Ty Taratasy Voalohany Nisoratin’i Jaona
2 Manoratsy aminareo mikasiky an’ny raha zay aho, nareo anako teako io, amy zay nareo tsy hanota. Fe laha misy olo sendra manota, le mana mpanampy* amy Baba any tsika, tsy ia zay fa Jesosy Kristy, azy marina iny. 2 Ie ro soro fampilongoa* amy ty fahotantsika, fe tsy ty ahintsika avao, fa ty ahini-zao tontolo zao iabiaby koa. 3 Laha manoriky ty didiny avao tsika, le zay ro ahaizantsika hoe fa mahay azy tsika. 4 Mpavandy ze olo mivola hoe: “Fa haiko ie”, kanefa tsy manoriky ty didiny. Tsy am-pon’olo zay ao koa ty fahamarina. 5 Fa ze manoriky ty safàny, le tena natao lavorary am-pony ao ty fitiavany a-Ndranahary. Zay ro ahaizantsika hoe miharo raiky aminy tsika. 6 Ze olo mivola hoe miharo raiky aminy avao, le tsy maintsy manahaky ty fiainan’i Jesosy koa.*
7 Rahalahiko teako, tsy didy vaovao raha soratiko aminareo toy, fa didy fa ela sady fa niazonareo baka am-boalohany any. Safà fa nirenareo iny didy fa ela io. 8 Manoratsy didy vaovao aminareo ndraiky aho henanizao, zany hoe didy norihin’i Jesosy noho norihinareo koa, satria mihalasa ty maìky, le fa mamirapiratsy azy tena hazavà iny.
9 Ze mivola hoe amy mazava ao kanefa malay ty rahalahiny, le mbo amy maìky ao avao. 10 Ze tea ty rahalahiny le amy mazava ao avao, sady tsy misy raha mahavoafinga azy. 11 Fa ze malay ty rahalahiny, le amy maìky ao sady mandeha amy maìky ao, ka tsy mahay ty lala ombany satria nataon’ny maìky iny jiky ty masony.
12 Manoratsy aminareo aho, nareo anako teako io, satria nengà ty hadisoanareo. Ty anarany* ro nahavy an’ny raha zay. 13 Manoratsy aminareo baba aho, satria nareo fa mahay azy, zany hoe fa mahay ani-azy fa nisy baka am-boalohany any iny. Manoratsy aminareo tanora aho, satria fa naharesy ani-azy raty iny nareo. Manoratsy aminareo ajà aho, satria fa mahay an’ny Babantsika iny nareo. 14 Manoratsy aminareo baba aho, satria nareo fa mahay azy, zany hoe fa mahay ani-azy fa nisy baka am-boalohany any iny. Manoratsy aminareo tanora aho, satria matanjaky nareo, sady am-ponareo ao avao ty safà-Ndranahary le fa naharesy ani-azy raty iny nareo.
15 Ka tea ani-zao tontolo zao na ty raha amy zao tontolo zao eo. Laha misy olo tea ani-zao tontolo zao, le tsy tea an’ny Baba olo zay, 16 satria ty raha iaby amy zao tontolo zao eo, zany hoe ty fanirian’ny nofotsy noho ty fanirian’ny maso noho ty fampisehosehoa hanana,* le tsy baka amy Baba, fa baka amy zao tontolo zao. 17 Sady mandalo zao tontolo zao noho ty raha irìny, fa ze manao ty sitrapo-Ndranahary ro maharitsy mandrakizay.
18 Henanizao, anako, ty lera farany. Araky ty fa nirenareo, le ho avy ty antikristy. Sady ndre henanizao aza le fa maro ty antikristy, ka zay ro ahaizantsika fa henanizao ty lera farany. 19 Niala tamintsika rozy, fa tsy namantsika,* satria mbo ho niaraky tamintsika avao rozy laha ninamantsika. Fe niala rozy mba ho hita hoe tsy ty olo iaby ro namantsika. 20 Nihosorani-Azy Masy iny ty fanahiny nareo, le mana fahaiza nareo iabiaby. 21 Ty antony anoratako aminareo, le tsy hoe satria nareo tsy mahay ty fahamarina, fa satria nareo mahay an’ny raha zay, sady tsy misy vandy mihintsy baka amy fahamarina.
22 Ia moa ty mpavandy laha tsy azy tsy maneky iny hoe Jesosy ro Kristy? Ze tsy maneky ty Baba noho tsy maneky ty Anaky ro antikristy. 23 Ze olo iaby tsy maneky ty Anaky le tsy mifandramby amy Baba koa, fa ze olo maneky ty Anaky le mifandramby amy Baba koa. 24 Fa nareo, anovo am-ponareo ao avao ze raha fa nirenareo baka am-boalohany. Laha ataonareo am-ponareo ao avao ty raha fa nirenareo baka am-boalohany, le hiharo raiky amy Anaky noho amy Baba avao koa nareo. 25 Ankoatsini-zay, le toy ty raha nampitamaniny antsika: Fiaina mandrakizay.
26 Manoratsy an’ny raha zay aminareo aho, satria misy olo ta hamitaky anareo. 27 Fa nareo fa nihosorany ty fanahiny, sady aminareo eo avao raha zay, ka tsy mila ampianarin’olo anareo. Le fanahiny zay ro nampiasà-Ndranahary mba hampianatsy anareo ty raha iaby, sady marina noho tsy misy vandy raha zay. Araky ty nampianarin’ny fanahy io anareo zany, le miezaha hiharo raiky aminy avao. 28 Ka zao zany ie, anako teako: Miezaha hiharo raiky aminy avao. Amy zay lafa aseho ie, le hahasaky hivola tsika sady tsy hiala aminy ka tsy ho afa-baraka amy fotoa fanatrehany. 29 Laha hainareo fa marina ie, le ho hainareo koa fa naterakiny iaby ze olo iaby manao ty marina.