Kalaqama Horoonsidhine Oosoꞌnera Yihowa Daafira Rosiisse

1. Annuwunna amuuwu oosonsara maa halchitanno?

ANNUWANNA AMUUWA, oosoꞌne Yihowa affannonna baxxanno gede kaaꞌla hasidhinannita anfoommo. Kayinni Magano laꞌꞌa didandiinanni. Ikkina qaaqquulliꞌnera isi xawe leellannonsa gedenna isiwa shiqqanno gede kaaꞌla dandiitinannihu hiittoonniiti?—Yai. 4:8.

2. Annuwunna amuuwu oosonsara Yihowa akatta daafira rosiisa dandiitannohu hiittoonniiti?

² Ooso Yihowawa shiqqanno gede kaaꞌla dandiinanniti qara doogo insara Qullaawa Maxaafa xiinxallisate. (2 Xim. 3:14-17) Ikkirono Qullaawu Maxaafi ooso Yihowa daafira rosa dandiitannota wole doogono kulanno. Lawishshu maxaafi giddo mittu anni beettisi kalaqamu aana leeltannota Yihowa akatta hawannokki gede kulinosi. (Law. 3:19-21) Annuwunna amuuwu kalaqama horoonsidhe oosonsa Yihowa ayimma affanno gede kaaꞌla dandiitannota mite doogga laꞌneemmo

KALAQAMA HOROONSIDHINE OOSOꞌNE ROSIISA DANDIITINANNIHU HIITTOONNIITI?

3. Annuwunna amuuwu oosonsa kaaꞌla dandiitannohu hiittoonniiti?

³ Qullaawu Maxaafi, ‘Alame kalaqantuhunni kayise mannaho leellannokkihu Maganu dani xawe leellannota’ kulanno. (Rom. 1:20) Annuwanna amuuwa, gobba fultine oosoꞌne ledo yanna sayisa baxxinanniha ikkara dandaanno. Togoo yanna horoonsidhine oosoꞌne Yihowa kalaqino ‘kalaqaminna’ dhagge ikkitanno akattasi mereero noo xaadooshshe huwattanno gede kaaꞌlensa. Hanni tenne assate annuwunna amuuwu Yesuusi lawishsha harunsa dandiitannohu hiittoonniitiro laꞌno.

4. Yesuusi rosaanosi rosiisate kalaqama horoonsiꞌrinohu hiittoonniiti? (Luqaasi 12:24, 27-30)

⁴ Yesuusi rosiisate kalaqama horoonsiꞌrino gara wodanche. Mitte yannara isi rosaanosi haraqeeyyenna xawu daraaro laꞌanno gede kulinonsa. (Luqaasi 12:24, 27-30 nabbawi.) Yesuusi hasiꞌroommero wole saada woy muꞌro qummi assa dandaanno; ikkirono isi rosaanosi seekkite affinore lawishshaho, ceanna daraaro lawishsha asse kulino. Rosaanosi haraqeeyye iima buubbanna hattono daraaro daraartanna laꞌinoha ikkara dandaanno. Yesuusi angasi haraqeeyyenniwanna daraaronniwa qole coyiꞌranna heda dandaatto. Konne lawishsha kulihu gedensaanni isi maa assiyya? Isi rosaanosira iimi Anninsa shaqqillinna danchumma daafira mitto kaajja roso rosiisinonsa: Yihowa haraqeeyyetenna xawu daraarora assinte gede ammanantino soqqamaanosira ittanno sagale aannonsa hattono uddisiisannonsa.

