Biꞌre Maganu Gashshooti hunda baalunku kalaqami keerunninna mittimmatenni heeꞌrino

Maganu Mangiste Hasiissannonkehu Mayiraati?

Mannu ooso kalaqantu waro, Maganonke Yihowa agurranna wolu mittu gashshaanchino dino. Qoleno isi gashshannohu baxillunniiti. Yihowa mannu oosora Edeni Gannate yinannita biifado qae, falakkino sagalenna hagiirsiisanno looso uyinonsa. (Kalaqama 1:28, 29; 2:8, 15) Mannu ooso Maganoho maahoyye yite galtoommero, hegerera keerunni heeꞌra dandiitannohu baino.

Addaami Heewani uyitinosiha hoolloonni haqqicho guma amade no — Addaaminna Heewani Maganu Gashshootira maahoyye yite gala gibbino

Qullaawu Maxaafi, yannate gedensaanni Sheexaane Daawuloosi yinoonnihu mittu finqilu sokkaasinchi Maganu gashshoote hettisinota kulannonke. Sheexaanu, mannu Maganu biddishshinna gashshooti nookkiha hagiirraame heeshsho heeꞌra dandaanno yiino. Hige massinanni, umi anninkenna amanke yaano Addaaminna Heewani Sheexaanu faale hadhe Maganoho finqiltino.—Kalaqama 3:1-6; Yohaannisi Ajuuja 12:9.

Addaaminna Heewani Maganoho maahoyye yite gala gibbino daafira, Gannate ikkitino qaensanna guuta ordu fayyimma afidhe hegerera heeꞌrate hexxonsa huꞌnitino. (Kalaqama 3:17-19) Insa assooti sirchinsa heeshsho nafa seekkannokki gede assino. Qullaawu Maxaafi Addaami cubbo loosino daafira, ‘cubbu tenne alame einotanna reyo cubbu widoonni higge dagginota’ kulanno. (Roomu Sokka 5:12) Isi loosino cubbi wolereno daafino; Qullaawu Maxaafi tenne daafira kulanni “mittu woloota kade gashshanno” yaanno. (Rosiisaancho 8:9) Wole yaattonni, mannu manna gashshannoha ikkiro, qarru kalaqamasi digattanno.

MANNU GASHSHOOTI HANAFINO GARA

Naamiruudi fenjeejje uurre no. Isira badheenni mannu gimbe minanni no. — Naamiruudi Yihowara finqilino

Qullaawu Maxaafi giddo gashshaancho ikkinota kulloonnihu umi manchi Naamiruudiiti. Naamiruudi Yihowa gashshootira finqilino. Isi warinni kayise wolqaataamu manni silxaane garimale horoonsiꞌre woloota gadadisanni keeshshino. Mitu 3,000 diri albaanni Moote Salamooni togo yee borreessino: “Kalqete aana assinanni beebba afoommo; gadadantinori sheshifachishannonsaha hoogge wiꞌlitanna laoommo. Roorre baala gadadissannonsarita ikkitinohura kaaꞌlannonsaha diafidhino.”—Rosiisaancho 4:1.

Yannankerano coyi hattoontilla. Buusantino Mangistubba 2009 qixxeessitino borro, “alamete aana noo qarrira koru, baincho gashshoote ikkasi albinni roore xabbe leeltanni no” yitanno.

MAGANU SAMMI YEE DILAꞌꞌANNO!

Alamenkera xaahunni woyyino gashshootinna danchu gashshaanchi hasiisanno. Qoleno Kalaqaanchinke hatto assate qaale eino!

Fotta: Mannu gashshooti abbino qarra 1. Mitte Iisiyaho heedhanno mancho qaaqqose hanqafidhe doogaanchote ofolte no. 2. Mittu jawu manchi xiwame hospitaalete goxe no. 3. Olamaasine massaarra tokkossanni no. 4. Hanqino manni gashshooteho finqilanni no. 5. Mitte manchonna qaaqqose gobba heeˈre hincilaallote saanqinsa hiiqqaminota laˈˈanni no. 6. Korreentete shibba guunjote wiliile woˈmitino katama. — Beya afiꞌrinoho yinannihu mannu gashshooti nafa qarra huna didandiino

Maganu mannu gashshoote baala riqiwanno gashshoote woy Mangiste xintino; tini Mangiste ‘hegerera kaajjite heedhanno.’ (Daanieeli 2:44) Miliyoonetenni kiirranni manni huucciꞌranni keeshshinohu tenne Mangiste daafiraati. (Maatewoosi 6:9, 10) Ikkollana, tenne Mangiste gashshaanchi Magano diꞌꞌikkino. Hatteentenni, konni albaanni uullate aana mancho ikke heeꞌrinoha Gashshaancho asse shoomino. Ikkina Maganu shoomino gashshaanchi ayeti?