakko coye woleho kula danchumma ikka hooggara dandiitanno. (1 Teselonqe 4:11) Mitu manni afiinsa abbire coyiꞌranni tini ammanamate yaanno; ikkollana coyiꞌneemmo coyi ayeewoteno coommannohanna shaqqillu nooha ikka hasiissannosi.—Qolasiyaasi 4:6.

11, 12. (a) Mitootu kabbaade cubbo loossuro, kalaqamino qarri roore sarraaqamanno gede assidhannohu hiittoonniiti? (b) Kabbaade cubbo lainohunni Sheexaanu tareessanno kaphphi hiikkonneeti? Ninkeneeto konni kaphphinni agadha dandiineemmohuna hiittoonniiti? (c) Yihowa dirijjitera ammanammoommore ikkinoommota leellisha dandiineemmohu ma garinniiti?

¹¹ Roorenkanni songote sooreeyye ledo ammanamme heeꞌra hasiissannonke. Mitootu kabbaade cubbo loossuro, cubbonsa maaxate woꞌnaalatenninna songote cimeeyye xaꞌmitanno wote kaphphatenni kalaqamino qarri roore sarraaqamanno gede assitanno. Hakkiinni saꞌeno, kuri mannooti kabbaade cubbo loossanni heedhenni Yihowara soqqantanni nooha lawisse lamu dani heeshsho heeꞌra jammartanno. Addaho, togoo ikkito mittu manchi heeshsho gudisidhe kaphphunni woꞌmitinota ikkitanno gede assitanno. (Faarso 12:2) Mitootu kayinni cimeeyyete qara coye maaxxe, gama calla kultanno. (Soqqamaanote Looso 5:1-11) Mittu manchi konni garinni ammanama baꞌꞌannohu Sheexaanu tareessanno kaphpho ammanirooti.—Qoola 188-189 noota, “Kabbaade Cubbo Lainohunni Sheexaanu Tareessanno Kaphpho” yitanno saaxine lai.

¹² Qoleno Yihowa dirijjitera mittore borrotenni shiqinsheemmo wote ammanammoommore ikka hasiissannonke. Lawishshaho, soqqanshote rippoortenke qolleemmo wote nookkire borreessa dihasiissannonke. Hakkiinni saeno, mitte soqqanshote mabte afiꞌrate forme wonshineemmo wote, fayyimmanke gara, soqqanshonke woyi wolere lainohunni noore calla borreessa hasiissannonke.—Lawishsha 6:16-19.

13. Ammanate roduuwinke ledo loosunni xaandeemmoha ikkiro, insara ammanammoommore ikkinoommota leellisha dandiineemmohu hiittoonniiti?

¹³ Loosu hajo lainohunnino ammanate roduuwinke ledo ammanammoommore ikka hasiissannonke. Mito wote Kiristaanu roduuwi wolu ammanate roduuwinsa ledo loosunni xaadara dandaanno. Kuri roduuwi Mangistete Harira heeꞌre woyi mitteenni soqqansho fule heeꞌre togoo hajo kayisa dihasiissannonsa. Mittu rodii ledo loosunni xaandummoro, xaadooshshinke loosannohunna loosiisiꞌrannohu mereero heeꞌrannoha ikka hasiissannosi. Ammanate roduuwanke qaxarre loosiisiꞌneemmoha ikkiro, kaffalate sumuu yinoommo damoozansa yannatenni kaffalatenni, hattono higge hajajjanno xiqime afidhanno gede assatenni insara ammanammoommore ikkineemmo. (1 Ximootewosi 5:18; Yaaqoobi 5:1-4) Wole widoonni kayinni, ammanate roduuwinkera qaxaramme loonseemmoha ikkiro kaffallanninke damoozira gabbaꞌꞌanno garinni loosa hasiissannonke. (2 Teselonqe 3:10) Isi ledo ammanatenni xaandeemmo daafira calla qaxarinonke manchi ninkera addire assankera, lawishshaho wole loosaasinera uyinokkiha fooliishshote barra, woyi wole xiqime aankera agadha dihasiissannonke.—Efesooni 6:5-8.

