Ty Taratasy Voalohany Nisoratin’i Jaona
5 Ze olo iaby mino hoe Jesosy ro Kristy, le nateraki-Ndranahary. Le ze olo iaby tea an’ny Babantsika iny le tea ani-ze naterakiny koa. 2 Toy ty ahaizantsika hoe tea an’ny anaki-Ndranahary rey tsika: Tea a-Ndranahary tsika sady manoriky ty didiny. 3 Ho zao ty dikan’ny hoe tea a-Ndranahary: Manoriky ty didiny. Fe tsy mavesatsy ty didiny, 4 satria mandresy ani-zao tontolo zao ze* nateraki-Ndranahary. Ka ty ahafahantsika mandresy ani-zao tontolo zao le ty finoantsika.
5 Ia moa ty afaky mandresy ani-zao tontolo zao? Ze mino hoe Jesosy ro Anaki-Ndranahary. 6 Tamy alalan’ny rano noho lio ro niavian’i Jesosy Kristy. Tsy tamy rano avao, fa tamy rano noho lio. Le ty fanahy ro vavolombelo, satria ty fanahy ro fahamarina. 7 Fa raha telo retoa ro vavolombelo: 8 Ty fanahy noho ty rano noho ty lio. Mifanaraky soa raha telo reo.
9 Maneky ze raha volanin’olo tsika, fe mbo anabo mandilatsy ani-zay ze raha volani-Ndranahary, satria ty raha volani-Ndranahary le ty raha nivolaniny mikasiky ty Anany. 10 Ze mino ty Anaki-Ndranahary le maneky am-pony ao ty safà nivolani-Ndranahary taminy. Fa ze tsy mino a-Ndranahary le ataony sahala hoe mpavandy Ndranahary, satria tsy mino ze raha nivolaniny mikasiky ty Anany ie. 11 Toy safà nivolani-Ndranahary iny: Nanome antsika fiaina mandrakizay Ie, le tamy alalan’ny Anany ro hahazoantsika an’ny fiaina zay. 12 Ze maneky ty Anaky ro hahazo an’ny fiaina io, fa ze tsy maneky ty Anaki-Ndranahary tsy hahazo an’ny fiaina io.
13 Manoratsy an’ny raha zay aminareo aho mba ho hainareo fa hahazo fiaina mandrakizay nareo, tsy ia zay fa nareo ze mino ty anaran’ny Anaki-Ndranahary. 14 Toy ty raha atokisantsika* mikasiky a-Ndranahary: Ndre ino ndre ino angatahintsika aminy ka mifanaraky amy ty sitrapony, le mijanjy antsika ie. 15 Ka laha haintsika fa mijanjy antsika ie ndre ino ndre ino angatahintsika, le haintsika fa tena ho azontsika raha zay, satria nangatahintsika taminy.
16 Laha misy olo mahita ty rahalahiny manao fahotà tsy mahafaty, le tokony hangataky ho an’ny rahalahiny iny ie, le hanome fiaina an’ny rahalahiny iny Ndranahary. Hanome fiaina ho ani-ze olo tsy manao fahotà mahafaty Ndranahary. Misy fahotà mahafaty. Tsy mampirisiky ndre ia ndre ia hivavaky mikasiky an’ny fahotà zay aho. 17 Fahotà iaby ze raha tsy marina ataon’olo, fe misy fahotà tsy mahafaty.
18 Haintsika fa tsy zatsy manota ze olo iaby nateraki-Ndranahary. Arovani-azy nateraki-Ndranahary iny* ie, ka tsy afaky mifehy* azy azy raty iny. 19 Haintsika fa baka amy Ndranahary tsika, fa zao tontolo zao iabiaby le ambany fahefàni-azy raty iny eo. 20 Fe haintsika hoe fa avy ty Anaki-Ndranahary, le nameany fahihira* tsika mba hahay ani-azy tena Ndranahary iny. Le amy alalan’i Jesosy Kristy Anany tsika ro miharo raiky amy azy tena ie iny, zany hoe azy tena Ndranahary sady mpanome fiaina mandrakizay iny. 21 Anako teako, miambena soa amy ty sampy.