Yihowa Mageeshshi Geeshsha Afootto?

1-2. Angeliito woꞌnaalshi leellishanno garinni, ninke mittu mittunku maa assa hasiissannonke?

ANNIKKINNA amakki Yihowa Farciꞌraasineeti? Hatto ikkiro, insa Yihowa jaalla ikkitinohura calla atino isi jaala ikkatto yaa diꞌꞌikkino. Anninkenna amanke Yihowa magansidhannore ikkiturono ikka hooggurono, ninke mittu mittunku Yihowa ledo jaalooma kalaqiꞌra hasiissannonke.

² Hanni Angeliito yinanni rodii woꞌnaalsha laꞌno. Isi lophinohu Yihowa Farciꞌraasine ikkitino maate giddooti. Ikkollana wedellichu noo yannara, Yihowa ledo dancha jaalooma kalaqiꞌrinokkita coyiꞌrino. Isi togo yino: “Yihowara soqqameemmohu maateꞌya assitannore assate geeshshira calla yeeti.” Ikkollana, Angeliito Maganu Qaale nabbawatenna nabbawinore hiincate yanna gaaꞌmino; hattono Yihowa ganye huucciꞌra hanafino. Tini kaaꞌlitinosihu hiittoonniiti? Isi togo yiino: “Baxillaanchu Anniꞌya Yihowawa shiqate, ani umiꞌya isi daafira seekke afa hasiissannoeta huwatoommo.” Angeliito woꞌnaalshi togo yine xaꞌmineemmo gede assannonke: Yihowa daafira shiimare afatenna iso seekke egennate mereero mayi badooshshi no? Yihowa afa dandiineemmohu hiittoonniiti?

3. Yihowa mito geeshsha afatenna iso seekke egennate mereero mayi badooshshi no?

³ Mittu manchi Maganu suꞌma, hattono Isi coyiꞌrinohanna assinoha mito coye afiro, hakku manchi Yihowa afino yaa dandiineemmo. Ikkollana, hakku manchi Yihowa seekke afino yaa didandiinanni. Yihowa seekke afate, isi daafiranna dhagge ikkitanno akattasi daafira yanna gaaꞌmine xiinxalla hasiissannonke. Isi mitto coye coyiꞌranno woy assanno gede kakkayisannosiri maatiro huwata dandiineemmohu hatto assinummoro callaati. Tenne huwatanke, hedonke, doodhineemmo doorshinna assootinke iso hagiirsiisannoronna teꞌee wodanchate kaaꞌlitannonke. Yihowa maa assinammora hasiꞌrannoro anfummoro, hakko coye assa hasiissannonke.

4. Qullaawu Maxaafi giddo kulloonni manni lawishsha xiinxallanke kaaꞌlitannonkehu hiittoonniiti?

⁴ Yihowara soqqama hasiꞌneemmo woyite, mitu manni arrassankeranna Kiristaanu gambooshshe haꞌra hananfeemmo woyite isinni albinni roore giwankera dandaanno. Ikkirono Yihowa addaxxinummoro, isi horonta tuge diagurannonke. Magano addaxxanke, isi ledo hegerera jaalooꞌmineemmo gede kaaꞌlitannonke. Yihowa seekkine afa dandiineemmo? Ee, dandiineemmo! Guuntete xeꞌne noonsa manni, lawishshaho, Musenna Moote Daawiti assitinori hatto assa dandiineemmota leellishanno. Insa assitinore xiinxallineemmo woyite, aante noote lame xaꞌmuwara dawaro afiꞌneemmo: Insa Yihowa affinohu hiittoonniiti? Ninke insa lawishshinni maa ronseemmo?

MUSE “ILLETE LEELLANNOKKI MAGANO” LAINO

5. Muse maa assino?

⁵ Muse Maganoho soqqama doodhino. Isi 40 dirihu heeꞌre, “Feriooni beetto beettooti” yinannisita giwe Maganu mannira yaano Israeelete halamino. (Ibi. 11:24) Muse noosita lowo silxaane facci asse agurino. Isi, Gibitsete gobbara borojje ikkite noo gaꞌresira halaminohu, hatto assasi hatte yannara maganu gede assine laꞌnanniha wolqaataamo gashshaancho Feriooni hanqissara dandiitannota afanni heeꞌreeti. Tini Musera kaajjado ammana noosita leellishshanno! Muse Yihowa addaxxino. Hatto assasi, Yihowa ledo noosi jaaloomi geedonniha ikkanno gede kaaꞌlitinosi.—Law. 3:5.