14. Dirijjite kalaqidhe guto daddaꞌlitanno Kiristaanooti balaxxe maa assa hasiissannonsa? Mayira?

¹⁴ Loosinke dirijjite kalanqe guto daddaꞌlinanniha ikkirona? Qullaawu Maxaafi tennera horoomannoha xintu seera amadino: Hakkuno, mitto mittonka coye borreesse wora hasiissanno yaate! Lawishshaho, Ermiyaasi baatto hidhi wote naqaashootu noowa lame sanade qixxeesse albillittete taje ikkitanno gede danchu garinni worino. (Ermiyaasi 32:9-12; qolteno Kalaqo 23:16-20 lai.) Ammanate roduuwinke ledo guto daddaꞌlineemmo wote danchu garinni qixxaabbinotera, hattono naqaashe noowa farrammoonni sanadera baalankare borreesse amada, roduuwanke ammana hooga diꞌꞌikkitino. Roorenkanni togo assa, coyi kawanna kaꞌaa higannokki gede, koffi assannori kalaqamannokki gede, hakkiinni saeno roduuwu mereero babbadama abbannori kalaqamannokki gede assitanno. Ammanate roduuwinsa ledo guto daddaꞌlitanno roduuwi daddalinsara yite songote mittimmanna keere huna hasiissannonsakkita wodancha hasiissannonsa.b—1 Qorontoosi 6:1-8.

SONGOTE GOBBAANNI AMMANAMMOOMMORE IKKA

15. Ammanama nookki daddalo lainohunni Yihowara mayi macciishshamannosi? Kiristaanu togooha halaꞌlino roso hiittoonni laꞌꞌa hasiissannonsa?

¹⁵ Kiristaanu ammanaminoha ikkannohu songote giddo calla diꞌꞌikkino. Phaawuloosi, “Duuchchunku coyinni ammanammoommore ikkine heeꞌrate halchineemmo” yiino. (Ibiraawuyaani 13:18, NW) Kalaqaanchinke, daddalu ledo xaado afidhino hajora ammanammoommore ikkinammora lowonta hasiꞌranno. Lawishshu maxaafira calla gara ikkino miizaani hasiisannota kultannoti shoole xiqise no. (Lawishsha 11:1; 16:11; 20:10, 23) Biꞌree waro, mannu hirannonna hidhanno wote hiranno uduunnenna woxe mazzanate miizaananna miizaanu kincho horoonsiꞌrannoti rosantinote. Ammanama baꞌino daddalaano hidhanno mannira kiilo itatenna tirfe afiꞌrate, lamu gariha miizaanu kinchonna gariweelo miizaana horoonsidhanno.c Yihowa togoo assoote effire giwanno! Baxillisinni fullummokki heeꞌrate, ammanama bainohu daddalu assooti baalunkunni xeertiꞌra hasiissannonke.

16, 17. Xaa yannara batinynyu manni ammanama baꞌꞌannohu hiitte doogganniiti? Kiristaanu kayinni ma assannokki gede qorophphanno?

¹⁶ Sheexaanu alamete gashshaancho ikkino daafira, qooxeessinke gudisame ammanama baꞌinoha ikkasi xagge diꞌꞌikkitannonke. Ammanama xeꞌinore assineemmo gede fatanannonkeri barru baala tuncu yaankera dandaanno. Mannootu looso qaxaramate kuꞌlaato borreessidhanno wote, noonsakki naxiwe qixxeessite, hattono lowo diro loossinohu gede assite borreessite kaphphansanna nookkire ledansa rosantinote. Qoleno mannu wole gobba haꞌrate, qaraxoho, inshuuraansetenna konne lawinorira forme wonshanno wote, hasiꞌrinore afiꞌrate yee nookkire wonshanno. Batinynye rosaano fatana moortanno; qolteno mittore loosse shiqishate woyi rosu minira rippoorte shiqishate hasidhuro, Interneetete aana afidhinore uminsahu gede assite shiqishshanno. Qoleno mannu hasiꞌrinore afiꞌrate, amanynyoote baꞌino gashshaanora gubbo aanno. Batinynyu manni ‘umonsa baxannoha, woxe baxannoha [hattono] danchare baxannokkiha’ ikkino alamera togoo akati heeꞌrannota anfoommo.—2 Ximootewosi 3:1-5.

