Kaphu Ammaꞌno Maganu Suꞌma Xonsiissino Gara

Maganu baxille ikkina, Magano magansiꞌneemmo yitannoti duucha ammaꞌno batinye busha coye assitinohu mayiraati? Togoo ammaꞌno kaphoho; qoleno Maganu suꞌma xonsiissannote. Kaphu ammaꞌno Maganu suꞌma xonsiissinohu hiittoonniiti? Tenne daafira isira mayi macciishshamannosi? Isi tennera maa assate hedino?

1. Kaphu ammaꞌno rosiissanno rosinni Maganu suꞌma xonsiissannohu hiittoonniiti?

Kaphu ammaꞌno “Maganu halaale kaphunni soorritino.” (Roomu Sokka 1:25) Lawishshaho, roore ammaꞌno manninsara Maganu suꞌma dirosiissino. Qullaawu Maxaafi kayinni Maganu suꞌma woshsha hasiissannota kulanno. (Roomu Sokka 10:13, 14) Mitu ammaꞌnote murrooti bushuri ikkanno woyite Maganu abbinoreeti yitanno. Tini kayi kaphoho. Maganu bushare horonta diassanno. (Yaiqoobi 1:13 nabbawi.) Addanko ammaꞌno rosiissannohu kaphu rosi, mannu Maganuwiinni xeertiꞌranno gede assino.

2. Kaphu ammaꞌno assootinsanni Maganu suꞌma xonsiissannohu hiittoonniiti?

Kaphu ammaꞌno manna Yihowa gede baxa agurte beebba assidhanno. Qullaawu Maxaafi, kaphu ammaꞌnoti “cubbise kuuso gordu geeshsha iillitino” yaanno. (Yohaannisi Ajuuja 18:5) Lowo xibbe diro, addi addi ammaꞌno poletikaho eꞌanninna olaho kaaꞌlantanni keeshshitino; qoleno kiirre tunqannikki manna shinanni gede assitino woy shinara sumuu yitino. Mitu ammaꞌnote murrooti dureeyye ikka hasidhanno daafira, mannansa woxe abbe yitanno. Kuni baalu assootinsa, insa Maganu soqqamaasine ikkitannota agurina Magano afa nafa affinokkita leellishanno.—1 Yohaannisi 4:8 nabbawi.

3. Kaphu ammaꞌno daafira Maganoho mayi macciishshamannosi?

Kaphu ammaꞌno assitanno bunshe ate dadillissannoheha ikkiro, Yihowarano mayi macciishshamannosiha lawannohe? Yihowa manna baxannoha ikkirono, iso xonsiissannonna manna beebba assidhanno ammaꞌno kayinni hanqissannosi. Isi kaphu ammaꞌno baꞌanno hattono “layinkimeeshsho horo dikaꞌanno” yee hexxo uyinonke. (Yohaannisi Ajuuja 18:21) Muli yannara, Maganu kaphu ammaꞌno baalanta hunanno.—Yohaannisi Ajuuja 18:8.

LEDDE XIINXALLI

4. Magano hagiirsiissannoti baalanta ammaꞌno diꞌꞌikkitino

Batinyu manni, babbaxxitino ammaꞌno Maganunniwa massitannote addi addi doogo gedeeti yee hedanno. Kayi hatto yaa garaho? Maatewoosi 7:13, 14 nabbabbe; hakkiinni tenne xaꞌmo hasaabbe:

• Heeshshote widira massitanno doogo daafira Qullaawu Maxaafi mayyaanno?

VIIDIYO laꞌe; hakkiinni aante noo xaꞌmo hasaabbe.

VIIDIYO: Baalanti Ammaꞌno Magano Hagiirsiissanno?—Murre Haaꞌnoonnita (3:22)

• Qullaawu Maxaafi, Magano hagiirsiissannoti batinye ammaꞌno no yaanno?