6. Muse lawishshinni maa ronseemmo?

⁶ Muse lawishshinni maa ronseemmo? Isi gede ninke baalunku doodha hasiissannonkeri no: Maganoho soqqamanna mannisi ledo gamba yaa doodhineemmo? Maganoho soqqamate yine uminke horo agura hasiissannonkeha ikkara dandaanno; qoleno Yihowa afinokki manni giwankera dandaanno. Ikkollana, iimi Annanke Yihowa addaxxinummoro, isi kaaꞌlannonke!

7-8. Muse mayi daafira rosa diagurino?

⁷ Muse Yihowa akatta daafira rosanna fajjosi assa diagurino. Lawishshaho, Muse Israeelete daga Gibitsete borojjimmanni massage fushshanno gede hajanjisi yannara, hatto assate ikkado diꞌꞌikkoommo yee Yihowara marro marro hige kulino. Maganu Muse xaꞌmora shaqqillunni dawarino; hattono kaaꞌlinosi. (Ful. 4:10-16) Hakko daafira Muse, kaajjado yoote sokka Ferioonira kula dandiino. Hakkiinni Yihowa wolqasi horoonsiꞌre Israeele gatisanna hattono Feriooninna olantosi Duumu Baarira hunanna laino.—Ful. 14:26-31; Far. 136:15.

⁸ Muse Israeele Gibitsetenni fushshihu gedensaanni, insa gunguntanni qarrissino. Ikkirono Muse, Yihowa Gibitsetenni fushshinoha konne manna cince kaaꞌlino gara laino. (Far. 78:40-43) Qoleno Muse, Yihowa isi xaꞌmiꞌrinore assate yee hedinore agure umosi heeshshi assanno Magano ikkasi leellishinota huwatino.—Ful. 32:9-14.

9. Ibiraawoota 11:27 kultanno garinni Musenna Yihowa mereero noo jaaloomi hiittooho?

⁹ Muse Israeele borojjimmatenni fushshi gedensaanni, iimi Annisi ledo albinni roore lubbora jaalooꞌmino daafira, Iso illetenni lainohu gede assine kulloonni. (Ibiraawoota 11:27 nabbawi.) Qullaawu Maxaafi Yihowanna Muse mereero noo jaaloomi mageeshsha kaajjado ikkinoro kulanni togo yaanno: “Kaaliiqi jaalu ledo hasaambannihu gede ikke alba Musewa hige hasaawanno.”—Ful. 33:11.

10. Yihowa seekke afate maa assa hasiissannonke?

¹⁰ Muse lawishshinni maa ronseemmo? Yihowa seekke afate yaa, akattasi daafira rosa calla ikkitukkinni, fajjosino assate. Yannankera Yihowa fajjo duuchunku gari ‘manni gatannonna halaale afanno gedeeti.’ (1 Xim. 2:3, 4) Maganu fajjo assa dandiineemmo doogga giddo mitte, mannaho Yihowa daafira rosiisate.

11. Wolootaho Yihowa daafira rosiisanke iso albinni roore anfeemmo gede kaaꞌlitannonkehu hiittoonniiti?

¹¹ Wolootaho Yihowa daafira rosiinseemmo woyite, ninkeno iso albinni roore egennineemmo. Yihowa gara ikkitinoti wodanu dooꞌꞌo noonsa manniwa massannonke woyite, isi mararannoha ikkinota huwanteemmo. (Yoh. 6:44; Soq. 13:48) Qullaawa Maxaafa xiinxallinseemmo manni busha rosichonsa agure haaro mannimma uddiꞌranna laꞌneemmo woyite Maganu Qaali afiꞌrino wolqa wodanchineemmo. (Qol. 3:9, 10) Qoleno, Yihowa qoqqowinkera heeꞌrannohu batinyu manni isi daafira rose gato afiꞌranno gede duucha faro fanasi cincanno Magano ikkinota buuxissannonke.—Rom. 10:13-15.

12. Fulo 33:13 kultanno garinni Muse maa huucciꞌrino? Mayira?

¹² Muse Yihowa ledo noosi jaalooma naadino. Isi, Yihowa suꞌminni maalale loosi gedensaanni nafa, Maganu daafira lede afa hasiꞌrino daafira, Yihowa ayimmasi lede leellishannosi gede ayirrinyunni xaꞌmiꞌrino. (Fulo 33:13 nabbawi.) Muse hatto yee xaꞌmiꞌri yannara 80 diro saꞌꞌannosi; ikkollana, isi iima heeꞌrannohu baxillaanchu Annisi daafira rosannori lowori noota huwatino.

