Ty Taratasy Fahatelo Nisoratin’i Jaona
1 Zaho, azy olobe* iny, ro manoratsy ho an’i Gaio, rahalahiko mamiko sady tena teako.
2 Rahalahiko teako, mivavaky ho anao aho mba handeha soa avao ty raha iaby, le mba ho salama soa iha, manahaky henanizao. 3 Tena falifaly biby aho lafa nisy rahalahy niavy nitantara hoe mbo mivahatsy amy fahamarina avao iha, manahaky ty fa nataonao* bakanibakany zay. 4 Tsy misy raha mahafalifaly ahy* mandilatsy ty maharè hoe tsy miala amy fahamarina mihintsy ty anako.
5 Rahalahiko teako, hita hoe tsy mivaliky iha amy ze raha ataonao ho ahi-ty rahalahy, ndre tsy hainao aza rozy. 6 Nitantaranin-drozy tamy fiangona teo ty fitiava nasehonao. Mba karakarao soa rozy lafa handeha, le anovo mifanaraky amy ze itiava-Ndranahary azy raha zay. 7 Fa ty anara-Ndranahary ro nahavy an-drozy handeha, sady tsy nangalaky raha baka amin’olo amy zao tontolo zao eo rozy, ndre ino zay ndre ino. 8 Ka tsy maintsy mampandroso an-trano noho mandramby soa an-drozy tsika, mba ho mpiaraky miasa amin-drozy amy fahamarina ao.
9 Nisy raha nisoratiko ho ahi-ty fiangona, fe ta ho sefosefo aminareo eo Diotrefa, ka tsy mba nisy nihajàny na nekeniny ze raha nivolaninay. 10 Ka lafa avy any aho, le hambarako soa ty raha mbo ataony, satria mandratiraty anay avao* ie. Le tsy vitani-zay, fa tsy mety mandramby soa an’ny rahalahy rey ie sady tsy manaja an-drozy. Le ze ta handramby an’ny rahalahy reo teany hosakàna noho halà tsy ho amy fiangona eo.
11 Rahalahiko teako, ka alà tahaky ty raha raty, fa ty raha soa ro alao tahaky satria baka amy Ndranahary ze manao raha soa. Tsy nahita a-Ndranahary ze manao raha raty. 12 Soa laza tamy mpiara-manompo iaby Demetrio sady manoriky ty fahamarina. Zahay koa vavolombelo amy raha zay, laha ty marina, sady hainao fa marina ty raha volaninay.
13 Maro ty raha nieritseretiko hosoraty taminao, fe tsy ta hanoratsy aminao amy stilô* noho ankra sasy aho. 14 Fe mitamà hahita anao tsy ho ela aho, le hiresaky mivanta tsika.
Hahazo fiadana lahy iha!
Mampamangy anao zao hoe ty namantsika atoy. Mampamangy amy namantsika kiraidraiky any, araky ty anaran-drozy kiraidraiky.