5. Kaphu ammaꞌno Maganu baxille dileellishshanno

Kaphu ammaꞌno duucha doogonni Maganu suꞌma xonsiissino. Tenne doogga giddo qara, olaho kaaꞌlamansaati. Tennera mitto lawishsha laꞌꞌate, VIIDIYO laꞌe. Hakkiinni, aante noo xaꞌmuwa hasaabbe.

VIIDIYO: Layinkihu Alamete Oli Yannara Beetekiristaane Assitinore (2:22)

• Layinkihu Alamete Oli yannara batinye beetekiristaane maa assitino?

• Insa assitinori daafira ati mayyaatto?

Yohaannisi 13:34, 35; 17:16 nabbabbe. Hakkiinni, tenne xaꞌmuwa hasaabbe:

• Ammaꞌno olaho kaaꞌlantanno woyite Yihowara mayi macciishshamannosiha lawannohe?

• Kaphu ammaꞌno batinye busha coye assitino. Kaphu ammaꞌno Maganu mimmito baxxe yee uyinonke hajajo ayirrissannokkita leellishannore maa maa assitino?

6. Maganu mannu kaphu ammaꞌno giddonni fulanno gede kaaꞌla hasiꞌranno

Yohaannisi Ajuuja 18:4 nabbabbe;a hakkiinni tenne xaꞌmo hasaabbe:

• Maganu kaphu ammaꞌno doggino manna gatisa hasiꞌrannota hedatto woyite mayi macciishshamannohe?

7. Addu Magani daafira rosa agurtooti

Kaphu ammaꞌno bunshe assitanno daafira Magano busha assa hasiissannonke? Hanni mittu beetti annisi amaalinosita dancha amaale adha giwino yine hendo. Kuni beetti mininni fule haꞌre bushare assa hanafi. Annu kayinni beettisi ikkito dibaxino. Kuni finqilu beetti heeꞌranno heeshshora annasi busha assa digaraho yineemmohu mayiraati?

• Kaphu ammaꞌno assitanno bunshera Yihowa busha assanna isi daafira rosa agura gara labbannohe?

XAPHISHSHA

Kaphu ammaꞌno rosiissanno rosinninna assitanno bunshenni Maganu suꞌma xonsiissino. Maganu kaphu ammaꞌno hunanno.

Kageeshsha Rosoottore

• Kaphu ammaꞌno rosiissino rosonna assitino bunshe hedatto woyite mayi macciishshamannohe?

• Kaphu ammaꞌno daafira Yihowara mayi macciishshamannosi?

• Maganu kaphu ammaꞌno ma assanno?

EGENNO LEXXI

Roore ammaꞌno Magano hagiirsiissannokki gede assinoha lame coye huwati.

“Baalanti Ammaꞌno Mittete? Baalanti Mannu Maganunniwa Shiqanno Gede Kaaꞌlitanno?” (Webisayitenkera fultino borro)

Yihowa wolootu ledo mitteenni magansiꞌnammosira hasiꞌrannohu mayiraati?

“Mitte Ammaꞌno Miila Ikka Hasiissanno?” (Webisayitenkera fultino borro)

Mitto qeesicha ammaꞌnosi assitannori baasa dadillisinosi. Ikkirono tini Maganu daafira halaale rosannokki gede diassitinosi.

“Mittu Qeesichi Eanno Beetekiristaane Agure Fulinohu Mayiraati?” (Baqqi Yiiyye!, Ammajje 2015)

Lowo xibbe diro ammaꞌno Maganu daafira kapho rosiissanni keeshshitino; kuni kaphi mannu Magano ninke daafira hedannokkihonna kaajjadoho yee ammananno gede assino. Konni kaphi giddo sasu hiikkoyetironna halaalu maatiro rosi.

“Magano Baxa Qarra Ikkitanno Gede Assino Kapho” (Agarooshshu Shae, Bocaasa 1, 2013)