13. Yihowa ledo noonke jaalooma naandeemmota leellisha dandiineemmo doogga giddo mitte maati?

¹³ Tenne xaggenni maa ronseemmo? Yihowara soqqammoommo diri ikki geeshshihano ikkiro, isi ledo noonke jaalooma mulluri gede assine laꞌꞌa dihasiissannonke. Isi ledo noonke jaalooma naandeemmota leellinsheemmo doogga giddo mitte, huuccattotenni isi ledo hasaawate.

14. Yihowa daafira seekke afate huuccatto lowo geeshsha kaaꞌlitanno yineemmohu mayiraati?

¹⁴ Jaalla mimmitu ledo hasaawansa jaaloominsa albinni roore kaajjanno gede assitanno. Hakko daafira, ganyite huuccatto assidhe Yihowawa shiqi; hattono giddokkita isira hasaapha waajjitooti. (Efe. 6:18) Kirista yinanniti Turkete heedhanno rodoo togo yitino: “Giddoꞌyata Yihowara hasaapheemmanna isi kaaꞌlinoe gara laeemma woyite, isira nooe baxilli lexxanni haꞌranno; hattono iso albinni roore addaxxeemma. Yihowa huuccattoꞌyara dawaro qolanna laꞌꞌaꞌya, iso Anniꞌyanna Jaaliꞌya gede asse laeemma gede kaaꞌlitinoe.”

MAGANU WODANITA WONSHANNO MANCHO

15. Yihowa Moote Daawiti daafira mayino?

¹⁵ Moote Daawiti ilaminohu heeshshonsa Maganu Yihowara sayisse uyitino daga mereerooti. Ikkollana isi Yihowa magansiꞌrinohu, maatesi Yihowa magansidhannore ikkitino daafira calla diꞌꞌikkino. Isi umisinni Maganu ledo jaalooma kalaqiꞌrino; Yihowano Daawiti lowo geeshsha baxanno. Yihowa umisi Daawiti daafira coyiꞌranni isi “wodaniꞌyata [wonshannoho]” yiino. (Soq. 13:22) Ikkina, Daawiti Yihowa ledo lubbora jaaloominohu hiittoonniiti?

16. Daawiti kalaqama lae Yihowa daafira maa rosino?

¹⁶ Daawiti kalaqama lae Yihowa daafira rosino. Isi wedellichu heeꞌre, annisi geꞌreewo allaalanni gobba lowo yanna sayisanno. Isi, Yihowa kalaqama hiinca hanafinohu hattee yannara ikkara dandaanno. Lawishshaho, Daawiti hashsha iima hige laꞌꞌanno woyite gordo woꞌmitino beeddahe lainoha calla ikkikkinni, beeddahe kalaqino Kalaqaanchira noosi akattano huwatino. Hakko daafira Daawiti togo yee borreessino: “Gordu Maganu ayirrinye kulanno; gordu dukkani angasi looso duduwanno.” (Far. 19:1, 2) Daawiti, mannu ooso kalaqantino gara hiincasi, Yihowata taalle nookki hayyo wodanchanno gede kaaꞌlitinosi. (Far. 139:14) Isi, Yihowa kalaqami daafira wodanchate sharramasi Yihowa albaanni bukicho ikkinota huwatanno gede assitinosi.—Far. 139:6.

17. Maganu kalaqinore hiincinummoro maa ronseemmo?

¹⁷ Daawiti lawishshinni maa ronseemmo? Kalaqamu daafira rosate hasatto heedhoꞌne. Yihowa biifise kalaqino uullara noo kalaqama hiince, hattono dhagge assidhe! Qooxeessiꞌnera noo muꞌro, saadanna manni Yihowa daafira maa rosiisannoꞌnero hiince. Hatto assitiniro, barru baala baxillaanchu Anniꞌne daafira rossinanniri heeꞌranno. (Rom. 1:20) Qoleno barru baala Yihowara nooꞌne baxilli lexxanni haꞌranno.

