Ty Taratasy Voalohany Nisoratin’i Jaona
3 Mba eritsereto moa ty fitiava nasehon’ny Baba antsika! Nikaihiny hoe anany* mihintsy tsika, sady zay vatany tsika. Zay ty antony tsy ahaizani-zao tontolo zao antsika, satria mbo tsy mahay Azy zao tontolo zao. 2 Rahalahiko teako, anaki-Ndranahary tsika henanizao, fe mbo tsy aseho hoe hanao akory tsika. Ty haintsika le hoe lafa aseho ie, le hanjary manahaky azy tsika, satria ho hitantsika hoe manao akory marina ie. 3 Ze mitamà azy, le manadio ty vatany mba halio manahaky azy.
4 Ze olo iaby zatsy manota le zatsy mandika lalàna koa, le mandika lalàna ze manota. 5 Hainareo koa fa naseho ie mba hanafaky ty fahotantsika, sady tsy misy fahotà ty aminy ao. 6 Tsy zatsy manota ze miharo raiky aminy avao. Fa ze zatsy manota le sady tsy nahita azy ro mbo tsy nahay azy. 7 Anako teako, ka engà hisy olo hamitaky anareo. Ze manao ty marina ro olo marina, satria marina koa Jesosy. 8 Fa baka amy Devoly ze zatsy manota, satria fa nanota baka am-boalohany any* ty Devoly. Toy zany ty antony nampisehoa ty Anaki-Ndranahary: Ty handrava ty asan’ny Devoly.
9 Tsy zatsy manota ze nateraki-Ndranahary, satria amin’olo zay ao avao ty voa* amea-Ndranahary. Tsy ho zatsy manota zany ie satria nateraki-Ndranahary. 10 Ho zao ty tena ahità ze anaki-Ndranahary noho ze anan’ny Devoly: Ze olo iaby tsy manao ty marina le tsy baka amy Ndranahary. Manahaky ani-zay koa ze tsy tea ty rahalahiny. 11 Toy ty hafatsy fa nirenareo baka am-boalohany any: Tokony hifankatea tsika, 12 fa tsy hanao manahaky an’i Kaina. Baka amy azy raty iny ie, ka namono ty rahalahiny. Ino moa ty antony namonoany azy? Satria raty ty raha nataony, fa marina ty raha nataon’ny rahalahiny iny.
13 Ka tseriky nareo, rahalahy, laha halani-zao tontolo zao. 14 Haintsika fa sahala hoe fa nimaty tsika, fe nivelo ndraiky, satria teantsika ty rahalahintsika. Fa ze tsy tea le sahala hoe mbo maty avao. 15 Ze olo iaby malay ty rahalahiny le mpamono olo, sady hainareo fa tsy misy mpamono olo hahazo fiaina mandrakizay. 16 Lasa haintsika ty atao hoe fitiava satria nahafoy ty ainy ho antsika ie. Le tsy maintsy mahafoy ty aintsika ho ahi-ty rahalahintsika koa tsika. 17 Fa laha misy mba manan-draha avao amy fiaina henanizao ka mahita hoe sahira ty rahalahiny, kanefa tsy miferinay azy, le akory moa ty ivolanany hoe tea a-Ndranahary ie? 18 Anako teako, tsy tokony ho tea amy safà na amy lela avao tsika, fa amy raha atao noho amy fahamarina koa.
19 Raha zay ro hahaizantsika hoe baka amy fahamarina tsika. Raha zay koa ro hanomezantsika toky* ty fontsika hoe teany tsika,* 20 ndre manome tsiny antsika aza ty fontsika, satria bevata mandilatsy ty fontsika Ndranahary sady mahay ty raha iaby. 21 Rahalahiko teako, laha tsy manome tsiny antsika ty fontsika, le hahasaky hiresaky amy Ndranahary tsika. 22 Le ndre ino ndre ino angatahintsika, le azontsika baka aminy raha zay, satria manoriky ty didiny tsika sady manao ze raha mahafalifaly azy. 23 Ho zao vatany moa ty didiny: Tokony hino ty anaran’i Jesosy Kristy Anany tsika sady hifankatea, mifanaraky amy didy nameany antsika iny. 24 Miharo raiky aminy avao koa ze olo manoriky ty didiny, le ie hiharo raiky amin’olo zay. Le fanahy nameany antsika iny ro ahaizantsika hoe miharo raiky amintsika avao ie.