Maganu Mangiste Moote Ayeti?

• Maganu doorinoho. “Mooteꞌyano moohisiꞌroommo. . . . Daga baalanta amadokki, baatto baalanta gashshootekki asse eemmohe.”—Faarso 2:6, 8.

• Moote Daawiti gashshoote ragiꞌranno. “Qaaqqu ilaminonke! Labbaa beettono uyinoonninke! . . . Wolqasira gawalo dino; gashshootisira hegere keeri woꞌmino. Isino Daawiti mootimma amade, taashshe halaalunni gashshanno.”—Isayaasi 9:6, 7.

• Beetelihemete ilamanno. “[Ati] Beeteliheme! . . . Israeelete gashshaanchi atewiinni fulanno. . . . Lowimmasi gobbate qacce geeshsha egennantanno.”—Mikiyaasi 5:2, 4.

• Minshannisi, hattono shinannisi. “Mannu mishinosihonna giwinosiho; . . . isi qasaminohu qarrinke daafiraati; ganaminohu ninke assinoommo sirxiraati.”—Isayaasi 53:3, 5.

• Reyotenni kae ayirrinye adhanno. “Lubboꞌya jeennaateho diaguroottose; qullaawakki hoqara worte diaguroottosi. Qiniitekkiinni heeꞌra hegere hagiirre uyitannoe.”—Faarso 16:9, 11.

Yesuusi Kiristoosi Guuta Gashshaanchooti

Mannu ooso gashsha hanaffu yannanni kayise, guuta Gashshaancho ikkinota leellishinohu Yesuusi Kiristoosi callaati. Mittu sokkaasinchi Yesuusi ama Maariyaamira “Mootichu Maganu, annisi Daawitiha ayirrinyu barcima aannosi. . . . Gashshootisira gawalo dino” yiinose.—Luqaasi 1:31-33.

Yesuusi uullate aana noo yannara moote ikke digashshino. Konni kaꞌa kayinni Maganu Mangiste Moote ikke iima heeꞌre mannu ooso gashshanno. Yesuusi baalunkunni roorino gashshaanchooti yineemmo gede assannonkeri maati? Hanni isi uullate aana heeꞌre assinoha mito coye laꞌno.

• Yesuusi manna mararanno. Yesuusi ajano akkalano, meyatano labbaahano buxichono dureessano mallaadikkinni baalanka manna kaaꞌlino. (Maatewoosi 9:36; Maarqoosi 10:16) Mitte hige dhiigu amadinosi manchi “Baxittoero hursattoera dandaatto” yee huucciꞌrita, Yesuusi marare hursinosi.—Maarqoosi 1:40-42.

• Yesuusi Magano hagiirsiisa dandiineemmo gara rosiisinonke. Isi, “Mittu manchi lamu Mootichira soqqama didandaanno” yiino. Hattono wolootu assitankera hasiꞌneemmore ninke mannaho assa hasiissannonketa coyiꞌrino. Qoleno Maganu assineemmore calla ikkikkinni hedonkenna macciishshamannonkere laꞌꞌannota coyiꞌrino. Hakko daafira Magano hagiirsiisate, hendeemmore qorophine heda hasiissannonke. (Maatewoosi 5:28; 6:24; 7:12) Hakkiinnino sae, Yesuusi addu hagiirre afiꞌrate Maganu maa assinammora hasiꞌrannoro afanna anfoommore loosu aana hosiisa hasiissannonketa duucha hige coyiꞌrino.—Luqaasi 11:28.

• Yesuusi woloota baxate yaa mayyaatero rosiisinonke. Yesuusi rosiisinorino ikko assinori macciishshannosi manna baasa hagiirsiisino. Qullaawu Maxaafi togo yaanno: “Macciishshitinori rosiisino roso dhaggeeffattu. . . . [Korkaatuno isi] Gashshootu mootoolla gede ikke rosiisinonsa.” (Maatewoosi 7:28, 29) Yesuusi “Baarigaaraꞌne baxxe” yee rosiisinonsa. Isi shitinosirira nafa “Annaꞌya! Diaffe assitanni noona saonsa aguri” yee huuccino.—Maatewoosi 5:44; Luqaasi 23:34.

Yesuusi guuta gashshaanchooti; qoleno isi shaqqadohonna shooshaqaho. Ikkina isi gashsha hanafannohu mamarooti?