Maganu Umo Kalaqino Manna

Maganu Edenete yinanniwa kaashshu base qixxeessino. Hattee kaashshu base giddo addi addi daraaro, haqqenna saada no. Hakkiinni Maganu Addaami yinanni mancho bushshunni kalaqe sanote widoonni qole foole worinosi. Hakkuyi gedensaanni ikkinore afootto? Manchu heeshshote noo kalaqama ikkino! Maganu, Addaami kaashshu base towaatara iso hakko worino; qoleno ‘Baalante saadara suꞌma fushshi’ yiinosi.

Yihowa Addaami togo yiino: ‘Kaashshu basera noo haqqe giddo mitte agurranna baalante haqqe laalo iti. Ittooti yoommo haqqicho laalo itittoro kayinni reyatto.’

Gedensaanni Yihowa togo yiino: ‘Addaamira kaaꞌlitannosita kalaqeemmosi.’ Maganu, Addaami takki yee goxanno gede assi; hakkiinni Addaami midaadinni miqicho haaꞌre minaama kalaqinosi. Ise suꞌmi Heewaniiti. Addaaminna Heewani umi minaannanna minaama ikkino. Addaami minaama afiꞌriti hiitto hagiidhinoro afootto? Isi lowo geeshsha hagiidhe togo yiino: ‘Tini Yihowa miqichiꞌyanni kalaqinote! Ane labbannota afiꞌroommo.’

Yihowa, Addaaminna Heewani, ‘Ille, ilamme gobba woꞌme’ yiinonsa. Yihowa insa uulla, Edenete kaashshu base gedeeta gannate woy biifado base assara hasiꞌrino. Ikkollana Maganu hedinori diwoꞌmino. Mayira? Aantanno fooliishshora tenne daafira ronseemmo.