5. Annuwunna amuuwu oosonsara Yihowa daafira rosiisate kalaqama horoonsiꞌra dandiitannohu hiittoonniiti?

⁵ Annuwanna amuuwa, oosoꞌne rosiissinanni woyite Yesuusi lawishsha harunsitinanni? Oosoꞌnera kiꞌne baxxinanni kalaqami daafira lawishshaho, saadatenna muꞌrote daafira kultinansara dandiitinanni. Togo assitinanni woyite kuni kalaqami Yihowa daafira maa rosiisannonsaro kullensa. Hakkiinni qaaqqoꞌne isi baxanno muro woy saada daafira xaꞌma dandiitinanni. Isi baxanno kalaqama horoonsidhine rosiissinisiro qaaqqiꞌne Yihowa akatta daafira kultinannisi woyite seekke macciishshara dandaanno.

6. Kiristooferi ama lawishshinni maa ronseemmo?

⁶ Annuwunna amuuwu saada woy muꞌro Yihowa daafira maa rosiissannoro oosonsara kulate qixxaabbanni lowo yanna guda hasiissannonsa? Dihasiissannonsa. Yesuusi haraqeeyye ma garinni sagaꞌlitannoro woy xawu daraaro hiittoonni lophitannoro kulanni lowore dicoyiꞌrino. Qaaqqiꞌne Yihowa kalaqino kalaqami daafira mitto mittonka coye afa hasiꞌrannoha ikkiro nafa, mito woyite kayinni qaaqqiꞌne kultinara hasidhinoonnire huwatanno gede harancho hedo kula woy xaꞌmo xaꞌma calla ikkitanno. Kiristooferi yinanni rodii qaaqqu noo warita qaage togo yiino: “Amanke qooxeessinkera noo kalaqama banxeemmo gede kaaꞌlate lowo coye dicoyidhanno. Lawishshaho, ilaalu noowa marrummoro togo yitannonke: ‘Kuni ilaali mageeshshihoronna biifino gara laꞌe! Yihowa didhagge ikkanno Maganooti?’ Woy wuqiyanoose noowa marrummoro togo yitannonke: ‘Dambalu mageeshshi wolqa afiꞌrinoro laꞌe! Yihowa diwolqaataamo Maganooti?’” Kiristooferi, “Tini kaajjanna harancho hedo lowo geeshsha kaaꞌlitinonke” yiino.

7. Qaaqqiꞌne kalaqamu daafira hiincanno gede qajeelsa dandiitinannihu hiittoonniiti?

⁷ Qaaqqiꞌne lophanni haꞌranno woyite kalaqamu daafira seekke hedanno gedenna Yihowa daafira rosanno gede qajeelsa dandiitinanni. Yihowa kalaqinoha mitto kalaqama kultine qaaqqoꞌne togo yitine xaꞌma dandiitinanni: “Kuni kalaqami Yihowa daafira maa rosiisannohe?” Qaaqqiꞌne kulannoꞌnere macciishshitine dhagge assidhinara dandiitinanni.—Mat. 21:16.

OOSOꞌNE ROSIISATE KALAQAMA HOROONSIꞌRA DANDIITINANNIHU MAMOOTEETI?

8. Israeele ikkitino annuwinna amuuwi ‘doogo hadhanno’ woyite maa assate faro afidhanno?

⁸ Israeele ikkitino annuwinna amuuwi ‘doogo hadhanno’ woyite oosonsara Yihowa hajajo rosiissanno gede kulloonninsa. (Mar. 11:19) Tini doogo Israeelete gobbara gaxarete qooxeessi geeshsha iillitannote. Insa hadhanno woyite doogo batinye saada, ceanna daraaro laꞌꞌa dandiitanno. Maate mitteenni hadhanno woyite annuwunna amuuwu oosonsara Yihowa kalaqinori daafira rosiisate faro afidhanno. Annuwanna amuuwa, kiꞌneno togoo faro horoonsidhine oosoꞌne rosiisa dandiitinanni. Hanni mitu annuwinna amuuwi tenne assino gara laꞌno.

