Mahazo Mampiaraky va ty Vavolombeloni-Jehovah?

Mino zahay Vavolombeloni-Jehovah fa ty torolala noho ty fitsipiky amy Baiboly ao avao ro manampy antsika handramby fanampahan-kevitsy soa satria mampifaly a Ndranahary raha zay sady mahasoa antsika. (Isaia 48:17, 18) Tsy niforoninay torolala noho fitsipiky ao reo, fe orihinay. Diniho moa torolala natao ho ahin’olo miaraky alohani-fanambalea na mampiaraky retoa.a

• Natao haharitsy zisiky farany ty fanambalea. (Matio 19:6) Vatan-draha amy Vavolombeloni-Jehovah ty fampiaraha satria dinga ho amy fanambalea raha zay.

• Natao ho ahin’olo ampy tao ho amy fanambalea ty fampiaraha. Mba olo “fa lisatsy ty fotoa fivelarani-hatanorà” ro tokony hampiaraky, zany hoe fa tsy amy fotoa mampanjeky ty faniria hanao firaisa iny.​—1 Korintianina 7:​36.

• Tokony ho olo mahazo manambaly ro mampiaraky. Laha hentea ty fitsipiki-Ndranahary, le tsy ze kila olo nisara-baly ara-dalàna ro mahazo manambaly ndraiky. Mivola mazava ty Baiboly hoe tsy mahazo misaraky amy ty valiny ty olo raiky ka hanambaly olo hafa ndraiky, laha tsy hoe ty fijangajangà vasa ty antony isarahan-drozy.​—Matio 19:9

• Ampirisihy ty Kristiana maniry hanambaly mba hila valy mitovy finoa aminy. (1 Korintianina 7:​39) Tsy ty olo manaja ty raha inoanay Vavolombeloni-Jehovah ro ataonay hoe olo finoa raiky aminay, fa ty olo manoriky noho mitory ty raha inoanay sady vita batisa. (2 Korintianina 6:​14) Fa liany fa ela Ndranahary ro nandidy ty mpanompony mba tsy hanambaly laha tsy olo finoa raiky aminy avao. (Genesisy 24:3; Malakia 2:​11) Ndre ty manam-pahaiza henanizao aza mahita fa mbo mahasoa ty manoriky fitsipiky zay.b

• Tokony hanoriky safàni-babany noho reniny ty anaky. (Ohabolana 1:8; Kolosianina 3:​20) Ho ahi-ty tanora mbo mipetraky an-tranoni-babany noho reniny ao, le tokony hanoriky ty safàn-drozy ie, tafilitsy amy zay ty fanapahan-kevitsin-drozy mikasiky ty hoe firy tao ie vo tokony hampiaraky, le ino ty azony atao noho ty tsy azony atao lafa mampiaraky ie.

• Laha hentea ty soratsy masy, le anjarani-Vavolombelo kiraidraiky ro mifily hoe hampiaraky va ie noho ia ty olo hiarahany. Mifanaraky amy torolala toy raha zay: “Samby handay ty entany ty kiraidraiky.” (Galatianina 6:5) Fe mbo mila torohevitsy baka amy Vavolombelo matotsy noho hainy hoe mila ze hahasoa azy ty Vavolombelo hendry lafa mampiaraky.​—Ohabolana 1:5.

• Maro ty raha ataon’olo lafa mampiaraky, nefa fahotà bevata ty ankamaroany. Mandidy antsika ohatsy ty Baiboly mba hanalavitsy ty fijangajangà. Tsy ze manao firaisa amin’olo tsy valiny avao ro atao hoe mijangajanga, fa ze manao raha tiva amin’olo hafa koa, ohatsy hoe manafosafo ty mahalahy na mahampela azy, na manao firaisa amy vava na amy lava-boly. (1 Korintianina 6:​9-​11) Misy koa tsy manao firaisa fa manao raha manaitaitsy ty filàni-nofotsy. Fa “maloto” amy Ndranahary zay ka tsy teany. (Galatianina 5:​19-​21) Tsy teany iaby ndre ty resaky mikasiky fijangajangà aza.​—Kolosianina 3:8.

• Mamitaky ty fo. (Jeremia 17:9) Afaky mitariky ty olo hanao raha hainy fa raty ty fo. Mba hahavy ty mpifankatea tsy ho voafitakini-fony, le tokony tsy handeha amy pilasy mitoka na pilasy mety hahavy an-drozy tsy hahatohitsy fakam-panahy rozy. Soa laha mba miaraky amin’olo raiky na maromaro rozy lafa mandeha amy pilasy mitoka. (Ohabolana 28:26) Haini-Kristiana tsy manambaly fa mahavoan-doza ty mila valy na mampiaraky amin’olo amy Internet ao, sirtò laha olo tsy hainy soa.​—Salamo 26:4.