18. Faarso 18 kultanno garinni Daawiti maa huwatino?

¹⁸ Daawiti Yihowa kaaꞌlanni noosita huwatino. Lawishshaho, isi annisi geꞌreewo doobbiichunna dibi yinanni moyichi afiinni gatisi yannara, kaaꞌlinosihu Yihowa ikkinota wodanchino. Qoleno isi, jigeessa olamaancho Gooliyaadi qeeli yannara Yihowa kaaꞌlanni noosita huwatino. (1 Sam. 17:37) Daawiti hinaasaanchu Moote Saaooliwiinni xooqanni noo yannara, Yihowa konni diinisi anganni gatisinosita wodanchino. (Far. 18 umoonni noo hedo lai.) Daawiti naaxxaleessa mancho ikkoommero, konne qarra umiꞌyanni saoommo yee hedara dandaanno. Ikkollana, isi umosi heeshshi assannoha ikkino daafira, Yihowa kaaꞌlinosita ammanino.—Far. 138:6.

19. Daawiti lawishshinni maa ronseemmo?

¹⁹ Tennenni maa ronseemmo? Yihowa kaaꞌlannonke gede huucciꞌratenni sainore assa hasiissannonke. Isi hiitte yannara kaaꞌlinonkeronna ma garinni kaaꞌlinonkero huwata hasiissannonke. Assa dandiineemmokkiri noota ammannummoro, Yihowa wolqankera aleenni ikkinore assineemmo gede kaaꞌlannonke gara laꞌneemmo. Yihowa kaaꞌlinonke gara laꞌneemmo woyite, isi ledo noonke jaaloomi kaajjanni haꞌranno. Ayisaaki yinannihu Fijii gobbara heeꞌranno rodii tini halaale ikkitinota umisi heeshshonni laino. Isi togo yino: “Albita qaageemmo woyite, Qullaawa Maxaafa xiinxalla hanafummo yannanni kayisse techo geeshsha Yihowa duucha doogonni kaaꞌlinoeta huwatoommo. Tini, Yihowa albinni roore xawe leellannoe gede assitinoe.”

20. Daawitinna Yihowa mereero noo jaaloominni maa ronseemmo?

²⁰ Daawitira Yihowate gedee akatta noosi. Yihowa isite gedee akatta heedhannonke gede asse kalaqinonke. (Kal. 1:26) Maganu akatta daafira ronsummo kiiro, albinni roore isi faale haꞌneemmo. Daawiti iimi Annasi seekke afino daafira, wole manna Yihowa laꞌꞌanno garinni laꞌꞌa dandiino. Hanni mitto lawishsha laꞌno. Daawiti Bersaabehi ledo foorinna minaannase shiishiishi yannara Yihowa baddalino. (2 Sam. 11:1-4, 15) Ikkollana, Daawiti wolootaho maarannoha ikkino daafira, Yihowano maarinosi. Daawiti Yihowa ledo lubbora jaalooꞌmino daafira, Israeelete daga lowo geeshsha baxxannosi; Yihowano wole Israeelete mootoollara Daawiti lawishsha asse horoonsiꞌrinosi.—1 Mot. 15:11; 2 Mot. 14:1-3.

21. Efesooni Sokka 4:24 nna 5:1 kultanno garinni, Maganu faale haꞌra kaaꞌlitannonkehu hiittoonniiti?

²¹ Daawiti lawishshinni maa ronseemmo? Ninkeno Maganu faale haꞌra hasiissannonke. Hatto assanke kaaꞌlitannonke, hattono iso seekkine anfeemmo gede assitannonke. Maganu akatta heedhannonke gede assiꞌrate sharrammeemmoha ikkiro, isi ooso ikkanke leellinsheemmo.—Efesooni Sokka 4:24; 5:1 nabbawi.

YIHOWA SEEKKE AFATE SHARRAMME

22-23. Yihowa daafira ronsoommore loosunni leellishanke kaaꞌlitannonkehu hiittoonniiti?

²² Xaa geeshsha ronsummonte gede, Yihowa kalaqamunna Qaalisi widoonni ayimmasi xawisinonke. Qullaawu Maxaafi giddo Musenna Daawiti gedeehu dancha lawishsha ikkannonke manni no. Yihowa iso anfeemmo gede kuri doogganni kaaꞌlinonke. Isi daafira rosate, illenke, maccankenna wodananke qixxeessiꞌra ninke qeechaati.

²³ Yihowa daafira anfe guda didandiineemmo. (Ros. 3:11) Qaru coyi Yihowa daafira lowore afa calla ikkitukkinni anfoommore loosunni leellishate. Ronsoommo garinni heeꞌneemmohanna baxillaanchu Anninke faale haꞌrate sharrammeemmoha ikkiro, isi ninkewa shiqqi yaanno. (Yai. 4:8) Qullaawu Maxaafi, Yihowa iso hasiꞌranno manna tuge agurannokkita buuxisannonke.