Ati Tenne Afootto?

Yesuusi waro mannu giwire baatannohu maa maahooti?

HUNDINNI kayise Israeelete daga halaalu magansiꞌrara kaaꞌlate fushsho fushshitanno. Yesuusi yannara kayi addi addi giwiri lexxe Yihudu mannira duha ikkinonsa.

Maganu mini giddo loonsanni looso kaaꞌlinanni doogga giddo mitte, diraakima yinannita lame saante fushshineeti; lemoo dironna hakkuyi ale ikkannonsahu Yihudu manni baalu tenne saante fushshanno. Umi xibbi diro konne giwire Heeroodisi mininohu qullaawu mini giddo loonsanni loosiranna shiqinshanni kakkalora horoonsiꞌnoonni. Mitu Yihudu mannooti Yesuusi konne giwire baatate daafira mayyaannoro afate Pheexiroosi xaꞌmitino; Yesuusi konne giwire baata dihasiissanno diyiino. Isinni konne giwire baatate Pheexiroosi saante afiꞌranno gara kulinosi.—Mat. 17:24-27.

Hunda Maganu manni asaraateno aanno; asaraateho yaa laalchinsa woy loosiꞌre afiꞌranno woxi giddonni tonnunni mittoho. (Lew. 27:30-32; Kir. 18:26-28) Ammaꞌnote murrooti mannu afiꞌrino coyi baalunkunni asaraate aanno gede giddeessitanno; wole agurina, “afuduudunniha, sunkurtunnihanna qimamenniha tonnunni mitto” aanno gede giddeessitanno. Yesuusi asaraate fushsha soꞌrote yiinokkiha ikkirono, borreessaanonna Farisootu asaraate fushshate daafira kulanno seera wirte manna waaddino daafira insa boroorino.—Mat. 23:23.

Qoleno hatte yannara gashshe noohu Roomu gashshooti mannu addi addi giwire baatanno gede assino. Konni giwiri giddo mittu uullate giwireeti; mannu konne giwire baatate woxe woy laalcho aara dandaanno. Baattonsa laashshitinori giddonni 20 kayise 25 anga geeshsha ikkannoha aanno yine hendanni. Qoleno mittu mittunku Yihudu manchi baatanno giwiri no. Farisootu Yesuusa xaꞌmitinohu konni giwiri daafiraati. Isi giwire baatate daafira hiittoo lao heedhannonke gede assiꞌra hasiissannonkero coyiꞌranni “Qeesaariha Qeesaarira, Maganunniha Maganoho uuyye!” yiino.—Mat. 22:15-22.

Qoleno gobbayidinni eessinanni uduunniranna wolewa haaꞌne haaꞌnanni uduunnira qaranxanni qaraxi no. Konne qaraxo qaranxannihu, malkate, buusu noowa, doogga xaaddannowa, woy katammanna dikko eꞌnanniwaati.

Roomu gashshooti giddo heeꞌranno mannira baatanno giwiri lowo duha ikkinonsa. Roomunnihu xaggete borreessaanchi Taasitesi coyiꞌrino garinni, Yesuusi uullate aana noo yannara Gashshaanchu Xiberiyoosi waro “Sooriyunna Yihudu manni duhu batiꞌrinonsa daafira, giwire ajinshanninsa gede huucciꞌrino.”

Konne giwire gamba assinanni garino, giwire baata roore duha ikkitanno gede assino. Giwire gamba assanno manna doorrannihu caratunniiti. Carata qeeltinori giwire gamba assanno manna qaxadhitanno; insano qaxadhitu mannino lowo woxe afiꞌra hasiꞌranno daafira, mannaho giwire ledde baatisiissanno. Zakkiwoosino qaraxo gamba assitannore qaxadhinoha ikkikki digatino. (Luq. 19:1, 2) Mannu tennera lowo geya giiramanno; hattono qaraxo gamba assitannore dibaxanno.