Nangalaky Fanahy ani-Jesosy ty Devoly

Lafa nivita batisa Jesosy, le nandesini-fanahy masy an-diomonto any. Tsy nihina mihintsy ie tanatini-40 andro ka nimosarè biby. Niavy amy zay ty Devoly hangalaky fanahy azy. Hoy ty asany: ‘Laha Anaki- Ndranahary vatany iha, le volano vato retoa hanjary mofo.’ Fe nivola andinin-teny Jesosy lafa namaly azy hoe: ‘Fa voasoratsy hoe tsy ty mofo avao ro mahavelo, fa mila mijanjy ty safàni-Jehovah koa.’

Nivola ndraiky Devoly iny hoe: ‘Laha Anaki-Ndranahary vatany iha, le mitsambokona baka anabo tempoly eny. Fa voasoratsy hoe handefa anjely hanavotsy anao Ndranahary.’ Nivola andinin-teny ndraiky Jesosy mba hamalea azy hoe: ‘Fa voasoratsy hoe ka mitsapa toetsy a Ndranahary.’

Bakeo natoroni-Satana ani-Jesosy ty fanjakà iaby an-tany etoy. Natorony koa hoe nanan-kanana noho nalaza rozy. Hoy ty asany: ‘Ameako anao iaby reo laha mivavaky amiko indraiky avao iha.’ Fe namaly Jesosy hoe: ‘Mialà avao iha Satana! Fa voasoratsy hoe Jehovah raiky avao ro tokony hivavaha.’

Farany nandeha Devoly iny, le nisy anjely niavy teo nanome hany ani-Jesosy. Nanomboky tamy zay Jesosy nandeha nitory ty vaovao soani-Fanjakà iny, satria zay ro naniraha azy tan-tany etoy. Nitean’olo ty raha nampianarini-Jesosy ka norihin-drozy avao ze nombany.