Addu Ammaꞌno Afiꞌra Dandeemmohu Hiittoonniiti?
Qullaawu Maxaafi mayyaanno?
Qullaawu Maxaafi, addu ammaꞌno haꞌrunsanno manninna kaphu ammaꞌno haꞌrunsanno manni mereero noo badooshshe anfeemmo gara kulanni, “Insa guminsanni baddine affinanni. Mannu utu aaninni woyinete laalo woy kokkoꞌlu aaninni balasete laalo xinqiꞌrannoni?” yaanno. (Maatewoosi 7:16) Woyinete haqqichonna kokkoꞌle gumansa laꞌe bada dandaattonte gede, addu ammaꞌnono kaphunnitewiinni badattohu gumisenniiti; insano:
Addu ammaꞌno Qullaawu Maxaafi aana xintamino halaale ikkinnina mannu egenno dirosiissanno. (Yohaannisi 4:24; 17:17) Konni halaali giddo gamu, lubbo reyitannota hattono baattote aana gannatete hegerera heeꞌnanni hexxo noota kulanno halaaleeti. (Faarso 37:29; Isayaasi 35:5, 6; Hiziqeeli 18:4) Qoleno addu ammaꞌno ammaꞌnote kapho xawo fushshate badhera dihigganno.—Maatewoosi 15:9; 23:27, 28.
Addu ammaꞌno mannu Magano afanno gede kaaꞌlitanno; lawishshaho suꞌmisi Yihowa ikkinota egensiissanno. (Faarso 83:18; Isayaasi 42:8; Yohaannisi 17:3, 6) Magano afa dandiinannikkihu gede woy isi gamba yinannikkiha ikkinohu gede assite dirosiissanno; hatteentenni, isi jaallasi ikkinammora hasiꞌrannota rosiissanno.—Yaaqoobi 4:8.
Addu ammaꞌno Maganu qixxeessinoti gatote doogo Yesuusi Kiristoosi ikkinota rosiissanno. (Soqqamaasinete Looso 4:10, 12) Addu ammaꞌno haꞌrunsitannori Yesuusi hajajo ayirrissanno; hattono faalesi haꞌrate sharrantanno.—Yohaannisi 13:15; 15:14.
Addu ammaꞌno mannu ooso hexxo Maganu Gashshoote calla ikkinota luphi assite kultanno. Ise haꞌrunsitannori konni Gashshooti daafira diinaggaabbe farcidhanno.—Maatewoosi 10:7; 24:14.
Addu ammaꞌno mannu anga qollara agadhikkinni woloota godowinta baxanno gede jawaachishshanno. (Yohaannisi 13:35) Qoleno duuchante gaꞌre wido ikkino manna ayirrinsanni gede rosiissanno; hattono baalunku sirchi, budinna qaali wido ikkino manna hanqaffe mitto assitanno. (Soqqamaasinete Looso 10:34, 35) Ise haꞌrunsanno manni mimmito baxanno daafira, olaho digaadanno.—Mikiyaasi 4:3; 1 Yohaannisi 3:11, 12.
Addu ammaꞌno giddo woxe baantanni qeesooti dino; qoleno ise giddo, shoomantino soqqamaano quwa sayinse ayirrinse baxxinohu suusu suꞌminni diwoshshinanni.—Maatewoosi 23:8-12; 1 Pheexiroosi 5:2, 3.
Addu ammaꞌno poletiku coyira horonta anga diwodhitanno. (Yohaannisi 17:16; 18:36) Ikkollana, addu ammaꞌno haꞌrunsitannori heedhanno gobba gashshoote ayirrissanno hattono hajajantanno; korkaatuno Qullaawu Maxaafi togo yee hajajanno: “Qeesaariha Qeesaarira [gashshooteho], Maganunniha Maganoho uuyye.”—Maarqoosi 12:17; Rooma 13:1, 2.
Addu ammaꞌno heeꞌneemmo heeshshonni leeltannote ikkinnina mulla woga wonsha calla diꞌꞌikkitino. Ise haꞌrunsitannori heeshshonsa woꞌmatenni ayirrado Qullaawu Maxaafi seera agadhite heedhanno. (Efessooni 5:3-5; 1 Yohaannisi 3:18) Kay dadillaamma ikkite millo miqqo hoogge heedhannoha ikkikkinni, ‘hagiirraamo Magano’ magansiꞌransanni hagiirraammaho.—1 Ximootewoosi 1:11.
Addu ammaꞌno eꞌannorira kiironsa shiimate. (Maatewoosi 7:13, 14) Addu ammaꞌno haꞌrunsitannore duucha woyite Maganu fajjora yiteenna mannu woffi assannonsa, qacifatannonsa hattono xiiwannonsa.—Maatewoosi 5:10-12.
Mitte ammaꞌno addaho woy kaphoho yineemmori ninke diꞌꞌikkinoommo
Mitte ammaꞌno ninke baxissinonke daafira calla addaho yaa qarra afidhino. Qullaawu Maxaafi, mannu “halchonsa ledo sumuu yaanno garinni maccansa kurkurtanno gede mulensa rosiisaano gamba” assiꞌranno yanna daggannota balaxe masaalino. (2 Ximootewoosi 4:3) Wole widoonni kayinni, Qullaawu Maxaafi rooru manni baxannokkita ikkiturono, “Maganinkenna Anninke albaanni xuru [nookkitanna] battaabbinokki ammaꞌno” haꞌrunsineemmo gede jawaachishannonke.—Yaaqoobi 1:27, lekkaalliidi qaagiishsha; Yohaannisi 15:18, 19.