Ty Taratasy Voalohany Nisoratin’i Jaona
4 Rahalahiko teako, ka mino ani-ze fanambarà volanin’ny fanahy,* fa anovo tse ze ahaiza hoe baka amy Ndranahary vatany va fanambarà* rey sa tsy baka aminy, satria maro ty mpaminany sandoky amy zao tontolo zao eo.
2 Toy ty ahaizanareo fa baka amy Ndranahary ty fanambarà volanin’ny fanahy: Ze fanambarà iaby maneky hoe nofotsy noho lio Jesosy Kristy tamy ie niavy tan-tany etoy, le baka amy Ndranahary. 3 Fa ze fanambarà iaby tsy maneky an’i Jesosy Kristy, le tsy baka amy Ndranahary. Fanambaràn’ny antikristy raha zay, azy fa nirenareo hoe ho avy iny, sady fa amy zao tontolo zao eo henanizao.
4 Baka amy Ndranahary nareo, anako teako, sady fa naharesy an’olo rey, satria bevata mandilatsy ani-azy miharo raiky amy zao tontolo zao iny azy miharo raiky aminareo iny. 5 Baka amy zao tontolo zao olo rey, ka zay ty antony ivolanan-drozy raha baka amy zao tontolo zao, sady mijanjy an-drozy zao tontolo zao. 6 Fa tsika baka amy Ndranahary. Ze fa mahay a-Ndranahary le mijanjy antsika, fa ze tsy baka amy Ndranahary tsy mijanjy antsika. Ka zay ro ahaizantsika manavaky hoe marina sa diso fanambarà volanin’ny fanahy iny.
7 Rahalahiko teako, ndao tsika hifankatea avao, satria baka amy Ndranahary ty fitiava. Ze olo iaby tea koa le nateraki-Ndranahary sady mahay a-Ndranahary. 8 Fa ze tsy tea le mbo tsy mahay a-Ndranahary, satria Ndranahary le fitiava. 9 Ho zao ro nampisehoa ty fitiava-Ndranahary tamintsika: Nirahiny ho amy zao tontolo zao etoy ty Anakilahiny toka mba hahazoantsika fiaina amy alalany. 10 Le ho zao fitiava zay: Tsy hoe tsika ro tea a-Ndranahary, fa ie ro tea antsika ka naniraky ty Anany ho soro fampilongoa* amy ty fahotantsika.
11 Rahalahiko teako, laha ho zay ty nitiava-Ndranahary antsika, le tsy maintsy mifankatea koa tsika. 12 Mbo tsy nisy nahita a-Ndranahary mihintsy. Fe laha mifankatea avao tsika, le amintsika ao avao Ndranahary sady natao lavorary am-pontsika ao ty fitiavany. 13 Ho zao ty ahaizantsika fa miharo raiky aminy avao tsika, le ie koa miharo raiky amintsika: Nameany antsika ty fanahiny. 14 Zahay mihintsy koa ro fa nahita sady mitsanga ho vavolombelo hoe fa naniraky ty Anany ho mpanavotsy ani-zao tontolo zao Babantsika iny. 15 Ze maneky hoe Anaki-Ndranahary Jesosy, le miharo raiky aminy avao Ndranahary, le ie koa miharo raiky amy Ndranahary. 16 Lasa haintsika hoe tea antsika Ndranahary, le mino an’ny raha zay tsika.
Ndranahary le fitiava. Miharo raiky amy Ndranahary avao ze tsy mieny mampiseho fitiava, sady miharo raiky aminy avao koa Ndranahary. 17 Ka zay ro nahavy ty fitiava natao lavorary am-pontsika ao, amy zay tsika hahasaky hivola,* amy andro fitsarà, satria manahaky an’i Kristy tsika amy zao tontolo zao eto. 18 Tsy misy tahotsy ty fitiava, satria ty fitiava lavorary mandroaky tahotsy. Manakantsaka antsika moa ty tahotsy. Kanao ty olo raiky matahotsy, le mbo tsy natao lavorary ty fitiavany. 19 Tsika tea satria ie ro nitea antsika voalohany.
20 Laha misy olo mivola hoe: “Tea a-Ndranahary aho”, kanefa ie malay ty rahalahiny, le mpavandy. Fa laha ty rahalahiny hitany aza tsy teany, akory moa ty hitiavany an’ny Ndranahary tsy hitany iny? 21 Le toy ty didy azontsika baka aminy: Tsy maintsy tea ty rahalahiny koa ze tea a-Ndranahary.