9. Puniitanna Kaatiya woꞌnaalshinni maa rosootto?

⁹ Hindete gobbara jawu katami giddo heedhannoti Puniita yinanni ama togo yitino: “Gaxarete noo maatenke laꞌnammora haꞌneemmo woyite tenne faro horoonsiꞌne oosonkera dhagge ikkannohu Yihowa kalaqino coyi daafira rosiinseemmonsa. Oosoꞌya katamaho mannu batiꞌrinowiinni hadhanno woyite kalaqama roore dhagge assidhanno yee hedeemma.” Annuwanna amuuwa, oosoꞌne biifado bayicho kiꞌne ledo sayissino yanna horo dihabbanno. Moldoovaho heedhannoti Kaatiya yinanni rodoo togo yitino: “Roorenkanni anje heeꞌre gaxarete anniꞌyanna amaꞌya ledo sayisoomma yanna horo dihaweemma. Insa anjeꞌyanni kayise Yihowa kalaqinore taxxi yee hedeemma gedenna kalaqama lae isi daafira roseemma gede kaaꞌlitinoe daafira lowo geeshsha galaxxeemmansa.”

10. Annuwunna amuuwu heedhanno kataminni haꞌra dandiitannokkiha ikkiro maa assa dandiitanno? (“Annuwanna Amuuwa Kaaꞌlitanno Hedo” yitanno saaxine lai.)

¹⁰ Gaxare haꞌra dandiitinannikkihalla ikki? Hindete heeꞌrannohu Amooli togo yiino: “Heeꞌreemmo qooxeessira annuwunna amuuwu looso seeda saate loosa hasiissannonsa; qoleno gaxare haꞌrate lowo woxi hasiisanno. Ikkirono shiimaadda paarke haꞌne woy barandaho uurrine Yihowa kalaqinore laꞌꞌanna akattasi daafira hasaawa dandiineemmo.” Seekkitine heddiniro miniꞌne qooxeessira oosoꞌnera kula dandiitinannihu batinyu kalaqami noota huwata dandiitinanni. (Far. 104:24) Miniꞌne qooxeessira cea, shiimaadda lubbuwa, muꞌro woy woluri nooha ikkara dandaanno. Jarmanete heedhannoti Kariina togo yitino: “Amaꞌya daraaro lowo geeshsha baxxanno; hakko daafira qaaqqo noomma waro lekkatenni milli yinummo kiiro biifado daraaro laꞌuro kultannoe.” Annuwanna amuuwa, oosoꞌne rosiisate Yihowa dirijjite qixxeessitinota kalaqamu daafira kultannota batinye viidiyonna borruwano horoonsiꞌra dandiitinanni. Addanko heedhinoonniwi ikkiwano ikkiro, oosoꞌne Maganu kalaqinore seekkite laꞌanno gede kaaꞌla dandiitinanni. Hanni xa oosoꞌnera kula dandiitinannita mite Yihowa akatta laꞌno.

“MANNAHO LEELLANNOKKIHU MAGANU DANI XAWE LEELLANNO”

11. Annuwunna amuuwu oosonsa Yihowa baxannonsata huwattanno gede kaaꞌla dandiitannohu hiittoonniiti?

¹¹ Oosoꞌne Yihowa baxannonsata huwattanno gede kaaꞌlate batinye saada oosonsa shaqqillunni towaaxxitanno gara kultinansara dandiitinanni. (Mat. 23:37) Qoleno hagiidhineemmo gede assannonkeha addi addi kalaqamano kultinansara dandiitinanni. Aleenni kulliti Kariina togo yitino: “Amaꞌya ledo lekkatenni milli yineemmo woyite mitte mittenti daraaro lowo geeshsha baxxitinota ikkitinotanna biinfillinsa Yihowa baxille leellishannohu hiittoonniitiro seekke hedeemma gede jawaachishshannoe. Xaano lowo diri gedensaanni daraaro addi addita ikkase, Yihowa kalaqino gara hattono kuulansa seekke laeemma. Xaano ikkiro tini daraaro Yihowa mageeshshi geeshsha baxannonkero qaageemma gede assitannoe.”

