Ty Taratasy Voalohany Nisoratin’i Jaona
1 Manoratsy aminareo mikasiky an’ny safàn’ny fiaina iny zahay, azy fa nisy baka am-boalohany any iny. Fa nirenay noho nihitan’ny masonay raha zay, sady fa nihenteanay soa noho nitsapànay tana. 2 —Fa naseho moa ty fiaina, sady fa nihitanay ka torinay noho volaninay aminareo ty fiaina mandrakizay. Baka amy Baba ty fiaina mandrakizay, sady fa naseho anay.— 3 Safàn’ny fiaina fa nihitanay noho nirenay iny ro volaninay aminareo koa, soa hiharo raiky* aminay koa nareo, satria miharo raiky amy Baba noho Jesosy Kristy Anany tsika. 4 Manoratsy aminareo mikasiky an’ny raha zay zany zahay, amy zay ho falifaly biby tsika.
5 Ho zao ty hafatsy nirenay taminy ka nivolaninay aminareo: Ndranahary le hazavà, ka tsy misy raha maìky mihintsy ty aminy ao.* 6 Laha mivola tsika hoe: “Miharo raiky aminy tsika”, kanefa mbo mandeha amy maìky ao avao, le mavandy tsika sady tsy manoriky ty fahamarina amy ty fiainantsika. 7 Fa laha mandeha amy mazava ao tsika, satria ie amy mazava ao, le tena miharo raiky tsika iaby. Le ty lion’i Jesosy Anany ro manadio antsika ho afaky amy fahotà iabiaby.
8 Laha mivola tsika hoe: “Tsy mpanota tsika”, le mamita-bata sady tsy am-pontsika ao ty fahamarina. 9 Fe laha tsika mieky ty fahotantsika, le tsy mivaliky amy ty safàny Ndranahary sady marina, ka hanenga ty fahotantsika noho hanadio antsika ho afaky amy raha raty iaby fataon’olo. 10 Laha mivola tsika hoe: “Mbo tsy nanota tsika”, le ataontsika sahala hoe mpavandy ie, sady tsy am-pontsika ao ty safàny.