¹⁷ Addu Kiristaani togoore mittoreno assannokki gede lowonta qorophphanno. Togoore ammanama baꞌinore assitanno mannooti duuchchuri injiinonsarenna alamete aana baalaho aliidire ikkitinoha labbe leellansa, mito wote ammanama kabbaade ikkitanno gede assitanno. (Faarso 73:1-8) Wole widoonni kayinni, Kiristaanu “duuchchunku coyinni” ammanaminoha ikka hasiꞌranno daafira, angate anjenni qarramara dandaanno. Konni garinni meessi xiqime kakkalo assa garaho? Ee lowo geeshsha! Mayira? Ammanama mayi atoote abbitanno?

AMMANAMA ABBITANNO ATOOTE

18. Ammaname dancha suꞌma afiꞌra lowo waaga afidhinohu mayiraati?

¹⁸ Ammanaminohonna addaxxinanni manchooti yinanni suꞌma afiꞌratenni roorinore wolere heeshshokki giddo diafiꞌratto yaa dandiinanni. (Qoola 191 noota, “Mageeshshi Geeshsha Ammanamoommoho?” yitanno saaxine lai.) Hanni konne coye hedi: Ayee manchino togoo suꞌma afiꞌra dandaanno! Togoo suꞌma afiꞌrattohu noohe dandoonni, jirokkinni, danikkinni, konni albaanni heeꞌrootto heeshsho garinni, woyi wolqakkira alee ikkinohu wolu coyinni diꞌꞌikkino. Ikkollana batinynyu manni dancha suꞌma afiꞌra didandiino. Konnira togoo suꞌma afiꞌrino manni muxxe ikkino. (Mikiyaasi 7:2) Mitu manni ammanamoottoha ikkakkinni arrassahera dandaanno; wolootu kayinni ammanakki xagge assidhe addaxxitaheranna ayirrissahera dandiitanno. Batinynye Yihowa Farciꞌraasine ammanantinore ikkansanni miinju widoonni nafa xiqime afidhino. Woloota loosuwiinni shorrinanna, insa kayinni gattino; qoleno ammanamino manna qaxarate hansanni basera looso afiꞌra dandiitino.

19. Ammaname heeꞌra tiiꞌꞌinke hiittooha ikkanno gede assitanno? Yihowa ledona hiittoo fiixoomi heeꞌrannonke gede assitanno?

¹⁹ Ati togoo atoote afiꞌroottoha woyi afiꞌroottokkihano ikkiro, ammanamoottoha ikkakkinni roore atoote afiꞌratto. Lawishshaho, keeraanchu tiiꞌꞌi heeꞌrannohe. Phaawuloosi, “Ammanamino tiiꞌꞌi noonkere ikkinoommota dihuluullammeemmo” yee borreessino. (Ibiraawuyaani 13:18, NW) Hakkiinni saeno, assattoha dancha looso iimi Anninke laꞌꞌanno; qoleno isi ammaname heeꞌranno manna baxanno. (Faarso 15:1, 2; Lawishsha 22:1) Addaho, ammanamoottoha ikkakki Maganu baxillinni fulittokki heeꞌratto gede kaaꞌlitannohe; qoleno konninni roorino atooti dino. Kawiinni aanchine tenne ledo xaado afidhino hajore laꞌneemmo; hattino Yihowara loosoho noosi laooti.