Ty Taratasy Faharoe Nisoratin’i Jaona
1 Zaho, azy olobe* iny, ro manoratsy ho an’ny ampela nifilỳ iny noho ty anany. Tena tea anareo aho, le tsy zaho avao, fa ze olo iaby fa mahay ty fahamarina koa. 2 Fahamarina fa am-pontsika ao iny sady mbo ho am-pontsika ao zisiky farany iny ro mahavy an’ny raha zay. 3 Hampiseho hasoam-panahy miavaky* noho hiferinay antsika Ndranahary Babantsika iny noho Jesosy Kristy Anan’ny Babantsika iny, sady hanome fiadana antsika. Hampianatsy antsika ty fahamarina koa rozy sady ho tea antsika.
4 Falifaly biby aho nahay hoe manoriky ty fahamarina ty ananao sisany, mifanaraky amy ty didy niazontsika baka amy Baba. 5 Ka zao ty angatahiko aminao, iha ampela nifilỳ io: Ndao tsika iaby hifankatea.—Fe tsy didy vaovao raha soratiko aminao toy, fa didy fa niazontsika baka am-boalohany any.— 6 Ty hoe tea le manoriky ty didin’ny Baba avao. Ho zao didy fa nirenareo baka am-boalohany any iny: Tokony hifankatea avao nareo, 7 satria maro ty mpamitaky amy zao tontolo zao eto, zany hoe ty olo tsy maneky hoe nofotsy noho lio Jesosy Kristy tamy ie niavy tan-tany etoy. Reo mpamitaky noho antikristy io.
8 Miambena soa tsy no hisera ty vokatsin’ny asa nataonay, fa anovo ze hahazoanareo ty valisoa iaby. 9 Ze olo iaby mivio lala ka tsy manoriky ze raha nampianarin’i Kristy sasy, le tsy maneky a-Ndranahary. Fa ze manoriky an’ny fampianara zay avao ro maneky ty Baba noho ty Anaky. 10 Laha misy olo avy aminareo eo ka tsy mampianatsy an’ny fampianara zay, le ka mampandroso azy an-trano na miarahaba azy, 11 satria lasa manoha ty raha raty ataony ze miarahaba azy.
12 Maro biby ty raha teako hosoraty aminareo. Fe tsy teako hosoraty amy taratasy noho ankra raha zay, fa mitamà aho hoe ho avy any le hiresaky aminareo mivanta, amy zay ho falifaly biby nareo.
13 Mampamangy anao zao hoe ty anan’ny rahavavinao, zany hoe rahavavinao nifilỳ iny.