Mitory San-trano Va ty Vavolombelo Jehovah mba ho Voavonjy?

Mitory san-trano zahay, fe tsy mieritseritsy zahay hoe tsy maintsy ho voavonjy satria manao raha io. (Efesianina 2:8) Ino ty antony?

Eritsereto hoe nisy lahilahy soa fanahy nampitamà fanomeza lafovily ho ahinolo nandeha ho amy faritsy raiky amy fotoa fa nameany. Laha inoanao fa marina raha ampitamany lahilahy io, tsy hanoriky ty safàny va iha? Tsy isalasalà fa hanoriky! Hovolaninao amy ty namanao noho ty longonao koa aza raha zay, mba hahazo fanomeza soa io koa rozy. Fe tsy ty fanorihanao ty safà lahilahy io ro nahavy anao hahazo fanomeza io, fa ty hasoa fanahiny.

Manahaky zay koa fa mampitamà Ndranahary fa hiay zisiky farany ze olo manoriky ty safàny. (Romanina 6:23) Inoanay raha zay ka resahinay aminolo hafa. Teanay hahazo fiaina zisiky farany koa rozy. Fe tsy mieritreritsy zahay hoe tsy maintsy ho voavonjy satria mitory. (Romanina 1:17; 3:28) Tsy maeva hahazo fitahia baka amy Ndranahary io tsika olombelo ndre ino ndre ino ataontsika. “Tsy baka amy fanaovantsika raha mahity”, ro nanavotany antsika fa “baka amy ty famindram-pony.”—Titosy 3:5.