12. Annuwunna amuuwu oosonsa Yihowa hayyo huwattanno gede kaaꞌla dandiitannohu hiittoonniiti? (Faarso 139:14) (Misileno lai.)

¹² Oosoꞌne Maganu hayyo huwattanno gede kaaꞌlensa. Yihowa ninkenni roore lowo geeshsha hayyichaho. (Rom. 11:33) Lawishshaho wayi gomichoho soorramanno garanna kuni gomichi waa bayichunni bayicho haaꞌre haꞌranno gara oosoꞌnera kula dandiitinanni. (Iyo. 38:36, 37) Qoleno dhagge ikkanno garinni kalaqaminohu mannu bisi daafirano kultinansara dandiitinanni. (Faarso 139:14 nabbawi.) Hanni Vilaadimiiri yinannihu mittu anni tenne assino gara laꞌno. Isi togo yiino: “Mitto barra qaaqqinke biskilliitete aaninni uwe madiꞌrino. Shiimu barri gedensaanni mada hurtinosi. Aninna minaamaꞌya Yihowa bisonke kalaqinohu isi isonoo dhaawa dandaanno gede asse ikkinota kullummosi. Mannu loosannohu aye coyino hatto assa dandaannokkita kulloommosi. Lawishshaho makeenu gawajjamihu gedensaanni isonoo dhaawa didandaanno. Tini qaaqqinke Yihowa hayyo huwatanno gede kaaꞌlitinosi.”

13. Annuwunna amuuwu oosonsa Maganu wolqa wodanchitanno gede kaaꞌla dandiitannohu hiittoonniiti? (Isayaasi 40:26)

¹³ Yihowa iima hinge gordo laꞌneemmo gedenna dhagge ikkitanno wolqasinna kalqe alame kalaqino gara hendeemmo gede koyisinonke. (Isayaasi 40:26 nabbawi.) Oosoꞌne iima higge gordo laꞌanno gedenna laꞌinore hiincitanno gede jawaachishshensa. Hanni Tayiwaanete heedhannoti Tingitingi yinanni rodoo anje noo warita qaagge coyidhinore laꞌno. Ise togo yitino: “Mitto barra amaꞌya dunkaana qasiꞌne gobba gallanniwa haadhe hadhinoe. Hakkiicho katamu caabbichi nookki daafira gordoho noota batinye beeddahe laꞌꞌa dandiinoommo. Hatte yannara, ledoꞌya rossanno ooso waaddinoe daafira Yihowara ammaname soqqameemmaronna teꞌee huluullame noomma. Amaꞌya Yihowa tenne baala beeddahe kalaqate horoonsiꞌrino wolqa hedeemma gedenna isi tenne wolqasinni iillannoe qarra baala dandee saeemma gede kaaꞌlannoeta qaageemma gede jawaachishshinoe. Hakka woyite, kalaqama seekke laummahu gedensaanni Yihowa albinni roore afatenna isira soqqamate murciꞌroomma.”

14. Annuwunna amuuwu kalaqama horoonsidhe, oosonsa Yihowa hagiirraamo Magano ikkinota affanno gede kaaꞌla dandiitannohu hiittoonniiti?

¹⁴ Yihowa kalaqinori isi hagiirraamo ikkinotanna ninkeno hagiidhinammora hasiꞌrannota leellishanno. Sayinsete fullahaano, roore saada lawishshaho ceanna qulxuꞌme godoꞌla dandiitannota huwattino. (Iyo. 40:20) Oosoꞌne saada godoꞌlitanna laꞌe osoꞌlite egentino? Basu qaaqquulli kaase shorranna woy woshshu buttuꞌli mimmitu ledo godoꞌlanna laꞌe egentinoha ikkara dandaanno. Aantanno yannara oosoꞌne saada godoꞌlitanna laꞌe osoꞌlitanno woyite soqqammeemmo Magani Yihowa hagiirraamo ikkinota qaagganno gede kaaꞌlensa.—1 Xim. 1:11.

