Ty Taratasy Nisoratin’i Joda
1 Baka amy Joda, mpanompon’i Jesosy Kristy sady rahalahin’i Jakoba.
Ho ahi-ty olo nifilì-Ndranahary Babantsika noho teany, sady arovany ho an’i Jesosy Kristy,
2 Hiferinay anareo lahy Ndranahary ka ho tea noho hanome fiadana anareo, le enganè hataony mandilatsy ty bakanibakany zay raha zay!
3 Rahalahiko teako, fa nita hanoratsy taminareo marè mikasiky ty fanavota iharoantsika aho, fe hitako hoe aleo manoratsy mba hampirisiha anareo hialy ay hiaro ty finoa. Namea indraiky avao* ho ahi-ty olo masy finoa zay. 4 Toy ty antony: Nisy olo nilitsy taminareo eo fe tsy niarakinareo, sady fa nivolanin’ny Soratsy Masy liany fa ela hoe maeva hosazỳ rozy. Tsy matahotsy a-Ndranahary rozy. Mieritseritsy moa rozy hoe soa fanahy biby* Ndranaharintsika iny, ka tsy manahy ndre mana fandaisam-bata mahamenatsy* aza rozy. Mivaliky amy Jesosy Kristy, azy Tompo nivily antsika iny koa rozy.
5 Fa hainareo soa iaby raha zay. Fe mbo teako hampitiarovy anareo hoe ndre navotan’i Jehovah baka Ejipta any aza ty vahoakiny, le naripakiny avao ze tsy nino, lafa tafara atoy. 6 Nirohizany mandrakizay amy pilasy maìky biby ao koa ty anjely sisany, mba hotsarà amy andro bevata iny, satria niala tamy andraikitsy nampanaovy an-drozy* rozy, sady nanenga ty pilasy misy an-drozy. 7 Nanao manahaky an’ny anjely rey koa Sodoma noho Gomora noho ty tanà nanodidy an-drozy, satria nidada tamy fijangajangà* tena mampangaroharo rozy, sady nanatanteraky ty fanirian’ny nofotsin-drozy mba hanao raha tsy fatao. Afo maharitsy mandrakizay* ty sazin-drozy, ka lasa anatsy ho antsika rozy.
8 Fe ndre zay, le mbo mieritseritsy* raha raty avao olo rey ka mandoto ty nofotsin-drozy. Tsy midary ani-ze mana fahefà koa rozy, sady mandratiraty ani-ze mana voninahitsy. 9 Kanefa Mikaela arkanjely lafa nifamaly tamy Devoly mikasiky ty fatin’i Mosesy, le tsy nahasaky nitsara azy na nandratiraty azy. Fa hoy ty asany: “Enganè Jehovah heloky anao!” 10 Fa olo rey mandratiraty ty raha iaby tsy hain-drozy. Manahaky biby tsy mandiniky io rozy, le manao raha mitovy amy ty fataon’ny biby amy ty raha iaby ataon-drozy, le lasa manimba ty vatan-drozy.
11 Azon-draha rozy fa nanao manahaky ty nataon’i Kaina, sady malisalisa hanao raha tsy mety manahaky ty nataon’i Balama mba hahazoa raha. Nikinokino ani-azy mana fahefà rey rozy, manahaky ty nataon’i Kora, ka ho ripaky koa. 12 Vato voasaron’ny rano rozy, amy fanasam-pifankatiava ataonareo, lafa miaraky manao fety aminareo. Mpiarak’aondry tsy mieritseritsy laha tsy ty vatan-drozy avao koa rozy, sady tsy matahotsy mihintsy. Rahona tsy manday ora noho andesin-tsioky rozy, sady hazo tsy mamoa amy fotoany, noho maty tanteraky* le niombota. 13 Lozoky mitavoaly an-driaky eny rozy sady mampiboaky loto, le tokony hahamenatsy an-drozy raha zay. Basia mikariokarioky koa rozy, sady fa voatoka mandrakizay ho amy pilasy farani-ze maìky ao.
14 Naminany mikasiky an-drozy koa Enoka, azy taranaky fahafito baka amy Adama iny, lafa nivola hoe: “Fa avy Jehovah, miaraky amy ty anjeliny masy an’alinaliny, 15 mba hitsara ty olo iaby, noho hanasazy ani-ze olo iaby tsy matahotsy a-Ndranahary. Hosazì-Ndranahary mpanota rey amy ty raha raty iaby nataon-drozy noho ty safà fandratiratia iaby nivolanin-drozy.”
16 Mpimenimeny noho mahatoreotoreo mikasiky ty fiainan-drozy olo rey, sady manao ze sitrapon-drozy avao. Mirengirengy rozy lafa mivola sady tea mandroboroboky olo mba hahazoa raha.
17 Fa nareo, longoko, tiarovo ty raha fa nivolanin’ny apostolin’i Jesosy Kristy Tompontsika. 18 Nivola taminareo avao rozy hoe: “Amy andro* farany, le hisy mpikizakizaky hanatanteraky ty fanirian-drozy hanao raha raty.” 19 Olo rey ro mahavy ty fiangona tsy hiharo raiky. Olo arakin’ny nofotsy* rozy, fa tsy mana ty fanahi-Ndranahary. 20 Fa hatanjaho ty finoanareo masy, longoko, le engao hiasa aminareo ty fanahy masy lafa mivavaky nareo, 21 amy zay nareo ho tea-Ndranahary avao. Tokony hitamà avao koa nareo hoe hiferinay anareo Jesosy Kristy Tompontsika, ka ho afaky hiay mandrakizay nareo. 22 Miezaha avao koa hiferinay ani-ze olo misalasala. 23 Avoto rozy le sintomo malaky baka anaty afo* ao. Miezaha avao hiferinay ty olo hafa, fe miambena soa le bokao ty fandaisam-bata voatasitasin’ny fahotà.*
24 Ndranaharintsika be voninahitsy iny le afaky manampy anareo mba tsy hisy handra aminy eo, amy zay nareo ho falifaly biby. Afaky manampy anareo tsy hanota* koa ie. 25 Ho an’ny Ndranahary raiky avao iny, azy nanavotsy antsika tamy alalan’i Jesosy Kristy Tompontsika iny lahy ty voninahitsy, ty fanajà,* ty fanjakà, noho ty fahefà liany fa ela biby taloha tany noho henanizao sady ho mandrakizay! Amena.