Ty Taratasy Nisoratin’i Jakoba
1 Baka amy Jakoba, mpanompo-Ndranahary noho mpanompon’i Jesosy Kristy Tompo.
Ho ahi-ty foko 12 miparitaky amy pilasy samby hafa any,
Miarahaba anareo!
2 Lafa tojiky raha sarotsy sankarazany nareo, rahalahiko, le rambeso ho raha mahafalifaly biby raha zay, 3 satria hainareo fa lasa mahay miaritsy nareo lafa vita sedra ty finoanareo. 4 Fe engao hamita ty asany ty fiareta, amy zay nareo ho lasa lavorary noho tsy hisy hokinokinoa amy raha iaby, ka tsy hisy raha tsy ampy aminareo ao.
5 Ka laha misy aminareo tsy ampy fahendrea, le tokony tsy hieny hangataky an’ny raha zay amy Ndranahary ie, satria matariky amin’olo iaby Ndranahary sady tsy masiaky amin’olo mangataky aminy.* Le hamea azy raha zay. 6 Fe tokony hangataky am-pinoa avao ie, sady tsy hisalasala mihintsy, fa ze olo misalasala le manahaky lozoky an-driaky eny rey, ka andesin’ny tsioky noho avembeny. 7 Tsy tokony hitamà hahazo raha baka amy Jehovah mihintsy ty olo manahaky ani-zay, 8 fa olo misalasala ie sady miovaova amy ze raha iaby ataony.
9 Tokony ho falifaly* ze rahalahy mahantra* satria misondrotsy, 10 le ho zay koa ze panarivo satria mijetsy. Tsy zay fa ho rava manahaky folera an-tonda eny ty panarivo. 11 Fa lafa miboaky ty masoandro ka may marè ty hafanany, le malazo ty raha mitiry bakeo mihintsa ty folerany, le rava ty hasoany. Halazo manahaky ani-zay koa ty panarivo tandrena mila hanana.
12 Sambatsy ze olo miaritsy avao lafa misy fitsapà, satria lafa mahazo hatò ie, le hahazo ty satroboninahitsin’ny fiaina, azy nampitamanin’i Jehovah ani-ze olo tea Azy avao iny. 13 Laha misy olo tratsin’ny raha sarotsy,* le tsy tokony hivola ie hoe: “Fitsapà baka amy Ndranahary toy.” Fa Ndranahary tsy azo tsapà amy raha raty, sady tsy mitsapa ndre ia ndre ia amy raha raty koa. 14 Fe tsapà ty olo kiraidraiky lafa voatarikin’ny faniriany noho maneky ho resin’ny raha zay.* 15 Ka ty faniria lafa engà hitombo* le miteraky ota, le ty ota amy zay lafa tanterahy mahavy fahafatesa.
16 Ka maneky ho voafitaky nareo, rahalahiko teako. 17 Baka anabo any ty fanomeza soa iaby noho ty fanomeza tsy misy handrany iaby, zany hoe mijotso baka amy Baban’ny hazavà amy lanitsy* eny iny. Tsy miovaova manahaky talinjo mifindrafindra* io ie. 18 Fa sitrapony ty niteraky antsika tamy alalan’ny safàn’ny fahamarina, amy zay tsika ho anatin’ny voaloham-bokatsy amy ty raha niforoniny.
19 Tiarovo toy rahalahiko teako: Tokony ho parè hijanjy ty olo iaby, sady tsy halisa hivola noho tsy halaky meloky, 20 satria manjary tsy manao ty marina* amy Ndranahary eo ty olo lafa meloky. 21 Ka le alao iaby lafa kila fahalotoa noho ze raha raty sisa tavela aminareo ao.* Miambanea* le ekeo ty safà ambolè-Ndranahary am-ponareo ao, satria afaky manavotsy anareo raha io.
22 Tokony ho mpanoriky safà nareo, fa tsy ho mpijanjy avao, ka hamitaky ty vatanareo amy hevitsy diso. 23 Fa laha misy olo mpijanjy safà kanefa tsy mpanoriky, le manahaky olo manenty ty tarehiny amy fitaratsy eo ie. 24 Manenty ty vatany ie bakeo mandeha, le avy le halinony hoe manao akory ie. 25 Fa ze mandiniky soa an’ny lalàna tena soa* manafaky ty olo iny, ka manoriky an’ny raha zay avao, le lasa mpanoriky safà fa tsy mpijanjy manalino. Ho sambatsy ie lafa manoriky safà.
26 Laha misy olo mieritseritsy hoe mpivavaky amy Ndranahary kanefa tsy mahafehy ty vavany,* le mamitaky ty fony ie, sady tsy misy dikany ty fivavahany.* 27 Ho zao ty fivavaha malio sady tsy misy loto amy Ndranahary Babantsika iny eo: Mikarakara ty kamboty noho ty ampela maty valy amy ty fijalea mahazo an-drozy, sady miamby soa mba tsy ho voatasitasini-zao tontolo zao.