MAATE MITTEENNI YIHOWA KALAQINORINNI HAGIIDHE

15. Annuwunna amuuwu oosonsa giddonsata fushshite kuꞌlitanno gede assate kaaꞌlannonsari maati? (Lawishsha 20:5) (Misileno lai.)

¹⁵ Mito woyite annuwahonna amuuwaho oosonsa iillanni noonsa qarra kultannonsa gede assa qarra ikkitannonsa. Kiꞌnerano tini qarra ikkitinoꞌneha ikkiro, oosoꞌne giddonsata fushshite kultannoꞌne gede assa hasiissannoꞌneha ikkara dandaanno. (Lawishsha 20:5 nabbawi.) Mitu annuwinna amuuwi oosonsa ledo kalaqama laꞌanni hagiidhitanno yannara oosonsa giddonsata fushshite kultannonsa gede assa shota ikkitinonsa. Mayira? Mittu korkaati, togoo yannara hakkeeshshi geeshsha hedonsa bebbeehantanno gede assanno coyi diheeꞌranno. Tayiwaanete heeꞌrannohu Masahiko yinannihu mittu anni wolereno qummi assino; isi togo yiino: “Oosonke ledo ilaala gooddiꞌneemmo woyite woy baaru qaccera milli yineemmo woyite oosonke roore wodanaaꞌmitanno. Togoo woyite giddonsata fushshite kuꞌlitanno gede assa shota ikkitannonke.” Aleenni kulliti Kaatiya togo yitino: “Rosu mininni higummaro duucha woyite amaꞌya biifado paarke haadhe hadhannoe. Togoo woyite, rosu mine tuncu yiinoere woy yaachishinoere kuꞌla shota ikkitannoe.”

16. Maate Yihowa kalaqinore laꞌanni boohaaranna hagiidha dandiitannohu hiittoonniiti?

¹⁶ Yihowa kalaqinori maate hagiidhitanni mitteenni yanna sayissanno gedeno kaaꞌlannonsa; tini qolte mimmito albinni roore baxxanno gede assitannonsa. Qullaawu Maxaafi ‘hagiidhatenna sirbate yanna noota’ kulanno. (Ros. 3:1, 4) Yihowa banxeemmo coye assineemmoha biifado addi addi bayicho kalaqino. Batinye maate boohaarate qixxeessinoonni base, gaxarete qooxeessa, ilaalla woy baaru qacce hadhe boohaara baxxanno. Mitu qaaqquulli paarkete giddo dodamanna godoꞌla, addi addi saada laꞌꞌa, baaraho, lagaho woy hayiqete waa daaha baxxanno. Boohaarreemmo gede assannohu Yihowa kalaqinohu batinyu coyi noonke!

17. Annuwunna amuuwu oosonsa Yihowa kalaqinorinni hagiidhitanno gede kaaꞌla hasiissannonsahu mayiraati?

¹⁷ Maganu abbannote haaro alamera annuwunna amuuwu hattono oosonsa Yihowa kalaqinorinni konni albaanni hagiidhite egentinokki garinni hagiidhitanno. Hatte yannara saada waajjineemmo gede assannonkeri diheeꞌranno; saadano ninke diwaajjitanno. (Isa. 11:6-9) Yihowa kalaqinorinni hegerera hagiidhineemmo. (Far. 22:26) Ikkirono annuwanna amuuwa, oosoꞌne Yihowa kalaqinorinni hagiidhitanno gede assate hatte yanna geeshsha agara dihasiissannoꞌne. Kalaqama horoonsidhine oosoꞌnera Yihowa daafira rosiissinanniha ikkiro, insano Moote Daawiti yiinori ledo sumuu yitannoti dihuluullissannote. Daawiti, “Mooticha! . . . loosatto looso loosara dandaannohu dino” yiino.—Far. 86:8.